Төгс эзэмших сургаалын давтлага 4

Төгс эзэмших сургаалын судрын хэсгүүдийг амьдралд хэрэгжүүлэх

Төгс эзэмших сургаалын зорилгуудын нэг бол төгс эзэмших сургаалын судрын хэсгүүдэд заасан сургаалыг амьдралдаа хэрэгжүүлэхэд туслах явдал юм. Энэ хичээл нь амьдралд тань тулгарч болох үйл явдалтай ижил төстэй жишээн дээр төгс эзэмших сургаалын судрын хэсгүүдийг амьдралд хэрэгжүүлэх дадлага хийх боломжийг танд олгох болно.

Суралцагчийн бэлтгэл: Суралцагчдыг өдийг хүртэл энэ жилийн туршид судалсан төгс эзэмших сургаалын судрын хэсгүүдэд заасан аль нэгэн үнэнийг амьдралдаа ямар арга замаар хэрэгжүүлснээ тунгаан бодоход урь.

Боломжит суралцах үйл ажиллагаа

Төгс эзэмших сургаалын хэсгүүдийн талаарх хичээлийг энэ давтах хичээлийн оронд зааж болох юм. Төгс эзэмших сургаалын судрын хэсгийг авч үзэх хичээл бүрийг семинарын үеэр заасан байхад анхаарахын тулд бүс нутгийг хариуцсан захирлын эсвэл зохицуулагчийн өгсөн цагийн хуваарийг үзнэ үү.

Судрууд миний амьдралд ямар хамаатай вэ?

Нико хэмээх нэгэн залуу судраас суралцахад ихээхэн цагийг зарцуулжээ. Тэр судрын олон түүх мэддэг бөгөөд олон шүлэг цээжилсэн байна. Ийм их хүчин чармайлт гаргасан ч гэсэн судрууд өөрийнх нь нөхцөл байдал, асуултад ямар хамаатай болохыг Нико олж харахгүй байлаа.

• Судрууд амьдралд нь хэрхэн хамаатай болохыг олж харахад Никод туслахын тулд та түүнд юу гэж хэлэх вэ?

• Хэзээ та судруудаас сурч мэдсэн үнэнийг амьдралдаа хэрэгжүүлсэн бэ?

Энэ хичээл нь төгс эзэмших сургаалын судрын хэсэгт заасан үнэнүүдийг бодит амьдралын нөхцөл байдалд хэрэгжүүлэхэд тань туслах болно.

Дараах хүснэгтийг үзүүлж, хичээлийн турш харах боломжийг суралцагчдад олго. Судрын аль хэсгийг онцлох мөн давтах нь илүү тустай болохыг тодорхойл.

Судрын эшлэл, түлхүүр үг хэллэг

Шинэ Гэрээг судлах хичээлийн жилийн эхний хагаст үзсэн төгс эзэмших сургаалын судрын хэсгүүдийн эшлэл, түлхүүр үг хэллэгүүдийг толилуулав. Энэ хүснэгтийг үзээд, хэрэв тэмдэглээгүй бол эдгээр судрын хэсгийг судар дээрээ тэмдэглэж болно.

Судрын эшлэл	Судрын түлхүүр үг хэллэг
Лук 2:10–12	“Өнөөдөр, Давидын хотод Аврагч Эзэн Христ та нарын төлөө мэндэллээ.”
Иохан 3:5	“Хэн ус болон Сүнснээс эс төрнө, тэр Бурханы хаанчлалд орж үл чадна.”
Иохан 3:16	“Бурхан ертөнцийг үнэхээр хайрласандаа цорын ганц Хүүгээ өгсөн.”
Матай 5:14–16	“Та нарын гэрэл тэдний өмнө тийнхүү гэрэлтэг.”
Матай 11:28–30	“Зүдэж зүтгэгсэд хийгээд хүнд ачаа үүрсэн бүгд ээ, Над дээр ир. Би та нарыг амраая.”
Maтай 16:15–19	“Би чамд тэнгэрийн хаанчлалын түлхүүрийг өгнө” хэмээн Есүс хэлэв.
Иохан 7:17	“Хэрэв хэн нэгэн нь Түүний хүслийг үйлдэхийг хүсвэл тэрээр энэ сургаалыг мэднэ.”
Maтай 22:36–39	“Чи Бурхан Эзэнээ хайрла. … Чи хөршөө … хайрла.”
Лук 22:19–20	“Намайг дурсаж” ариун ёслолоос хүрт хэмээн Есүс Христ айлдав.
Иохан 17:3	“Цорын ганц үнэн Бурхан Таныг болон Таны илгээсэн Есүс Христийг мэдэх нь мөнхийн амь мөн.”
Лук 24:36–39	“Учир нь сүнсэнд та нарын харж байгаа Над шиг яс, мах байдаггүй юм.”

• Энэ төгс эзэмших сургаалын судрын хэсгүүдэд заасан зарим үнэнийг та өөрийн амьдралд ямар арга замаар хэрэгжүүлсэн бэ эсвэл хэрэгжүүлж болох вэ?

Сургаалыг бодит амьдралын нөхцөл байдалд хэрэгжүүлэх

Төгс эзэмших сургаалын судрын хэсгүүдийг бодит амьдралын нөхцөл байдалд хэрэгжүүлэх дадлага хийхэд суралцагчдад тусал. Ийн үйлдэх нэг арга зам бол дараах жишээ бүрийг хуваалцаад, суралцагчдаар тухайн нөхцөл байдалд орсон хүнд тусалж болох төгс эзэмших сургаалын судрын хэсгүүдийг сонгуулах явдал юм.

Энэ үйл ажиллагааг сонирхолтой болгох үүднээс судрын эшлэлүүдийг бичсэн цааснуудыг (нэг цаасан дээр нэг эшлэл) ангид тараан байршуулж болно. Жишээг ангийнханд танилцуулаад, тухайн жишээнд хамгийн сайн тохирох судрын эшлэлтэй цаасны хажууд зогсоход суралцагчдыг урь. Дараа нь суралцагчдыг яагаад энэ эшлэлийг сонгосноо тайлбарлахад урь. Тухайн судрын хэсэг уг жишээнд илүү тус болно гэж бодож байгаа нэмэлт шалтгаанаа хуваалцахыг бусад суралцагчаас хүсэж болох юм.

Энэ үйл ажиллагаанд ашиглаж болох хоёр жишээг өгөв. Хүсвэл уг хүснэгтэд жагсаасан төгс эзэмших сургаалын судрын бусад хэсэгтэй холбоотой өөр жишээ зохио.

• Найз тань танаас “Есүс Христ яагаад тийм чухал юм бэ?” гэж асуужээ.

• Найз тань сайн мэдээний талаар суралцаж эхлэхдээ “Би яагаад баптисм хүртэх ёстой вэ? Би зүгээр л сайн хүн байж болохгүй гэж үү?” гэж асуув.

Дараах хоёр жишээг авч үзэхдээ, ангийнхныг хос хосоор нь эсвэл жижиг бүлгүүдэд хуваах талаар бодож үз. Хос эсвэл бүлэг тус бүрд нэг жишээ оноож өг. Жишээг дагалдах асуултуудыг ярилцахад суралцагчдыг урь.

• Та амьдралд цөхөрч, хаанаас тусламж авахаа мэдэхгүй байна.

• Бусдад үлгэр жишээ болох нь таны хувьд ямар чухал болохыг эцэг эх тань онцолдог.

• Та төгс эзэмших сургаалын аль судрын хэсгийг энэ жишээтэй холбоотой гэж бодож байна вэ?

• Төгс эзэмших сургаалын энэ судрын хэсгийн яг ямар үг эсвэл хэллэг энэ нөхцөл байдалд ихээхэн тус болох вэ?

Энэ хичээлд жагсаасан төгс эзэмших сургаалын судрын хэсгүүдэд хамаатай нэг эсвэл хэд хэдэн жишээг бодож олох цагийг суралцагчдад гаргаж өг. Жишээ бодож олсных нь дараа хэдэн суралцагчийг сайн дураараа ангийнхантай хуваалцахад урь. Суралцагчийг жишээгээ хуваалцсаны дараа бусад суралцагчийг тухайн жишээнд хамгийн сайн хамаатай гэж үзэж байгаа төгс эзэмших сургаалын судрын хэсгээ сонгоход урьж болох юм.

Суралцагчдыг төгс эзэмших сургаалын судрын хэсэгт заасан сургаалыг амьдралдаа хэрэгжүүлэх арга замыг үргэлжлүүлэн хайж олоход уриал.