Матай 13:3–8, 18–23

Тариачны сургаалт зүйрлэл

Есүс үр тарьж буй хүний тухай сургаалт зүйрлэлийг заасан. Үрнүүд янз бүрийн хөрсөнд унаснаар өөр өөр үр дагаврыг авчирдаг. Үүнтэй адил, Бурханы үгийг сонсож буй хүмүүс янз бүрээр хүлээн авдаг. Энэ хичээл танд Бурханы үгийг хүлээн авч, тордон, өсгөж үржүүлэхэд зүрх сэтгэлээ бэлдэхэд туслах болно.

Эд зүйл, зураг ашиглах. Эд зүйл болон зураг нь сударт гардаг хүмүүс, газар нутаг, үйл явдал, эд зүйл, бэлгэдэл зэргийг төсөөлөн харахад суралцагчдад тусалдаг. Тухайлбал, судрууд дээр гарч буй эд зүйлийн талаар зүгээр ярихын оронд тэдгээрийг зурахад суралцагчдыг урь.

Суралцагчийн бэлтгэл: Суралцагчдыг Ирээд, Намайг дага—Хувь хүн, гэр бүлүүдэд зориулав дээрх энэ долоо хоногийн тоймын “Яагаад заримдаа бидний зүрх сэтгэл үнэнийг хүлээн авахад бэлэн, харин заримдаа хүлээн авах хүсэлгүй байдаг вэ?” гэсэн асуултыг тунгаан бодоход урь. (“3-р сарын 20–26. Матай 13; Лук 8; 13: ‘Сонсох чихтэй нь сонсогтун’” Ирээд, Намайг дага—Хувь хүн, гэр бүлүүдэд зориулав: Шинэ Гэрээ 2023).

Боломжит суралцах үйл ажиллагаа

Бурханы үгийг сонсоход өөрийгөө бэлтгэх

Хичээлд бэлтгэхээр тунгаан бодоход урьсан асуултынхаа хариултыг хуваалцахад хэдэн суралцагчийг урьснаар хичээлийг эхлүүлж болох юм.

Та Бурханы үгийг хүлээн авахад хэр бэлэн байгаагаа цаг гарган дүгнэж цэгнэ. Дараах мэдэгдэл тус бүрээр өөрийгөө хэмж.

Байнга—Заримдаа—Ховорхон

Суралцагчдад Бурханы үгийг хүлээн авах чадвараа бодох хангалттай цаг олгох үүднээс мэдэгдлүүдийг үзүүл эсвэл аажуухан уншиж өг. Суралцагчид хариултаа чангаар хэлэлгүй, дотроо тунгаан бодох ёстой.

Би сурч мэдэж, өсөж хөгжих зорилгоор судраас суралцдаг.

Би амьдралдаа Сүнсний нөлөөг ажиглаж, өгөгдсөн зааварчилгааг дагахыг оролддог.

Би Их Эзэний бошиглогч, төлөөлөгчдөөрөө дамжуулан өгсөн зөвлөгөөг сонсож, дуулгавартай дагадаг.

Би Есүс Христийн тухай, Түүний сайн мэдээний талаарх хувийн гэрчлэлээ хүчирхэгжүүлэхийг эрмэлздэг.

Та одоо Бурханы үгэнд хандах хандлагаа шалгасан тул тариачны сургаалт зүйрлэлийг судлахад бэлэн боллоо. Энэ сургаалт зүйрлэлд Их Эзэн үрийг соёолж, үндэслэж, үр жимсээ өгөхөд саад болж болзошгүй зарим асуудлыг дурджээ. Их Эзэн бүх сургаалт зүйрлэлдээ ашигладагтай адил, сүнслэг сургамж өгөхийн тулд бүгдийн сайн мэдэх зүйлсийг ашигласан байдаг.

Тариачны сургаалт зүйрлэлийг судлахын тулд дараах дөрвөн алхамтай загварыг ашигла. Дээрх мэдэгдэлд хэрхэн хариулснаас үл хамааран энэхүү хичээл нь Их Эзэний танд өгөхийг хүссэн адислалыг хүлээн авахад зүрх сэтгэлээ бэлтгэхэд тань туслах зорилготой. Судлах явцдаа Бурханы үгээс утга учир бүхий туршлага олж авахыг эрэлхийл.

Хэрэв энэ загварыг өмнөх хичээл дээр танилцуулсан бол суралцагчдаас алхам тус бүрийг эргэн санаж, самбарт бичихийг хүс.

1. Чухал мэдээллийг олж харах

2. Сүнслэг харьцуулалт хийх

3. Үнэ цэнтэй сургамжийг олж нээх

4. Хувийн амьдралдаа хэрхэн хэрэгжүүлэхээ тодорхойлох

Чухал мэдээллийг олж харах

Суралцагчид дараах үйл ажиллагааг хос хосоороо гүйцэтгэж болно. Хос бүрийн нэг суралцагч шүлгийн эхний хэсгийг уншихад нөгөөх нь чухал мэдээллийг дурдаж болно. Тэд дараа нь бүгдээрээ судлах тэмдэглэлдээ зураг зурж болох юм. Дараа нь суралцагчид үүргээ солилцоод, дараах бүлэг шүлэгт уг үйл явцыг давтан гүйцэтгэж болно.

Чухал мэдээллийг төсөөлөн бодох нэг арга зам бол сургаалт зүйрлэлийн хэсэг тус бүрийг зурах явдал юм. Судрын тэмдэглэлдээ нэг хуудсыг дөрвөн хэсэгт хуваа. Шүлгүүдийг уншаад, энд дүрсэлсэн зүйлийн энгийн зургийг зур.

1. Maтай 13:3–4

2. Maтай 13:5–6

3. Матай 13:7

4. Матай 13:8

Хэрэв суралцагчид юу зурахаа мэдэхгүй бөгөөд тусламж хэрэгтэй бол дараах жишээнүүдийг өгч болох юм. Үүнд:

Сүнслэг харьцуулалт хийх

Дараах шүлэг дэх сургаалт зүйрлэлийн талаарх Есүсийн тайлбарыг уншина уу. Түүний хийсэн аливаа харьцуулалтыг зургийнхаа хажууд бич.

Суралцагчид ганцаараа, хосоороо эсвэл жижиг бүлгээр ажиллаж болно. Хэрэв тэд бүлгээр ажиллах бол шүлгүүдийг бүлгийн гишүүдийн дунд хуваарилаад, олж мэдсэн зүйлээ бүлгийнхэндээ тайлагнахыг хүс.

1. Maтай 13:19

2. Maтай 13:20–21

3. Maтай 13:22

4. Maтай 13:23

Үнэ цэнтэй сургамжийг олж нээх

Үнэ цэнтэй сургамжийг олж нээхийн тулд Ариун Сүнсэнд өөрт тань заах боломж олгох асуултуудыг тавих нь тустай байж болно. Дараах асуултуудаас гадна нэмж асууж болох өөр асуултуудын тухай бод.

• Аврагч энэ түүхээс намайг юу сураасай хэмээн хүссэн байж болох вэ?

• Аврагч яагаад намайг ямар зүрх сэтгэлтэй болохоо мэдээсэй хэмээн хүссэн бэ?

Мөн та сургаалт зүйрлэл бодит амьдралтай хэрхэн холбогдож болохыг төсөөлж болох юм. Тухайлбал, зүрх сэтгэл нь чулуурхаг эсвэл хогийн ургамал бүхий хөрстэй адил хүний үйлдэл зүрх сэтгэл нь үржил шимтэй хөрстэй адил хүний үйлдлээс хэр өөр байхыг төсөөлөн бодохыг хичээ. Та эдгээр үйлдлийн талаар бодох зуураа заримыг нь зураг тус бүрийн хажууд бичиж болно.

Суралцагчдаас бичсэн үйлдлүүдээсээ хэд хэдэн жишээ өгөхийг хүсэж болох юм. Хэрэв жишээ бодож олоход суралцагчдад хэцүү байвал “Нэмэлт суралцах үйл ажиллагаа” хэсгийг ашиглах нь тустай байж болно.

• Та зүрх сэтгэл нь хатуу, чулуурхаг эсвэл хогийн ургамлаар дүүрсэн хүнд ямар зөвлөгөө өгч болох вэ?

Хувийн амьдралдаа хэрхэн ашиглахаа тодорхойлох

Өөрийнхөө зүрх сэтгэлийн байдлын талаар мөн дөрвөн төрлийн хөрсний аль нь таныг дүрсэлж байгааг бод. Хэрэв сүнслэг байдлын хувьд таны зүрх сэтгэл хүссэнээр тань байж чадахгүй байвал өөрчлөх боломжтой гэдгийг санаарай.

Өнөөдөр олж мэдсэн зүйлс дээрээ үндэслэн, зүрх сэтгэлийнхээ байдлыг сайжруулахын тулд та юу хийж болохоо цаг гарган тунгаан бод.

• Та зүрх сэтгэлдээ Бурханы үгийг урихын тулд юу хийж чадах вэ?

• Та зүрх сэтгэлийнхээ байдлыг сайжруулахын тулд ямар ямар үйлдэл хийх вэ?

• Та ямар саад бэрхшээлийг даван туулахдаа Их Эзэнд хандан тусламж хүсэх вэ?

Өнөөдөр Их Эзэний тухай мөн үгийг нь зүрх сэтгэлдээ ургуулаасай гэх Түүний хүслийн талаар олж мэдсэн зүйлээ хуваалцах боломжийг суралцагчдад олго.

Тайлбар ба нөхцөл байдлын талаарх мэдээлэл

Тэргүүн Зөвлөлийн ерөнхийлөгч Даллин Х.Өүкс Ерөнхий чуулган дээр хэлсэн үгэндээ тариачны сургаалт зүйрлэлийн талаар ярьсан. Дараах асуултуудад түүний тайлбарыг ашиглан хариулсан болно.

“Замын хавиар унасан” үрнүүд ямар үрнүүд байсан бэ? ( Матай 13:4, 19 -ийг үзнэ үү)

“Замын хавиар унасан” ( Марк 4:4) үрнүүд нь ургах боломж олгодог мөнх бус амьдралд ургах хөрсөнд унаагүй гэсэн үг. Тэд зүрх сэтгэлээ хатууруулсан эсвэл бэлтгэгдээгүй нэгэнд сургаал танилцуулахтай адил юм.

(Даллин Х.Өүкс, “Тариачны сургаалт зүйрлэл,” Ensign, May 2015, 32 эсвэл 2015 оны 4-р сарын Ерөнхий чуулган, 16)

Юу хэн нэгний зүрх сэтгэлийг “чулуурхаг газар” байлгахад хүргэдэг вэ? ( Матай 13:5, 20–21 -ийг үзнэ үү)

Залуучууд аа … би нэгэн тодорхой жишээг хуваалцъя. Хэрэв та нар ариун ёслолыг адисалж, түгээх үедээ мессеж бичиж, шивнэлдэх юм уу видео тоглоом тоглох эсвэл зайлшгүй шаардлагатай сүнсний хоолыг үгүйсгэх өөр бусад зүйлийг хийж байвал та сүнслэг үндсээ сулруулж, өөрсдийгөө чулуурхаг газар луу нүүлгэж байна гэсэн үг юм.

(Даллин Х.Өүкс, “Тариачны сургаалт зүйрлэл,” Ensign эсвэл 2015 оны 4-р сарын Ерөнхий чуулган, 17)

Бид амьдралын “хогийн ургамлыг” хэрхэн таньж болох вэ? ( Матай 13:7, 22 -ыг үзнэ үү)

Бид (1) Бурханы гайхамшигт бэлэг болох сонгох эрхийг сулруулах зүйлсэд донтох үед; (2) мөнхийн ач холбогдолтой зүйлсээс холдуулдаг анхаарал сарниулагч чухал бус зүйлсэд хууртахад; (3) мөн мөнхийн хувь заяаныхаа шаардлагыг хангахад хэрэгтэй хувийн өсөлт хөгжлийг сулруулдаг сайн гэх бүх зүйлээс хүртэх эрхтэй гэсэн хандлагатай байвал “өнөөгийн амьдралын тааламжид” [ Лук 8:14 ] бууж өгдөг байна.

Бид Бурханд болон Түүний амлалтуудад найдаж, итгэлтэй урагшлахад саад болдог ирээдүйн талаарх айдастаа хүлэгдэх үедээ “өнөөгийн амьдралын зовнилд” [ Лук 8:14 ] автагддаг байна.

(Даллин Х.Өүкс, “Тариачны сургаалт зүйрлэл,” Ensign, May 2015, 34–35 эсвэл 2015 оны 4-р сарын Ерөнхий чуулган, 18)

“Сайн хөрснөөс” үр жимс ургуулахын тулд юу хэрэг болох вэ? ( Матай 13:8, 23 -ыг үзнэ үү)

Бидэнд сайн мэдээний үгийн үр бий. Бидний хөрсөө сайжруулж, ургацаа арвин байлгах зүйлс хийхээ нэн тэргүүнд тавих эсэх нь бид бүхнээс шалтгаалдаг. Бид Есүс Христийн сайн мэдээнд бат бөх суурилагдаж, хөрвөгдөхийг эрэлхийлэх ёстой ( Колоссай 2:6–7 -г үзнэ үү). Бид залбирч, судраас судлан, үйлчилж, Түүний Сүнсийг өөрсөдтэйгөө үргэлж хамт байлгахын тулд ариун ёслолоос тогтмол хүртсэнээр энэхүү хөрвөлтийг олж авдаг.

(Даллин Х.Өүкс, “Тариачны сургаалт зүйрлэл,” Ensign, May 2015, 35 эсвэл 2015 оны 4-р сарын Ерөнхий чуулган, 19)

Нэмэлт суралцах үйл ажиллагаа

Тариалахын өмнө хөрсөө шинжих

Суралцагчдыг жижиг бүлгүүдэд хуваагаад, бүлэг тус бүрд тариачны сургаалт зүйрлэлд тайлбарласан төрлийн хөрсөөр дүүргэсэн жижиг савыг өг. Суралцагчдыг хөрсийг шинжээд, үр суулгахад төгс зохицсон болгохын тулд юу хийх ёстойгоо ярилцахад урь. Суралцагчдаас сургаалт зүйрлэлийг судлахдаа ямар төрлийн хөрс ямар сүнслэг байдлыг төлөөлөхийг олж мэдэн, үүнээс юуг сурч мэдэх боломжтойг бүлгээрээ ярилцахыг хүсэж болох юм.

Тариачны сургаалт зүйрлэлийг үзэж, сонсох

“Тариачны сургаалт зүйрлэл” (4:36) видео бичлэгийг цагийн код 0:00-оос 0:55 хүртэл үзүүлээд, чухал мэдээллийг тайлбарлахад суралцагчдыг урьж болох юм. Дараа нь суралцагчид видео бичлэгийг цагийн код 3:00-аас 4:36 хүртэл үзээд, Есүсийн тайлбар дээр үндэслэн сүнслэг байдалтай холбож болно. Хэсэг тус бүрийн дараа түр зогсож, сурч мэдсэн зүйлээ ярилцах боломжийг суралцагчдад олгох нь тустай байж болно.

Сургаалт зүйрлэл бодит амьдралд

Хөрсний төрөл эсвэл зүрх сэтгэлийн байдлыг тодорхойлоход суралцагчдад туслахын тулд дараах жишээнүүдийг ашиглаж болно. Суралцагчид жишээ бүр дээр гарч буй хүнд Аврагчид илүү ойртож, зүрх сэтгэлдээ Бурханы үгийг ургуулах боломжийг олгох зөвлөгөөг санал болгож болох юм.

Найзууд нь Скоттод сэргээгдсэн сайн мэдээг танилцуулсан бөгөөд түүнээс хойш тэр удалгүй баптисм хүртжээ. Гэсэн ч Сүмд нэгдсэнээс хэдэн сарын дараа зарим хүн түүний шинэ итгэл үнэмшлийг дооглон тохуурхах болов. Скотт бусдын сөрөг хандлагыг давж гарч чадна гэдэгтээ итгэлгүй байлаа.

Жилл хичээл сургуульдаа сайн сурдаг, жүжгийн дугуйланд явдаг, ажилдаа дуртай нэгэн байв. Ажил, сургуулийн үүрэг хариуцлагаас шалтгаалан Жилл Сүмийн үйл ажиллагаанд оролцохгүй байхаар шийдсэн бөгөөд энэ жил семинарт бүртгүүлээгүй. Тэр зөвхөн боловсрол, ирээдүйн ажил мэргэжилдээ анхаарлаа төвлөрүүлэхийг хүсэж байв.

Мормоны Номыг ашиглан харьцуулалт хийх

Суралцагчдыг Бурханы үгийг үртэй харьцуулсан Алмагийн харьцуулалтыг уншихад урь ( Алма 32:26–43 -ыг хар). Мөн тэд Лихай амьдралын модыг зүүдэндээ харсан тухай түүхийг судлаад, тухайн үзэгдлийг тариачны сургаалт зүйрлэлд гарсан хөрсний төрлүүдтэй бүлэг тус бүрээр харьцуулалт хийж болох юм ( 1 Нифай 8:19–34 -ийг үзнэ үү). Суралцагчид Мормоны Номын эдгээр түүх тариачны сургаалт зүйрлэл дэх Аврагчийн сургаалыг ойлгоход хэрхэн тус нэмэр болсон талаар хуваалцаж болох юм.