Еврей 1–10

“Илүү эрхэм нэр”

Есүс Христийн бүх дагалдагч итгэлээрээ соригдоно. Олон еврей Христэд итгэгчид ийм зүйл тохиосон. Янз бүрийн дарамт хавчлагын улмаас олон хүн Сүмийг орхиж, харьцангуй аюулгүй орчин болох синагогт еврей шүтлэг бишрэлдээ эргэн очжээ. Паул эдгээр еврей Христэд итгэгчдэд Есүс бол Мосегоос агуу бөгөөд Түүний тохинуулал Мосегийн хуулийн хуучин гэрээнээс дээд түвшний шинэ гэрээг авчирсныг харуулахыг хүсэж байлаа. Энэ хичээл нь Аврагчийн зарим нэр, цолыг судалж, тодорхойлох замаар Түүнд бүхнийг захирах хүч байдаг гэдгийг сурч мэдсэнээр Түүнд итгэх итгэлээ бэхжүүлэхэд танд тусална.

Есүс Христэд анхаарлаа төвлөрүүлэх. “Биднийг Түүний нэр, үүрэг, шинж чанар, зан байдалд анхаарлаа төвлөрүүлэх үед Ариун Сүнс Түүний үнэн төрх байдлыг илүү сайн ойлгож, хайрлаж, Түүнтэй адил болохыг илүү ихээр хүсэх хүслийг төрүүлэн, Түүнийг гэрчлэх болно” (Чад Х.Вэбб, “Бид Христийн тухай ярьж, Христэд баясдаг” [Шашны институт, семинарын жил тутмын сургалтын нэвтрүүлэг дээр хэлсэн үг, 2018 оны 6-р сарын 12], ChurchofJesusChrist.org).

Суралцагчийн бэлтгэл: Суралцагчдыг хувиараа эсвэл гэр бүлээрээ судраас судлах үедээ Есүс Христийн нэр цолыг олж мэдэн, олсон нэрсээ ангид хуваалцахаар бэлдэж ирэхэд урь.

Боломжит суралцах үйл ажиллагаа

Есүс Христийн нэр, цол

Суралцагчдыг дараах үйл ажиллагааг цаасан дээр хийж гүйцэтгэхэд урих талаар бодож үз. Дараа нь цааснуудыг хурааж аваад, хариултыг нь уншин, аль суралцагч тухайн тайлбарыг бичсэн болохыг таахад суралцагчдыг урь.

Нэг минут гарган, судлах тэмдэглэлдээ таныг дүрслэх аль болох олон үг, хэллэгийг жагсаан бич.

• Та яагаад эдгээр үг, хэллэгийг ашигласан бэ?

Таныг дүрсэлдэг үг эсвэл хэллэг байдгийн нэгэн адил Есүс Христийг дүрсэлдэг олон нэр, цол бий. Эдгээр нэр, цолыг илүү бүрэн мэддэг болсноор бид Түүний хэн болохыг мөн биднийг хэр их хайрладаг талаар илүү сайн ойлгодог.

Зарим суралцагч судлах тэмдэглэлдээ Аврагчийн нэр, цолыг жагсаан бичсэн байж болох юм. Хэрэв бичээгүй бол жагсаалт гаргахад тэднийг урьж болно.

Судлах тэмдэглэлдээ өөрийн аль хэдийн мэдэх Аврагчийн зарим нэр, цолыг жагсаан бич.

• Есүс Христийн эдгээр нэр, цолыг мэддэг, ойлгодог байх нь таны Түүнийг харах өнцөгт хэрхэн нөлөөлдөг вэ?

Самбарт суралцагчдын хариултыг жагсаан бичих талаар бодож үз. Есүс Христэд итгэх итгэлээ гүнзгийрүүлэхэд нь суралцагчдад туслахын тулд “Аврагчийн талаар мэдэх нь өсвөр насныханд яагаад чухал гэж та бодож байна вэ?” эсвэл “Энэ нэр, цол Түүний зан байдал, өвөрмөц шинж чанарын талаар бидэнд юу зааж байна вэ?” гэх зэрэг дагалдах асуултуудыг тавих талаар бодож үз.

Аврагчийн тухай илүү ихийг сурч мэдсэнээр адислагдаж болох арга замуудын талаар ерөнхийлөгч Рассэлл М.Нэлсон ийн заасан.

Аврагчийн талаар илүү ихийг сурах тусам Түүний нигүүлсэл, хэмжээлшгүй хайранд мөн хүчирхэгжүүлж, эдгээж, гэтэлгэх хүчинд итгэж найдахад хялбар болно.

(Рассэлл М.Нэлсон, “Христ амилсан бөгөөд Түүнд итгэх итгэлээр уулсыг нүүлгэж чадна,” 2021 оны 4-р сарын Ерөнхий чуулган, 105)

• Ерөнхийлөгч Нэлсоны тайлбарласан Аврагчийн тусламжийг та ямар ямар арга замаар авах хэрэгтэй вэ?

Еврейчүүдийн хам сэдвийн хүрээнд ойлгоход нь суралцагчдад туслахын тулд дараах материалыг харуулах эсвэл товчхон нэгтгэн дүгнэх талаар бодож үз.

Бидэнд Аврагч хэрэгтэй байдгийн адилаар, хавчлага болон өөр бусад төрлийн дарамт шахалтын улмаас Сүмийн цуглаанд явж чадахгүй байсан еврей Христэд итгэгчдэд ч гэсэн Аврагч хэрэгтэй байсан. Тэд Есүс Христэд итгэх хэрэггүй өөрсдийн сайн мэдэх, аюулгүй еврей уламжлалт шүтлэг бишрэлдээ эргэн ирж байв ( Еврей 10:25, 38–39 -ийг үзнэ үү). Та Судруудын удирдамж дээрх “ Еврей, Захидал ”-ыг судлан, энэхүү захидлын талаар илүү ихийг мэдэж авч болно.

Есүс Христийн нэр цол, үүргийг олж мэдэх

Паул Аврагчийн олон нэр цол, үүргийг хуваалцсан нь гэгээнтнүүдэд тэдгээр нэр, цол нь Аврагчид хэрхэн хэрэгтэй болохыг ухааран ойлгоход тусалсан байж болох юм. Жишээлбэл: Еврей 1:2 -т “бүхний өвлөгч” гэдэгтэй холбоотой “Хүү” хэмээх Аврагчийн нэрийг онцолсон. Еврей 1:2, 10 нь тэнгэр, газрыг Бүтээгчийн хувьд гүйцэтгэсэн Есүсийн үүргийг тайлбарладаг.

Суралцагчдад хосоороо эсвэл жижиг бүлгээр унших зарим шүлгийг оноож болно. Тэднийг уншсаны дараа, олж илрүүлсэн нэр цолыг нь самбарт жагсаа.

Та одоо Аврагчийн нэр цолнуудын зарим жишээг харсан тул дараах шүлгүүдийг уншаад, Есүс Христийн нэмэлт нэр цол, үүргийг хайж ол. Олж мэдсэнээ тэмдэглэх талаар бодож үз.

Еврей 1:1–3, 10

Еврей 2:9–10, 17

Еврей 3:1

Еврей 5:8–10

Еврей 9:11–16

• Та Түүний нэр цол, үүргийн нэг эсвэл хэд хэдээс нь Аврагчийн талаар ямар үнэнийг тодорхойлсон бэ?

Суралцагчид Есүс Христ тэнгэр, газрыг бүтээсэн ( Еврей 1:2, 10 -ыг үзнэ үү) эсвэл Есүс Христ Бурханы Хүү бөгөөд Эцэгийнхээ мөн чанарын бодит илрэл ( Еврей 1:2–3 -ыг үзнэ үү) гэх зэрэг янз бүрийн үнэнүүдийг тодорхойлж болно.

Есүс Христийн таны амьдралд гүйцэтгэх ёстой үйлдлийг дүрсэлсэн нэр цол, үүргийг сонгоод, үүнийгээ цаасны гол хэсэгт бич. Судар, Gospel Library аппликэйшныг эсвэл ChurchofJesusChrist.org-ийг ашиглан өөрийн сонгосон Есүс Христийн нэр цолны талаарх илүү гүн гүнзгий ойлголтыг олж ав. Хичээлээ эхлүүлэх нэг арга бол Судруудын удирдамж дээрээс “Есүс Христ” гэж оруулан хайх явдал юм.Та дараа нь Аврагч дээр төвлөрсөн янз бүрийн судруудыг харж болно.

Нэр цолыг тойруулан Есүс Христийн талаар мөн яагаад уг нэр цол таны хувьд утга учиртай болох тухай бодол санаагаа бич. Таны бодол санаанд

• уншсан шүлэг эсвэл эшлэл дээрх үг хэллэг,

• Аврагч үүргээ гүйцэлдүүлэх нь таны амьдралд хэрхэн тусалж болох талаарх санаа,

• тухайн нэр цолыг ойлгох нь Есүс Христэд итгэх итгэлийг тань хэрхэн бэхжүүлэх талаарх өөрийн ойлголт,

• нэр цолтой холбоотой танд байгаа аливаа асуулт зэрэг орж болно.

Хэрэв цаг гарвал, суралцагчдад асуултынхаа хариултыг олох боломжийг олго. Мөн суралцагчдыг ойлгосон зүйлээ ангиараа, жижиг бүлгээр эсвэл хос хосоороо хуваалцахад урьж болно. Есүс Христийн тухай болон Түүний талаар илүү ихийг судлахын ач холбогдлыг гэрчил.

Одоо та Есүс Христийн нэр цолыг тодорхойлох дадлага хийсэн тул энэ ур чадвараа судраас судлахад хэр сайн ашиглаж байгаагаа цаг гарган эргэцүүлэн бод.

• Есүс Христийн нэр цолыг олж мэдэх нь Түүнийг илүү сайн таньж мэдэхэд танд хэрхэн тусалсан бэ?

• Та Есүс Христийн нэр цолыг судлах ажлыг хэрхэн судраас судлах үйл явцынхаа нэгэн хэсэг болгож болох вэ?

Та Шинэ Гэрээ болон бусад судрыг үргэлжлүүлэн хувиараа төдийгүй гэр бүлээрээ судлахдаа Есүс Христийн нэр цолыг олж мэд.

Тайлбар ба нөхцөл байдлын талаарх мэдээлэл

Би яагаад Есүс Христийн талаар судлах хэрэгтэй вэ?

Ерөнхийлөгч Рассэлл М.Нэлсон ийн заасан.

Хэрэв та нар Есүс Христийн тухай олж мэдэж болох бүхнийг судлах юм бол Түүнийг болон Бурханы хуулиудыг хайрлах хайр тань төсөөлж байгаагаас тань ч илүү өсөх болно гэдгийг би амлаж байна. Мөн би нүглийг эсэргүүцэх чадвар тань өснө гэдгийг амлаж байна. Зарлигуудыг сахих хүсэл тань ч агуу ихээр өснө. Та нар Есүс Христийн дагалдагчдыг гутаан доромжилдог үзвэр үйлчилгээ, үймээн самуунаас хол байх илүү чадвартай болсноо ойлгох болно.

Та Есүс Христийн цол хэргэм, нэр бүр хувь хүний тань хувьд ямар утга учиртайг ойлгохын тулд залбирч, хичээнгүйлэн эрэлхийлснээр Есүс Христийн талаарх бүх зүйлийг судал.

(Рассэлл М.Нэлсон, “Бошиглогчид ба удирдлага мөн тэнгэрлэг хууль” [Залуучуудад зориулсан дэлхий дахины онцгой цугларалт, 2017 оны 1-р сарын 8], ChurchofJesusChrist.org; онцлон бичилт нэмэгдсэн)

Еврей 1:2, 10. Бүтээгчийн хувьд гүйцэтгэдэг Есүсийн үүрэг миний амьдралд хэрхэн нөлөөлж болох вэ?

Шашны институт, семинарын зохицуулагч Чад Х.Вэбб ийн тайлбарласан.

Та бүхэн ерөнхийлөгч Боид К.Пакэрыг модон шувуу сийлбэрлэх дуртай чадварлаг сийлбэрчин байсан гэдгийг санаж байгаа байх. Нэг өдөр түүнийг ахлагч А.Тийдор Таттлын жолоодож явсан машинд сууж явахад нэг сийлбэр нь машины арын суудал дээр байжээ. Замын уулзвар дээр ахлагч Таттл огцом тоормослон, сийлбэр шалан дээр доош харан унаад, хэдэн хэсэг болон эвдэрсэн байна. Ахлагч Таттл ихэд санаа зовсон боловч ерөнхийлөгч Пакэр огт тоосонгүй. Тэр “Битгий санаа зов. Би хийсэн юм чинь Би засаж чадна” гэж хэллээ. Тэр чадсан! Тэрээр уг сийлбэрээ өмнөхөөс нь илүү бат бөх болгож, бага зэрэг сайжруулан засжээ. Ерөнхийлөгч Пакэр “Таныг хэн бүтээсэн бэ? Таны Бүтээгч хэн бэ? Таны амьдралд Түүний засаж чадахааргүй нугарсан, эвдэрсэн юм гэж байхгүй” гэж тайлбарлан хэлсэн юм.

Чад Х.Вэбб, “Бид Христийн тухай ярьж, Христэд баясдаг” (2018 оны 6-р сарын 12-ны Шашны институт, семинарын жил тутмын сургалтын шууд нэвтрүүлэг, ChurchofJesusChrist.org)

Есүс Христийг таньж мэдэх нь надад хэрхэн итгэл найдвар төрүүлдэг вэ?

Ахлагч Роналд А.Расбандын хуваалцсан дараах түүх Есүс Христийн нэр цол, үүргийг мэдэх нь хэрхэн итгэл найдвар төрүүлдэг болохыг ойлгоход бидэнд тусална.

Еврей 2:10. Есүс ямар арга замаар “бидний авралын Тэргүүн” байдаг вэ?

 

Нэмэлт суралцах үйл ажиллагаа

Мормоны Номоос Есүс Христийн нэр цолыг олох

Есүс Христийн нэр цолыг олж мэдэхэд суралцагчдад туслах өөр нэг арга бол Мормоны Номыг ашиглах явдал юм. Дараах үйл ажиллагааг хийж гүйцэтгэх талаар бодож үз.

Суралцагчдаас “Мормоны Номын бүтэн нэр юу вэ? гэж асуу.

Есүс бол Христ гэдэгт бүх хүнийг итгүүлэхийн тулд Мормоны Ном бичигдсэнийг суралцагчдад сануул.

Мормоны Номын үндсэн зорилгыг ойлгоход суралцагчдад туслахын тулд ерөнхийлөгч Эзра Тафт Бэнсоны (1899–1994) хэлсэн дараах мэдэгдлийг чанга уншихыг нэг суралцагчаас хүс.

Үнэнийг чин сэтгэлээрээ эрэлхийлэгч нь Мормоны Номын сүнслэгээр өдөөгдсөн үгсийг залбиран байж тунгаан бодсоноор Есүс бол Христ юм гэх гэрчлэлтэй болж чадна.

Мормоны Номын шүлгүүдийн тэн хагасаас илүү нь бидний Их Эзэнийг дурдсан байдаг. Христийн зарим нэг нэрийг Мормоны Номын шүлгүүдэд Шинэ Гэрээнээс ч илүү олон удаа дурдсан байдаг билээ.

Мормоны Номд Түүнд зуу гаруй нэр өгсөн байдаг. Тэдгээр нэр нь Түүний тэнгэрлэг мөн чанарыг дүрслэхэд нэн чухал үүрэг гүйцэтгэдэг.

(Ezra Taft Benson, “Come unto Christ,” Ensign, Nov. 1987, 83)

Мормоны Номын аль нэг бүлэг рүү ороод, Есүс Христтэй холбоотой нэр, цолуудыг олж чадах эсэхээ харахад суралцагчдыг урь. Олж мэдсэн нэр эсвэл цолоо хэлээд, энэ нь Есүс Христийн талаар бидэнд юу зааж болохыг тайлбарлахыг суралцагчдаас хүс.

Есүс Христийн нэмэлт нэр цол

Суралцагчдыг аль хэдийн мэддэг нэр цолоо жагсаасных нь дараа, хараахан тодорхойлоогүй байгаа дараах вэбсайтыг ашиглан Аврагчийн өөр нэр цолуудыг хайж олоход урь. ChurchofJesusChrist.org/comeuntochrist/believe/jesus/50-names-for-jesus

Энэ нь суралцагчдад өөрсдийнх нь хувьд хамгийн утга учиртай нэр цолоо сонгож судлахдаа сонгох өөр нэр цолуудыг өгнө.