Eperu 11, Vaega 1

Faatuatua ia Iesu Keriso

E toatele tagata e talanoa e uiga i le i ai o le faatuatua—ia i latou lava, i isi, ma e oo lava i mea e tutupu po o mea faitino. O lea la, o le a le mea e avea ai le i ai o le faatuatua ia Iesu Keriso ma se faasili malosi ma le taua? I le Eperu 11 tatou te faitau ai i aoaoga a le Aposetolo o Paulo e uiga i le atinaeina o le faatuatua ia Iesu Keriso. O lenei lesona o le a fesoasoani e te malamalama ai po o le a le faatuatua ia Iesu Keriso ma pe aisea e taua ai ia te oe lava ia.

Taulai ai i mataupu faavae o le liua. A o fuafuaina le faagasoloina o le lesona, ia mautinoa ua lava le taimi e faaalu e fesoasoani ai i tagata aoga e feutagai i vaega o le lesona lea e taulai atu i mataupu faavae o le liua ai.

Sauniuniga a le tagata aoga: Valaaulia tagata aoga e faauma le faamatalaga “O le faatuatua o le _____” ma ia saunia e faasoa mai a latou tali i le vasega.

Gaoioiga e ono Mafai Ona Aoao Ai

O le faamautinoa o le faatuatua ia Iesu Keriso

O le vaega muamua lenei o se lesona e lua ona vaega o loo faamamafa mai ai aoaoga a Paulo e uiga i le faatuatua i le Eperu 11. Afai e tapulaa le taimi o le vasega ma e na o le tasi le lesona i le Eperu 11 e mafai ona aoao atu, mafaufau pe mafai faapefea ona tuufaatasi lelei ia lesona e lua.

E mafai ona faaaoga e tagata aoga a latou sauniuniga mo le gaoioiga lenei. Atonu e aoga le tusi i luga o le laupapa o se faauigaga a le vasega o le faatuatua ma fai i tagata aoga e fetuunai le faaupuga ao faagasolo le lesona.

• O le a sau tala e fai atu pe a fesili atu se tasi ia te oe po o le a le faatuatua?

Tusi lau faauigaga i lau api faamaumau mo suesuega po o se faamatalaga faatekonolosi. Mafaufau e fai ni suiga po o ni faaopoopoga i lenei faauigaga ma tusifaamaumau isi manatu ma uunaiga a o e suesue i le aso.

Faitau le Eperu 11:1 ma maka pe na faapefea ona faauigaina e le Aposetolo o Paulo le faatuatua. Atonu e fesoasoani le iloa o le Faaliliuga a Iosefa Samita o lenei fuaiupu, na suia ai e le Perofeta le upu faalagolago i le faamautinoa, o se upu o lona uiga o le mautinoa po o le faatuatuaina (tagai Eperu 11:1 , vaefaamatalaga e).

Mafaufau e valaaulia le vasega e toe faaupu le Eperu 11:1 i a latou lava upu ia mautinoa ai ua latou malamalama i upu o le fuaiupu.

• O le a sou manatu i le uiga o le i ai o le faamautinoa po o le faalagolago i mea e te faamoemoe i ai?

• E mafai faapefea ona i ai se faamaoniga o mea e le mafai ona e vaaia?

• E faavae i lenei fuaiupu, e mafai faapefea ona e suia pe faaopoopo i lau faauigaga o le faatuatua?

Mafaufau e tusi le faamatalaga lenei i luga o le laupapa po o le valaaulia o tagata aoga e fetuunai le faauigaga a le vasega ina ia aofia ai ni manatu talitutusa.

O se tasi o upumoni faigofie o loo aoao mai i le Eperu 11:1 e faapea o le faatuatua o le faamautinoa lea o mea ua faamoemoe i ai, o le faamaoniga o mea e le o vaaia.

Mo ni eseesega i le faitauina o fuaiupu e sosoo ai, mafaufau e vaeluaina le vasega po o le valaaulia o tagata aoga e galulue i paga. Fai atu i le afa o tagata aoga e faitau le Alema 32:21 ma le isi afa e faitau le Mataupu Faavae o le Faatuatua 1:4. Ona tuuina atu lea i tagata aoga e faatusatusa mea na latou aoaoina.

Faitau le Alema 32:21 ma le Mataupu Faavae o le Faatuatua 1:4 , ma vaavaai mo malamalamaaga faaopoopo e uiga i le faatuatua. Atonu e te manao e fefaasinoa’i pe faafesootai fuaiupu nei e lua i le Eperu 11:1 .

• O le a se isi mea na e aoaoina e uiga i le faatuatua?

• E ono mafai faapefea ona e suia pe faaopoopo i lau faauigaga o le faatuatua ona o mea sa e aoaoina?

O se tasi o auala e fetuunai ai le faamatalaga talu ai o le upumoni o le faatuatua ia Iesu Keriso o le faamautinoa lea o mea ua faamoemoe i ai, o le faamaoniga o mea e le o vaaia ae moni.

Afai na tusia le faamatalaga talu ai po o le faauigaga a le vasega i luga o le laupapa, fetuunai le faaupuga ina ia mafai ai ona fesootai manino mai le “faatuatua ia Iesu Keriso”.

Ina ia fesoasoani i tagata aoga ia tuuloloto lo latou malamalama i le faatuatua ia Iesu Keriso, mafaufau e fai atu nisi o fesili nei. Fesoasoani ia latou iloa le matafaioi a le Faaola i le ata o le faaolataga ma Lana matafaioi patino i o latou olaga.

Atonu e fesoasoani le faasoa atu o le amataga o le saunoaga a Peresitene Russell M. Nelson i le vaega o “Tala Auiliili ma Faamatalaga o Talaaga” o lenei lesona.

• O le a sou manatu e faapefea ona ese le i ai o le faatuatua ia Iesu Keriso nai lo le i ai o le faatuatua i se tasi tagata po o se isi mea?

• E mafai faapefea e lou faatuatua ia Iesu Keriso ona fesoasoani ia te oe e faatuatuaina o Ia pe a e feagai ma fesili po o le le mautonu?

Tuuloloto atili lou malamalama i le faatuatua ia Iesu Keriso.

Toe manatunatu i ou lagona e uiga i lou lava faatuatua ia Iesu Keriso. O a ni auala e te lagona ai o loo malosi lou faatuatua ia te Ia? O a ni auala e te lagona e mafai ona malosi atili ai lou faatuatua ia te Ia?

O Elder Neil L. Andersen o le Korama a Aposetolo e Toasefululua sa aoao mai:

O le faatuatua e le faafuasei ona oo mai i o tatou luga pe e tumau foi ia i tatou e ala i se tofi tuufaasolo. … O le faatuatua ia Iesu Keriso o se meaalofa mai le lagi lea e oo mai, pe a tatou filifili e talitonu ma pe a tatou saili ma uumau i ai. O lou faatuatua a le o tuputupu malosi o loo faasolo ina vaivai. O le faatuatua o se mataupu faavae o le mana, e taua e le gata i lenei olaga, ae faapea foi i lo tatou alualu i luma i talaatu o le veli. E ala i le alofa tunoa o Keriso, o le a i ai se aso e faasaoina ai i tatou e ala i le faatuatua i Lona suafa [tagai i le Efeso 2:8]. O le lumanai o lou faatuatua e le tupu faafuasei ae e ala i filifiliga.

(Neil L. Andersen, “O Le Faatuatua E Le Tupu Faafuasei, ae e ala i Filifiliga,” Ensign po o le Liahona, Nov. 2015, 65)

• O le a se mea sa tulaga ese ia te oe mai upu a Elder Andersen?

• O le a se mea ua ia fesoasoani ia te oe e malamalama ai e uiga i le faatuatua ia Iesu Keriso?

Faaaoga tatau taimi e aoao atili ai e uiga i le faatuatua ia Iesu Keriso e ala i le suesueina o nisi o punaoa nei. Faamaumau ou manatu i lau api faamaumau mo suesuega. Ia magafagafa, ma valaaulia le Agaga Paia e fesoasoani ia te oe e aoao mea e te manaomia i le aso.

Faaali atu fesili nei ma punaoa fautuaina mo tagata aoga e tagai i ai a o latou suesue. Atonu e fesoasoani le tuuina atu o ni nai kopi ua lolomiina o se tasi pe sili atu foi o lauga mo tagata aoga e leai ni masini tekonolosi e maua ai nei anomea.

Mafaufau ma le magafagafa i gafatiaga e aoao ai po o manaoga o tagata aoga taitoatasi i le vasega. O nisi atonu e manuia mai le suesue faatasi ma se paga. Fetuunai le galuega atofa po o fesili e faatatau i ai pe a manaomia.

Atonu e te manao e mafaufau e uiga i fesili nei po o ni au lava fesili a o e suesue:

• O le a le uiga ia te au o le faatuatua ia Iesu Keriso?

• Aisea e taua ai lo‘u atinae o le faatuatua ia te Ia?

• O le a se mea e mafai ona ou faia e faateleina ai loʻu faatuatua ia Iesu Keriso?

Mafaufau e fealuai solo i le potuaoga atoa a o suesue tagata aoga e iloa ai tagata atonu o i ai ni fesili pe manaomia se fesoasoani. Fautuaina i latou e taumafai pea, pe fai ni fesili faamalamalama e fesoasoani ai i tagata aoga e faaleleia o latou mafaufauga.

O tusitusiga paia fautuaina ma fesoasoaniga mo suesuega

Alema 32:26–34

Eteru 12:6–9

Bible Dictionary po o le Taiala i Tusitusiga Paia, “ Faatuatua ”

E mafai ona e maua isi punaoa i tusitusiga paia po o le polokalama o le Potutusi o le Talalelei e ala i le sailia o le faaupuga “Faatuatua ia Iesu Keriso.”

Manatu fautuaina mai taitai o le Ekalesia

Russell M. Nelson, “Ua Toetu Keriso; O Le Faatuatua ia te Ia O Le A Aveesea ai Mauga,” Liahona, Me 2021, 101–4

Neil L. Andersen, “O Le Faatuatua e le Tupu Faafuasei, ae e ala i Filifiliga,” Ensign po o le Liahona, Nov. 2015, 65–68

Richard C. Edgley, “Faatuatua—o le Filifiliga e A Oe Lea,” Ensign po o le Liahona, Nov. 2010, 31–33

Mafaufau e vaevae le vasega i ni paga po o ni vaega toalaiti ina ia mafai e tagata aoga ona faasoa mai mea sa latou aoaoina. Afai e lava le taimi, e mafai e tagata aoga ua loto i ai ona faasoa mai o latou malamalamaga ma le vasega. Fautuaina le vasega e vaavaai mo se avanoa e faasoa ai mea na latou aoaoina i o latou aiga po o i le lotu. Mafaufau e fesili i le vasega pe na faapefea ona suia a latou faauigaga o le faatuatua ia Iesu Keriso i le taualumaga o le lesona.

Tala Auiliili ma Faamatalaga o Talaaga

Aisea e taua ai le tuu atu o lo’u faatuatua ia Iesu Keriso?

Na fautua mai Peresitene Russell M. Nelson:

Pe a tatou talanoa e uiga i le faatuatua—le faatuatua lea e mafai ona aveesea ai mauga—tatou te le o talanoa i le faatuatua i se tulaga lautele ae o le faatuatua i le Alii o Iesu Keriso. …

Tatou te ono fesili ia i tatou lava taitoatasi, po o fea lo tatou faatuatua? O i ai i se au [taalo]? O i ai i se ituaiga o oloa? O i ai i se tagata lauiloa? E oo lava i au [taalo] e silisili ona lelei e mafai ona toilalo. E mafai ona mou ese atu tagata lauiloa. Ua na o le Tasi lava le tagata e saogalemu ai i taimi uma lou faatuatua, o le Alii o Iesu Keriso.

(Russell M. Nelson, “Ia Faaalia Lo Outou Faatuatua,” Ensign po o le Liahona, Me 2014, 29)

Aisea ou te taumafai ai e faateleina lo’u faatuatua ia Iesu Keriso?

Na aoao mai Peresitene Russell M. Nelson:

O la‘u valaau ia te outou … o le ia amata i le asō ona faateleina lou faatuatua. E ala i lou faatuatua, o le a faateleina ai e Iesu Keriso lou gafatia e aveese ai mauga i lou olaga, [tagai i le 1 Nifae 7:12 ], e ui i ni ou lu’itau patino e ono matua fotuai mai e pei o le Mauga o Everese.

O au mauga atonu o le tuuatoatasi, masalosalo, ma’i, po o isi faafitauli patino. O le a eseese lava au mauga ae o le tali i ou lu’itau taitasi o le faateleina lea o lou faatuatua. E manaomia ai galuega. …

O le faatuatua ia Iesu Keriso o le mana silisili lea ua avanoa ia i tatou i lenei olaga. E mafaia mea uma ia i latou o ē talitonu [tagai i le Mareko 9:23].

(Russell M. Nelson, “Ua Toetu Keriso; O Le Faatuatua ia te Ia O Le A Aveesea ai Mauga,” Liahona, Me 2021, 102–3, 104)

O le a se mea e manaomia ona ou faia e aoao ai e ala i le faatuatua?

Na aoao mai Elder David A. Bednar o le Korama a Aposetolo e Toasefululua:

O aafiaga [o le olaga] ua mafai ai ona ou malamalama o se tali e aumai i se isi tagata e masani lava e le umi se taimi e manatua ai, pe afai lena e manatua. Peitai o se tali tatou te iloaina pe mauaina e ala i le faatinoina o le faatuatua, e masani lava ona tumau i le olaga atoa. O aoaoga aupito taua o le olaga e puemauina—e le aotauina.

O le malamalama faaleagaga ua faamanuiaina ai oe ma au e maua, ma ua faamautuina ai e moni i o tatou loto, e le mafai ona tuuina atu i se isi tagata i se faaupuga faigofie. O le pili o le filiga ma le aoao e ala i le faatuatua, e tatau ona totogi ina ia maua ai ma “onaina” totino ai lena malamalama. E na o le pau lea o le auala e mafai ai e se mea ua iloa i le mafaufau ona liua e avea o se mea ua lagonaina i le loto. E na o le pau lea o le ala e mafai ai e se tagata ona siitia i talaatu o le faalagolago i le malamalama faaleagaga ma aafiaga o isi tagata ae latou tapā ai na faamanuiaga mo i latou lava. E na o le pau lea o le auala e mafai ai ona tatou saunia faaleagaga mo le mea o le a oo mai. Ia tatou “saili i le aoaoga, e faapea foi i le suesue ma le faatuatua” ( MF&F 88:118).

(David A. Bednar, “Saili e Aoao e Ala i le Faatuatua,” Ensign, Sete. 2007, 67)

E mafai faapefea e le faatuatua ia Iesu Keriso ona aafia ai lo‘u olaga i aso taitasi?

Maimoa le vitio “Campfires of Faith” (3:25), lea na faasoa mai ai e Elder Gerrit W. Gong o le Korama a Aposetolo e Toasefululua ma isi mea ua latou aoaoina e uiga i le faatuatua ia Iesu Keriso. O loo maua lenei vitio i le ChurchofJesusChrist.org.

Galuega Faatino Faaopoopo e Aoao Mai Ai

O fautuaga e lima e faateleina ai le faatuatua mai a Peresitene Russell M. Nelson

Mafaufau e faasoa atu fautuaga e lima a Peresitene Russell M. Nelson mo le faateleina o le faatuatua ia Iesu Keriso, lea o loo maua i lana saunoaga “Ua Toetu Keriso; O Le Faatuatua ia te Ia o le Aveesega ai Mauga” (Liahona, Me 2021, 103–4). Fautuaina tagata aoga e filifili se tasi o fautuaga ma fai se fuafuaga e galue ai mo se vaiaso. Valaaulia i latou e lipoti mai i le vasega le alualu i luma na latou faia po o luitau na latou oo i ai.