Eperu 7–13

Vaaiga Aoao

I le afa lona lua o lana tusi ia Eperu, sa faamamafa atu ai e Paulo le taua o le faatuatua ia Iesu Keriso. Sa ia ta’ua le anoai o faataitaiga faatusi paia o tagata taitoatasi o e sa galulue ma le faatuatua ia Keriso ma sa faamanuiaina. Sa ia aoao atu foi e faatatau i uiga o le Atua, ma sa ta’ua le Atua o “ia foi na te tauia mai o e matuā saili ia te ia” (Eperu 11:6) ma “o le Tama o agaga” (Eperu 12:9). Sa Ia fautuaina i tatou ia “aua le faatauvaa i lou manatu le aoaiga a le Alii, … aua o le ua alofagia e le Alii, ua aoai atu o ia ia te ia” (Eperu 12:5–6).

Sauni e Aoao Atu

O faamatalaga nei e tuuina atu ai i faiaoga ni manatu i mea e ono manaomia ona vave saunia mo lesona taitasi:

Eperu 11, Vaega 1

Faamoemoega o le lesona: O lenei lesona o le a fesoasoani i tagata aoga ia malamalama ai po o le a le uiga o le faatuatua ia Iesu Keriso ma pe aisea e taua ai i o latou lava olaga patino.

Sauniuniga a le tagata aoga: Valaaulia tagata aoga e faauma le faamatalaga “O le faatuatua _____” ma ia saunia e faasoa mai a latou tali i le vasega.

Anotusi e faaali atu: Sauni e faaali atu punaoa ma fesili mo le gaoioiga suesue a le tagata aoga i le faaiuga o le lesona.

Fautuaga faafaiaoga mo fesootaiga e faaaoga ai vitio: Faaaoga le vaega o le laupapa paepae i lau polokalama mo fesootaiga e faaaoga ai vitio e faataga ai tagata aoga ona tusi a latou faauigaga o le faatuatua mo le vasega e vaai i ai pe tusi ai se faauigaga se tasi faatasi ma le vasega. E mafai ona uunaia tagata aoga i le lesona atoa e fetuunai a latou faauigaga po o le faauigaga latou te tusia faatasi.

Eperu 11, Vaega 2

Faamoemoega o le lesona: O lenei lesona e mafai ona fesoasoani i tagata aoga e faateleina ai lo latou mananao e ola e ala i le faatuatua ia Iesu Keriso ma iloa ai faamanuiaga e tuuina mai e le Atua ia i latou ona o lo latou faatuatua.

Sauniuniga a le tagata aoga: Valaaulia tagata aoga e mafaufau pe na faapefea ona faamanuiaina i latou po o se tasi latou te iloa e le Atua ona sa latou galulue i le faatuatua. Uunaia i latou e sauni e faasoa mai se aafiaga i le vasega.

Ata: Sauni e faaali atu ata o tagata i tusitusiga paia pe mai le talafaasolopito o le Ekalesia o e na faaalia le faatuatua ia Iesu Keriso.
Vitio: “Faatuatua Mama ma Faigofie” (5:21)

Fautuaga faafaiaoga mo fesootaiga e faaaoga ai vitio: Mafaufau e tofi ni tagata aoga e suesue i fuaiupu eseese mai le Eperu 11 e uiga i faataitaiga o le faatuatua. Ona mafai lea ona tuu tagata aoga i potu e vaevae ai i latou ma isi tagata aoga o e sa suesue i fuaiupu eseese, ma e mafai ona latou faasoa uma mai mea sa latou aoaoina mai fuaiupu sa latou suesueina.

Eperu 12

Faamoemoega o le lesona: O lenei lesona e mafai ona fesoasoani i tagata aoga e aoao ai pe mafai faapefea e le gauai atu ma le lotomaualalo i aoaiga mai le Tama Faalelagi ona fesoasoani ia i latou ia maua ai le filemu ma avea atili ai e faapei o Ia.

Sauniuniga a le tagata aoga: Valaaulia tagata aoga e mafaufau i taimi na latou faafetai ai ona sa aoaiina i latou, e le Atua pe o se isi tagata.

Ata: Sauni e faaali atu ni ata o se tagata tamoe o loo foliga vaivai ma se malae tutuu.
Vitio: “O Le Finagalo o Le Atua” (3:01)

Fautuaga faafaiaoga mo fesootaiga e faaaoga ai vitio: I le amataina ai o le vasega, mafaufau e fatu se faigapalota i luga o upega tafailagi ma valaaulia tagata aoga e faasoa faalilolilo mai ni auala ua faapei ai o latou olaga i le taimi nei o se tuuga tamoe mamao.

Eperu 12:9

Faamoemoega o le lesona: O lenei lesona ua faamoemoe e fesoasoani i tagata aoga ia iloa atili ai le Tama Faalelagi ma malamalama ai i le ala e mafai ai e lo latou malamalama ma le sootaga ma Ia ona aafia lelei ai o latou olaga.

Sauniuniga a le tagata aoga: Valaaulia tagata aoga e faitau upu o le pese “O Au o se Atalii o le Atua” (Viiga, nu. 301) ma mafaufau pe faapefea e lenei malamalama i lo latou faasinomaga ona aafia ai o latou olaga.

Vitio: “A Regal Identity” (7:13; matamata mai le faailotaimi 1:22 seia oo i le 3:25)

Fautuaga faafaiaoga mo fesootaiga e faaaoga ai vitio: Mafaufau e faasoa atu soo se uunaiga ma malamalamaaga patino o ia te oe e uiga i le talafaatusa na faasoa mai e Sister Clayton lea o loo aofia i le amataga o lenei lesona. Molimau atu i le auala e mafai ai e le iloaina o le Atua ma lo tatou sootaga paia ia te Ia ona aafia ai o tatou uiga faaalia ma amioga.

Atamai i Aoaoga Faavae: Eperu 12:9

Faamoemoega o le lesona: O lenei lesona o le a fesoasoani i tagata aoga e taulotoina lenei mau faasino o le atamai i aoaoga faavae ma le fasifuaitau autu o tusitusiga paia mo le Eperu 12:9 , faamatala le aoaoga faavae, ma faaaoga mataupu faavae o le mauaina o le malamalama faaleagaga i tulaga masani o le olaga.

Sauniuniga a le tagata aoga: Valaaulia tagata aoga e mafaufau i tulaga e feagai ma le autalavou pe a aoga ia i latou ia malamalama pe manatua o i latou o fanau a le Tama Faalelagi.

Fautuaga faafaiaoga mo fesootaiga e faaaoga ai vitio: Mafaufau e tuu tagata aoga i ni potu e vaevae ai i latou lea e mafai ona latou galulue ai i ni paga pe i ni vaega toalaiti e palepalealuga faatasi i ni nai auala e mafai ona latou faatumuina ai avanoa mo le gaoioiga o le faaaogaina o le ata faataitai. Tuu le avanoa i tagata aoga e faasoa i le vasega ia ata faataitai na latou mauaina.