Eperu 11, Vaega 2

Ola Ai i le Faatuatua ia Iesu Keriso

Pe na i ai se taimi na e mafaufau ai pe faapefea ona tumau le faamaoni o nisi o tagata e tusa lava pe o feagai ma tofotofoga aupito sili ona faigata o le olaga? O le a se mea ua latou malamalama i ai e uiga i le Tama Faalelagi ma Iesu Keriso e fesoasoani ia i latou ina ia onosai tumau? Ina ua uma ona aoao atu le Au Paia Eperu e uiga i le faatuatua, sa fautuaina i latou e Paulo e faaaoga lo latou faatuatua ia Iesu Keriso e pei ona sa faia e isi tagata faamaoni. O lenei lesona e mafai ona fesoasoani ia te oe e faateleina ai lou manao e ola e ala i le faatuatua ia Iesu Keriso ma iloa faamanuiaga e tuuina mai e le Atua ia te oe ona o lou faatuatua.

Uunaia o tagata aoga ia taumafai ma le malamalama ia avea atili e faapei o Iesu Keriso. Fesoasoani i tagata aoga ia malamalama o le avea ai e faapei o le Faaola o se faagasologa e manaomia ai le faatuatua. O le faatuatua ia Iesu Keriso o le a avea ma se uiga o la latou amio a o latou aoao e uiga ia te Ia ma ola ai i le faatuatua ia te Ia.

Sauniuniga a le tagata aoga: Valaaulia tagata aoga e mafaufau pe na faapefea ona faamanuiaina i latou po o se tasi latou te iloa e le Atua ona sa latou faatinoina lo latou faatuatua ia Iesu Keriso. Uunaia i latou e sauni e faasoa mai se aafiaga ma le vasega.

Gaoioiga e ono Mafai Ona Aoao Ai

Faatino i le faatuatua

Ina ia amata le lesona, mafaufau e faaali atu ni nai ata mai tusitusiga paia po o le talafaasolopito o le Ekalesia o ni faaaoao o se tasi o faatinoina lona faatuatua ia Iesu Keriso. Valaaulia ni nai tagata aoga e toe faamatala faapuupuu le tala a se tagata ma faamatala mai pe na faapefea ona faamanuiaina le tagata i le faatinoina o le faatuatua. E mafai e tagata aoga ona faaaoga le galuega atofaina mo sauniuniga a le vasega mo lenei gaoioiga.

Mafaufau i tagata i tusitusiga paia po o le talafaasolopito o le Ekalesia po o tagata e te iloaina na faamanuiaina e le Atua ona sa latou faatinoina le faatuatua ia Iesu Keriso. O ata nei e mafai ona fesoasoani ia te oe e manatua ai nisi o nei tala.

• O le a se mea o tulaga ese ia te oe i le tala a lenei tagata?

• E faapefea ona aafia ai i tatou pe a tatou faalogo pe faasoa atu tala o le faatuatua? Aisea?

I le lesona talu ai, sa e aoao ai i le uiga o le iai o lou faatuatua ia Iesu Keriso mo oe lava ia. Mafaufau pe mafai faapefea e le faatinoina o le faatupulaia o le faatuatua ia te Ia ona faamalosia ai oe i tulaga e te ono lagona ai le vaivai ma le faavaivaiina. E ono mafai ona fesoasoani le faamauina o nei lagona i lau api faamaumau mo suesuega. A o e suesue i le aso, mafaufau loloto pe mafai faapefea ona e faateleina lou naunautaiga ma le gafatia e faatino ai lou faatuatua.

O i latou o e ola “i le faatuatua”

E pei ona tusia i le Eperu 11 , sa faasoa mai e Paulo le tele o faataitaiga o tagata i le Feagaiga Tuai o e sa ola “i le faatuatua” ma “e ala i le faatuatua.” E mafai ona e maitauina pea faafia nei fasifuaitau i le Eperu 11. A o e suesue i nisi o faataitaiga na faasoa atu e Paulo i le Au Paia Eperu, mafaufau pe na faapefea ona faaalia le alofa ma le agalelei o le Atua i taui ma faamanuiaga na Ia faaee i luga o i latou o e na faatinoina lo latou faatuatua.

Mo le gaoioiga lenei, mafaufau e vavae le vasega i ni vaega se tolu, faatasi ai ma vaega taitasi ua atofa i ai se tasi o seti o fuaiupu e suesue iai. A maea suesuega a tagata aoga, e mafai ona valaaulia i latou e faasoa mai mea na latou aoaoina i se tagata aoga sa suesueina se isi faamatalaga ese.

Fatu se siata e lua koluma i lau api faamaumau mo suesuega e faapei o lenei. Ia mautinoa o lava se avanoa i lalo o ulutala taitasi.

Auala na faatinoina ai le faatuatua	O le ala na tauia ai e le Atua faatinoga faamaoni

Suesue le tasi pe sili atu o seti o fuaiupu nei. A o e suesue, tusi ou manatu i le siata i lau api faamaumau mo suesuega.

Eperu 11:4–11, 17–22

Eperu 11:23–31

Eperu 11:32–38

Mafaufau e faaaoga fesili nei e fesoasoani i tagata aoga e toe faamanatu ai mea na latou aoaoina.

• O a nisi o auala na faaaoga ai e tagata o loo ta‘ua i au fuaiupu lo latou faatuatua i le Atua?

• O a nisi o auala na tauia ai i latou e le Atua i Lona mana ma faamanuiaga?

• O a ni mea na e aoaoina mai nei fuaiupu e mafai ona fesoasoani ia te oe i lou olaga?

• Mai lau suesuega o nei fuaiupu, o le a se mea na e aoaoina e uiga i le Atua?

E ala i faataitaiga faamaoni na faasoa mai e Paulo, e mafai ai ona tatou aoaoina le tele o upumoni e uiga i le faatuatua, e uiga i le Atua, ma i tatou lava. O se tasi o upumoni o loo faaalia i lenei mataupu atoa o loo aoao mai i le Eperu 11:6 : E tauia e le Atua i latou o e faatinoina le faatuatua ia Iesu Keriso. Afai e te lei faia, mafaufau e maka le “o ia o se tauia o i latou o e saili ia te ia ma le filiga” i le fuaiupu 6 .

• E mafai faapefea e le sailia ma le filiga o le Atua ona avea o se auala e faatinoina ai lou faatuatua?

• Aisea e te manatu ai e fiafia le Tama Faalelagi pe a tatou faatinoina lo tatou faatuatua?

Mafaufau e faaali atu fesili nei ma valaaulia tagata aoga e talanoaina i ni vaega toalaiti.

Afai e faafaigata i tagata aoga le fesili lona lua, mafaufau e faasoa atu le saunoaga a Elder Ronald A. Rasband i le vaega o “Tala Auiliili ma Faamatalaga o Talaaga” o lenei lesona.

• Aisea e te manatu ai o le faatinoina o le faatuatua e tatau mo i tatou e maua ai faamanuiaga a le Atua i o tatou olaga?

• O le a se mea e mafai ona fesoasoani ia te oe e tumau ai pe a foliga mai e le oo mai faamanuiaga mo faatinoga faamaoni?

Ola Ai i le faatuatua

E faaopoopo atu i le faamanuiaina o le toatele o tagata i le taimi ua tuanai mo le faatinoina o le faatuatua ia te Ia, o le Atua foi “o se tauia i latou o e saili ma le filiga ia te ia” ( Eperu 11:6) i o tatou aso.

Afai e ono mafai, matamata i le “Pure and Simple Faith” (5:21), o loo maua i le ChurchofJesusChrist.org. A o e matamata i le vitio, vaavaai pe na faapefea ona faamanuiaina e le Atua se tamaitai talavou ma lona aiga a o latou faatinoina lo latou faatuatua ia Iesu Keriso. Ia mafaufau foi i auala ua faamanuiaina ai oe e le Atua a o e faatinoina le faatuatua ia te Ia.

Mafaufau i se taimi na faamanuiaina ai oe po o se tasi e te iloa e le Atua mo le faatinoina o le faatuatua ia Iesu Keriso.

Mafaufau e valaaulia tagata aoga e tusi a latou tali i fesili nei ia latou api faamaumau mo suesuega a o lei valaauliaina volenitia e faasoa mai a latou tali i le vasega.

• O le a se mea na e aoaoina e uiga i le Tama Faalelagi ma Iesu Keriso mai lena aafiaga?

• O le a sou manatu e mafai faapefea e lena aafiaga ona fesoasoani ia te oe i le lumanai e faatinoina ai lou faatuatua ia i Laua?

Mafaufau e faasoa atu se molimau patino i faamanuiaga o le faatinoina o le faatuatua ia Iesu Keriso. E mafai ona faitau leotele le faamatalaga lenei e faaiu ai le lesona.

Na aoao mai e Peresitene Russell M. Nelson:

O mea lelei uma i le olaga—o faamanuiaga faamoemoeina uma e i ai le taua e faavavau—e amata i le faatuatua. O le faatagaina o le Atua ia pulea o tatou olaga e amata i le faatuatua o loo Ia finagalo e taiala i tatou.

(Russell M. Nelson, “Ua Toetu Keriso; O Le Faatuatua ia te Ia O Le A Aveesea ai Mauga,” Liahona, Me 2021, 102)

Toe manatunatu i mea ua e aoaoina ma e faalogoina a o e suesue ai e uiga i le faatuatua i le Eperu 11. O le a se mea na e lagona na musuia ai oe e fai ona o se taunuuga o mea na e suesueina? O le a se mea e mafai ona e faia ina ia faatino ai le faatuatua ia Iesu Keriso? Tusi faamaumau ou mafaufauga ma uunaiga i lau api faamaumau mo suesuega.

Tala Auiliili ma Faamatalaga o Talaaga

E faapefea ona ou maua faamanuiaga mai le Atua?

Na aoao mai Elder Dale G. Renlund o le Korama a Aposetolo e Toasefululua:

O le tele o faamanuiaga e finagalo le Atua e foai mai ia i tatou e manaomia ai le faatinoga o la tatou vaega—o faatinoga e faalagolago i lo tatou faatuatua ia Iesu Keriso. O le faatuatua i le Faaola o se mataupu faavae o faatinoga faapea foi ma le mana. Muamua tatou te faatino i le faatuatua; ona oo mai lea o le mana—e tusa ma le finagalo ma le taimi a le Atua. E taua le faasologa. Peitai, o le faatinoga manaomia e laitiiti lava pe a faatusa i faamanuiaga tatou te maua [tagai i le Mosaea 2:24–25].

(Dale G. Renlund, “E Tele Mea e Manuia Ai,” Ensign po o le Liahona, Me 2019, 70)

O le a se mea e mafai ona ou aoao mai i faataitaiga a tagata faamaoni o le Ekalesia i aso nei?

O vitio nei o loo faamatala ai faataitaiga o tagata taitoatasi o e sa faaalia le faatuatua i le Tama Faalelagi ma Iesu Keriso. Mafaufau pe mafai faapefea e a latou faataitaiga ona faatosinaina oe e faatino se faatuatua sili atu i lou olaga. O loo maua nei vitio i luga o le ChurchofJesusChrist.org.

Vitio: “My New Life” (8:20)

Vitio: “Sealed Together: The Manaus Temple Caravan” [14:14]

Vitio: “Living beyond ‘What If?’: Cambry Kaylor” [14:47]

Fuaitau o le vitio: “Faith Is Not by Chance, but by Choice” [10:49–14:13]

Afai ou te le mauaina ni tali po o ni faamanuiaga, pe le o lava ea lo‘u faamaoni?

Na aoao mai Elder Ronald A. Rasband o le Korama a Aposetolo e Toasefululua:

E anoanoai vavega, o faailoga, ma mea ofoofogia i e o mulimuli ia Iesu Keriso i ona po nei, i o outou olaga ma i lo’u foi. …

… E le o ni mea ia tatou te ole atu ai pea po o mea foi tatou te faamoemoeina, ae pe a tatou faalagolago i le Alii, o le i ai o Ia iina, ma o le a tonu lava o Ia. O le a Ia faafetaui le vavega ma le taimi tatou te manaomiaina ai. …

E i ai taimi tatou te faamoemoe ai mo se vavega e faamalolo aise e pele, e toe suia ai se faiga e le amiotonu, pe faamalulu le loto o se agaga ua tiga pe faanoanoa. O le vaai atu i mea e ala i mata faaleolaga nei, tatou te mananao ai i le Alii ia fesoasoani, e toe faaleleia le mea ua faaleagaina. E ala i le faatuatua, o le a oo mai le vavega, e ui atonu e le o la tatou taimi faatulagaina po o le faaiuga sa tatou mananao ai. Pe o le uiga o lena mea ua itiiti lo tatou faatuatua pe ua tatou le agavaa mo Lana fesoasoani? Leai. O pele i tatou a le Alii. Na Ia ofoina mai Lona soifua mo i tatou, ma o Lana Togiola o loo faaauau pea ona faasaoloto i tatou mai avega ma le agasala pe a tatou salamo ma faalatalata atu ia te Ia.

Ua faamanatu mai e le Alii ia i tatou “O outou ala e le o o’u ala ia” [ Isaia 55:8].Ua Ia ofo mai, “Ia outou o mai ia te au outou uma o e tigaina ma mafatia i avega o au foi e malolo ai outou” [ Mataio 11:28 ]—malolo mai le popole, o le le fiafia, atuatuvale, le usiusitai, atugaluga mo e pele, po o miti ua mou ma le taulau. O le filemu i le taimi o le fememea’i po o le faanoanoa o se vavega. Manatua afioga a le Alii: “Ou te lei tautala atu ea le filemu i lou mafaufau e uiga i le mataupu? O le a se molimau sili atu e mafai ona e maua [nai] lo lena mai le Atua?” [ Mataupu Faavae ma Feagaiga 6:23].O le vavega e faapea o Iesu Keriso, le Ieova Sili, o le Alo o Le Silisiliese, o loo tali mai i le filemu.

(Ronald A. Rasband, “Faauta! O Au o se Atua o Vavega,” Liahona, Me 2021, 109, 111)

Galuega Faatino Faaopoopo e Aoao Mai Ai

Eperu 11. Faailoaina o faatusa ma faaataata o Iesu Keriso

Mafaufau e valaaulia le vasega e mafaufau loloto pe faapefea e nisi o faataitaiga o le faatuatua na tuuina mai e Paulo i le Eperu 11 ona ogatusa ma mea na tutupu mai le soifuaga o Iesu Keriso. E mafai ona fesoasoani lenei mea e malamalama ai tagata aoga i le tele o tala o le Feagaiga Tuai o faatusa ma faaataata o le soifuaga o le Faaola.

Mo se faataitaiga, o le naunau o Aperaamo e ofo atu Isaako e fai ma taulaga (tagai i le Eperu 11:17) e mafai ona faatusatusa i le tuuina atu e le Tama Faalelagi o Lona Alo Pele e Toatasi na Fanaua e togiola le lalolagi (tagai i le Ioane 3:16). E faapena foi, o le faatusatusaga a Paulo o taulaga a Apelu ma Kaino (tagai i le Eperu 11:4) e mafai ona faatusatusa i le ofoina atu e Ieova o Ia lava e fai ma o tatou Togiola i le aufono i le muai olaga i le lagi (tagai i le Mose 4:1–4). O Noa, o le na “saunia se vaa i le laveaiina o lona aiga” ( Eperu 11:7), e mafai ona faatusatusa ia Iesu Keriso, o le sa “saunia mai le faavaega o le lalolagi e togiola [Lona] nuu” ( Eteru 3:14).

Eteru 12. O faataitaiga o le faatuatua mai le Tusi a Mamona

A o suesue e tagata aoga i faataitaiga a Paulo o tagata faamaoni i le Eperu 11 , mafaufau e valaaulia i latou e toe faamanatu le Eteru 12:13–22 mo tala faaopoopo o tagata faatuatua.