Atamai i Aoaoga Faavae: Eperu 12:9

O le Tama Faalelagi O “le Tamā o Agaga”

I lau suesuega o le Eperu 12:9, sa e aoao ai e uiga i lou sootaga ma le Atua, o lē “o le Tama o agaga,” ma pe mafai faapefea e lenei mea ona aafia ai lou olaga. O lenei lesona o le a fesoasoani ia te oe e tauloto ai mau faasino o le atamai i aoaoga faavae ma le fasifuaitau autu o le mau mo le Eperu 12:9, faamatala le aoaoga faavae, ma faaaoga mataupu faavae o le mauaina o le malamalama faaleagaga i tulaga moni o le olaga.

Malamalama, faaaogaina, ma le taulotoina. A o amata malamalama tagata aoga, ona aoao lea pe faapefea ona faaaoga lenei malamalamaaga i o latou olaga, o le taulotoina o fuaitau o le atamai i aoaoga faavae o le a faigofie atu. O le mea e sili atu lona taua, o aoaoga faavae ma mataupu faavae mai fuaitau o le a ono sili atu ona i ai se aafiaga tumau.

Sauniuniga a le tagata aoga: Valaaulia tagata aoga e mafaufau i ni tulaga latou te feagai ai i se taimi o le a aoga ai mo i latou le malamalama pe manatua o i latou o fanau a le Tama Faalelagi.

Gaoioiga E Ono Mafai Ona Aoao Ai

O lenei lesona i fuaitau o le atamai i aoaoga faavae ua faatulagaina ia aoaoina pe a uma le lesona o le “Eperu 12:9,” o le lesona faatatau mo le fuaitau o le atamai i aoaoga faavae Eperu 12:9 . Afai e manaomia le tuu o le lesona lenei o le atamai i aoaoga faavae i se isi vaiaso, ia mautinoa e aoao atu ai foi le lesona faatatau e talafeagai i le vaiaso foi lena.

Faamalamalama ma tauloto

Fesoasoani i tagata aoga e faataitai le faamalamalamaina o le aoaoga faavae i a latou lava upu. O se tasi lenei o auala e faatino ai lenei mea. O lenei gaoioiga e mafai ona fetuunai e ala i le valaaulia o tagata aoga e faatino-faataitai lenei tulaga i ni paga, vaega toalaiti, pe o se vasega.

I le lesona talu ai na e aoaoina ai o le Atua o le Tama o o tatou agaga. Manatu faapea o loo e talanoa ma se uo o loo fesiligia po o ai i latou. Faaaoga le Eperu 12:9 e fesoasoani ai ia i latou. A o e taliina a latou fesili pe talanoaina o latou atugaluga, mafaufau e faaaofia ai mea nei:

O le a le uiga e faapea o i tatou o fanau a le Atua ma pe aisea e taua ai le iloa o lenei mea
E faapefea e le malamalama po o le le malamalama i lenei upumoni ona mafai ona aafia ai lo tatou faasinomaga ma le taua faaletagata lava ia
O auala e taumafai ai le lalolagi e uunaia lo tatou malamalama e uiga po o ai i tatou faapea ma o tatou sootaga ma le Atua, ma pe aisea o le a tatou mananao ai e tetee atu i nei faatosinaga

Fesoasoani i tagata aoga e tauloto le tusi faasino o le mau ma le fasifuaitau autu o le mau mo le Eperu 12:9 , “O le Tama Faalelagi o ‘le Tama o agaga.’“ O se tasi o auala e faia ai lenei mea o le faaali atu lea o mataitusi muamua o upu taitasi i le tusi faasino o le mau ma le fasifuaitau autu o le mau i luga o le laupapa: E 12:9, O l T F o l “T o t a.”

Valaaulia tagata aoga e taumafai e toe tau le tusi faasino ma le fasifuaitau autu o le mau e ala i le faaaogaina o mataitusi muamua o ni faaiteite. A uma ona toe fai mo ni nai taimi, tape ni isi o mataitusi muamua ma vaai pe mafai lava ona tauloto sa’o pea e tagata aoga. Ona tape lea o mataitusi uma ma toe tau le tusi faasino ma le fasifuaitau autu o le mau faatasi o se vasega.

Faataitai le faaaogaina

Fesoasoani i tagata aoga e toe faamanatu mataupu faavae o le mauaina o le malamalama faaleagaga. O le gaoioiga o mulimuli mai o se tasi lea o auala e faatino ai. Mafaufau e faaali atu upu autu nei ma fai fesili o loo i lalo.

Ina ia fesoasoani ia te oe e toe faamanatu mataupu faavae e tolu o le mauaina o le malamalama faaleagaga, mafaufau i upu autu nei:

Faatuatua
Vaaiga Manino
Punaoa

Tali fesili nei. A manaomia, e mafai ona e toe faasino i parakalafa 5–12 i le vaega o le “Mauaina o le Malamalama Faaleagaga” i le Pepa Autu o le Atamai i Aoaoga Faavae (2022).

E faapefea ona fesootai nei upu taitasi i mataupu faavae e tolu o le mauaina o le malamalama faaleagaga?
Aisea e taua ai le malamalama ma faaaoga nei mataupu faavae?

Valaaulia tagata aoga e sauni e faaaoga ia mataupu faavae o le mauaina o le malamalama faaleagaga ma le aoaoga faavae o loo aoao mai i le Eperu 12:9 . O se tasi o auala e faia ai lenei mea o le faaali atu lea o le faaiteitega lenei ma avanoa o i ai i luga o le laupapa ma faatumu elemene o loo misi faatasi o se vasega. I se isi foi faiga, mafaufau e faaaoga le ata faataitai ua tuuina atu e fai ma faataitaiga pe a uma le faaiteitega.

O _______________________(Igoa) o se tagata talavou e __________________________________________________________________ (tulaga po o le faafitauli). O lenei mea ua ia lagona ai ____________________________________________________________. E faatatau i lona sootaga ma le Atua, ua manatu o ia ___________________________________________________________________________________________________________________________________________________________________________________________________________________________________________________________.

Mo se faataitaiga, e ono foliga faapea se vaaiga faataitai e tasi ua maea:

O Leslie o se tagata talavou e tulaga maoae i le tele o gaoioiga eseese ma o se taitai i lana tupulaga. O lenei mea na te lagona ai le fiafia. E tusa ai ma lana sootaga i le Atua, ua manatu o ia ua matua lelei lava lona olaga lea na te le o vaaia ai lava se manaoga e soona taulai atu ai ia te Ia.

Mafaufau e faaali atu fesili o loo maua i lalo o mataupu faavae taitasi nei o le mauaina o le malamalama faaleagaga. E mafai e tagata aoga ona talanoaina faatasi o se vasega, i paga, pe i ni vaega toalaiti.

Iloilo mataupu ma fesili i se vaaiga e faavavau

O le a sou manatu e tusa ai ma le silasila a le Tama Faalelagi i lenei tagata? Aisea o le a taua ai mo lenei tagata le iloa pe faapefea ona silasila le Tama Faalelagi ia te ia?
E mafai faapefea e se malamalama sili atu i lo latou faasinomaga paia o se atalii/afafine o le Atua ona aafia ai le tagata i lenei tulaga?

Saili le malamalama atili e ala i punaoa mamana filifilia

O le a se mea ua e aoaoina mai lau suesuega o le Eperu 12:9 e mafai ona fesoasoani i lenei tulaga?
O a isi punaoa e mafai e le tagata i lau vaaiga faataitai ona suesue e i latou lava ina ia maua ai se malamalamaaga faaopoopo?

Tuu atu i tagata aoga se taimi e sue ai, saili, ma faasoa mai ni isi o punaoa faaopoopo o loo ta’ua i le fesili o i luga. Afai latou te manaomia se fesoasoani, mafaufau e faasino atu i latou i le vaega o “Tala Auiliili ma Faamatalaga o Talaaga” i le faaiuga o le lesona talu ai, “Eperu 12:9.”

Faatino i le faatuatua

O a ni aafiaga, a le patino pe i se isi tulaga, e oo mai i lou mafaufau pe a e mafaufau e uiga i le faatinoina i le faatuatua? E mafai faapefea ona e faaaogaina nei mea e fesoasoani ai i le tagata i lau vaaiga faataitai?
O a ni fautuaga e mafai ona e tuuina atu i le tagata i lau vaaiga faataitai e fesoasoani ai ia i latou e faatino i le faatuatua?

Mafaufau e faaiu i le tuuina atu o le molimau i lo tatou faasinomaga paia o ni fanau a le Atua pe valaaulia tagata aoga e faasoa mai a latou molimau. Atonu foi e aoga le tuu atu i tagata aoga e faasoa mai mea sa latou aoaoina ma lagonaina e ala i le faia o fesili. Mo se faataitaiga, “Aisea e te manatu ai o le Eperu 12:9 o se fuaitau o le atamai i aoaoga faavae?” “O le a se mea ua e aoaoina i lau suesuega o lenei fuaitau sa e lei iloaina muamua?” po o le “E mafai faapefea ona e faaaogaina patino lenei fuaitau i lou olaga?”

Iloiloga o le atamai i aoaoga faavae

O le gaoioiga iloilo lenei e tatau ona faaaogaina i se lesona o le a aoao atu pe a maea le lesona lenei ma i se taimi lata mai.

Ina ia fesoasoani i tagata aoga i lo latou taulotoina ma le malamalama i le Eperu 12:9 ma lana fasifuaitau autu o o le mau, tau le tusi faasino ma valaaulia le vasega e toe fai mai le fasifuaitau “O le Tama Faalelagi o ‘le Tama o agaga.’” Ona toe fai lea o le fasifuaitau ma valaaulia tagata aoga e ta’u mai le tusi faasino. Atonu foi e aoga le faaaofia ai o isi fuaitau o le atamai i aoaoga faavae o le Feagaiga Fou e fai ma vaega o lenei iloiloga.

Gaoioiga Faaopoopo e Aoao Ai

Vaaiga faataitai faaleoleo

Mo se isi auala e faataunuu ai e tagata aoga le faaiteitega na tuuina atu i le amataga o le lesona, mafaufau e faaali atu ni nai vaaiga faigofie, e pei o nei, ma tuu atu i tagata aoga e filifili se tasi e tali i ai.

E le lelei le sootaga a Susi ma ona matua. Pe a mafaufau o ia e uiga i le avea ma se afafine o le Atua, e mafaufau o ia pe ua na o Ia lava o se isi tagata ua le fiafia i ana filifiliga ma manao e ta’u atu ia te ia le mea e fai.
E faaalu e Amari le tele o taimi e o faatasi ai ma sitaili a le lalolagi. O ni isi taimi e auai o ia i amioga e le tusa ai ma poloaiga a le Atua ma mafaufau pe aisea na te le lagonaina ai se faasilia o le fiafia i lona olaga.