Ua Toetu Keriso; O Le Faatuatua ia te Ia O Le A Aveesea ai Mauga

Saunia e Peresitene Russell M. Nelson

Peresitene o Le Ekalesia a Iesu Keriso o le Au Paia o Aso e Gata Ai

O le faatuatua ia Iesu Keriso o le mana silisili lea ua avanoa ia i tatou i lenei olaga. E mafaia mea uma ia i latou o ē talitonu.

O’u uso e ma tuafafine, ou te faafetai mo le avanoa e lauga atu ai ia te outou i lenei Aso Sa o le Eseta.¹ O le taulaga togiola ma le Toetu o Iesu Keriso ua suia ai o tatou olaga taitoatasi e faavavau. Tatou te alolofa ia te Ia ma tapuai atu ma le loto faafetai ia te Ia ma lo tatou Tama Faalelagi.

I le aluga o le ono masina ua tuanai, ua faaauau pea ona tatou tauivi ma se faama’ioti i le lalolagi. Ua ou maofa i lo outou malosi ma le malosi’aga faaleagaga a o fetaia’i ai ma faama’i, maliu, ma le fai’esea. Ou te tatalo pea, i na mea uma, o le a outou lagonaina le alofa lē mafaato’ilaloina o le Alii mo outou. Afai sa e tali atu i ou tofotofoga i le avea ai ma se soo malosi atu, o le a lē valetuulima la le tausaga ua tuanai.

O lenei taeao, ua tatou faalogo atu mai ta’ita’i o le Ekalesia o ē e mai mai konetineta uma ua nofoia o le lalolagi. O le mea moni, o faamanuiaga o le talalelei e mo ituaiga uma, gagana, ma tagata. O le Ekalesia a Iesu Keriso o se ekalesia mo le lalolagi atoa. O Iesu Keriso o lo tatou ta’ita’i.

O le mea e faafetai ai, e oo lava i se faama’ioti e le o mafai ona faatelegese ai le agai pea i luma o Lana upumoni. O le talalelei a Iesu Keriso o le mea tonu lea o loo manaomia i lenei lalolagi fenumia’i, fefinaua’i, ma pagātia.

E manaomia e fanau taitasi a le Atua le avanoa e faalogo ma talia ai le savali o le faamalologa ma le togiola a Iesu Keriso. E leai se isi savali e sili atu ona taua i lo tatou fiafia—i le taimi nei ma le faavavau.² E leai se isi savali e sili ona faatumulia i le faamoemoe. E leai se isi savali e mafai ona tafi’esea ai fefinaua’iga i totonu o o tatou mālō.

O le faatuatua ia Iesu Keriso o le faavae lea o talitonuga uma ma le alātafe o le mana faalelagi. E tusa ai ma le Aposetolo o Paulo, “A leai foi se faatuatua e le mafai ona fiafia mai [le Atua]: aua e tatau i lē alu atu i le Atua ona talitonu o loo soifua o ia, o ia foi na te tauia mai o e matuā saili ia te ia.”³

O mea lelei uma i le olaga—o faamanuiaga faapolopolo uma e i ai le taua e faavavau—e amata i le faatuatua. O le faatagaina o le Atua e faamuamua i o tatou olaga e amata i le faatuatua o loo Ia finagalo e taiala i tatou. O le salamo moni e amata i le faatuatua o loo ia Iesu Keriso le mana e faamamā, faamalolo, ma faamalosia ai i tatou.⁴

“Ia outou lē faafitia le mana o le Atua,” na ta’utino mai ai le perofeta o Moronae, “aua e galue o ia e ala i le mana, e tusa ma le faatuatua o le fanauga a tagata.”⁵ O lo tatou faatuatua e tatalaina ai le mana o le Atua i o tatou olaga.

Ae ui i lea, o le faatinoina o le faatuatua e mafai ona ono lofituina. E i ai taimi tatou te ono tuufesili ai pe mata e mafai ona tatou aofa’ia ia lava le faatuatua e maua ai faamanuiaga ia tatou te matuā manaomiaina lava. Peitai, e faamalolo e le Alii na popolega e ala i upu a le perofeta o le Tusi a Mamona o Alema.

Ua talosagaina i tatou e Alema e tau na ona tofotofo i le upu ma “faaaoga sina vaega itiiti o le faatuatua, ioe, e tusa pe ua le mafai ona [tatou] faia o se isi lava mea nai lo le fia talitonu.”⁶ O le fasifuaitau “vaega itiiti o le faatuatua” ua faamanatu mai ai ia te a’u le folafolaga a le Alii i le Tusi Paia e faapea afai “e tusa lo [tatou] faatuatua ma le fua o le sinapio le a mafai ona tatou “fai atu … i lenei mauga, Alu atu ia oe i le la mea; ona alu atu ai lea; e leai foi se mea [tatou] te le mafaia.”⁷

E malamalama le Alii i o tatou vaivaiga faaletino. E i ai taimi tatou te faaletonu uma ai lava. Ae ua Ia silafia foi e uiga i lo tatou gafatia sili. O fua o le sinapi e amata o laiti ae tuputupu a’e i se laau telē na’ua mo manulele e nonofo ai i ona lala. O fua o le sinapi e faatusa i se faatuatua itiiti ae tuputupu ae.⁸

E le manaomia e le Alii se faatuatua atoatoa mo i tatou e maua ai Lona mana atoatoa. Ae ua Ia talosagaina i tatou ia talitonu.

O’u uso e ma tuafafine pele, o la’u valaau ia te outou i lenei taeao o le Eseta o le amata nei loa ona faateleina lou faatuatua. E ala i lou faatuatua, o le a faateleina ai e Iesu Keriso lou tomai e aveese ai mauga i lou olaga,⁹ e ui i ni ou lu’itau patino e ono tetelē e pei o le telē o le Mauga o Evaresi.

O au mauga atonu o le tuuatoatasi, masalosalo, ma’i, po o isi faafitauli patino. O le a eseese lava au mauga, ae o le tali i ou lu’itau taitasi o le faateleina lea o lou faatuatua. E manaomia ai galuega. O tagata e paie e a’oa’o ma soo faatalalē o le a tauivi i taimi uma e tau āoāo mai sina vaega itiiti o le faatuatua.

Ina ia faia soo se mea ia lelei, e manaomia se taumafaiga. O le avea ma se soo moni o Iesu Keriso, e leai se tuusaunoaga. O le faateleina o lou faatuatua ma le faalagolago ia te Ia e manaomia ai se taumafaiga. Se’i o’u ofoina atu ni fautuaga se lima e fesoasoani ai ia te oe e atia’e lena faatuatua ma le faalagolago.

Muamua, su’esu’e. Avea ma se tasi e punoua’i e a’oa’o. Faatofu oe lava ia i tusitusiga paia ia malamalama atili ai i le misiona ma le galuega a Keriso. Ia iloa le mataupu faavae a Keriso ina ia e malamalama ai i lona mana mo lou olaga. Faapatinoina le upumoni e faapea o le Togiola a Iesu Keriso e faatatau ia te oe. Sa Ia ave i Ona lava luga ou faanoanoaga, au mea sese, ou vaivaiga, ma au agasala. Sa Ia totogiina le tau e sui a’i, ma tuuina mai le mana mo oe e aveese ai mauga uma o le a oulua fetaia’i. E te mauaina lena mana i lou faatuatua, faalagolago, ma le naunautaiga e mulimuli ia te Ia.

O le aveesea o au mauga atonu e manaomia ai se vavega. A’oa’o e uiga i vavega. E oo mai vavega e tusa ma lou faatuatua i le Alii. E tutotonu i lena faatuatua o le faalagolago i Lona finagalo ma Lana taimi—faapefea ma po o afea o le a Ia faamanuiaina ai oe i se fesoasoaniga faavavega o loo e manaomiaina. Ua na o lou lē talitonu o le a taofia le Atua mai le faamanuiaina o oe i vavega e aveese ai mauga mai louolaga.¹⁰

O le faateleina o lou a’oa’o e uiga i le Faaola, o le faigofie atu foi lena o le faalagolago i Lona alofa mutimutivale, Lona alofa lēmafuatia, ma Lona mana faamalosi’au, faamalolo, ma togiola. E le latalata atili atu le Faaola ia te oe nai lo le taimi ua e feagai ai pe ā’ea ai se mauga i le faatuatua.

Lona lua, filifili e talitonu ia Iesu Keriso. Afai e i ai ni ou masalosaloga i le Atua le Tama ma Lona Alo Pele, po o le moni o le Toefuata’iga po o le moni o le valaauga paia o Iosefa Samita o se perofeta, filifili e talitonu¹¹ ma tumau i le faatuatua. Avatu au fesili i le Alii ma i isi puna faatuatuaina. Su’esu’e faatasi ma se manao ia talitonu nai lo le faamoemoe e mafai ona e maua se measese na tupu i le soifuaga o se perofeta po o se mea faaletonu i tusitusiga paia. Taofi le faateleina o ou masalosaloga e ala i le talanoaina ma isi tagata masalosalo. Faataga le Alii e ta’ita’i oe i lau malaga o le sailiga faaleagaga.

Lona tolu, faatino i le faatuatua. O le a se mea e te faia pe afai ua ia te oe se faatuatua tele atu? Mafaufau i ai. Tusitusi e uiga i ai. Ona maua tele ai lea o le faatuatua e ala i le faia o se mea e manaomia tele ai le faatuatua.

Lona fa, auai i sauniga paia ma le agavaa. E tatalaina e sauniga le mana o le Atua mo lou olaga.¹²

Ma le lona lima, ole atu i lou Tama Faalelagi, i le suafa o Iesu Keriso, mo se fesoasoani.

E manaomia e le faatuatua ia galuega. O le mauaina o faaaliga e manaomia ai galuega. Ae “ai se ōle atu, e maua e ia; o lē saili foi, e iloa e ia; e toina foi i lē tu’itu’i atu.”¹³ Ua silafia e le Atua le mea o le a fesoasoani i lou faatuatua e tuputupu a’e ai. Ōle, ma toe ōle atu pea.

E ono fai mai sē e lē talitonu o le faatuatua e mo ē vaivai. Ae o lenei faaupuga e le amanaiaina ai le mana o le faatuatua. Pe sa ono faaauau pea ona a’oa’o atu e Aposetolo a le Faaola Lana mataupu faavae i le mavae ai o Lona maliu, i le lamatia ai o o latou ola, pe ana faapea sa latou masalosalo ia te Ia?¹⁴ Pe sa ono mafatia Iosefa ma Ailama Samita i le oti faamaturo i le puipuiga o le Toefuata’iga o le Ekalesia a le Alii se’i vagana sa la maua se molimau mautinoa e moni? Pe sa ono maliliu le toeitiiti 2,000 o le Au Paia i le alasopo a paionia¹⁵ pe ana faapea sa leai so latou faatuatua e faapea na toefuata’i mai le talalelei a Iesu Keriso? O le mea moni, o le faatuatua o le mana lea e mafai ai e mea faatauvaa ona faataunuuina mea faigata.

‘Aua e te faaitiitia le faatuatua ua uma ona ia te oe. E manaomia le faatuatua e auai ai i le Ekalesia ma tumau ai i le faamaoni. E manaomia le faatuatua e mulimuli ai i perofeta nai lo tagata atamamai ma manatu taatele o tagata. E manaomia le faatuatua e auauna ai i se misiona i le taimi o se faama’ioti. E manaomia le faatuatua e ola ai i se olaga mamā a o alaga mai le lalolagi o le tulafono a le Atua o le ola mamā [po o le lēgāviā] ua lē toe aogā. E manaomia le faatuatua e a’oa’o atu ai le talalelei i fanau i se lalolagi eleelea. E manaomia le faatuatua e ‘ai’oi atu ai mo le ola o sē pele faapea ai ma se faatuatua sili atu e talia ai se tali faanoanoa.

O le lua tausaga ua mavae, sa ma asia ai ma Sister Nelson Samoa, Toga, Fiti, ma Tahiti. O na motu taitasi sa tetele ai timuga mamafa mo ni aso. Sa anapopogi tagata o le au paia ma tatalo ina ia puipuia a latou sauniga na faia i fafo mai le timu.

I Samoa, Fiti, ma Tahiti, o le taimi lava na amata ai sauniga, na uma ai le timu. Ae i Toga, sa le’i taofia le timu. Ae o le Au Paia faatuatua e 13,000 na vave atu i ni itula muamua ia maua se nofoa, sa faatalitali ma le onosai i se to mamafa o timuga, ona nonofo ai lava lea i le sauniga atoa e lua itula i le sūsū.

Sa matou vaaia le faatuatua malosi i lona faatinoga i na tagata taitoatasi o ia motu—o le lava o le faatuatua e taofi ai le timu, ma le faatuatua e onosai ai le lē muta o le timu.

O mauga i o tatou olaga e lē aveesea i taimi uma i le auala tatou te mananao ai ma le taimi tatou te mananao ai. Ae o lo tatou faatuatua o le a tuleia i taimi uma i tatou i luma. O le faatuatua na te faateleina i taimi uma lo tatou mauaina o le mana faaleatua.

Faamolemole ia iloa le mea lenei: afai o le a toilalo mea uma ma isi tagata uma i le lalolagi o ē e te faatuatuaina, o Iesu Keriso ma Lana Ekalesia o le a lē toilalo lava [e laveai] oe. E lē tulemoe le Alii, e lē moe lava o Ia.¹⁶ E “tutusa lava ia o ananafi, i le asō, ma [le aso a taeao].”¹⁷ O le a Ia lē lafoa’ia Ana feagaiga,¹⁸ Ana folafolaga, po o Lona alofa mo Lona nuu. O loo Ia faia vavega i le asō ma o le a faia foi vavega ā taeao.¹⁹

O le faatuatua ia Iesu Keriso o le mana silisili lea ua avanoa ia i tatou i lenei olaga. E mafaia mea uma ia i latou o ē talitonu.²⁰

O lou faatuatua tuputupu a’e ia te Ia o le a aveesea ai mauga—e le o mauga o papa o loo faamatagofie ai le lalolagi—ae o mauga o faanoanoaga i o outou olaga. O lou faatuatua uluuluola o le a fesoasoani ia te oe e liliu ou lu’itau i le tuputupu a’e ma avanoa lē mafaatusaliaina.

I lenei Aso Sa o le Eseta, faatasi ai ma o’u lagona loloto o le alofa ma le lotofaafetai, ou te folafola atu la’u molimau o Iesu Keriso e moni lava ua toetu. Ua toetu o Ia e ta’ita’i Lana Ekalesia. Ua toetu o Ia e faamanuia olaga o fanau uma a le Atua, po o fea lava o latou nonofo ai. Faatasi ma le faatuatua ia te Ia, e mafai ai ona tatou aveesea mauga i o tatou olaga. O lea ou te molimau atu ai i le suafa paia o Iesu Keriso, amene.