Tausisi atu i le faailoga
E le taua tele mea o tatou asaina i le olaga, ae o le mea o le a avea ai i tatou.
A o ou faitauina le tusi o Galuega ma tusi a Paulo, ou te maofa i le faaosofia o Paulo e le alofa ma le lotofaafetai i le auauna atu, aoao atu, ma le molimau atu ia Iesu Keriso. E mafai faapefea e sea ituaiga o tagata ona auauna atu, ma sea ituaiga o alofa ma le lotofaafetai, aemaise pe a mafaufau i ona mafatiaga e tele? O le a le mea sa faaosofia ai Paulo e auauna atu? “Ou te tausisi atu i le faailoga, ia maua ai le taui na valaauina ai a’u mai luga e le Atua ia Keriso Iesu.”1
O le tausisi atu i le faailoga o le faaauau pea lea ma le faamaoni i luga o le “ala sa’o ma le vaapiapi lea e tau atu ai i le ola e faavavau”2 faatasi ma lo tatou Faaola ma lo tatou Tama o i le Lagi. Sa vaavaai atu Paulo i ona mafatiaga faapea “e le agavaa ona faatusaina i le mamalu o le a faaalia mai ia te i tatou.”3 O le tusi a Paulo i Filipi lea na ia tusi atu ai ina ua noanoatia o ia i le falepuipui, o se tusi o le lofituina i le olioli ma le fiafia, ma le faamalosiauga ia i tatou uma, aemaise i lenei taimi faigata o le le mautonu. E manaomia uma ona tatou maua le lototoa mai ia Paulo: “O lo’u manatu ua le aoga mea uma lava ona o le silisili ese o le poto i la Keriso Iesu lo’u Alii; ona o ia ua ou faaleaogaina mea uma, ma ou manatu o otaota ia mea, ina ia ou maua Keriso.”4
A o tatou vaavaai atu i le auaunaga a Paulo, e musuia i tatou ma faagaeetia e o tatou lava “Paulo” o o tatou aso, o e o loo auauna atu foi, aoao atu, ma molimau atu ma le alofa ma le lotofaafetai i le lotolotoi o luitau latou te fetaiai i o latou soifuaga ma i olaga o a latou pele. O se aafiaga na oo ia te au i le iva tausaga talu ai sa fesoasoani ia te a’u ou te iloa ai le taua o le tausisi atu i le faailoga.
I le 2012, a o ou savali atu mo le uluai taimi i le sauniga faaleautaitai o le konafesi aoao, sa tau le mafai ona ou tatalia le lagona lofituina ma le le agavaa. I lo’u mafaufau, sa i ai se leo sa fai mai pea lava pea, “E le o sou le mea nei! E i ai se mea sese matuia na faia!” A o ou savali ma taumafai e sue se mea ou te nofo ai, sa iloa mai au e Elder Jeffrey R. Holland. Na sau o ia ia te a’u ma fai mai, “Edward, lelei ua e sau” ma sa ia popo malie o’u foliga. Sa ou lagona le pei o se pepe! Sa faamafanafanaina a’u i lona alofa ma lana opo ma sa fesoasoani ou te lagonaina ai le agaga o a’u lava o se tasi o i latou, le agaga o le usoga. I le aso na sosoo ai, sa ou matauina Elder Holland o faia lea lava mea e tasi na ia faia ia te a’u, i le aso ua mavae, sa popo atu ma le agalelei i foliga o Elder Dallin H. Oaks, o le e sinia ia te ia!
I lena taimi, sa ou lagonaina le alofa o le Alii e ala mai i nei tamaalii ua tatou lagolagoina o ni perofeta, tagatavaai, ma talifaaaliga. O Elder Holland, e ala i ana faatinoga agalelei, masani, na fesoasoani ia te a’u e faatoilalo ai lo’u manatu ifo ia te a’u lava, ma o’u lagona o le le agavaa. Sa ia fesoasoani ia te a’u e taulai i le galuega paia ma le fiafia lea na valaauina ai a’u---e aumaia agaga ia Keriso. O ia, e faapei o Paulo o anamua, sa faasino mai ia te a’u e tausisi atu i le faailoga.
E malie, o loo apoapoai mai Paulo ia i tatou e tausisi atu i luma, a o valaauina i tatou e faagalo i mea ua tuanai—o o tatou popolega ua tuanai, o o tatou taulaiga ua tuanai, o o tatou toilalo ua tuanai, ma o tatou faanoanoaga ua tuanai. Ua ia valaaulia i tatou, e faapei foi o lo tatou perofeta pele, o Peresitene Russell M. Nelson, “i se faiga e fou atu, ma sili ona paia.”5 E moni lava le folafolaga a le Faaola: “Aua ai se fia faasaogalemuina lona ola, e maumau ai ia te ia; a o lē faamaumau lona ola ona o a’u, e maua ai e ia.”6
I la’u uluai lauga i le konafesi aoao, sa ou faasoa atu ai se aafiaga o lo’u tina sa aoaoina a’u e galue i la matou faatoaga. “Aua lava e te tepa i tua,” na ia fai mai ai. “Tepa i luma i mea na e tatau ona ta faia.”7
I le tulata i le iuga o lona soifua, a o tauivi Tina ma le kanesa, sa nofo o ia ia ma’ua ma Naume. I se tasi po sa ou faalogo ai o tagimasusu i lona potumoe. Sa o’oo’o ona tiga, e ui ina ua uma ona fai lana inumaga faaiu o aso taitasi o le mofini i le na o le lua itula ua mavae.
Sa ou ulu atu i lona potu ma fetagisi masusu ai ma ia. Sa ou tatalo leotele mo ia ia maua loa lava sona mapusaga mai ona tiga. Ona ia faia ai foi lea o le mea lava e tasi sa ia faia i le faatoaga i tausaga ua mavae: sa nofo ma aoao mai ia te a’u se lesona. O le a le galo lava ia te a’u ona foliga i lena taimi: ua augavaivai, ua matua mafatia, ma tigaina, ma sioa mai ma le alofa i lana tama faanoanoa. Sa ataata mai o ia ma loimata, ma autilo sa’o mai i o’u mata, ma fai mai, “E le pule oe po o se isi lava, ae e pule le Atua pe aluese lenei tiga pe leai.”
Sa ou nofo ae ma le filemu. Sa nofo filemu foi o ia. E olaola pea lea vaaiga i lo’u mafaufau. O lena po, e ala mai i lo’u tina, sa aoao mai ai e le Alii se lesona ia te a’u o le a tamau pea ia te a’u e faavavau. A o faaalia mai e lo’u tina lona taliaina o le finagalo o le Atua, sa ou manatuaina le mafuaaga na puapuagatia ai Iesu Keriso i le Faatoaga o Ketesemane ma i luga o le satauro i Kolokota. Na Ia fetalai: “Faauta ua ou tuuina atu ia te outou la’u tala lelei, o [lau] talalelei lenei ua ou tuuina atu ia te outou—na ou sau i le lalolagi e fai le finagalo o lo’u Tama, aua na auina mai a’u e le Tama.”8
Ou te toetomanatu i fesili faaperofetaga a lo tatou perofeta pele o Peresitene Nelson ia i tatou i le konafesi talu ai. Na fesili mai Peresitene Nelson: “O e loto e faamuamua le Atua i lou olaga? O e loto e avea le Atua ma faatosinaga sili ona taua i lou olaga? … Pe o le a e faatagaina Lona siufofoga ia … faamuamua i lo se isi lava faanaunauga? O e loto e tofatumoanaina lou loto i Lona finagalo?”9 Semanu e tali mai lo’u tina ma se loto ootia ae mausali “ioe,” ma e faapea foi i isi tagata faamaoni o le Ekalesia i le salafa o le kelope ma se loto ootia ae mausali “ioe.” Peresitene Nelson, faafetai atu mo le musuiaina ma le faagaeetiaina o i matou i nei fesili faaperofetaga.
Talu ai nei, sa ma talanoa ai i Pretoria, i Aferika i Saute, ma se epikopo sa falelauasiina lona faletua ma lona afafine matua i le aso lava e tasi. Na maliliu i la’ua i le faama’i oti o le koronavairasi. Sa ou fesili atu pe o faapefea mai o ia. O le tali a Epikopo Teddy Thabete na faamalosia ai la’u faaiuga e mulimuli i afioga ma fautuaga mai perofeta, tagatavaai, ma talifaaaliga a le Alii. Na tali mai Epikopo Thabete o loo i ai pea lava le faamoemoe ma le faamafanafanaga i le iloa na tauaveina e le Faaola i Ona lava luga ia tiga o Lona nuu, ina ia Ona silafia ai le ala e fesoasoani mai ai ia i tatou.10 Faatasi ai ma le faatuatua loloto na ia molimau mai ai, “Ou te faafetai lava mo le ata o le faaolataga, le fuafuaga o le fiafia.” Ona ia fai mai lea ia te a’u o se fesili, “Pe le o le mea ea lea sa taumafai lo tatou perofeta e aoao mai ia i tatou i le konafesi talu ai?”
E ui po o le a lava le ala o le a oo mai ai luitau o le olaga nei ia i tatou uma, ia tatou taulai atu i le sini o lo tatou “tausisi atu i le faailoga,” “o le taui lea na valaauina ai a’u mai luga e le Atua.”11
O la’u valaaulia faamaualalo ia i tatou uma ia aua lava ne’i fiu! Ua valaauina i tatou ina ia “tuu ese ia o mea mamafa uma, atoa ma le agasala e faalavelavegofie ai i tatou, ia tatou taufetuli ma le onosai i le ala tanu o i o tatou luma, ma ia vaavaai atu ia Iesu o le na te taitaiina ma le na te faaatoatoaina lo tatou faatuatua.”12
E le taua tele mea o tatou asaina i le olaga, ae o le mea o le a avea ai i tatou. E i ai le olioli i le tausisi atu i le faailoga. Ou te molimau atu o Ia o Le na manumalo i mea uma, o le a fesoasoani ia i tatou a o tatou vaavaai atu ia te Ia. I le suafa, o Iesu Keriso, amene.