O Taumafaiga Alofa e Aumai ai le Toomaga

E faaauau pea e le Ekalesia ni taumafaiga e fesoasoani ai ia i latou e le tagolima i le lalolagi atoa ma tuuina atu le toomaga i le alofa i taimi o faigata.

I le taumafaiga sili ona tele o fesoasoaniga alofa i le talafaasolopito o le Ekalesia, sa fesoasoani ai le auaunaga a le Au Paia o Aso e Gata Ai (o le lima agaalofa o le Ekalesia) i le toatele o tagata i le taimi o le KOVITI-19 le faamai oti, e tuuina atu ai tupe ma sapalai e fesoasoani ai i le puipuiga ma le togafitiga o le faamai. O le taumafaiga ua saunia ai foi oloa ma aoaoga mo tagata tomai faapitoa mo le tausiga o le soifua maloloina, e aofia ai le taitaiga i le auala e ofo atu ai le lagolago faaletino, faalemafaufau, ma faalelagona.

O fale e tuuapa ai meaai ma gaosi ai meaai a le Ekalesia ua fetuunai ina ia fetaui ma manaoga ua faateleina, ua faia ai meaai ma oloa ia maua pe a manaomia i taitai o le Ekalesia, o ofisa o nuu, polokalama o le fafagaina o a’oga, faleteu meaai, ma isi faalapotopotoga ua faipaaga ma le Ekalesia, e aofia ai malo, faalapotopotoga faavaomalo e le o ni o le malo, ma isi vaega o auaunaga alofa. E oo mai i le aso, ua lagolagoina e le Auaunaga Alofa a le Au Paia o Aso e Gata Ai le 1,050 o galuega faatino o le toomaga o le KOVITI-19 i atunuu e 152.

Talu mai le konafesi aoao talu ai, ua faia e Auaunaga Alofa a le Au Paia o Aso e Gata Ai ma taitai o le Ekalesia i le lotoifale mea nei:

Faatulaga o volenitia o Lima Fesoasoani ma taumafaiga laveai i le mavae ai o afa e tolu na taia ai le Talafatai o le Faga o le Iunaite Setete mai sautesasae o Texas i le siui o Florida.
Galulue faatasi ma ni paaga ma sa faamaopoopoina ma taitai o le Ekalesia i le lotoifale e tuuina atu le toomaga ina ua uma ia asiosio na taia ai Filipaina. Faaaoga falelotu e 40 o le Ekalesia e fai ma ni nofoaga autu mo e aveesea mai o latou nofoaga.
Na fesoasoani i e na aafia o siteki e 23 i Kalefonia, Idaho, Oregon, ma Uosigitone, ISA i le afisosolo.
Sa galulue ma se paaga e tuuina atu le 180 tone o meaai e fesoasoani ai i tagata e manaomia i Wyoming, Maryland, Michigan, Nebraska, Karolaine Saute, Kolorato, Masatuseti, ma Karolaina Matu, ISA
Na tuuina atu le $1 million Amerika i le Salvation Army e lagolago ai le faasoasoaina o meaai i le silia ma le 150 nofoaga i le Iunaite Setete atoa.
Foai atu meaai i le 200 o fale e tufa ai meaai i le lotoifale i Niu Ioka, ISA.
Na tilivaina le 37,500 pauna o lavalava ma le 171,168 pauna o meaai i Honetura, ma galulue faatasi ma taitai o le malo ma nuu e tuuina atu le fesoasoani ia i latou na faasaoina mai ina ua mavae afa e lua.
Sa fesoasoani e faatupe ia polokalama o le a saunia ai ni taumafataga e 30 million mo aoga i atunuu e iva i Aferika.
Sa lagolagoina le 200 o sailiga o toto i le salafa o setete e 14 i le Eria Tutotonu a Amerika i Matu o le Ekalesia.
Na foai atu le silia ma le $200,000 Amerika mo mea e faaaoga mo le puipuiga a tagata fomai ma ufifofoga mo tamaiti aoga i Botswana. E sefulutasi faapotopotoga a le Ekalesia i le lotoifale na su’iina faatasi ni ufifofoga e 8,000 e fesoasoani ai i le taumafaiga.
Tuuto atu le $20 million tala Amerika e lagolago ai le tali atu i le KOVITI-19 a Malo Aufaatasi i le Tupe a Tamaiti Faavaomalo mo Faalavelave Faafuasei (UNICEF), lea o le a fesoasoani e saunia ai tui puipui i atunuu e 196.
Na tilivaina atu le 790,400 pauna o meaai; 17,000 pusa vai; faamalu, ma isi sapalai ia i latou e manaomia le fesoasoani i Texas ma Oklahoma ina ua mavae ia afa ogaoga o le taumalulu.