Amy A. Wright

Fesoasoani Lua i le Au Peresitene Aoao o le Peraimeri

O le lima tausaga talu ai, na maua ai Sister Amy A. Wright i le tulaga 4 o le kanesa o le faaautagata. Na o le pau le auala na lavatia ai e lona aiga ona togafitiga faigata, sa ia fai mai ai, o le taulai atu lea i le Faaola o Iesu Keriso.

“Ina ua faatatau ia te au mea uma, sa avea le lalolagi ma se nofoaga pogisa tele lava,” sa ia toe taua ai. “Ae ina ua liliu la’u taulaiga i fafo atu, ina ua ou taumafai e auauna atu i isi ma savali i le ala na savalia e Keriso, sa i ai le malamalama ma le olioli, e oo lava i le taimi o le tiga ma mafatiaga aupito ogaoga.”

Sa faamatala e Sister Wright lana taua ma le kanesa o se “aafiaga na polesi ma matua’i faaleleia ai”—o se aafiaga sa “matuai fetuunaia” e fesoasoani ai ia te ia ia iloa le Faaola i se auala e patino le loloto. Na aoao mai ai foi ia te ia o le malosi faaopoopo e sau mai le saili e aoao ma malamalama i luitau eseese o isi.

“Tatou te auauna uma i vaega eseese o le tovine a le Alii i taimi eseese i o tatou olaga. Ae o le tovine lava lea e tasi ma le Matai lava e tasi,” na ia fai mai ai.

“E tutusa foi lo tatou faamoemoe, o le ola e faavavau lea ma le faaeaga. O le mea lena tatou te mananao i ai mo nei tamaiti laiti pele, ia avea le Faaola ma se vaega o la latou malaga, ma o le a latou toe foi atu i le aiga ia te Ia.”

O Amy Eileen Anderson Wright sa soifua mai i le aso 6 o Ianuari, 1972, i le Aai o Sate Leki, Iuta, ISA, ia Robert ma Joy Anderson. Sa faaipoipo o ia ia James McConkie Wright i le 1994 i le Malumalu o Sate Leki. E toatolu le la fanau.

Sa faauu Sister Wright ma se faailoga tikeri i le tuputupu ae o le tagata ma suesuega faaleaiga mai le Iunivesite o Iuta i le 1998. Sa faigaluega o ia o se faiaoga faufautua o le faitautusi ma le pule o le ofisa ma o se volenitia o le Asosi a Matua ma Faiaoga. Talu ai nei sa ia fesoasoani ai i fefaatauaiga ma faasalalauga faalauaitele mo se ofisa o fomai nifo.

Sa galue auauna ia Sister Wright i le fono faufautua aoao o Tamaitai Talavou talu mai le 2018. O valaauga talu ai na aofia ai le peresitene o le Peraimeri a le siteki ma le uarota, fesoasoani i le au peresitene o le Peraimeri a le uarota, faiaoga o Aoaoga Faavae o le Talalelei, ma se taitai Sikauti Laiti.