Savali Faafeiloai
Susū maia i le konafesi aoao ma le avanoa e faafofoga ai i le siufofoga o le Alii.
O’u uso e, tuafafine, ma uo pele i le lalolagi atoa, ou te ofo atu la’u faafeiloaiga patino i lenei konafesi aoao. Ua tatou potopoto o se aiga tele i le lalolagi ua naunau e tapuai i lo tatou Alii ma le Faaola, o Iesu Keriso. Faafetai mo le auai faatasi ma i matou.
O le tausaga na te’a nei o le tausaga ua pinefaamauina i tusi. E lē masalomia ua tatou taufai a’oa’oina uma ni mea sa tatou le’i iloaina muamua. O nisi o lesona sa ou iloaina muamua ua tusia i luga o lo’u loto i ni auala fou ma faagaeetiaina.
Mo se faataitaiga, ou te iloa ma le mautinoa o loo taitai e le Alii mataupu o Lana Ekalesia. Sa Ia fetalai, “O le a Ou faaali atu [ia te outou] Ou te mafai ona faia o laʼu lava galuega.”1
O le tele o taimi, matou te vaavaai atu ai ma o’u fesoasoani ma lagona ootia ma loimata a o Ia faasalavei mai i tulaga matuā lu’itauina i le mae’a ai ona matou faia o mea sili na matou mafaia ma lē toe mafai ona fai o se mea. Matou te tu ma ofo moni lava.
Ua ou malamalama atili nei foi i le mea na Ia fetalai ai e faapea, “Faauta, o le a Ou faanatinatiina la’u galuega i lona taimi.”2 Ua ou olioli pea lava pea a o Ia taitaia ma faatinoina le faanatinatiina o Lana galuega—e oo lava i le taimi o se faama’ioti i le lalolagi.
O’u uso e ma tuafafine pele, o le malosiaga o le Ekalesia o loo taoto lea i taumafaiga ma molimau tuputupu a’e pea a ona tagata. O molimau e aupito sili ona faafaileleina i totonu o le aiga. I le tausaga ua mavae, e toatele outou ua faateleina na’ua le suesueina o le talalelei i totonu o o outou aiga. Ou te faafetai atu, ma o le a faafetai atu a outou fanau ia te outou.
O loo faaauau pea le galuega tele o le toe faafouina o le Malumalu o Sate Leki. Mai lo’u ofisa o loo i ai sa’u nofoa pito i luma e matamata ai i le galuega o loo faia i le malumalu.
A o ou matamata atu i le aufaigaluega o eli i luga a’a o laau tuai, palama, uaeaina, ma se vaipuna o loo liki, sa ou mafaufau i le manaomia mo i tatou taitoatasi e aveese, faatasi ma le fesoasoaniga a le Faaola, ia otaota mai i o tatou olaga.
O le talalelei a Iesu Keriso o se talalelei o le salamo.3 Ona o le Togiola a le Faaola, ua saunia ai e Lana talalelei se valaaulia ia faatumauina pea suiga, tuputupu a’e, ma le mamā a’ia’i atili. O se talalelei o le faamoemoe, o le faamalologa, ma le alualu i luma. O lea, o le talalelei o se savali o le olioli! E olioli o tatou agaga i laa laiti uma tatou te laa ai i luma.
O se vaega o le faapotopotoina o Isaraelu, ma se vaega taua tele, o le poloaiga mo i tatou o se nuu ina ia agavaa ma loto ia fesoasoani e saunia le lalolagi mo le Afio Mai Faalua o le Alii.
Afai tatou te faalogo i savali ua sauniaina ma le faaeteete e o tatou taitai i lalo o le taitaiga a le Agaga Paia, ou te valaaulia outou ia tatalo ia iloa otaota e tatau ona e aveesea mai lou olaga ina ia mafai ona e agavaa atili.
Ou te alofa ia te outou, o’u uso e ma tuafafine pele, ma molimau atu e silafia ma alofa lo tatou Tama Faalelagi ma Lona Alo Pele ia te outou taitoatasi. O loo tutu sauni i Laua e fesoasoani ia te oe i laasaga uma e te agai ai i luma. Susū maia i le konafesi aoao ma le avanoa e faafofoga ai i le siufofoga o le Alii. I le suafa o Iesu Keriso, amene.