Faaauau le Alualu i Luma o Malumalu

I lana saunoaga faaiu i le konafesi aoao, na fofogaina mai ai e Peresitene Russell M. Nelson ni fuafuaga e fausia malumalu fou e 20 i le lalolagi atoa (tagai i le itulau 127). O le numera maualuga talu ai mo malumalu faapitoa na fofogaina mai i se tasi taimi, o malumalu e 12 na fofogaina e Peresitene Nelson i le aso 7 o Oketopa, 2018.

Na fofogaina mai e Peresitene Gordon B. Hinckley ni fuafuaga e fausia ai le tele o ni malumalu fou e 32 i le konafesi aoao ia Aperila 1998 ae sa lei lisiina ni nofoaga patino.

Talu ona avea o ia ma Peresitene o le Ekalesia i le 2018, ua 69 malumalu ua fofogaina mai e Peresitene Nelson mo le fausiaina. Sa ia faasilasila mai malumalu e 19 i lena tausaga, 16 i le 2019, ma le 14 i le 2020. E 43 malumalu o loo fausia i le taimi nei, ma e ui lava i le faamai oti, sa suatia le eleele mo malumalu fou e 21 i le 2020. Ua 251 nei malumalu ua fofogaina mai e le Ekalesia i le taimi nei, ua fausiaina, pe ua faagaoioia.

E le gata i le faasilasilaga o malumalu, ae sa otooto mai foi e Peresitene Nelson ia vaega e fa mo le toetatalaina o malumalu a o faaitiitia le faama’i oti.