Aisea i le Ala o Feagaiga
O le eseesega o le ala o feagaiga e tulaga ese ma taua e faavavau.
I aluga o lana auaunaga, sa suesue ai Peresitene Russell M. Nelson ma aoao atu e uiga i feagaiga a le Atua ma Ana fanau. O ia lava o se faataitaiga susulu o se e savali i le ala o feagaiga. I lana uluai savali o se Peresitene o le Ekalesia na saunoa ai Peresitene Nelson:
“O lo outou tuuto e mulimuli i le Faaola e ala i le osia o feagaiga ma Ia ona tausia lea o na feagaiga, o le a matala ai le faitotoa i faamanuiaga uma faaleagaga ma avanoa e maua e alii, tamaitai, ma fanau i soo se mea.
“… O sauniga o le malumalu ma feagaiga tou te faia iina o le ki lea i le faamalosia o lou olaga, lau faaipoipoga ma le aiga, ma lou tomai e tetee atu ai i osofaiga a le fili. O lou tapuai ai i totonu o le malumalu ma lau auaunaga iina mo ou tuaa o le a faamanuiaina ai oe i le faateleina o faaaliga faaletagata lava ia ma le filemu, ma o le a faamalosia ai lou tuuto e tumau i luga o le ala o feagaiga.”1
O le a le ala o feagaiga? O le ala lea e tasi e taitai atu ai i le malo selesitila o le Atua. Tatou te o atu i le ala i le faitotoa o le papatisoga ona “fetaomi atu i luma ma le tumau ia Keriso, ma se susulu atoatoa o le faamoemoe, ma le alofa i le Atua ma tagata uma [o poloaiga sili e lua] … e oo i le iuga.”2 I le aluga o le ala o feagaiga (lea e oo i talaatu o le olaga nei), tatou te maua ai sauniga ma feagaiga e faatatau i le faaolataga ma le faaeaga.
O lo tatou tuuto atoa i feagaiga o le faia lea o le finagalo o le Atua “ma usiusitai i ana poloaiga i mea uma e poloaiina ai i tatou”3 O le mulimuli i mataupu faavae ma poloaiga o le talalelei a Iesu Keriso i lea aso ma lea aso, o le kosi aupito fiafia lea ma sili ona faamalieina ai i le olaga. O se tasi mafuaaga, e alofia e se tagata le tele naua o faafitauli ma faanoanoaga. Se’i ou faaaogaina se talafaatusa o taaloga. I le tenisi, e i ai se mea e igoa o ni mea sese e le ma’alofia. O mea ia e pei o le ta o se polo i le neti a o alu le taaloga po o se sasi-valalua pe a ta le polo e amata ai. O mea sese e le ma’alofia e manatulia faapea o le taunuuga o se sese o le tagata taalo nai lo le faapea na afua i le tomai o le ‘au tauva.
Ua tele naua taimi e faatupu ai lava e tatou o tatou faafitauli po o luitau, o taunuuga o filifiliga e le lelei, pe, e mafai foi ona tatou faapea, o le taunuuga o “mea sese le ma’alofia.” Pe a tatou tulimataia ma le maelega le ala o feagaiga, i se tulaga lava e masani ai tatou te alofia ai le tele o “mea sese e le ma’alofia.” Tatou te faatafa ese mai ituaiga eseese o vaisu. Tatou te le pauu i ‘autu o amioga le faamaoni. Tatou te sopoloa i le lualoto o le ola le mama ma le le faamaoni. Tatou te ui ese mai tagata ma mea, tusa lava pe lauiloa, ae o le a lamatia ai lo tatou soifua manuia faaletino ma le faaleagaga. Tatou te aloese mai filifiliga e faataumaoia ai pe faavaivaia ai isi nai lo le mauaina o mausa o le amio-pulea ma le auauna atu.4
E manatu tagata faapea na fai mai Elder J. Golden Kimball, “Atonu ou te lei savali [i taimi uma] i le ala sa’o ma le vaapiapi, ae ou te [taumafai] e sopoia i le tele ou te [mafai ai].”5 I se taimi e sili ona matuia, ou te talitonu semanu e ioe Brother Kimball o le tumau ai i luga, ae le na o le sopoia, o le ala o feagaiga o lo tatou faamoemoe aupito sili lea mo le ‘alofiaina o faanoanoaga e mafai ona alofia i se tasi itu ma taulima ai ma le manuia faanoanoaga e le ma’alofia o le olaga i se isi itu.
Atonu e faapea mai nisi, “E mafai ona ou faia filifiliga lelei tusa pe papatiso pe le papatiso foi; ou te le manaomia ni feagaiga e avea ai ma tagata faamamaluina ma faamanuiaina.” E moni, e toatele i latou, e ui latou te le o i ai i luga o le ala o feagaiga, e faatinoina mea i se ala e talifoliga tutusa ai i filifiliga ma saofaga a i latou o i luga o le ala. Atonu e te faapea mai, latou te selesele i faamanuiaga o le faia o mea lelei e tutusa ma mea e faia e i latou o i luga o le ala o feagaiga. O le a la, le eseesega o le ala o feagaiga?
O le mea moni, o le eseesega e tulaga ese ma e faavavau. E aofia ai le natura o lo tatou usiusitai, o le uiga o le tuuto mai o le Atua ia i tatou, o le fesoasoani faalelagi tatou te maua, o faamanuiaga e o faatasi ma le faapotopotoina o se nuu o le feagaiga, ma le mea e aupito sili ona taua, o lo tatou tofi e faavavau.
Usiusitai Tuuto
O le mea muamua o le natura o lo tatou usiusitai i le Atua. E sili atu i le na ona i ai o ni faamoemoega lelei, tatou te tautino atu ai ma le paia e “ola i afioga uma e tulei mai le fofoga o le Atua. I le faia o lea, tatou te mulimuli ai i le faataitaiga a Iesu Keriso, o le, e ala i le papatisoina, “ua faaali mai e ia i le fanauga a tagata, ua ia faamaualaloina o ia lava e tusa ma la le tino i luma o le Tamā, ma molimau atu i le Tamā o le a ia usiusitai ia te ia i le tausia o ana poloaiga.”6
O le i ai o feagaiga, tatou te matua tulimatai atu ai mo mea e sili atu nai lo le na o le aloese mai mea sese po o le faautauta ia tatou faaiuga. Tatou te lagonaina le tiutetauave e tali atu i le Atua mo a tatou filifiliga ma o tatou olaga. Tatou te tauave i o tatou luga le suafa o Iesu Keriso. Tatou te taulai atu ia Keriso---i le totoa i le molimau ia Iesu ma i le atiina ae o uiga o Keriso.
O le i ai o feagaiga, e mauaa ai le usiusitai i mataupu faavae o le talalelei i o tatou agaga. Ou te masani i se ulugalii, i le taimi o la la’ua faaipoipoga, sa lei malosi le fafine i le Ekalesia ma e lei avea le tane ma se tagata o le Ekalesia. O le a ou faaigoa i la’ua o Mele ma Sione, e le o o la igoa moni. Ina ua amata ona ulufale mai le fanau i le ata, sa matuai naunau Mele e tausi i latou, e pei ona fai mai le mau, “i le aoaoga ma le apoapoaiga a le Alii.”7 Sa lagolago atu i ai Sione. Sa faia e Mele ni osigataulaga taua ia i ai i le fale e aoao atu le talalelei i se tulaga faifai pea. Sa ia faamautinoa ua faaaoga atoa e le aiga le tapuaiga ma gaoioiga a le Ekalesia. Sa avea Mele ma Sione ma faataitaiga lelei o matua, ma sa tutupu ae le la fanau (o ni tama malolosi tele) i le faatuatua ma le tuuto i mataupu o le talalelei ma tulaga faatonuina.
Sa fiafia tele matua o Sione, o matua o matua o tama, i olaga lelei ma mea na ausia e fanau a le fanau, ae ona o ni nai tetee i le Ekalesia, o lea sa latou mananao ai e faapito’augafa atoa lenei manuia i tomai faamatua oSione ma Mele. O Sione, e ui e le o se tagata o le Ekalesia, ae na te lei tuuaunoaina lenei faavasegaga ma le lu’iina o manatu o ona matua. Sa tumau pea lona faapea atu i ona matua o loo la’ua molimauina fua o aoaoga a le talalelei---o mea sa aafia ai ona atalii i le ekalesia faapea foi mea sa tutupu i le fale.
O Sione lava ia sa tosinaina e le Agaga, e le alofa ma faataitaiga a lona toalua, ma i uunaiga a ona atalii. Na oo mai le taimi, sa papatiso ai o ia, ma sa matua fiafia tele ai tagata o le uarota ma uo.
E ui ina sa lei aunoa le olaga ma luitau mo i la’ua ma o la atalii, ae sa faamautu ma le loto atoa e Mele ma Sione e faapea, o le mea moni o feagaiga i le talalelei o le faapogai lea o o latou faamanuiaga. Ua latou vaai i afioga a le Alii ia Ieremia ua faataunuuina i olaga o le la fanau faapea foi i o la’ua lava olaga.: “Ou te tuuina la’u tulafono i totonu ia te i latou, ma ou tusi ai i o latou loto; e fai foi a’u mo latou Atua, o i latou foi e fai mo’u nuu.”8
Noatia i le Atua
O se itu tulagaese lona lua o le ala o feagaiga o lo tatou tiutetauave i le Atua. O feagaiga ua ofo mai e le Atua i Ana fanau, e tele atu mea e faia ai nai lo le na ona taiala ai o i tatou. E noatia ai i tatou ia te Ia, ma, o le notia ia te Ia, e mafai ai ona tatou manumalo i mea uma.9
Sa ou faitau i se tasi aso i se tala na tusia e se failipoti sa le’i lelei ona faamatala i ai, o le sa faamatalaina faapea o le ala tatou te faatino ai papatisoga mo e ua maliliu o le faatofu lea o lola o atamataninii i le vai. O i latou uma la o i ai igoa i luga o atamataninii e faitaulia ua papatiso. O lena faiga o le a lava, ae ua le amana’ia ai le taua e le uma o agaga taitasi ma le taua tele o se feagaiga patino ma le Atua.
“Na fetalai [Iesu] … : Ina ulu atu ia i le ala vaapiapi; aua e vaapiapi le faitotoa, ma lauitiiti le ala e tau i le ola, ma e toaitiiti i latou o e latou te mauaina.”10 I se tala faafaatusa, o lenei faitotoa e matuai vaitiiti tele ma e faataga ai na o le toatasi i le taimi e ulu atu i ai. E faia e tagata taitoatasi se tautinoga a ia lava i le Atua, ae e maua mai ai ia te Ia se feagaiga patino, i le igoa, lea e mafai ai e ia ona faalagolago i lona atoatoa i le olaga nei ma le faavavau. Faatasi ai ma sauniga ma feagaiga, “e faaalia le mana o le amioatua” i o tatou olaga.11
Fesoasoani Faalelagi
O lea tulaga e taitai atu ai i tatou i le mafaufauina o se faamanuiaga faapitoa lona tolu o le ala o feagaiga. Ua saunia e le Atua se meaalofa e toetoe ina a le malamalama ai, e fesoasoani i e osia feagaiga ia avea ma ni e e tausia feagaiga: o le meaalofa o le Agaga Paia. O le meaalofa o le aia tatau lea i le mafutaga faifaipea, puipuiga, ma le taitaiga a le Agaga Paia.12 Ua lauiloa foi o le Faamafanafana, o le Agaga Paia ”e faatumuina le tagata i le faamoemoe ma le alofa atoatoa.”13 Na te ”silafia mea uma, ma ua molimau e uiga i le Tama ma le Atalii.”14 ia ua tatou tautino atu e avea ai ma o La molimau.15
I luga o le ala o feagaiga tatou te maua ai foi ia faamanuiaga e tatau ai o le faamagaloga ma le faamamaina mai agasala. O le fesoasoani lea e mafai ona maua mai i le na o le alofatunoa paia, e tuuina mai e ala i le Agaga Paia. “O lenei o le poloaiga lenei,” ua fetalai mai ai le Alii, “Ia salamo, outou tuluiga uma o le lalolagi, ma o mai ia te a’u ma ia papatiso i lo’u igoa, ina ia faapaiaina outou i le taliaina o le Agaga Paia, ina ia outou tutu ma le le pona i o’u luma i le aso gataaga.”16
Faapotopoto ma Tagata o le Feagaiga
Lona fa, o i latou e tulimatai atu i le ala o feagaiga e mauaina faamanuiaga e sili ona faapitoa i faapotopotoga eseese e atofaina. O valoaga o se faapotopotoina totino o ituaiga ua loa ona faataapeapeina o Isaraelu i laueleele o lo latou tofi, o loo maua i tusitusiga paia uma.17 O le faataunuuina o na valoaga ma folafolaga ua faagasolo nei ma le faapotopotoina o le nuu o le feagaiga i le Ekalesia, le malo o le Atua i le lalolagi. Ua faamalamalama mai e Peresitene Nelson: “Pe a tatou talanoa i le faapotopotoina,, ua na ona tatou fai atu lava o lenei upumoni taua: o tagata uma o fanau a lo tatou Tama Faalelagi, … e tatau ona faalogo i le savali o le talalelei toefuataiina a Iesu Keriso.”18
Ua poloaiina e le Alii ia tagata o Le Ekalesia a Iesu Keriso o le Au Paia o Aso e Gata Ai ia “tutulai ia ma susulu atu, ina ia avea lo outou malamalama ma tagavai mo atunuu; … ma ina ia avea le faapotopotoina faatasi i luga o le laueleele o Siona, ma i luga o ona siteki, mo se puipuiga, ma mo se sulufaiga mai le afa, ma mai le toasa pe a sasaa mai e aunoa ma le suia i luga o le lalolagi atoa.””19
E i ai foi se faapotopotoina i vaiaso taitasi o tagata o le feagaiga i le fale o le tatalo i le aso o le Alii, ina ia “tatou tausi atili atoatoa ai i tatou ia le pisia mai le lalolagi.”20 O se faapotopotoina e aai ai ma feinu i le areto o le faamanatuga ma le toto e manatua ai le Togiola a Iesu Keriso ma se taimi “e anapopogi ma tatalo ai, ma talatalanoa, o le tasi i le tasi, e uiga i le uelefea o o [tatou] agaga.”21 I le avea ai o se talavou, sa na o au le tagata o le Ekalesia i la’u vasega i le aoga maualuga. Sa ou fiafia i le mafutaga ma le tele o uo lelei i le aoga, ae sa ou iloa sa ou faalagolago tele i lenei faapotopotoina i le Sapati i vaiaso taitasi e toe faafelesi ma faafou ai a’u faaleagaga, e oo lava i le faaletino. E maeu se lagona naunau na tatou lagonaina ina ua le faia lenei faapotopotoina masani o le feagaiga i le taimi o le faama’i oti o i ai nei, ma lo tatou faanaunau atu i le taimi e mafai ai ona tatou toe potopoto faatasi e pei o le taimi muamua.
E faapotopoto foi tagata o le feagaiga i le malumalu, le maota o le Alii, ia maua ai sauniga, faamanuiaga, ma faaaliga e faapitoa ona maua ai iina. Na aoao ma e le Perofeta o Iosefa Samita: “O le a le faamoemoega o le faapotopotoina o le … nuu o le Atua i soo se matua o le lalolagi? … O le faamoemoe autu lava o le fausiaina lea i le Alii o se fale e mafai ai e le Alii ona faailoa mai i Lona nuu ia sauniga o Lona fale ma mamalu o Lona malo, ma aoao tagata i le ala o le faaolataga; aua e i ai sauniga patino ma mataupu faavae a aoao ma faata‘ita‘ia, e tatau ona faia i se nofoaga po o se fale e fauina mo lena faamoemoega.”22
Ia Mautofi i Folafolaga o le Feagaiga
O le mea mulimuli, e na o le tulimata’ia lava o le ala o feagaiga tatou te maua ai faamanuiaga o Aperaamo, Isaako, ma Iakopo, o faamanuiaga laualuga o le faaolataga ma le faaeaga lea e na o le Atua e mafai ona aumaia.23
O mau faasino i le nuu o le feagaiga e tele ina faauiga totino i e tupuga mai ia Aperaamo po o le “aiga o Isaraelu.” Ae peitai o le nuu o le feagaiga e aofia ai foi i latou uma ua taliaina le talalelei a Iesu Keriso.24 Sa faamatala mai e Paulo:
“Aua o outou uma lava ua papatisoina ia Keriso, ua outou oofu ia Keriso. …
“Ma afai e avea outou o ni o o Keriso, o outou la o fanau a Aperaamo, ma suli e tusa ai ma le folafolaga.”25
O i latou o e faamaoni i a latou feagaiga o le a tutulai mai i le toetutu mai o e amiotonu.”26 E “faaatoatoaina i latou e ala ia Iesu o le Puluvaga o le feagaiga fou. … “O i latou ia o e o o latou tino ua selesitila, o e o lo latou mamalu lena o le la, le mamalu lava lea o le Atua, le silisili i tagata uma.”27 “O le mea lea, o mea uma e a i latou, pe o le ola po o le oti, po o mea o i ai nei, po o mea o le a oo mai, o mea uma e a i latou, ma o i latou e a Keriso, ma o Keriso e a le Atua.”28
Ia gauai atu i le valaau a le perofeta ia tumau i le ala o feagaiga. Sa vaai Nifae ia i tatou i lo tatou aso ma sa tusia: “[Ma sa oo ina a‘u,] vaai a‘u o Nifae, i le mana o le Tamai Mamoe a le Atua, ua alu ifo i luga o le au paia o le ekalesia a le Tamai Mamoe, ma luga o tagata o le feagaiga a le Alii, o e sa faataapeapeina i luga o le lalolagi atoa; ma sa faaauupegaina i latou i le amiotonu ma le mana o le Atua i le mamalu tele.”29
Faatasi ai ma Nifae, “ua fiafia loʼu agaga” i feagaiga a le Alii.”30 I lenei Aso Sa o le Eseta, ou te tuu atu la’u molimau e uiga ia Iesu Keriso, o Lona Toetu o lo tatou faamoemoe lea ma le faamautinoaga o mea uma ua folafola mai i luga ma le taunuuga o le ala o feagaiga. I le suafa o Iesu Keriso, amene.