Faamoemoe ia Keriso
Matou te moomoo e fesoasoani ia i latou uma o e lagona le tuuatoatasi pe lagona o i latou e lē ni ō. Se’i o’u ta’ua, aemaise lava i latou o loo nofofua i le taimi nei.
Uso e ma tuafafine, i lenei taimi o le Eseta tatou te tulimatai atu ai i le Toetu mamalu o lo tatou Alii ma le Faaola, o Iesu Keriso. Tatou te manatua Lana valaaulia alofa ia “outou o mai ia te a’u, outou uma o e tigaina ma mafatia i avega, o a’u foi e malolo ai outou.
“Ia outou amoina la’u amo, ma ia outou faaa’oa’o ia te au, aua o au lē agamalu ma le loto maulalo: ona maua lea e outou o le malologa mo outou agaga.
“Aua e avegofie la’u amo, o la’u avega foi e māmā ia.”1
O le valaaulia a le Faaola e o mai ia te Ia o se valaaulia i tagata uma ia le gata e o mai ia te Ia ae ia avea ma ni ō Lana Ekalesia.
I le fuaiupu o loo muamua atu o lenei valaaulia alofa, o loo aoao mai ai e Iesu le ala e faia ai lenei mea e ala i le saili e mulimuli ia te Ia. Na Ia tautino mai, “E leai se tasi [alii po o se tamaitai] ua iloa le Atalii, ua na o le Tama; e leai foi se tasi ua iloa le Tama, ua na o le Atalii, ma se ua loto le Atalii e faaali atu i ai.”2
E finagalo Iesu ia tatou iloa o le Atua o se Tama Faalelagi alofa.
O le iloa ai e alofa lo tatou Tama Faalelagi ia i tatou o le a fesoasoani lea tatou te iloa ai pe o ai i tatou ma iloa ai o i tatou o ni ō Lona aiga tele e faavavau.
Na matauina talu ai nei e le a’oga faafomai akatemia o le Mayo Clinic: “E taua tele le i ai o se lagona uunai o i tatou o ni ō. … E toetoe o vaega uma o o tatou olaga ua faatulagaina ia avea ma ni ō se mea.” Ua faaopoopo i ai e le lipoti lenei, “E le mafai ona tatou tavavaeina le taua o se lagona uuna’i o le avea ma ni ō, mai lo tatou soifua maloloina faaletino ma faalemafaufau.”3—ma ou te faaopoopo atu, lo tatou soifua maloloina faaleagaga.
I le afiafi a o lumanai Lona puapuagatia i Ketesemane ma le maliu i luga o le satauro, sa potopoto ai le Faaola ma Ona soo mo le Tausamaaga Mulimuli. Na Ia fetalai atu ia te i latou, “E maua foi outou e le puapuaga: i le lalolagi, a ia outou lototetele, ua ou manumalo i le lalolagi.”4 A o lei goto le la i le aso na sosoo ai, sa mafatia Iesu Keriso ma sa “maliu [i luga o le satauro] mo a tatou agasala.”5
Ou te le iloa pe o le a le tuulafoaiina atonu na lagona e tamaitai ma alii faamaoni o e sa mulimuli ia te Ia i Ierusalema, a o goto ifo le la ma ufitia ai i latou i le pogisa ma le atuatuvale.6
E faapei o nei soo anamua i le toetoe atoa le 2,000 tausaga talu ai, e toatele outou atonu e lagona le tuulafoaiina mai lea taimi i lea taimi. Ua ou oo i lea tuulafoaiina talu mai le maliu o si o’u toalua pele, o Barbara, i le silia ma le lua nei tausaga. Ou te iloa le siomia ai i tagata o aiga, uo, ma paaga ae o loo lagonaina pea le tuuatoatasi—ona o le alofa o lo’u olaga ua le o toe iinei i o’u autafa.
O le faama’i oti o le KOVITI-19 ua faamamafa mai ai lenei lagona uuna’i o le faaesea ma le tuulafoaiina mo le toatele. E ui i lea, e ui i luitau tatou te feagai i le olaga, e pei o lena taeao o le Eseta, e mafai ona tatou alafa’i mai i se ola fou ia Keriso faatasi ai ma ni avanoa fou ma le ofoofogia ma ni mea fou moni, pe a tatou liliu atu i le Alii mo se faamoemoe ma avea ai ma ni ō.
Ou te lagonaina e a’u lava ia le tiga po o le faanoanoa o i latou e leai se lagona uuna’i o le avea ma ni ō. A o ou matamata i talafou mai le salafa o le lalolagi, ou te vaaia le toatele o e foliga mai ua oo i lenei tuuatoatasi. Ou te manatu, mo le toatele, ona e le mafai ona latou iloa e alofagia i latou e le Tama Faalelagi ma o tatou uma o ni ō i lona aiga e faavavau. O le talitonu e alofa le Atua ia i tatou, ma o i tatou o Ana fanau o se tulaga e faamafanafana ma faamautinoa ai.
Ona o i tatou o fanau agaga a le Atua, ua tofu ai tagata uma ma se faapogai, natura, ma gafatia faalelagi. O i tatou taitoatasi “o se atalii po o se afafine agaga faapelepele a ni matua faalelagi.”7 O lo tatou faasinomaga lenei. O i tatou moni lava ia!
O lo tatou faasinomaga faaleagaga e faaleleia atili pe a tatou malamalama i o tatou faasinomaga e tele i le olaga nei, e aofia ai lo tatou tupuaga faale-ituaiga, faaleaganuu, po o le faaleatunuu.
O lenei lagona uunai o le faasinomaga faaleagaga ma faaleaganuu, alofa, ma le avea ma ni ō, e mafai ona musuia ai le faamoemoe ma le alofa mo Iesu Keriso.
O loo ou tautala e uiga i le faamoemoe ia Keriso, ae le o se mafaufauga faivavale. Nai lo lena, o loo ou tautala e uiga i le faamoemoe o le a faataunuuina. O lena faamoemoe e tatau ai mo le faatoilaloina o mafatiaga, e siitia ai le maufetuuna’i mausali ma le malosiaga, ma oo ai ina iloa e alofagia i tatou e lo tatou Tama Faavavau ma o i tatou o Ana fanau o ni ō Lona aiga.
Pe a oo ina i ai lo tatou faamoemoe ia Keriso, ona tatou iloa lea pei ona manaomia ona tatou osia ma tausia feagaiga paia, e mafai ona faataunuuina mea e sili ona tatou faananau i ai, e ala ia te Ia.
Sa fefautuaai faatasi le Korama a Aposetolo e Toasefululua i se agaga o le tatalo ma faatasi ai ma se faanaunauga ia malamalama pe faapefea ona fesoasoani i tagata uma o lagona le tuuatoatasi pe lagona e le o avea i latou ma ni ō. Matou te moomoo e fesoasoani ia i latou uma o e lagonaina lenei [tuuatoatasi]. Se’i o’u ta’ua, aemaise lava i latou o loo nofofua i le taimi nei.
Uso e ma tuafafine, e silia ma le afa o tagata matutua i le Ekalesia i le taimi nei o fafine ua oti a latou tane, o e ua tatala faaipoipoga, pe e le’i faaipoipo lava. O loo taumanatunatu nisi e uiga i avanoa ma tulaga i le fuafuaga a le Atua ma i le Ekalesia. E ao ina tatou malamalama e faapea, o le ola e faavavau ua le na o se fesili e uiga i le tulaga faalefaaipoipoga i le taimi nei ae o le avea ai ma so’o ma le “totoa i le molimau ia Iesu.”8 O le faamoemoega o tagata uma o e nofofua, e tutusa lava ma tagata uma o le Ekalesia toefuataiina a le Alii—e mafai ona maua le alofa tunoa o Keriso e ala i le “usiusitai i tulafono ma sauniga o le Talalelei.”9
Ou te fautua atu e i ai ni nai mataupu faavae taua e ao ona tatou malamalama i ai.
Muamua, ua faamautu mai e tusitusiga paia ma perofeta o aso e gata ai e faapea o tagata uma e faamaoni i le tausiga o feagaiga o le talalelei o le a maua le avanoa mo le faaeaga. Na aoao mai Peresitene Russell M. Nelson: “I le ala ma le taimi a le Alii lava ia, e leai se faamanuiaga o le a taofia mai Ana Au Paia faamaoni. O le a faamasinoina ma tauia e le Alii tagata taitasi e tusa ai ma le naunauga o le loto faapea foi ma galuega.”10
Lona lua, o le taimi tonu ma le auala e faaee mai ai faamanuiaga o le faaeaga e le’i faailoa uma maia, ae peitai ua mautinoa lava e faataunuuina.11 Sa faamatala mai e Peresitene Dallin H. Oaks e faapea o nisi o tulaga “o i ai i le olaga nei o le a faasa’oina i le Meleniuma, o le taimi lea mo le faataunuuga o mea uma e le i maea o le fuafuaga sili o le fiafia mo fanau agavaa uma a lo tatou Tama.”12
E le faapea la o le a tolo i tua faamanuiaga uma seia oo i le Meleniuma; o nisi ua uma ona maua ma o isi o le a faaauau pea ona maua seia oo i lena aso.13
Lona tolu, o le faatalitali atu i le Alii e aofia ai le usiusitai faifaipea ma le agaigai i luma faaleagaga ia te Ia. O le faatalitali i le Alii e le aofia ai le faatalitali e aunoa ma se mea e fai. E le tatau lava ona e lagona faapei o la e te i totonu o se potu faatalitali.
O le faatalitali i le Alii e aofia ai le faatinoga. Ua ou aoaoina i le aluga o tausaga e faateleina lo tatou faamoemoe ia Keriso pe a tatou auauna atu i isi. O le auauna atu e pei ona auauna atu Iesu, tatou faateleina masani lo tatou faamoemoe ia te Ia.
O le tuputupu ae patino e mafai e se tagata ona ausia i le taimi nei a o faatalitali ai i le Alii ma Ana folafolaga, o se elemene taua tele, ma le paia o Lana fuafuaga mo i tatou taitoatasi. O loo matua manaomia lava saofaga e mafai e se tagata ona faia i le taimi nei e fesoasoani ai i le fausiaina o le Ekalesia i le lalolagi ma ia faapotopoto ai Isaraelu. O le tulaga o le faaipoipoga e le faatatau lea i le gafatia o se tasi e auauna atu ai. E faamamaluina e le Alii i latou o e auauna ma faatalitali ia te Ia i le onosai ma le faatuatua.14
Lona fa, ua ofoina mai e le Atua le ola e faavavau i Ana fanau uma. O i latou e talia le meaalofa a le Faaola o le salamo ma ola ai i Ana poloaiga, o le a maua le ola faavavau, e ui ina latou te lei ausia ona uiga uma ma le atoatoaga i le olaga nei. O i latou o e salamo o le a latou iloa le saunia o le Alii e faamagalo, e pei ona sa Ia faamautinoa mai: “Ioe, ma o le tele o taimi e salamo ai lo’u nuu Ou te faamagalo ai i latou ia latou solitulafono faasaga mai ia te a’u.”15
Pe a oo ina mafaufauina mea uma, o le gafatia o se tagata, faanaunauga, ma avanoa i mataupu o le faitalia ma filifiliga, e aofia ai tulaga manaomia mo faamanuiaga e faavavau, o mataupu ua na o le Alii e mafai ona faamasinoina.
Lona lima, o lo tatou talitonuga mautinoa i nei faamautinoaga e faavae i lo tatou faatuatua ia Iesu Keriso o le ona ia le alofa tunoa e faatulaga sa’o ai mea uma e faatatau i le olaga nei.16 E maua faamanuiaga uma ua folafola mai, e ala ia te Ia o lē, e ala i Lana Togiola “na afio maualalo ifo ai i mea uma”17 ma ua “manumalo i le lalolagi.”18 “Ua afio o [Ia] i le itu taumatau o le Atua, e maua mai i le Tama ana aia o le alofa mutimutivale lea ua ia te ia mo le fanauga a tagata … ; o le mea lea, ua fautuaina ai e ia le faamoemoe o le fanauga a tagata.”19 I le faaiuga, “o le a faatumulia le au paia i lona mamalu … ma maua lo latou tofi”20 o “suli faatasi ma Keriso.”21
O lo matou faanaunauga, o le a fesoasoani nei mataupu faavae i tagata uma ua faateleina lo latou faamoemoe ia Keriso ma lagonaina ai se lagona uunai o le avea ai ma ni ō.
Aua lava nei galo o oe o se atalii/afafine o le Atua, lo tatou Tama Faavavau, nei ma le faavavau. E alofa o Ia ia te oe e mana’o le Ekalesia ia te oe ma e manaomia oe. Ioe, matou te manaomia outou! Matou te manaomia o outou leo, taleni, agalelei, ma le amiotonu.
Ua tele tausaga, sa matou talanoa ai e uiga i “talavou nofofua matutua,” “tagata matutua nofofua,” ma “tagata matutua.” O na ta’uga e mafai ona aoga pe a i tulaga tau le taitaiga i ni taimi ae e mafai ona suia ai e aunoa ma le mafaufauina le ala tatou te vaai atu ai i isi.
Pe o i ai se ala e aloese ai mai lenei uiga faaletagata lea e mafai ona tavavaeina mai ai i tatou mai le tasi ma le isi?
Sa talosaga mai Peresitene Nelson e faapea ia tatou faasino ifo ia i tatou lava o tagata o Le Ekalesia a Iesu Keriso o le Au Paia o Aso e Gata Ai. E foliga mai ua faasino lena mea ia i tatou uma, a ea?
Ua i ai i le talalelei a Iesu Keriso le mana e tuufaatasia ai i tatou. I le faaiuga e tele lo tatou tutusa nai lo o tatou eseesega. I le avea ai ma tagata o le aiga o le Atua, o i tatou uma o uso ma tuafafine. Sa ta’ua e Paulo “ua faia e [le Atua] nuu uma o tagata i le toto e tasi, ina ia nonofo ai tagata uma i le lalolagi.”22
Ia te outou peresitene o siteki, epikopo, ma taitai o korama ma tuafafine, ou te talosagaina outou ia mafaufau i tagata uma o lau siteki, uarota, korama, po o faalapotopotoga o ni tagata o le au paia o e e mafai ona saofaga ma galulue i ni valaauga ma fai so latou sao i le tele o auala.
O tagata uma ia tatou korama, faalapotopotoga, uarota, ma siteki ua i ai meaalofa na tuuina i ai e le Atua ma taleni e mafai ona fesoasoani ai e fausia Lona malo i le taimi nei.
Ia tatou valaau atu i o tatou tagata auai o e nofofua e auauna atu, siitia, ma aoao atu. Aua nei toe amana’ia manatu ma aitia tuai ia sa saofaga i nisi taimi ma le le faamoemoeina i o latou lagona o le tuuatoatasi, ma e le o i latou o ni ō, po o le faapea e le mafai ona galulue.
Ou te tuu atu la’u molimau i le faaiuga o lenei vaiaso o le Eseta a lo tatou Faaola o Iesu Keriso ma le faamoemoe e faavavau ua Ia tuu mai ia te a’u ma i tatou uma o e talitonu i Lona suafa. Ou te tuuina atu ai lenei molimau ma le lotomaualalo, i Lona suafa paia, o Iesu Keriso, amene.