Ua Ausia e Mekasini Manaoga i le Lalolagi Atoa

O le faatulagaina fou o le tolu o lomiga i le lalolagi atoa e amata ia Ianuari 2021, o mekasini a le Ekalesia o loo auina atu ai savali mai taitai o le Ekalesia e “tatau ai ma talafeagai,” e tusa ai ma le saunoaga a Elder Quentin L. Cook o le Korama a Aposetolo e Toasefululua. O mekasini fou mo tamaiti, autalavou, ma tagata matutua “ua i ai se mana faaleagaga ma faaleaoaoga faavae,” na ia saunoa ai. O autu e lagolago ai le mataupu aoaoina o le Sau, Mulimuli Mai ia te Au ma isi mataupu taua.

“O mekasini a le Ekalesia o ni punaoa taua e aoao ai e uiga i le talalelei a Iesu Keriso ma lagonaina se lagona o le auai i Lana Ekalesia,” na saunoa ai le Au Peresitene Sili i se tusi e faasilasila atu ai mekasini fou. “Matou te mananao i tagata o le ekalesia i soo se nofoaga ina ia lesitala ma talia lenei faatosinaga e lagolagoina e le faatuatua i o latou loto ma aiga.”

O le Liahona, mo tagata matutua; Mo Le Malosi o le Autalavou, mo le autalavou; ma o le Uo, mo le fanau, ua mafai nei ona faia mo:

Aiga pe tusa ma le 150 atunuu ina ia maua le avanoa e lesitala ai i mekasini e faapitoa lava mo tamaiti ma le autalavou.
O mekasini ia maua faatele atu i nisi o eria ma gagana.
E maua e tagata o le Ekalesia ia savali e tutusa ma le lotogatasi e ala i mekasini i le lalolagi atoa.
O tusiga o mekasini ia faateleina ona maua i polokalama faa eletonika ma lomiga.

Ua uunaia taitai i le lotoifale ina ia tuuina atu i tagata fou liliu mai se lesitala mo le tasi le tausaga i le mekasini e talafeagai mo o latou tausaga ma ia totogi foi se lesitala mo se Uo po o le Mo Le Malosi o le Autalavou a tamaiti ma le autalavou o e auai i le lotu e aunoa ma o latou matua.¹