Elder S. Mark Palmer

Au Peresitene o Fitugafulu

O Elder S. Mark Palmer o le a faavavau ona faafetai mo le olioli ma le faamoemoe o loo maua i auaunaga ma sauniga o le malumalu. O se valaauga e auauna atu i vaiaso taitasi ma lona faletua o Jacqueline i le Malumalu o Dallas Texas, i se tasi o taimi aupito pisi o o laua olaga na fesoasoani ia Elder Palmer e toe faatulaga lelei ai ana mea e faamuamua. O le auauna atu i le malumalu na aoaoina ai o ia i le ositaulaga, fuafuaina, ma le paleni ma sa fesoasoani ia te ia e manatua ai ana feagaiga ma avea ai ma se tane ma se tama e sili atu ona lelei. O le auauna atu i le malumalu na faamanatu atu ai ia te ia le natura e faavavau o le aiga ma se faatasiga olioli i le lumanai ma e pele ia i tatou, e aofia ai se tuafafine na maliu i le tasi o lona tausaga.

O le auauna atu i le malumalu sa fesoasoani foi ia Elder Palmer e saunia ai faaleagaga mo valaauga faaleperisitua i le lumanai, e aofia ai le avea ma se uso o le Au Peresitene o Fitugafulu. O Elder Palmer, na lagolagoina i le aso 3 o Aperila, 2021, o le a amataina ana tiutetauave fou i le aso 1 o Aokuso, 2021.

Sa soifua mai Stanley Mark Palmer i le aso 11 o Fepuari, 1956, i Te Puke, Bay of Plenty, Niu Sila, ia Kenneth ma Jill Palmer. Sa auai lona aiga i le Ekalesia a o laitiiti o ia.

Ina ua uma ona auauna atu i se misiona talai i le Misiona a Niu Sila Ueligitone, sa ia maua se faailoga tikeri i pisinisi i le Iunivesite o Aukilani i le 1979 ma se matuaofaiva o le pulega o faapisinisi i le Iunivesite o Polika Iaga i le 1982. A o nofo ai i Provo, Iuta, ISA, sa ia feiloai ai i se faifeautalai ua maea lana misiona e suafa ia Jacqueline Wood. Sa faaipoipo i la’ua i le Malumalu o Sate Leki i le 1981. E toaono alo ma fanau a fanau e toaiva a le au Palmer.

O Elder Palmer o le peresitene o SMP Ventures, o se kamupani o le atiina ae o fanua sa ia faavaeina i Austin, Texas, ISA. Sa ia auauna atu o se epikopo, peresitene o se siteki, peresitene o le Misiona a Uosigitone Spokane (2009–12), peresitene le tumau o le Misiona a Ausetalia Sini i Saute (2014), ma se Fitugafulu Eria.

Sa lagolagoina o ia o se Fitugafulu o le Au Pulega Aoao i le aso 2 o Aperila, 2016, ma o loo auauna atu nei o se peresitene o le Eria a Aferika i Saute.