Elder Sean Douglas

Fitugafulu o le Pulega Aoao

A o avea ma se faifeautalai talavou na auauna atu i le Misiona a Chile Concepcion, sa amata e Sean Douglas lana auaunaga i nuu i tua. O lana “soa maoae muamua mai Tile ma o lona taitai foi lea, sa pei o le emo o le uila lana tautala faaSipaniolo.” Ina ua mavae le tolu masina i le atunuu o Amerika i Saute, sa tauivi pea Elder Douglas ma le faaSipaniolo.

O le lotovaivai ma le misia o le aiga na velosa’i ai o ia i se masalosaloga loloto ma tata’i ifo ai o ia i ona tulivae. “Ou te le o faia se mea lelei,” sa ia tatalo ai. “E foliga mai ou te le o faaaafiaina se tasi.”

Sa faatumulia lona loto i se fesili mumu mai luga: “O e i ai iinei mo Au, pe o e i ai iinei mo oe?”

I le taimi lea, sa ia faitonu ai ma le Atua e faagalo o ia lava ma taumafai pea. “O lena lava po sa ou moemiti ai i le faaSipaniolo,” o lana tala lea.

O le aso na sosoo ai sa faigofie atu mea uma. “Sa lelei teisi atu la’u tautala. Sa mafai ona ou malamalama teisi,” o lana tala lea. “O le misiona na faatele’a’iia ai la’u molimau i le mana o le tatalo ma afai e te alu ma fai le mea ua poloai mai ai le Alii, na te saunia i taimi uma se ala mo oe.”

O lena filosofia na taialaina ai le vaega o totoe o lona olaga.

Sa soifua mai Sean Douglas i le aso 1 Me, 1964, i le Aai o Sate Leki, Iuta, ia Barbara ma Leo Douglas. Na ola ae i le tuaoi i sasae o le Vanu o Sate Leki, sa ia faaipoipo ai ia Patricia Ann Dickson—o lana manamea i le aoga maualuga—i le Malumalu o Sate Leki ia Iuni 1985. E toafa le la fanau.

Na faauu Elder Douglas i le tausitusi mai le Iunivesite o Iuta ma sa galue o se suetusi a o lei faaaluina le tolu sefulu tausaga ma le Faalapotopotoga a Huntsman, na iu lava ina auauna atu o se sui peresitene o mea tautupe a le ofisa.

O lona faatuatua ma le faalagolago i le Alii, na tamauina i le taimi o lona talavou ma le misiona, sa taialaina ai o ia i le taimi o le galuega o le siitia atu i Egelani, lea sa ia auauna ai o se epikopo talavou, ma Houston, Texas, ISA. Sa avea o ia ma peresitene o le Misiona a Peru Lima i Saute mai le 2012 e oo i le 2015. Sa auauna atu Elder Douglas o se Fitugafulu Eria a o lei oo i lona valaauga i le taimi nei.