Elder Alfred Kyungu

Fitugafulu o le Au Pulega Aoao

I le 1991, o Alfred Kyungu o se tamaitiiti aoga e 24 tausaga le matua i le Iunivesite o Lubumbashi i le Ripapelika Temokarasi o Congo, sa nonofo faatasi ma le uso o lona tama, o Polydor Ngoy. I se tasi aso na tau atu ai e le uso o lona tama ia te ia e uiga i se taimi ua faatulagaina ma nisi o faifeautalai mai le Ekalesia a Iesu Keriso o le Au Paia o Aso e Gata Ai.

“Aua e te misia lenei avanoa lelei,” na fai atu ai le uso o lona tama ia te ia.

E lei leva ae feiloai i laua ma le uso o lona tama e le aunoa ma se ulugalii matutua faamisiona mai Iuta. I le taimi muamua, sa musu Alfred e auai i se lotu fou, ma mai se isi atunuu. Ae ui o lea, i le mavae ai o le ono masina o talanoaga ma tali i le tele o fesili, na papatisoina Alfred ma le uso o lona tama i le aso 21 o Setema, 1991.

I nisi o itu, o le auai i le Ekalesia sa le o se suiga faigofie. O le toatele o tagata i le nuu sa masalosalo i le Ekalesia ma mafaufau pe o le Au Paia o Aso e Gata Ai o ni tagata o taumafai e maua se malamalama faalelotu i le na ona tatalo, pe o ni Kerisiano moni lava. O le mea e lelei ai, o tagata o la latou paranesi laitiiti sa agalelei ma talileleia. Sa maua e Elder Kyungu ma le uso o lona tama le malosiaga mai le “aoaoina o i la’ua i mataupu faavae na aoaoina e Iesu Keriso.”

Sa faaipoipo Elder Kyungu ia Lucie Kabulo Malale i le 1998. Na faamauina i la’ua mulimuli ane i le Malumalu o Johannesburg Aferika i Saute i le 2004. O i laua o ni matua o ni afafine se toalua ma se atalii e toatasi.

Sa soifua mai Alfred Kyungu Kibamba i Kamina, Ripapelika Temokarasi o Congo, i le aso 31 o Oketopa, 1966, ia Domitien Kyungu Nkimba ma Celestine Ngoy Mbuyu.

Sa maua e Elder Kyungu se faailoga tikeri ma se faailoga o le matuaofaiva i le saienisi faaagafesootai ma sootaga faavaomalo mai le Iunivesite o Lubumbashi. Sa faigaluega o ia i le tele o tofiga faalemalo mo le Ripapelika Temokarasi o Congo ma mo le Ekalesia o se taitai faamaopoopo mo Sseminare ma inisitituti ma o se pule o talafaasolopito o aiga.

O se Fitugafulu Eria i le taimi o lona valaauga, sa ia auauna atu foi o se faiaoga o le inisitituti, faiaoga o le Aoga Sa a le uarota, fesoasoani i se au epikopo, fautua maualuga, fesoasoani i se au peresitene o le siteki, ma le Peresitene o le Misiona a le Ripapelika Temokarasi o Congo Mubji-Mayi mai le 2016 i le 2019.