Elder Clark G. Gilbert

Fitugafulu o le Pulega Aoao

E toatele ua iloa Elder Clark G. Gilbert o le peresitene o le BYU–Pathway Worldwide ma sa avea foi ma Peresitene o le Iunivesite o Polika Iaga–Idaho. E toatele foi ua iloa o ia mo lana atinaega fatufatuai o polokalama o aoaoga maualuluga i luga o le initoneti i faalapotopotoga uma e lua.

Ua tuuina atu e Elder Clark ni auaunaga anoa i le Ekalesia —e fesoasoani ai i alii talavou i le aai i le lotoifale o Boston, Massachusetts, ISA— mo le sauniaina o ia e faaaoga ni avanoa faaleaoaoga i ni aofia e tetele atu. Na oo mai lena avanoa e auauna atu ai a o pisi o ia i le aoga maualuga ma le tausiga o se aiga talavou.

“O na alii talavou sa lei i ai i taimi uma ni lagolago se tele. Sa avea i latou ma se vaega o o matou olaga, ma sa oo ina matou alolofa ia i latou,” na ia saunoa ai. “Sa ou aoao e faalogo i le Alii ma iloa ai o loo i ai o Ia i o latou olaga. Sa mafai ona ou lagona atu o loo Ia fai mai ia te au le mea e tatau ona ou faia mo i latou. ”

Na saunoa Elder Gilbert na aoaoina o ia e le Alii e uiga i manaoga o isi tagata. “Sa le na o Lona saunia o au mo le aoga, ae sa Ia faaali mai ia te au le mea e mafai ona Ia faia i olaga o tagata i se tulaga loloto, ma patino.”

Sa soifua mai Clark Gordon Gilbert i Oakland, Kalefonia, ISA, i le aso 18 o Iuni, 1970, ia Paulo ma Susan Gilbert. Sa ia ola ae i Phoenix, Arizona, ISA. Ina ua uma ona auauna atu i le Misiona a Iapani Kobe, sa ia faaipoipo atu ia Christine Calder i le 1994 i le Malumalu o Sate Leki. E toavalu le la fanau.

Na maua e Elder Gilbert se faailoga tikeri i sootaga faavaomalo i le 1994 mai le Iunivesite o Polika Iaga, se faailoga o le matuaofaiva i suesuega Faa-Asia i le 1995 mai le Iunivesite o Stanford, ma se doctor i le pulega faapisinisi i le 2001 mai le Iunivesite o Harvard. Sa faigaluega o ia o se polofesa lagolago i le aoga faapisinisi a Harvard, se sui peresitene faaakatemia i le BYU Idaho, ma le peresitene ma le pule faatonusili o le Deseret News ma le Deseret Digital Media.

O se Fitugafulu Eria i le taimi o lona valaauga, na auauna atu ai Elder Gilbert o se peresitene o le korama a toeaina, fesoasoani i se au peresitene o Alii Talavou a le siteki ma le au peresitene o le siteki, ma le epikopo.