O Le Malaga Patino a se Atalii/Afafine o le Atua
I le avea ai ma fanau o le feagaiga a le Atua, tatou te alolofa, faamamalu, faafailele, puipuia, ma talileleia na agaga o loo o mai mai le muai olaga.
Na tofu aafia i tatou taitoatasi i le faama’i oti i le lalolagi atoa, a o masi’i ma le le faamoemoeina o se aiga ma uo i talaatu o le olaga nei. Se’i ou faailoa atu le toatolu tatou te matua misia, e avea ma sui o i latou tatou te matua alolofa i ai.
O Uso Philippe ma Tuafafine Germaine Nsondi lenei. O Uso Nsondi, sa auauna atu o se peteriaka o le Siteki a Pasavili Kongo i le taimi na maliu ai. O ia o se fomai o sēe sa faasoa atu ma le agalelei ana taleni i isi.1
O Tuafafine Kalala Ruano de Villareal mai Tukana, Ekuatoa. Sa ia taliaina le talalelei toefuataiina i le 34 o ona tausaga ma o se taitai alofagia. Sa faatofa atu i ai lona aiga i le lagiina o le viiga sa ia fiafia lava i ai, “Ua Ou Iloa Lo’u Faaola. ”2
O Uso Ray Tuineau lea mai Iuta, ma lona aiga matagofie. Fai mai lona faletua o Iulieta, “Ou te manao i [a’u tama] e [manatua o lo latou tama sa taumafai lava e faamuamua le Atua.”3
Na fetalai mai le Alii, “Ia outou nonofo faatasi i le alofa, ia outou fetagisi ai i le toesea o i latou o e e oti.”4
A o tatou fetagisi, tatou te olioli foi i le Toetu mamalu o lo tatou Faaola. Ona o Ia, e faaauau ai pea e a tatou uo ma e pele ia i tatou la latou malaga faavavau. Pei ona sa faamatala mai e Peresitene Iosefa F. Samita, “E le mafai ona tatou faagaloina i latou; e le uma foi lo tatou alolofa ia i latou. … Ua latou agaigai i luma; o loo tatou agaigai i luma; o loo tatou tuputupu ae e faapei ona latou tuputupu ae.”5 Na saunoa mai Peresitene Russell M. Nelson: “O o tatou loimata o le faanoanoa … o le a liua i loimata o le faamoemoe.”6
Ua Tatou Iloa e uiga i le Olaga a o lei Fananau Mai
O le a le gata ina faateleina e la tatou vaaiga faavavau lo tatou malamalama ia i latou o e o faaauau pea la latou malaga i talaatu o lenei olaga, ae e talaia ai foi lo tatou malamalama e uiga ia i latou e fou i la latou malaga ma ua faatoa ulufale mai i le olaga nei.
O tagata taitoatasi e sau i le lalolagi, o se atalii po o se afafine tulagaese o le Atua.7 E lei amataina la tatou malaga i le fanau mai. Ae tatou te lei fananau mai, sa tatou faatasitasi i se lalolagi o tapenaga lea na tatou “maua ai a [tatou] lesona muamua i le lalolagi o agaga.”8 Na ta’u atu e Ieova ia Ieremia, “Na a’u iloa oe a o lei faia oe e au i le manava; na au faapaiaina oe a o lei fanau mai oe.”9
Atonu e fesili nisi pe na amata le olaga i le faufauina o se ‘alu’alutoto, pe pe a amata ona tata le fatu, pe o le taimi ua mafai ai ona ola le pepe i fafo o le manava, ae mo i tatou, e leai se fesili aua o afafine ma atalii agaga o le Atua o loo i ai i a latou malaga patino e o mai i le lalolagi e maua se tino ma le poto masani i le olaga faitino.
I le avea ai ma fanau o le feagaiga a le Atua, tatou te alolofa, faamamalu, faafailele, puipuia, ma talileleia na agaga o loo o mai mai le muai olaga.
O Le Sao Ofoofogia a Tamaitai
Mo se tamaitai, o le maua o se tamaitiiti e mafai ona avea o se osigataulaga tele faaletino, faalelagona, ma faaletamaoaiga. Tatou te alolofa ma faamamalu i tamaitai maoae o lenei Ekalesia. Faatasi ai ma le atamai ma le poto, tou te tauaveina avega mamafa o o outou aiga. Tou te alolofa i isi. Tou te auauna atu. Tou te ositaulaga. Tou te faamalolosia le faatuatua, auauna atu ia i latou e le tagolima, ma e tele lo outou sao i nuu.
O Le Tiutetauave Paia o le Malupuipuia o le Ola
I le tele o tausaga ua mavae, i le loloto o ona lagona popole i le tele o faapau pepe i le lalolagi, sa saunoa ai Peresitene Gordon B. Hinckley i tamaitai o le Ekalesia ma upu e talafeagai mo i tatou i aso nei. Na ia saunoa: “Outou na o ava ma tina o taula o le aiga. Tou te fanauina fanau. Se tiutetauave paia ina a tele naua. … O le a le mea ua tupu i lo tatou talisapaiaina o le paia o le ola o le tagata? O le faʻapau pepe o se mea faatiapolo, mataga ma moni ma inosia, lea ua lilofia ai le lalolagi atoa. Ou te aioi atu i tamaitai o lenei Ekalesia e aloese mai ai, ia tutu i luga aʻe, ia taumamao ese mai na tulaga fetuutuunai ia e foliga mai ai e manaomia. Atonu e i ai ni nai tulaga e ono mafai ai ona tupu, ae e matuai faatapulaaina lava.10 … O outou o tina o atalii ma afafine o le Atua, e paia o latou olaga. O le malupuipuia o i latou o se tiutetauave foaʻi mai le Atua lea e le mafai ona tuumamaina ma faataatia ese.”11
Na faasoa mai e Elder Marcus B. Nash ia te au le tala i se tamaitai e 84-tausaga-le-matua, i le taimi o lona faatalanoaga mo lona papatisoga, sa ia “faailoa ane se faapau pepe [i le tele o tausaga ua mavae].” Faatasi ai ma se lagona ootia, sa ia fai mai, “Sa ou tauaveina le avega o le faapau o se tamaitiiti, i aso uma o lo’u ola mo le fasefulu ono tausaga. … E leai se mea sa ou faia na mafai ona aveesea ai le tiga ma le ta’usalaina. Sa leai so’u faamoemoe seia vagana ina ua aoaoina au i le talalelei moni a Iesu Keriso. Sa ou aoaoina le auala e salamo ai … ma sa faafuasei ona faatumulia au i le faamoemoe. Sa iu ina ou iloa e mafai ona faamagaloina au pe afai ou te salamo moni i a’u agasala.”12
E maeu lo tatou faafetai mo meaalofa paia o le salamo ma le faamagaloga.
O Le a se Mea e Mafai ona Tatou Faia?
O le a lo tatou tiutetauave o ni soo toafilemu o Iesu Keriso? Ia tatou ola i poloaiga a le Atua, aoao atu i a tatou fanau, ma faasoa atu i isi o e naunau e faalogo.13 Ia tatou faasoa atu o tatou lagona loloto e uiga i le pa’ia o le ola ia i latou o e faia tonu i totonu o nuu. Atonu latou te le talisapaia atoatoa o tatou talitonuga, ae tatou tatalo ia latou malamalama atili i le mafuaaga, mo i tatou, o nei faaiuga e matua mamao lava ma le mea e manao i ai se tagata mo lona lava olaga.
Afai o faatalitali le fanau mai o se tamaitiiti e lei mafaufauina, ia tatou aapa atu i ai ma le alofa, faamalosiau, ma, pe a manaomia, fesoasoani tautupe, faamalosia o se tina ina ia tuu lana tama e fanau mai, ma faaauau lana malaga i le olaga nei.14
O Le Matagofie o le Vaetamaina
I lo matou aiga, sa matuai le mafuatiaina le faamanuiaina i le luasefulu tausaga talu ai, sa iloa ai e se talavou e 16-tausaga-le matua, ua ma’ito. Sa lei faaipoipo i la’ua ma le tama o le pepe ma la te lei manatu e mafai ona la agai i luma faatasi. Sa talitonu le tamaitai talavou e taua le ola o loo ia tauaveina. Sa fanauina e ia se pepe teine ma faatagaina se aiga amiotonu e vaetamaina o ia e fai mo i latou. Mo Bryce ma Jolinne, o se tali lea ia la’ua tatalo. Sa la faaigoaina o ia ia Emily ma sa la aoao o ia ia faalagolago i lona Tama Faalelagi ma i Lona Alo o Iesu Keriso.
Sa ola a’e Emily. E maeu lo matou faafetai ina ua alolofa faamama’i Emily ma le tama a le ma tama, o Christian, ma sa faaipoipoina i le maota o le Alii. Ua i ai le tama teine a Emily ma Christian lava ia.
Na tusia talu ai nei e Emily: “I nei masina talu ai o le ma’itaga, sa ou maua se taimi ou te tomanatu ai i mea na tutupu [o] lo’u lava olaga. Sa ou mafaufau i lo’u tina na ou fanau mai ai, o le sa na o le 16 ona tausaga. A o ou oo i tiga ma suiga na aumaia e le ma’itaga, sa le mafai ona taofia lo’u mafaufau i le faigata atonu sa i ai i le talavou e 16. … Ua maligi nei o’u loimata a ou mafaufau i lo’u tina na ou fanau mai ai, o le sa iloaina sa le mafai ona ia tuuina mai le olaga [sa ia manao ai mo au ma tuuina atu ai ma le le manatu faapito] a’u ina ia vaetamaina. E le mafai ona ou malamalama i le mea na oo i ai o ia i na masina e iva—a o matauina o ia e mata faamasinosino a o suia lona tino, o aafiaga faatalavou ua ia misia, ma le iloa ai o le taunuuga o lenei tiga o le alofa faatina, o le a ia tuuina atu lana tama i lima o se tasi. Ou te matua faafetai mo lana filifiliga e lei manatu faapito, na te lei filifili e faaaoga lana faitalia i se ala o le a aveesea ai lo’u lava ola.” Sa faaiu e Emily, “Ou te matua faafetai lava i le fuafuaga paia a le Tama Faalelagi, mo o’u matua e le matalitonuina, o e [sa alolofa ma tausia au], ma mo malumalu ua mafai ona faamauina ai i o tatou aiga mo le faavavau.”15
Na “tago [le Faaola] i se tamaitiiti, ua faatu ia te ia i o latou luma, ua na siitia o ia i ona luma, ona fetalai atu lea ia te i latou, Ai se talia se tama itiiti [o nei] tamaiti i lo’u nei igoa ua talia e ia o a’u.”16
Pe A Le’i Iloaina Lava ni Amioga Amiotonu
Ou te momoli atu o’u alofa ma le nutimomoia mo ulugalii amiotonu o e, e toatele e le mafai ona maua ni a latou lava fanau, latou te matua faamoemoe ma le naunautai, ma i na tamaitai ma alii o e e lei maua le avanoa e faaipoipo ai e tusa ai ma le tulafono a le Atua. O miti e lei faataunuuina o le olaga e faigata ona malamalama i ai pe afai e vaavaai atu mai na o le vaaiga faaleolaga nei. I le avea ai o se auauna a le Alii, ou te folafola atu a outou faamaoni ia Iesu Keriso ma a outou feagaiga, o le a outou maua faamanuiaga tauia i lenei olaga ma o outou manaoga amiotonu i le faavavau i le taimi faatulagaina a le Alii.17 E mafai ona i ai le fiafia i le malaga o le olaga nei tusa lava pe lei faataunuuina o tatou faamoemoega amiotonu uma.18
A mavae ona fanau mai, e faaauau pea e le fanau ona manaomia la tatou fesoasoani. O nisi latou te matua manaomia vave. O tausaga taitasi e ala i epikopo magafagafa ma a outou saofaga limafoai mo taulaga anapogi ma tupe o fesoasoaniga alofa, ua faamanuiaina ai olaga o le miliona ma miliona o fanau. Na fofogaina mai talu ai nei e le Au Peresitene Sili se faaopoopoga o le 20 miliona tala e lagolago atu ai i le UNICEF i a latou taumafaiga mo le lalolagi atoa e tuuina atu ai tui puipui e lua piliona.19 E alofagia fanau e le Atua.
O Le Faaiuga Paia ina ia Maua se Tamaitiiti
Ona o lena tulaga, e oo lava i nisi o atunuu aupito maumea o le lalolagi, e toaitiiti ni fanau ua fananau mai.20 “O le poloaiga a le Atua i Lana fanau ia fanafanau ma uluuluola i le lalolagi, ua faamalosia ma faatumauina.”21 O le taimi e fanau ai se tamaitiiti ma pe toa fia foi le aofai o le fanau o ni faaiuga faalilolilo lea e faia i le va o se tane ma le ava ma le Alii. Faatasi ai ma le faatuatua ma tatalo, o nei faaiuga paia e mafai ona avea ma aafiaga matagofie, faalefaaaliga.22
Ou te faasoaina le tala i le aiga o Laing o Kalefonia i Saute. Na tusia e Tuafafine Rebecca Laing:
“I le taumafanafana o le 2011, sa foliga mai ua matua atoatoa le olaga o lo matou aiga. Sa ma faaipoipo fiafia ma e toafa le ma fanau---9, 7, 5, ma le 3 tausaga. …
“O o’u maitaga ma le fanauina [sa] matuai maualuga le tulaga lamatia … [Ma] sa ma lagonaina le matua faamanuiaina i le i ai o se fanau e toafa, [ma le mafaufau] ua atoa lo matou aiga. Ia Oketopa, a o faalogologo atu i le konafesi aoao, sa ou lagonaina se faalogona e le mafaaseseina, e tatau ona toe maua se isi pepe. A o ma manatunatu loloto ma LeGrand ma tatalo, … Sa ma iloaina e ese se fuafuaga a le Atua mo i ma’ua nai lo lea na ma faia mo i ma’ua lava.
“O se isi ma’itaga faigata ma le fanauina, ae sa faamanuiaina i ma’ua i se pepe teine lalelei. Sa ma faaigoaina o ia ia Brielle. O se vavega lava o ia. I nai minute talu ona fanau mai o ia, a o i ai pea i le [potu fanau], sa ou faalogoina se leo e le mafaaseseina o le Agaga: ‘Toe tasi lava.’
“Tolu tausaga mulimuli ane, ae toe tupu foi se isi vavega, o Mia. O Brielle ma Mia o se olioli maoae lea mo lo matou aiga. Na ia faaiuina “O le tatala atu o le loto i le taitaiga a le Alii ma mulimuli i Lana fuafuaga mo i tatou, o le a aumaia ai pea lava le fiafia sili atu nai lo le … faalagolago i lo tatou lava malamalama.”23
E alofa le Faaola i tamaiti faapelepele taitoatasi.
“Ua ave foi e Ia o latou tamaiti taitoatasi ma faamanuia ia te i latou. …
“Ma … sa tetepa ae o latou mata e faasaga i le lagi, ma sa latou vaai i agelu ua afifio ifo mai le lagi … i le totonugalemu o se afi; ma sa latou afifio ifo i lalo ma lio faataamilo ia tamaiti laiti, … ma sa auauna atu agelu ia te i latou”24
Ou te molimau atu o lau lava malaga patino o se atalii/afafine o le Atua e lei amataina mo oe ina ua faatoa ulu atu i ou māmā le ea o le lalolagi, ma o le a le muta foi pe a uma lau toe manava o le olaga nei.
Tau ina ia tatou manatua pea lava o atalii/afafine agaga taitasi o le Atua o loo sau i le lalolagi i lana lava malaga patino.25 Ia tatou talileleia i latou, puipuia i latou, ma alolofa e le aunoa ia i latou. A o outou taliaina nei fanau faapelepele i le suafa o le Faaola ma fesoasoani ia i latou i la latou malaga faavavau, ou te folafola atu o le a faamanuiaina outou e le Alii ma faatumulia outou i Lona alofa ma Lana faamaoniga i o outou luga. I le suafa o Iesu Keriso, amene.