Elder Paul V. Johnson

Au Peresitene o Fitugafulu

O se tasi o lesona taua na aoao mai e Elder Paul V. Johnson i le tele o tausaga sa galue ai i a’oga a le Ekalesia e faapea, mo i latou o e tausia a latou feagaiga, e tausia e le Alii Ana folafolaga—e tusa lava po o a luitau o le olaga.

“E ui ina tatou feagai ma le le mautonu i ni vaega faapitoa o le olaga, ae ua ia i tatou folafolaga e mautinoa,” na ia saunoa talu ai nei. “E le mafai ona tatou faatagaina ni faamoemoega le mautonu e luluina ai i tatou mai folafolaga faapitoa a le Alii.”¹

I le taimi nei, o loo fetaiai fanau a le Atua ma se faamai oti i le lalolagi atoa, fevaevaeaiga o nuu, ma se lologa o ala o faasalalauga faaagafesootai. Ae a o tatou ola ai i a tatou feagaiga, na saunoa ai Elder Johnson, ua ofo mai e le Alii ia i tatou le taitaiga, mana, ma le faamafanafanaga.

I le aso 3 o Aperila, 2021, sa lagolagoina ai Elder Johnson o se tasi o le Au Peresitene o Fitugafulu, e amata faamamaluina i le aso 1 o Aokuso, 2021. Sa auauna atu Elder Johnson o se Komesina lona 16 o le Ofisa o Aoga a le Ekalesia mai le 2008 i le 2015, ma sa toeamatalia lena tulaga i le 2019.

Sa soifua mai Paulo Vere Johnson i le aso 24 o Iuni, 1954, i Gainesville, Florida, ISA, ia Vere ma Winefred Johnson. Ina ua mavae le tuputupu ae i Logan, Iuta, ISA, sa auauna atu o ia i le misiona a Nouei Oslo. I le maea ai o lana misiona, sa ia faaipoipo ai ia Leslie Jill Washburn i le Malumalu o Logan Iuta i le 1976. E toa 9 o la’ua alo ma fanau a fanau e 40.

Sa maua e Elder Johnson se faailoga tikeri i le zoology/botany mai le Iunivesite o Polika Iaga i le 1978, o se matuaofaiva o aoaoga mai le BYU i le 1982, ma se faailoga o le fomai faaleaoaoga tau tekinolosi i le Iunivesite o le Setete o Iuta i le 1989.

Sa faiaoga o ia i le seminare mo le 12 tausaga i Arisona ma Iuta a o lei galue i se vaega o le atinaega o mataupu aoaoina eseese ma tofiga faaleautaitai mo le ofisa o aoga a le Ekalesia i le Aai o Sate Leki.

Na lagolagoina Elder Johnson o se tasi o le Korama Muamua a Fitugafulu i le aso 4 Aperila, 2015. Na avea foi o ia ma Fitugafulu Eria, fesoasoani i se au peresitene o le siteki, fautua maualuga, epikopo, peresitene o Alii Talavou a se uarota.