Elder Vaiangina Sikahema

Fitugafulu o le Au Pulega Aoao

Mai le taimi na amata ai e Vaiangina (Vai) Sikahema ona tosina mai le vaai a i latou e pikia au taaalo a le kolisi, o ia o se tagata mua i le lakapi a le aoga maualuga i Arisona, ISA, sa fiafia ia te ia tagata lautele.

Sa matuai maoae o ia i le lakapi i le Iunivesite o Polika Iaga, sa tauva ai i le au siamupini a le Cougars a le atunuu 1984. Sa ia taalo faapolofesa mo le tele o au Liki Lakapi a le Atunuu ma e faalua ona faaigoa i le Pro Bowl a o lei suia i se galuega faamanuiaina o se tagata faasalalau talafou.

Ae o le “tagata taalo lakapi” po o le “TV anchorman” sa le o le tagata tauagafau 58-tausaga lea sa i ai.

“Ou te lei faalagolago lava i le avea ai ma se tagata taalo faapolofesa po o se tagata faasalalau e fai mo’u faasinomaga,” na fai mai ai Elder Sikahema, o le sa lagolagoina o se Fitugafulu o le Au Pulega Aoao i le aso 3 o Aperila, 2021. “Ou te faailoa a’u muamua o se atalii o le Atua ma se Au Paia o Aso e Gata Ai.”

O ia foi o se tane, tama, ma se e umia le perisitua—o faasinomaga uma e faavavau.

Sa soifua mai i le aso 29 o Aokuso, 1962, i Nukualofa, Toga, ia Sione ma Ruby Sikahema, o Elder Sikahema sa ola ae i se aiga sa faauigaina i le aiga ma le faatuatua. O ona tuaa o nisi o tagata muamua i Toga na auai i le Ekalesia.

O le tuputupu ae i Mesa, Arisona, sa ia faataatia ese ai sauniuniga e avea ma se tama fusu faapolofesa ina ua ia mauaina ana taleni i le lakapi. Ina ua ia taliaina se sikolasipi e taalo i le BYU, sa lei fuafua o ia e auauna atu i se misiona talai.

“Ae sa ou maua au lava o faatasi ma ni alii talavou o e sa matuai tautino atu e ola i le talalelei, ma sa ou manao ia avea atili e faapei o i latou,” o le tala lea a Elder Sikahema.

I le 1982 sa ia laa ese ai mai lakapi a le kolisi ina ia auauna atu i le Misiona o le Aai o Dakota i Saute. I le toe foi atu ai i le BYU ina ua maea lana misiona, sa ia feiloai ai ia Keala Heder, o le Hawaii. Sa faaipoipo i laua i le malumalu o Mesa Arisona i le 1984. O le au Sikahema o matua o se fanau e toafa.

A o lei avea ma se Pulega Aoao, sa auauna atu Elder Sikahema o se peresitene o Alii Talavou a le uarota, epikopo, faatonu faarisone o le va i fafo, fesoasoani i le au peresitene o le misiona, peresitene o le siteki, ma le Fitugafulu Eria.