Susan H. Porter

Fesoasoani Muamua i le Au Peresitene Aoao o le Peraimeri

Ina ua maliu lona toalua, o Elder Bruce D. Porter, o se Fitugfulu o le Au Pulega Aoao, i se aafiaga o ona mama, ia Tesema 2016, sa na o Sister Susan Porter lava i lo latou fale i Nuumau, Iuta, ISA.

Mo le toeitiiti lua tausaga a o lei maliu o ia, sa malaga ai [Sister Porter] ma auauna atu faatasi ma [Elder Porter] a o avea o ia ma Peresitene o le Eria o Europa i Sasae.

I le avea ai ma se tina fou ua oti lana tane, sa ia tatalo mo se taitaiga. I se tasi aso sa ia vaaia ai se ata vali o le Faaola o talanoa atu i le fafine Samaria i le vaieli o Iakopo (tagai Ioane 4:6 – 26). Sa ia lagonaina le uunaiga a le Agaga ia faapea foi ona “nofo i aao o le Faaola ma aoao, ma o le a Ia aoao atu ia te oe.”

Sa taumafai Sister Porter e faalatalata atili atu i le Faaola, ma sa faamafanafanaina o ia e le Agaga Paia ma taitai atu o ia i luma.

“Ou te iloa sa siiina a’u,” o lana tala lea. “Sa ia te au le malosi ma le filemu e sili atu nai lo au lava.”

A o feagai tamaiti Peraimeri i le salafa o le lalolagi ma faigata, e manao Tuafafine Porter ia latou iloa e alofa le Atua ia i latou.

“Ana faatasi Iesu ma i latou i le taimi nei, o le a ia ave i latou taitoatasi ma faamanuia i latou ma tatalo mo i latou, e pei lava ona sa Ia faia mo fanau a sa Nifae i tausaga ua leva [tagai 3 Nifae 17:21]. Ou te faamoemoe o le a tatalo tamaiti taitoatasi mo Lana fesoasoani ma ole atu ia vaaia Lona aao agaalofa i o latou lava olaga.”

Sa soifua mai Susan Holland Porter i le aso 31 o Iulai, 1955, i le aai o Ponca, Okalahoma, ISA, ia Hans ma Charlene Holland. Sa faauu Sister Porter mai le Iunivesite o Polika Iaga ma se faailoga tikeri i le Igilisi. Sa faigaluega o ia o se fesoasoani i le potusuesue ma se faiaoga o le matematika.

Sa faaipoipo o ia ia Elder Porter i le 1977 i le Malumalu o Uosigitone D.C. E toafa le la fanau.

Na auauna atu Sister Porter i le aufono aoao a le Aualofa talu mai le 2017. O ona valaauga sa i ai muamua e aofia ai le fesoasoani i le au peresitene o le Aualofa a le siteki, peresitene o le Aualofa ma Tamaitai Talavou a le uarota, faiaoga o Aoaoga Faavae o le Talalelei, ma le taitai musika a le Peraimeri.