O Gaoioiga ua Faatino i Masini Faaneionapo ua Fatufatu ai le Lotogatasi
O mea na faatinoina i luga o masini faaonaponei na fatuina ai le tele o avanoa mo tagata o le Ekalesia e lagona ai le lotogatasi i faamoemoega ma le malamalama o le talalelei.
Uo i le Uo
I le lagolagoina ai e le Au Peresitene Aoao o le Peraimeri, o lenei gaoioiga mo tamaiti, matua, ma taitai na faatautaia e se tama ma se teineitiiti ma sa tautatala i a latou lava gagana masani o le gagana FaaPeretania, FaaSipaniolo, po o le FaaPotukale. O isi tamaiti na tuuina maia ni lipoti mai o latou nofoaga mai le salafa o le lalolagi. O le polokalama sa aofia ai tala faavitio e uiga ia Iesu Keriso, o se savali mo tamaiti mai ia Peresitene Russell M. Nelson, o se faatalanoaga ma Elder Ulisses Soares o le Korama a Aposetolo e Toasefululua e uiga i feagaiga o le papatisoga, ma talanoaga ma le Au Peresitene Aoao o le Peraimeri. Na aofia ai foi ma lesona o le tusia o ata, gaoioiga faatufugaga, ma pesepesega. Ua uma ona faaliliuina lea gaoioiga ma o loo maua mo le maimoaina i gagana faaopoopo. O le a maua foi i ni vaega pupuu mo le faaaogaina i suesuega o le talalelei i le fale.
Faamanatuina o Tamaitai Talavou
Sa talimalo le Au Peresitene Aoao o Tamaitai Talavou i se gaoioiga na faatinoina i luga o masini faaonaponei, lea na faailogaina ai le lona 150 tausaga o le faalapotopotoga a Tamaitai Talavou. Sa faasalalauina i gagana e 11. Na tuuina mai e Peresitene Nelson se savali na pu’eina, ma sa taliina e taitai o Tamaitai Talavou ni fesili i le gagana Peretania, Sipaniolo, ma le Potukale. Sa ofoina atu e tamaitai talavou i Nouei ma Taialani ia tatalo. I le 2020, sa uunaia ai tamaitai talavou i le salafa o le lalolagi e fai ni faatinoga auauna atu se 150.
RootsTech Connect
E silia ma le miliona tagata e fiafia i talafaasolopito o aiga na auai i le gaoioiga o le RootsTech ia Fepuari 2021. O le aofaiga aupito sili ona tele o tagata auai o loo avea pea ma se vaega tele o le faamanatuina o talafaasolopito o aiga i le lalolagi. Ua faafaigofieina e le RootsTech le atiina ae o se potutusi o le aoaoina i luga o masini faaonaponei lea o le a maua i le tausaga atoa. O Elder Jeffrey R. Holland o le Korama a Aposetolo e Toasefululua ma lona faletua, o Patricia, o failauga iloga mo le Aso Faaleaiga mo le Mauaina, o se vaega faaletausaga o le faapotopotoina.
Faaaliga Musika a le Autalavou
O le Faaaliga o Musika a le Autalavou i le lalolagi atoa a Mati na faaalia ai taleni ma molimau faamusika. O autalavou mai Niu Sila, Pasila, le Ripapelika o Tominiko, Siamani, Aferika i Saute, ma le atu Filipaina na talimalo i le polokalama, lea sa faavae i le autu a le autalavou i le 2021 o le Ekalesia, “O Se Galuega Tele” (tagai Mataupu Faavae ma Feagaiga 64:33–34). E faaopoopo atu i musika ma savali e faatotonugalemu ia Keriso mai a latou uo, sa faalogo foi le autalavou mai ia Peresitene Nelson; Peresitene Bonnie H. Cordon, Peresitene Aoao o Tamaitai Talavou; ma Peresitene Steven J. Lund, le Peresitene Aoao o Alii Talavou.
Avanoa mo Tamaitai
O Peresitene Jean B. Bingham, o le Peresitene Aoao o le Aualofa, o le tootoo autu o le felafolafoaiga i le Aso Faavaomalo lona lima a Tamaitai-i-Ona Tulaga Faalupe faaletausaga. Na lagolagoina e le afioga mamalu a le konesula o le Republic o Senegal, o lea gaoioiga i luga o masini faaonaponei na tuusao mai Los Angeles, Kalefonia, ISA. Sa tau atu e Peresitene Bingham i taitai o pisinisi faavaomalo ma tulagatofi e faapea, o aoaoga o le ki lea i le faamanuiaina mo tamaitai ma teine i le lalolagi atoa. Sa ia faasoa mai ai ni faataitaiga o tamaitai o e na faamanuiaina i le polokalama tusitusi ma le faitautusi a le Ekalesia i le Talalelei.
Konaseti o le Kerisimasi
Na auina mai e tagata o le Ekalesia ma uo o isi faatuatuaga mai le salafa o le lalolagi ni faatinoga o vitio o le Kerisimasi lea na faatonutonuina i konaseti ma faasalalauga i luga le ChurchofJesusChrist.org i le vaitau atoa o le Kerisimasi e avea o se vaega o le faalauiloaga faaletausaga o le Kerisimasi o le Faamalamalama le Lalolagi.