Faapito’au Faaosolilivau
E malamalama Iesu Keriso i le faapito’au ma ua i ai le mana e tuuina mai ai se vaifofo.
I le 1994, sa tagatavaleina ai se vaega faaleituaiga atoa i Aferika i sasae i le atunuu o Rawana lea sa afua i se isi itu ona o sootaga leaga i le va o ituaiga faalevaega malolosi ma ua leva ona nofoia. O se fuafaatatau i ai e silia ma le afa miliona ia tagata na fasiotia.1 O se mea ofoofogia, o le toatele o tagata o Rawana, ua fealofani ma ua uma ona foia o latou faafitauli,2 ae o loo faaauau pea ona tosinaina tagata Rawana i nei mea na tutupu.
I le sefulu tausaga talu ai, a o ma asiasi atu i Rawana, sa ma faama’itea ma lo’u toalua se talanoaga ma se tasi o pasese i le malaevaalele o Kigali. Na tutulu o ia i le faapito’au o le fasiotigatagata ma fesili mai ma le lotonutimomoia, “Afai e i ai se Atua, mata Na Te lē faia se mea e uiga i lea mea?” O lenei alii—ma faapea foi i le toatele o i tatou—o mafatiaga ma le faapito’au mataga, e mafai ona foliga e le ogatusa ma le moni o se Tama Faalelagi alofa, ma le agalelei. Ae e moni lava o Ia, e agalelei o Ia, ma e alofa atoatoa o Ia i Ana fanau taitasi. O lenei eseesega tele i nei manatu e lua e tutusa le matua ma le tagata ma e le mafai ona faamatalaina i se faaupuga puupuu e manatua ai, po o se fasifuaitau i luga o se apaapa o se taavale.
Ina ia amata ona faaagatonu, se’i o tatou vailia ituaiga eseese o faapito’au. Manatu i se aiga e maua e tamaiti taitasi se alauni i vaiaso taitasi mo le faia o feau i le fale. O le tasi atalii, o Sione, na faatau se lole; o se tasi afafine, o Ana, na sefeina lana tupe. Na mulimuli ane faatau e Ana sana lava uila. Sa mafaufau Sione e matua faapito’au lava le maua e Ana o se uila ae leai sana uila. Peitai o filifiliga a Sione na matua’ia ai le lē tutusa, ae lē o faatinoga faamatua. O le faaiuga a Ana na ositaulagaina ai le faamalieina vave i le ‘ai o le lole, e le’i uunaia ai lava se faapito’au ia Sione ona sa ia maua foi le avanoa lava lea e tasi e pei o lona tuafafine.
O a tatou faaiuga e mafai foi ona aumaia ai tulaga manuia po o tulaga e lē manuia. E pei ona sa faaalia mai e le Alii, “Afai e maua e se tagata le poto ma le tomai sili atu i le olaga lenei i lo se isi tagata e ala i lona filiga ma le usiusitai o lea maua e ia le avanoa tele atu i le lalolagi a sau.”3 Pe a oo ina maua e isi penefiti ona o a latou filifiliga maelega, e le mafai ona tatou faia se faaiuga sa’o faapea na faapito’au le faiga ae o lea sa tutusa lava o tatou avanoa.
O se isi faataitaiga o le faapito’au e tatupu mai i se tulaga na fetaiai ma lo’u toalua, o Ruth a o teineitiiti. I se tasi aso, sa iloa ai e Ruth na ave e lona tina lona uso laitiiti, o Merla, e faatau ni ona seevae fou. Sa faitio ia Ruth, “Mama, ua matuai faapito’au tele! O Merla na maua le pea seevae fou talu ai.”
Sa fesili le tina o Ruth, “Ruth, o ofi ou seevae?”
Sa tali atu Ruth, “Oi, ioe.”
Ona fai atu lea o le tina o Ruth, “Ua le o toe ofi seevae o Merla.”
Sa ioe Ruth e tatau i tamaiti taitasi o le aiga ona i ai ni seevae o ofi. E ui semanu e fiafia ia Ruth i ni seevae fou, ae o lona manatu sa faapito’au le faiga na i’uvale ina ua ia vaai atu e ala i mata o lona tina, i tulaga na i ai.
O nisi faapito’au e le mafai ona faamatalaina, o faapito’au e aunoa ma ni mafuaaga e faaosolilivau. O le faapito’au e sau mai le ola faatasi ma tino e le atoatoa, manu’alia, pe faama’ia. O le natura lava o le olaga faitino e mafua ai ona faapito’au. E i ai ni isi tagata e fananau mai e tele le tamaoaiga, o isi e leai. O ni isi e i ai matua alolofa, o isi e leai. O ni isi e tele tausaga e ola ai, o isi e laiti. Ma faapena ai lava. O ni isi tagata e faia ni measese faataumaoi, tusa lava foi pe a latou taumafai e fai mea lelei. O ni isi e filifili e aua le faaitiitia le faapito’au pe a oo ina mafai ona latou faia. O nisi ua faaaogaina lo latou faitalia na tuuina mai e le Atua e faatiga ai i isi i le taimi sa le tatau ai lava ona latou faia.
E anoanoai ituaiga eseese o faapito’au e mafai ona aafia ai, ma fatuina ai se sunami o faapito’au lofituina. Mo se faataitaiga, o le faama’i oti o le KOVITI-19 ua aafia tele atu ai ni isi nai lo isi, o ē o loo ua i ai le mau tulaga lē manuia E momomo lo’u loto mo i latou o ē o feagai ma na ituaiga o faapito’au, ae ou te tautino atu ma lo’u loto mafatia atoa, e malamalama Iesu Keriso i le faapito’au ma o loo i ai le mana e maua mai ai se vaifofo. E leai lava se mea e faatusalia i le faaituau e le gata na onosaia e le Faaola. Sa le’i talafeauga Lona oo i tiga uma ma puapuaga o tagata. Sa le’i talafeauga Lona mafatia mo a’u agasala ma a’u mea sese ma outou foi. Ae na Ia filifili lava e faia ona o Lona alofa mo i tatou ma mo le Tama Faalelagi. E malamalama atoatoa o Ia i mea o loo tatou oo i ai.4
O loo tusia i tusitusiga paia e faapea sa faitio Isaraelu anamua faapea sa le’i talafeauga le taulimaina o i latou e le Atua. I le tali atu i ai, na fesili ai Ieova, “Pe mafai ea ona galo i se fafine lana tama o susu, ina ia lē alofa o ia i le tama a lona manava?” E faapei ona le mafai e se tina alofa ona galo sana tama meamea, ua tautino mai foi e Ieova e faapea e sili atu ona mausali o Lona faamaoni. Na Ia faamautinoa mai, “Ioe, atonu e galo ia te i latou, ae o le a le galo ia te a’u oe. … Faauta, ua Ou togitogia oe i luga o alofilima o oʼu lima; o ou pa ua i ai pea i oʼu luma.”5 Ona sa onosa’ia e Iesu Keriso le taulaga togiola e le i’u, o lea ua Ia malamalama lelei ai ia i tatou.6 E silafia e Ia i tatou e le aunoa ma o tatou tulaga.
I le olaga nei, e mafai ona tatou “o mai faamalosi” i le Faaola ma maua ai le mutimutialofa, faamalologa, ma le fesoasoani.7 Tusa lava foi pe a tatou mafatia e aunoa ma se mafuaaga, e mafai e le Atua ona faamanuiaina i tatou i ni ala faigofie, masani, ma le tulagaese. A o tatou aoao ia iloa nei faamanuiaga, o le a faateleina lo tatou faalagolago i le Atua. I le faavavau, o le a foia e le Tama Faalelagi ma Iesu Keriso faapito’au uma. Tatou te mananao ma le malamalama ia iloa pe faapefea ma pe o afea. Pe faapefea ona La faia lena mea? Pe o afea La te faia ai lena mea? I lo’u iloa i ai, La te le’i faaalia maia pe faapefea po o le pe o afea8 O le mea ua ou iloa o le aLa faia.
I tulaga e le talafeauga pe ua faapito’au, o se tasi o a tatou mea e fai o le faatuatua lea “o mea uma e le talafeauga e uiga i le olaga e mafai ona faasa’o e ala i le Togiola a Iesu Keriso.”9 Na manumalo Iesu Keriso i le lalolagi ma “miti’ia” ai faiga faapito’au uma. Ona o Ia, ua mafai ai ona tatou maua le filemu i lenei lalolagi ma ia lototetele.10 Afai tatou te faatagaina o Ia, o le a faapaiaina e Iesu Keriso faiga faapito’au mo lo tatou lelei.11 O le a lē na ona Ia faamafanafanaina i tatou ma toefuatai mai mea sa leiloloa;12 ae o le a Ia faaaogaina le faapito’au mo lo tatou manuia. Pe a oo mai i le pe faapefea ma le pe o afea, e manaomia ona tatou faailoa ma talia, e faapei o Alema, “ua le afaina; ona ua silafia e le Atua nei mea uma; ma ua lava ia te au le iloa o le tulaga lenei ua i ai.”13
E mafai ona tatou taumafai e taofiofi a tatou fesili e uiga i le pe faapefea ma le pe o afea mo se taimi mulimuli ane ae taulai atu i le atina’eina o le faatuatua ia Iesu Keriso, o Ia o i ai le mana e faasa’o ai mea uma ma matuai naunau e faia.14 Mo i tatou e tauanau pea ia iloa pe faapefea po o le po o afea e leai se uiga, aua o le mea moni, e vaai lata mai.15
A o tatou atiina a’e le faatuatua ia Iesu Keriso, e tatau foi ona tatou taumafai malosi ia avea e faapei o Ia. Ona tatou talanoa atu lea i isi ma le mutimutialofa ma taumafai e faaitiitia faiga faapito’au i mea tatou maua ai;16 e mafai ona tatou taumafai e faia mea tonu i totonu o lo tatou lalolagi o tosinaga. E moni, ua faatonu mai le Faaola e faapea e “ao ona tatou auai ma le naunautai i se faamoemoega lelei, ma fai mea e tele i lo [tatou] lava loto malie, ma aumai le amiotonu tele.”17
O se tasi sa punouai ma le naunautai e faasagatau i faiga faapito’au o le loia o Bryan Stevenson. O lana galuega faata’ita’i faaletulafono i le Iunaite Setete na tuuto atu i le puipuia o ē na tuua’iina sese, faamutaina o faasalaga soona fai, ma le puipuia o aia tatau faavae o tagata. I ni nai tausaga talu ai, sa tu ai Mr. Stevenson mo se alii na tuua’ia sese i le faasioti tagata ma sa faasala ai i le oti. Sa talosagaina e Mr. Stevenson le ekalesia Kerisiano i le lotoifale a lea alii mo se lagolago, e ui ina sa lei malosi lea alii i le lotu ma sa ta’uleagaina i le nuu ona ua lauiloa uma o loo faapouliuli ma se tasi e ese mai lona toalua faaipoipo.
Ina ia faataula’i atu le faapotopotoga i le mea tonu e taua, o lea sa talanoa atu ai Mr. Stevenson ia i latou e uiga i le fafine na molia i le mulilua lea na aumai ia Iesu. Sa mananao i latou na moliaina e fetogi o ia ia oti, ae na fetalai atu Iesu, “O so outou e leai sana agasala … , ia lua’i togi se maa ia te ia.”18 Sa solomuli i latou na molia ane le fafine. Sa lei tausalaina e Iesu le fafine ae sa poloaiina o ia e aua le toe agasala.19
Ina ua uma ona toefaamatala atu lea mea na tupu, sa matauina e Mr. Stevenson, o le au faafiaamiotonu, matata’u, ma le ita na afua ai e oo lava i Kerisiano ona fetogi ma’a i tagata o e ua tautevateva. Ona ia fai atu lea, “E le mafai ona na ona tatou matamata atu o tupu lena mea,” ma sa ia fautuaina le potopotoga ia avea ma “i latou e sapoina ma’a.”20 Uso e ma tuafafine, o le aua nei fetogia ma’a o le uluai laasaga lea i le taulimaina o isi ma le mutimutialofa. O le laasaga lona lua o le taumafai e sapo ia ma’a e tau’ai mai e isi.
O le auala tatou te taulimaina ai tulaga manuia ma tulaga le manuia o se vaega o le suega o le olaga. O le a lē tele le faamasinoina o i tatou ia tatou tala e fai, ae o le auala tatou te taulimaina ai e manaomia le fesoasoani ma e pagatia.21 I le avea ai ma Au Paia o Aso e Gata Ai, tatou te saili e mulimuli i le faataitaiga a le Faaola, e femaliua’i ma agalelei.22 Tatou te faapupula atu lo tatou alolofa i o tatou tuaoi e ala i le galulue ia mautinoa le tausaafia o fanau uma a le Tama Faalelagi.
Faatasi ai ma o tatou tulaga manuia ma tulaga lē manuia i o tatou mafaufau, e lelei lo tatou mafaufau loloto i o tatou lava tulaga manuia ma tulaga lē manuia. Mo Sione ia malamalama i le mafuaaga na maua ai le uila a Ana, sa faaalia ai ona lava uiga. Mo Ruth ina ia vaai i le manaomia e Merla o ni seevae e ala atu i mata o lona tina, sa faamalamalamaina ai o ia. Ina ia taumafai e vaai atu i mea ma se vaaiga e faavavau, e mafai ona faamaninoina. A o tatou avea atili e faapei o le Faaola, tatou te atiina a’e atili le loto malamalama, o le malamalama, ma le alofa mama.
Ou te toe foi i le fesili na tuuina mai e le uso-a-pasese i Kigali, o le sa tutulu i le lē talafeauga o le fasiotiga tagata i Rawana ma fesili mai, “Afai e i ai se Atua, mata Na Te le faia se mea e uiga i lea mea?”
E aunoa ma le faapea na faaitiitia mafatiaga na afua i le fasiotiga tagata, ma i le mae’a ai ona faailoa atu le le mafai ona ma malamalama i lea ituaiga o mafatiaga, sa ma tali atu faapea na faia e Iesu Keriso se mea e uiga i le ogaoga o le faapito’au.23 Sa ma faamatala atu i ai le tele o mataupu faaletalalelei e faatatau ia Iesu Keriso ma le Toefuataiga o Lana Ekalesia.24
Mulimuli ane, sa fesili mai le ma uo, ma loimata i ona mata, “O lona uiga e i ai se mea e mafai ona ou faia mo o’u matua ua maliliu ma le uso o lou tama?”
Sa ma fai atu, “Oi ioe!” Ona ma molimau atu lea o mea uma e le talafeauga e uiga i le olaga e mafai ona faasa’o e ala i le Togiola a Iesu Keriso ma e ala i Lona pule e mafai ai ona tuufaatasia aiga e faavavau.
Pe a oo ina fetaiai ma faiga faapito’au, e mafai ona tatou tuleiesea i tatou lava mai le Atua pe e mafai foi ona tatou faalatalata atu ia te Ia mo se fesoasoani ma se lagolago. Mo se faataitaiga, o le taua faifaiumi i le va o sa Nifae ma sa Lamana na eseese auala na aafia ai tagata. Na matauina e Mamona e faapea “e toatele na faamaaaina” ma o isi “na faamaluluina ona o latou puapuaga, sa oo ina latou faalotomaualalaloina i latou lava i luma o le Atua.”25
Aua nei e faatagaina le faapito’au e faamaaaina oe, pe faavaivaia lou faatuatua i le Atua. Nai lo lena, ole atu i le Atua mo se fesoasoani. Ia faateleina lou talisapaia ma lou faalagolago i le Faaola. Nai lo le lilivau, ia tuu atu ia te Ia e fesoasoani ia te oe ia e lelei atili.26 Faataga o Ia e fesoasoani ia te oe ia sogasoga, ia tuu atu i ou puapuaga e “tofatumoanaina i le olioli ia Keriso.”27 Ma auai atu faatasi ma Ia i Lana misiona “e faamalolo i e lotonutimomoia,”28 taumafai malosi e tuuitiitia le faapito’au, ma avea ma sē e sapoina maa.29
Ou te molimau atu o loo soifua le Faaola. E malamalama o Ia i faiga faapito’au. O faailoga o i Ona alofilima e faamanatu atu ai pea lava pea ia te Ia oe ma ou tulaga. E auauna atu o Ia ia te oe i ou faanoanoaga uma. Mo i latou o e o mai ia te Ia, o le a suia lefulefu o le tagitu’i i se palealii o le matagofie; o le olioli ma le fiafia o le a suia ai le lotomomomo ma le faanoanoa, talisapaia ma samiga o le a suia ai le lotovaivai ma le atuatuvale.30 O le a tauia lou faatuatua i le Tama Faalelagi ma Iesu Keriso e sili atu nai lo se mea e mafai ona e mafaufauina. O tulaga faapito’au uma—aemaise o le faapito’au faaosolilivau—o le a faapaiaina mo lou manuia. Ou te molimau atu ai i le suafa o Iesu Keriso, amene.