Puipuia o Lo Tatou Faavae na Musuia mai le Lagi

Saunia e Peresitene Dallin H. Oaks

Fesoasoani Muamua i le Au Peresitene Sili

O lo tatou talitonuga i musumusuga mai le lagi e maua ai e le Au Paia o Aso e Gata Ai se tiutetauave tulagaese e tausisia ma puipuia le Faavae o le Iunaite Setete ma mataupu faalefaavae.

I lenei taimi o faigata, ua ou lagona ai e tautala atu e uiga i le Faavae musuia o le Iunaite Setete. O lea Faavae e faapitoa lona taua i o tatou tagata o le Ekalesia i le Iunaite Setete, ae o le tele foi o atunuu o le lalolagi o loo tosi faataoto ai o latou faavae.

I.

O se faavae o le mea lea e fau ai pe faavae ai le malo. E saunia ai le fausaga ma tapulaa mo le faaaogaina o malosiaga o le malo. O Le Faavae o le Iunaite Setete, o le faavae aupito matua lea na tusia ma o loo faaaogaina pea i ona po nei. E ui ina sa vaeooto mai e sina aofaiga itiiti o kolone, ae e lei pine ae avea o se faataitaiga i le lalolagi atoa. O le taimi nei, ua vaeooto e malo uma sei vagana ai le toatolu, ni faavae tusitusia.¹

I nei la faamatalaga, ou te le o tautala atu mo se vaega faaupufai po o isi vaega. Ou te tautala atu mo le Faavae o le Iunaite Setete, lea sa ou suesueina mo le silia ma le 60 tausaga. Ou te tautala atu mai le poto masani o se failautusi o le tulafono i le faamasino sili o le Faamasinoga Maualuga a le Iunaite Setete. Ou te tautala atu mai le 15 tausaga o lo’u avea ai ma se polofesa o le tulafono, ma mai le 3½ tausaga o avea ai ma faamasino o le Faamasinoga Maualuga a Iuta. O le mea e sili ona taua, ou te tautala atu mai le 37 o tausaga o se Aposetolo a Iesu Keriso, e nafa ma le suesueina o le uiga o le faavae musuia mai le lagi o le Iunaite Setete, i le galuega o Lana Ekalesia toefuatai.

O le Faavae o le Iunaite Setete e tulagaese aua sa faaali mai e le Atua e faapea na Ia “faatuina” (le faavae) “mo aia tatau ma le puipuiga o tagata uma”” (Mataupu Faavae ma Feagaiga 101:77; see also verse 80). O le mafuaaga lea e faapitoa ai le popolega i lenei faavae mo Le Ekalesia a Iesu Keriso o le Au Paia o Aso e Gata Ai i le lalolagi atoa. Pe tatau po o le pe faapefea ona faaaoga ona mataupu faavae i isi atunuu o le lalolagi, o mea lava ia latou te filifilia.

O le a le faamoemoega o le Atua i le faatuina o le Faavae o le Iunaite Setete? Ua tatou vaaia i le aoaoga faavae o le faitalia tatau. I le uluai sefulu tausaga o le Ekalesia toefuataiina, sa puapuagatia ona tagata i sisifo i sauaga ma’oti ma i nofoaga faitele. I se isi itu na mafua ona o lo latou tetee i le faia o tagata ma pologa, lea sa i ai i totonu o le Iunaite Setete i lena taimi. I nei tulaga le manuia, na faaali mai ai e le Atua e ala mai i le Perofeta o Iosefa Samita ia upumoni e faavavau e uiga i Lana aoaoga faavae.

Na tuuina mai e le Atua i Ana fanau le faitalia tatau---o le mana e filifili ai ma faatino. O le tulaga aupito manaomia mo le faaaogaina o lena faitalia o le saolotoga aupito maualuga mo alii ma tamaitai e faatino e tusa ai ma a latou lava filifiliga patino. Ona, faamalamalama mai lea e le faaaliga, “ina ia mafai e tagata taitoatasi ona tali mo ana lava agasala i le aso o le faamasinoga” (Mataupu Faavae ma Feagaiga 101:78). “O le mea lea,” na faaalia mai ai e le Alii, “e le o se mea sa’o le nofopologa o soo se tagata i se tasi” (Mataupu Faavae ma Feagaiga 101:79). Ua manino mai ai le uiga o lenei mea, e sese le faia o tagata ma pologa. Ma e tusa ai ma lea lava mataupu faavae, e sese mo tagatanuu ona leai so latou leo i le filifiliga o o latou taitai po o le faia o a latou tulafono.

II.

O lo tatou talitonuga faapea o le Faavae o le Iunaite Setete na musuia mai le lagi, e le faapea o ta’u mai i le faaaliga faalelagi upu uma ma fasifuaitau, e pei o tuutuuga e faasafua ai le aofai o sui mai setete taitasi po o le laitiiti o tausaga o le matua.² O le Faavae sa le o “se pepa o faamatalaga ua matua atoatoa,” na saunoa ai Peresitene J. Reuben Clark. “I se itu e ese ai,” na ia faamatala mai, “tatou te taitonu e tatau ona tuputupu ae ma atia’e ia fetaui ma manaoga fesuisuiai o se lalolagi ua agai pea i luma.”³ Mo se faataitaiga, o suiga musuia na faamutaina ai le fai o pologa ma tuu atu ai i tamaitai le aia tatau e palota ai. Peitai, tatou te le o vaaia se musumusuga faapena i faaiuga uma a le Faamasinoga Maualuga i le faaliliuga o le Faavae.

Ou te talitonu o le Faavae o le Iunaite Setete o loo i ai pe a ma le lima mataupu faavae musuia mai le lagi.⁴

Muamua, o le mataupu faavae faapea o le faapogai o le malosiaga o le malo o tagata. I se taimi na faapea ai tagata lautele, o le paoa e pulea ai e mai le aia tatau faalelagi na tofia mai tupu, po o le paoa faamiliteli, o se taaviliga ina ia avatu atoa le mana e pulea ai i tagata. Sa fautuaina e le au faitofa lenei mea, ae o le Faavae o le Iunaite Setete na mua i malae i le faaaogaina. O le paoa i tagata e pulea ai e le faapea e mafai e tagata faatupu faalavelave po o isi vaega o tagata ona faalavefau e faamata’u pe faamalosia faatinoga a le malo. O le Faavae na faatuina ai se faigamalo e faavae i faiga faatemokalasi, lea e faaaoga ai e tagata lo latou paoa e ala i o latou sui ua filifilia.

O se mataupu faavae musuia lona lua o le vaevaega o le paoa faamatuu i le va o le malo ma ona setete maioio. I la tatou faiga tutotonu faalemalo, o lenei mataupu faavae fou e lei i ai muamua, o nisi taimi sa fesuia’ia ai i suiga musuia, e pei o le faamutaina o le fai o pologa ma le faalautele atu o aia tatau e palota ai tamaitai, pei ona ta’ua muamua. I se tulaga iloga, o le Faavae o le Iunaite Setete e faatapulaa ona faaaoga e le faigamalo a le atunuu ona faaaoga le paoa e faamatala tuusao atu pe atagia i tusiga, ma o loo taofia uma ai isi paoa a malo “i Setete taitasi, po o tagata ”⁵

O se isi mataupu faavae musuia o le tuueseesega o paoa. Ua silia mamao ma se seneturi a o lei faia la tatou Tauaofiaga Faalefaavae i le 1787, sa amataina ai e le Fonofaitulafono a Peretania se tuueseesega o le pule faitulafono ma le pulega faalemalo ina ua latou aveesea faamalosi ni paoa patino mai le tupu. O le musumusuga na maua i le tauaofiaga a Amerika, o le faamatuu atu lea o paoa tutoatasi i pulega faalemalo, fonofaitulafono, ma le faafaamasinoga, ina ia mafai ai e nei lala e tolu ona faatuaoia o latou paoa mai isi.

O se mataupu faavae musuia lona fa o loo i ai lea i le taufuifui o faamautinoaga taua o aia tatau taitasi ma tapulaa o le pulega faalemalo o i le Pili o Aia Tatau, na vaeooto mai e ala i se teuteuga i le na o le tolu tausaga talu ona faamalosia le Faavae. O lea la ua fou nei le Pili o Aia Tatau. O i la, o le musumusuga sa i ai i le faatinoga tonu o mataupu faavae na amata mai i Egelani, lea na amata i le Faavae o le Saolotoga. Sa masani ia tusitala o le Faavae i nei mea aua sa i ai na faamautinoaga i nisi o uluai kolone.

A na leai se Pili o Aia Tatau, semanu e le avea Amerika ma malo e talimalo mo le Toefuataiga o le talalelei, lea na amata i le na o le tolusefulu tausaga mulimuli ane ai. Sa i ai musumusuga faalelagi i le uluai tuutuuga faapea e le tatau ona manaomia ni suega faalelotu mo tofi faitele,⁶ ae sa taua i le Uluai Suiga, le faaopoopoga o le saolotoga faalelotu ma le faamautinoaga e leai se tapuaiga e faapea o se tapuaiga aloaia a le atunuu. Ua tatou vaai ai foi i le musumusuga faalelagi i le Uluai Suiga, o le saolotoga e faaali ai taofi ma tusitusiga, ma i puipuiga patino o loo aofia ai i isi suiga, e pei o moliaga faasolitulafono.

Lona lima ma le mea mulimuli, ua ou vaai i le musumusuga faalelagi i le faamoemoega taua o le Faavae atoa. E tatau ona pulea i tatou e le tulafono ae le pulea e tagata, ma o lo tatou lotonuu e tatau ona tuu atu i le Faavae ma ona mataupu faavae ma ona faagasologa, ae le o soo se tagata e umia se tofi. I lenei auala, e tatau ai ona tutusa tagata uma i luma o le tulafono. O nei mataupu faavae e taofia ai le manao e pulea toatasi, lea ua ta’uvaleina ai le faatemokarasi i nisi o atunuu. O le isi foi faauigaga, e leai se tasi o lala ia e tolu o faigamalo e tatau ona fiapule fua i le isi, pe taofiofia isi i le faatuaoia o lo latou paoa e faatinoinaina lelei o a latou galuega faalefaavae.

III.

E ui i mataupu faavae mai le lagi o le Faavae o le Iunaite Setete, ina ua faatino e tagata e le atoatoa, e lei ausiaina i taimi uma o latou aafiaga faamoemoeina. O mataupu taua o le faia o tulafono, e pei o nisi o tulafono e pulea ai sootaga faaleaiga, ua aveesea mai setete e faigamalo faaleatunuu. O le Uluai Suiga e faamaonia ai le saoloto e faaalia manatu, o nisi taimi ua suivai e ala i le taumafai e tuuitiitia le faia o faamatalaga e le fiafia i ai le toatele. O le mataupu faavae o le tuueseeseina o paoa, e faigata tele e le aunoa ona o le fana’e mai ma le mou atu o se lala e tasi o faigamalo i le faaaogaina po o le taofiofia o paoa e faamatuu atu i se isi.

E i ai foi isi taufaamata’u e faavaivaia ai mataupu faavae musuia o le Faavae o le Iunaite Setete. Ua faavaivaia le malosi o le Faavae i taumafaiga e suia manatu o loo sili ona lilifa i ai tagata i le taimi nei e avea ma mafuaaga na faavae ai, nai lo le saolotoga ma le pulea e ia lava. E le taua le pule a le Faavae pe a le amanaiaina e tagata tauva po o taitai ona mataupu faavae. Ua tuuitiitia le mamalu ma le malosiaga o le Faavae e i latou o e ua manatu i ai faapei o se su’ega o le lotonuu po o se anaga faapolotiki, nai lo lona tulaga faamalumalu o se faapogai o le maliega ma tapulaa mo le pulega faalemalo.

IV.

O lo tatou talitonuga i musumusuga mai le lagi e maua ai e le Au Paia o Aso e Gata Ai se tiutetauave tulagaese e tausisia ma puipuia le Faavae o le Iunaite Setete ma mataupu faalefaavae i soo se mea tatou te nonofo ai. E ao ona tatou faalagolago i le Alii ma ia vaai i le itu lelei e uiga i le lumanai o lenei atunuu.

O a isi mea e tatau ona fai e le Au Paia o Aso e Gata Ai? E tatau foi ona tatou tatalo i le Alii ina ia taialaina ma faamanuiaina atunuu uma ma o latou taitai. O se vaega lenei o la tatou mataupu faavae o le faatuatua. O le tatau ai ona tatou usitai i peresitene po o taitai⁷ o le mea moni e leai se iota o ta’u mai ai tatou te tetee i tulafono po o aiaiga faavae taitasi. O loo manaomia ai e tatau ona faaaoga la tatou tosinaga i le ava ma le faaaloalo ma le toafimalie, i totonu o le faavaa o o tatou faavae ma tulafono e faatatau i ai. O mataupu e feteenai ai, e ao ina tatou saili ia masuigamalie ma ia lotogatasi.

O loo i ai isi tiute o se vaega o le taofimauina o le Faavae musuia. E ao ona tatou aoao ma lagolago ia mataupu faavae musuia o le Faavae o le Iunaite Setete. E ao ina tatou sailia ma lagolago ia tagata atamamai ma lelei o e o le a lagolagoina na mataupu faavae i a latou faatinoga mo tagata lautele.⁸ E ao ona avea i tatou ma tagatanuu malamalama o e e malolosi i le faia o a tatou tosinaga ia lagonaina i fegalegaleaiga faalemalo.

I totonu o le Iunaite Setete ma i isi malo faatemokalasi, e faatino le tosinaga faaupufai i le avea ma suitauva mo se tofi (lea matou te fautuaina), e ala i le palota, e ala i le lagolago i mea tautupe, e ala i le avea ma sui ma tautua i vaega faaupufai, ma e ala i fesootaiga faifai pea ma taitai, i vaega, ma suitauva. Ina ia galue lelei, e manaomia e se faatemokalasi nei mea uma, ae soo se tagatanuu maelega, na te le tau tuuina atu na mea uma.

E tele mataupu faapolotiki, ma e leai se vaega, leai ni aiaiga faavae ma ni tulaga faatonuina, po o se sui tauva se toatasi e mafai ona faamalieina manaoga patino uma. O le mea lea e tatau ai i tagatanuu taitoatasi, ona filifili pe o a mataupu e sili ona taua ia te ia i soo se taimi faapitoa. Ona ao lea i tagata o le ekalesia ona saili musumusuga pe faapefea ona faaaoga la latou tosinaga e tusa ai ma mea latou te faamuamua. O le a le faigofie lea faiga. E ono manaomia ai le suia o le vaega e lagolagoina po o filifiliga o sui tauva, tusa lava pe mai lea palota i lea palota.

O na ituaiga o faatinoga tutoatasi o le a i ai nisi taimi e manaomia ai tagata palota e lagolago ia sui tauva po o vaega faaupufai po o aiaiga faavae, o isi o o latou tulaga e le mafai ona latou faamaonia.⁹ O se tasi lea o mafuaaga tatou te fautuaina ai o tatou tagata ina ia aloese mai le faamasino atu o le tasi ma le isi i mataupu faapolotiki. E le tatau lava ona tatou ta’u atu faapea e le mafai e se Au Paia o Aso e Gata Ai ona avea ma ni ō o se vaega faapitoa pe palota mo se sui tauva patino. Tatou te aoao atu mataupu faavae sa’o ae tuu atu i tagata lava ia latou te filifili pe faapefea ona faamuamua ma faaaoga na mataupu faavae i mataupu e tulai mai i lea taimi ma lea taimi. Matou te faatauanau atu foi, ma talosagaina o tatou taitai i lotoifale ina ia faatauanau atu, faapea o filifiliga ma sootaga faapolotiki ia le avea o se mataupu o aoaoga po o fautuaga i soo se tatou sauniga po o fonotaga faale-Ekalesia.

Ioe, o Le Ekalesia a Iesu Keriso o le Au Paia o Aso e Gata Ai, e faaaoga ana aia tatau e faamaonia ai pe tetee atu ai foi i ni lafo faatutu faitulafono tatou te manatu e feteena’i ma le saolotoga e tapuai ai po o mea e tatau ai mo faalapotopotoga a le Ekalesia.

Ou te molimau atu i le musuia faalelagi o le Faavae o le Iunaite Setete ma tatalo, o i tatou o e ua iloa le Atua Paia o le na musuiaina, o le a tausisia pea e le aunoa ma puipuia ona mataupu faavae maoae. I le suafa o Iesu Keriso, amene.