Mea na Faamamafa mai le Konafesi Aoao Faaletausaga Lona 191

O le taulaiga o le konafesi aoao, na faia i le faaiuga o le vaiaso o le Eseta, o le Faaola o Iesu Keriso, faamalolosia o tagata o le Ekalesia, ma le natura o le Ekalesia i le lalolagi atoa.

• Itulau 6: I lana saunoaga amata, na saunoa ai Peresitene Russell M. Nelson, “Ua tatou potopoto o se aiga tele i le lalolagi o loo mananao e tapuai i lo tatou Alii ma le Faaola, o Iesu Keriso.” Sa ia taua faapea “o le malosi o le Ekalesia o loo taoto i taumafaiga ma molimau tuputupu ae pea o ona tagata.” I le taimi atoa o le konafesi, o taumafaiga a taitai o le Ekalesia e faamalolosia tagata taitoatasi na iloagofie.

• Itulau 79: I le taimi o le sauniga a le au perisitua, na aoao mai ai e Peresitene Nelson le auala e mafai ai ona tatou faia o tatou fale o ni nofoaga paia, “o le totonugalemu o le aoaoina o le talalelei ma le ola ai i le talalelei,” e tusa lava pe mae’a le faamai oti.

• Itulau 101: I lana savali i le taeao o le Aso Sa, na faamanino mai ai e Peresitene Nelson e faapea, o se Ekalesia i le lalolagi atoa o loo i ai se uiga o le talalelei mo tagata uma: “I le taeao nei, ua tatou faalogo ai i taitai o le Ekalesia o e o mai i konetineta aina uma i le lalolagi. E moni lava, o faamanuiaga o le talalelei e mo ituaiga, gagana, ma tagata uma . O le Ekalesia a Iesu Keriso o se ekalesia a le lalolagi uma O Iesu Keriso o lo tatou taitai.”

• Itulau 127: E le gata i lea, o le taumafaiga e faamalolosia tagata o le Ekalesia sa faaalia i le faasilasilaga o malumalu fou e 20. “Matou te mananao e aumai le maota o le Alii ia latalata atili i o tatou tagata,” na saunoa ai Peresitene Nelson i lana saunoaga faaiu. O le aofaiga aupito tele ia o malumalu na faasilasila mai talu mai le 1998, ina ua fofogaina e Peresitene Gordon B. Hinckley le 32 malumalu, o le tatalaina o se vaitau fou o le faalauteleina o malumalu.

• Itulau 139: Mo nisi faataitaiga o le auala e saili ai e le Ekalesia le faamalolosia o fanau uma a le Atua, tagai i mea e faamamafa i ai le tele o galuega faatino alofa ua maea i le aluga o le 2020.