Elder Alvin F. Meredith III

Fitugafulu o le Au Pulega Aoao

I le tausaga mulimuli o le aoga maualuga a Alvin F. Meredith i Tennessee, ISA, sa filifilia ai o ia o se tagata afeleti a lana aoga o le tausaga e se vaega o tamaiti afeleti Kerisiano.

E lei leva, ae ta’u atu e lona faiaoga ia te ia faapea sa lei faaaogaina e le au taitai o le vaega i le setete o ia ona latou te lei aloaiaina Le Ekalesia a Iesu Keriso o le Au Paia o Aso e Gata Ai o se faatuatuaga Kerisiano.

Sa talosagaina e lona faiaoga, “o se alii Kerisiano lelei tele,” le faalapotopotoga e auina atu se tasi i le aoga e talanoa ai ma le alii afeleti talavou. Na alu ane le sui o le faalapotopotoga i le aoga maualuga ma faamatala mai ai ni manatu se 10 o le aoaoga faavae lea sa ia lagonaina e tauamiotonuina ai la latou faaiuga e faaleaogaina ai le tagata afeleti o le Au Paia o Aso e Gata Ai. Ina ua ia vaaia se tusi paia i le ato a le tagata, sa fesili atu Elder Meredith pe mafai e le toalua o i laua ona toeiloilo nisi o fuaiupu.

“Sa ma tilotilo i na manatu taitasi e 10 ma sa ma o i le Nofoaiga a Tupu ma le Iakopo ma le tusi o Faaaliga ma Korinito,” o le tala lea a Elder Meredith. “Sa luitauina lo’u faatuatua, ma na ala i le afi o lena luitau, sa faamalosia ai ma sa lei maluelue lava talu mai lena taimi.”

Na soifua mai Alvin Frazier “Trip” Meredith III i Chattanooga, Tennessee, ISA, i le aso 22 Iulai, 1970, ia Alvin ma Mary Meredith. Sa faaipoipo o ia ia Jennifer Denise Edgin i le 1998 i le Malumalu o Sate Leki. E toaono le la fanau.

Na faauu Elder Meredith i se faailoga tikeri i le psychology mai le Iunivesite o Polika Iaga i le 1994 ma sa maua lona faailoga o le matuaofaiva i le pulega o pisinisi mai le Iunivesite o Chicago i le 2001. Sa faigaluega o ia i le Laumua o GE, Boston Consulting Group, ma Asurion.

A o avea ma se alii talavou, sa auauna atu Elder Meredith i le Misiona a Iuta Aai o Sate Leki. I le taimi o lona valaauga o se Fitugafulu o le Au Pulega Aoao, sa auauna atu o ia o se peresitene o le Misiona a Iuta Aai o Sate Leki i Saute. Sa avea foi o ia ma se Fitugafulu Eria, peresitene o le siteki, fesoasoani i se au peresitene o le misiona, epikopo, ma se faiaoga o le Aoga Sa.