Elder Michael A. Dunn

Fitugafulu o le Au Pulega Aoao

Sa tatala le faaipoipoga a matua o Elder Michael A. Dunn a o laitiiti lava o ia, ae a o tausia o ia e lona tina, sa ia faamautuina ia te ia le faatuatua malosi ma tulaga faatauaina. Ina ua uma ona auai i se aoga Episcopal tuma’oti i le aai o Sate Leki, Iuta, ISA, sa siitia atu o ia i se aoga maualuga a le malo i le taimi lea, lea sa ia feiloai ai i tagata o Le Ekalesia a Iesu Keriso o le Au Paia o Aso e Gata Ai.

A o faafeiloai o ia e ana uo fou ma o latou matua i lima mafola, sa manao Michael e aoao e uiga i le Ekalesia. Na iu lava ina tonu ia te ia e feiloai ma faifeautalai. O a latou aoaoga e uiga i le Aiga Atua ma le Uluai Faaaliga a Iosefa Samita “na matuai mamana le tosinaga ai o au,” na ia saunoa ai.

E ala i le tatalo, sa ia iloa ai e moni le talalelei ma sa papatisoina i le taimi o lona tausaga faaiu i le aoga maualuga. Talu mai lena taimi, sa “faafaileleina ai Elder Dunn e se soloa’iga o taitai maoae.”

Na te faailoa mai foi le taitaiga a le Tama Faalelagi ma le Faaola i lona soifuaga atoa. “O au o se tagata talitonu,” o le tala lea a Elder Dunn. “Ua faamanuiaina au e avea ma se molimau ia Iesu Keriso ma faalauiloaina Lona soifua, Lona agalelei, Lana talalelei toefuataiina i aso nei.”

Sa soifua mai Michael Austin Dunn i le aso 5 o Mati, 1958, ia Patricia ma James R. Dunn in Tucson, Arisona, ISA. Sa ola ae o ia i le aai o Sate Leki. Ina ua uma ona auauna atu i se misiona talai i le misiona a Hawaii Honolulu, sa ia faaipoipo atu ia Linda Virginia Poulson i le 1980 i le Malumalu o Sate Leki. E toatolu le la fanau.

Sa maua e Elder Dunn se faailoga tikeri i fesootaiga tetele i le 1981 ma se faailoga o le matuaofaiva i fesootaiga i le 2008, i le Iunivesite o Iuta. O ia sa pule sili o le KUED (PBS Iuta), p eresitene o le Dunn Communications Inc., ma talu ai nei lava, o le pule faatonusili o le BYUtv ma le Leitio BYU.

O Elder Dunn, o le sa auauna atu o se Fitugafulu Eria i le taimi o lona valaauga, sa avea o se epikopo, fesoasoani i se au epikopo, peresitene o le siteki,peresitene o alii talavou a le uarota, fautua maualuga, ma se peresitene o le misiona o le Misiona a Aferika i Saute Johannesburg mai le 2014 i le 2017.