Ioane 14:15–31; 15:10–14

“Afai Tou te Alolofa Mai ia te Aʼu, Ia Outou Tausi i Aʼu Poloaiga”

Jesus teaches about forgiveness to Peter.

A o faamanatuina e le Faaola ma Ona Aposetolo le Paseka i le afeafe aupitoaluga, sa aoao e le Faaola Ona Aposetolo i upumoni taua. Faatasi ai ma Ona puapuaga i Ketesemane ma Kalevaria o loo faatali pea, sa faatonuina ai e Iesu nei tagata sa Ia alofa faapelepele i ai, “Afai tou te alolofa mai ia te aʼu, ia outou tausi i aʼu poloaiga” (Ioane 14:15). O lenei lesona e mafai ona fesoasoani ia te oe e faaali atu ai lou alofa i le Tama Faalelagi ma Iesu Keriso e ala i le usiusitai i a La‘ua poloaiga.

Maitauina ma le iloatinoina. Faaaoga se taimi e mataʼitu ai tagata aoga, ma saili le fesoasoani a le Agaga i le iloatinoina o o latou manaoga ina ia mafai ai ona fetuunai le lesona. Aua nei soona popole i le tautalagia ai o anomea o le lesona po o se isi faamatalaga e sosoo ai; o lena mea e mafai ona faavaivaia ai manaoga o tagata aoga ma musumusuga a le Agaga Paia.

Gaoioiga e ono Mafai Ona Aoao Ai

Mafaufau e amataina le vasega i le faasoaina atu lea o faataitaiga patino o tagata o le aiga o loo faaalia le alofa o le tasi i le isi. I le ma se isi faiga, valaaulia tagata o le vasega e talanoaina fesili nei.

E faapefea ona e faaali atu le alofa?

E mafai faapefea ona e iloa pe alofa se tasi ia te oe? O a upu, amioga, po o uiga e faamaonia ai lo latou alolofa?
E faapefea ona e faaali atu lou alofa mo isi?
Ae a pe a faapea e te alofa i se tasi, ae o ou uiga faaalia po o amioga e le masani ona faaalia ai pea lena alofa? O le a se mea e mafai ona e faia?

A o faaauau pea ona aoao e le Faaola Ona Aposetolo i le taimi o le Talisuaga Mulimuli, sa Ia aoao mai e uiga i Lona alofa mo i tatou ma aoao mai le ala e mafai ai ona tatou faaalia lo tatou alolofa mo Ia.

E faalagolago i manaoga ma gafatia o tagata aoga, e mafai e tagata aoga taitoatasi ona faitau fuaiupu uma nei, pe e mafai foi ona vaelua le vasega ona atofa lea o fuaitau taitasi i vaega taitasi.

Suesue le Ioane 14:15, 21, 23–24 ma le Ioane 15:10–14, ma vaavaai mo mea na fetalai le Faaola e mafai ona tatou faia e faaalia ai lo tatou alolofa mo Ia ma le Tama Faalelagi.

A uma ona faitau tagata aoga, fautuaina i latou e fai ni fesili pe faaali ni manatu e uiga i mea sa latou faitauina. A o latou faia lea mea, fesoasoani ia i latou e faailoa mai pe mafai faapefea ona tatou faaali atu lo tatou alofa mo le Atua, ma fesoasoani foi ia i latou e maitau upu po o fuaitau o loo faaalia ai le alofa o le Atua mo i tatou.

O a mea na faamamafa mai e le Faaola i nei fuaiupu e uiga i le ala e mafai ai ona tatou faaali atu le alofa mo Ia?

Mafaufau e tusi i le laupapa le upumoni lenei po o se upumoni talitutusa na faailoa mai e tagata aoga: Tatou te faaalia lo tatou alolofa mo Iesu Keriso e ala i le tausia o Ana poloaiga.

O a mea ua aoao mai e nei fuaiupu e uiga i le alofa o le Faaola mo oe?
O a nisi o tulaga o le a fesoasoani ai upumoni na aoao mai e le Faaola i nei fuaiupu?

Afai na valaaulia tagata aoga e matamata le vitio o se vaega o a latou sauniuniga o ni tagata aoga, valaaulia i latou e talanoa i mea na latou aoaoina e uiga i le mafuaaga ua tuuina mai ai e le Atua ia i tatou poloaiga, nai lo le toe matamataina o le vitio i le vasega. Pe mafai foi e tagata aoga ona matamata i le vitio o le “Going to Grandma‘s” (4:02), e maua i le ChurchofJesusChrist.org, pe faitau le faamatalaga o loo i lalo.

Na aoao mai e Sister Carole M. Stephens, sa avea muamua ma Au Peresitene Aoao o le Aualofa, e uiga i le faamoemoega o le Atua i le tuuina mai ia i tatou o poloaiga ma lo tatou faamoemoega mo le usitaia o i latou.

Matamata le vitio “Going to Grandma’s (4:02), o loo maua i le ChurchofJesusChrist.org.

4:2

Atonu tatou te manatu i nisi taimi o tulafono a le Atua ua faasa ai lo tatou saolotoga patino, e aveesea ai lo tatou faitalia, ma faatapulaa ai lo tatou tuputupu ae. Ae peitai ao o tatou saili atu mo se malamalama sili, a o tatou tuu atu i lo tatou Tama e aoao i tatou, o le a amata ona tatou vaaia o Ana tulafono o se faailoga lea o Lona alofa mo i tatou ma o le usiusitai i Ana tulafono o se faailoga lea o lo tatou alofa mo Ia.

(Carole M. Stephens, “Afai Tou te Alolofa Mai ia te Aʼu, Ia Outou Tausi i Aʼu Poloaiga,” Ensign po o le Liahona, Nov. 2015, 119)

Mafaufau e fai atu i ni nai tagata aoga e fesoasoani e fatu le lisi lenei e ala i le tusia o tali a a latou paaga i luga o le laupapa.

Lisi nisi o tulafono ma poloaiga e te lagona e faaalia ai le alofa o le Tama Faalelagi mo oe. Ina ia fesoasoani ia te oe e mafaufau i ni tulafono, e mafai ona e iloiloina Tulafono e Sefulu (tagai Esoto 20:3–17) po o le Mo le Malosi o le Autalavou [tamaitusi, 2011].

E faapefea ona avea poloaiga ua e lisiina o se “faaaliga o le alofa [o le Atua] mo i tatou”?
E mafai faapefea ona avea lou usiusitai i nei poloaiga o se “faailoga o lou alofa mo Ia”?

Filifili se tasi o poloaiga mai i lau lisi. Atonu o se tasi o loo e taumafai e tausia po o se tasi ua faaosoosoina oe e soli ae ua filifili e usitai iai.

Ia faamaonia taumafaiga a tamaiti aoga ina ia usiusitai e ala i le faailoa mai o nisi o poloaiga latou te tausia, ma fesoasoani ia i latou e iloilo o latou faamoemoega mo le tausia o na poloaiga.

Mafaufau e faaali atu fesili nei ma tuu atu i tagata aoga ia lava se taimi e mafaufau loloto ai ma tusi a latou tali i a latou api talaaga mo suesuega. Ia nofouta i le natura maaleale o nei fesili.

O fesili nei o le a fesoasoani ia te oe e iloilo ai ou faamoemoega mo le tausia o poloaiga a le Atua. A o e mafaufau i au tali, e taua le iloa atonu e i ai ni au mafuaaga eseese mo le tausia o poloaiga. E tusa lava po o a ou faamoemoega o i ai nei, ia faaauau pea ona usiusitai, ma e iai le taimi e mafai ai ona faateleina lou manao e usiusitai ona o le alofa.

O le a se mea e faaosofia ai oe e tausia lenei poloaiga?
O le a sou lagona e uiga i au mafuaaga mo le tausia o poloaiga e faatusatusa i le faataitaiga a le Alii o le usiusitai ona o le alofa?
Aisea e ono taua ai mafuaaga i tua atu o lou usiusitai (ou faamoemoega)?
O le a se fautuaga o le a e tuuina atu i se tasi e manao e usiusitai i poloaiga a le Atua ona o le alofa?

O le faataitaiga a lo tatou Faaola o le alofa

Na tuuina mai e Iesu Keriso ia i tatou le faataitaiga atoatoa o le ala e usitaia ai tulafono ma poloaiga a le Atua ona o le alofa mama. Ina ua uma le talisuaga mulimuli, sa Ia fetalai atu, “Ae ina ia iloa e le lalolagi ou te alofa i le Tama; ma e pei ona tuuina mai e le Tama ia te a‘u le poloaiga, e faapea lava ona ou faia” ( Ioane 14:31). Ona maliu ae lea o Iesu e puapuagatia mo a tatou agasala ma o tatou “tiga ma puapuaga ma faaosoosoga o ituaiga eseese uma” ( Alema 7:11)) i le faatoaga o Ketesemane ma faapea foi i luga o le satauro.

Aisea na naunau ai le Faaola e usiusitai i le Tama Faalelagi? (Tagai i le Ioane 15:13 ; Eperu 12:2 .)

Na valaaulia e Elder D. Todd Christofferson o le Korama a Aposetolo e Toasefululua i tatou ina ia mafaufau ma le toto‘a i mea e mafai ona uunaia i tatou e le alofa o Iesu Keriso e fai. Atonu e te manao e matamata le vitio o le “Abide in My Love” o loo maua i le ChurchofJesusChrist.org, mai le faailotaimi 14:27 i le 14:50 pe faitau le faamatalaga lenei:

15:8

E te le alofa ea ia te Ia o lē na muai alofa ia te oe? [tagai 1 Ioane 4:19 ]. Ona tausi lea o Ana poloaiga [tagai i le Ioane 14:15 ]. E le avea ea oe ma se uo ia te Ia o lē na foai mai Lona ola mo Ana uo? [tagai i le Ioane 15:13 ]. Ona tausi lea o Ana poloaiga [tagai i le Ioane 15:14 ]. E te le tumau ea i Lona alofa ma maua mea uma ua Ia ofo maia ma le alofa tunoa ia te oe? Ona tausi lea o ana poloaiga [tagai i le Ioane 15:10 ].

“D. Todd Christofferson, “Tumau i Lo’u Alofa,” Ensign po o le Liahona, Nov. 2016, 51)

E mafai faapefea e lou tuuto atu i le usiusitai sili atu, e faavae i le alofa, ona aafia ai lou sootaga ma le Tama Faalelagi ma Iesu Keriso? (Tagai i le Mosaea 5:13 .)

A o e taumafai e tausi poloaiga ona o le alofa mo le Tama Faalelagi ma Iesu Keriso, o le a e lagonaina se faateleina o lo La‘ua alofa i lou olaga (tagai i le Ioane 14:21)). Afai e te tauivi ina ia usiusitai, pe manao foi ia usiusitai, e mafai e le Tama Faalelagi ona fesoasoani ia te oe pe afai e te ole atu ma le lotomaualalo ia te Ia mo se suiga o le loto. Manatua, foi, o se tasi o poloaiga o le salamo, ma e mafai ona tatou tausia lenei poloaiga a o galulue e faatoilalo o tatou vaivaiga.

Tala ma Faamatalaga o Talaaga

Aisea e finagalo ai le Atua tatou te usiusitai i Ana poloaiga?

Na aoao mai Peresitene Dallin H. Oaks o le Au Peresitene Sili:

E finagalo le Atua ia i tatou ia usiusitai i Ana poloaiga aua ua na o le ala atu i lena usiusitai, e aofia ai le salamo, e mafai ai ona tatou toe foi atu e nonofo i Lona afioaga ma ia atoatoa e pei o Ia.

(Dallin H. Oaks, “Two Great Commandments,” Ensign or Liahona, Nov. 2019, 74)

E afaina pe aisea ou te usitai ai i poloaiga?

E tatau ia i tatou taitoatasi ona fesili ifo ia i tatou lava pe aisea ua tatou usiusitai ai i poloaiga a le Atua. Pe ona ua tatou fefefe ea i le faasalaga? Pe ona o lo tatou fia maua ea o taui o le ola i se olaga lelei? Pe ona o lo tatou alolofa i le Atua ma Iesu Keriso ma ua mananao e auauna atu ia i Laua?

E sili atu le usiusitai i poloaiga ona ua tatou fefefe i le faasalaga nai lo le matua le usitaia lava. Ae o le a sili atu ai ona tatou fiafia pe afai tatou te usiusitai i le Atua ona o lo tatou alolofa ia te Ia ma mananao e usiusitai ia te Ia. A tatou usiusitai ia te Ia ma le loto i ai, o le a mafai foi ona Ia faamanuia mai ia i tatou ma le finagalo i ai. Ua Ia fetalai mai, “O A’u, o le Alii, … ou te fiafia lava e faamamalu i e auauna mai ia te a’u i le amiotonu ma le upu moni e oo i le iuga” [ Mataupu Faavae ma Feagaiga 76:5 ]. E fesoasoani foi le usiusitai ia i tatou ia tatou alualu i luma ma avea e pei o lo tatou Tama faalelagi. Ae o e e le faia se mea sei iloga e poloaiina ai i latou, ma latou tausi toai poloaiga, [o le a] latou te le maua le taui [tagai i le Mataupu Faaave ma Feagaiga 58:26–29 ].

(Gospel Principles[2009], 201–2)

Gaoioiga Faaopoopo e Aoao Ai

Ioane 15:18–25 . “Pe afai e inoino atu le lalolagi ia te outou”

Afai e faigata i tamaiti aoga ona usitai i poloaiga ona o faatosinaga po o sauaga faalelalolagi, e mafai ona fesoasoani nei fuaiupu ia i latou e maua ai le lototele pe maua ai se vaaiga.

Valaaulia tamaiti aoga e mafaufau pe o le a faapefea ona talia Iesu Keriso pe afai e tupu Lana galuega i le olaga nei i o tatou aso.

E mafai e le vasega ona suesue le Ioane 15:18–25, ma vaavaai mo mea na fetalai ai le Faaola e uiga i le lalolagi ma mafuaaga na mafatia ai pea Lona nuu i mea faafeagai ma sauaga mai le lalolagi. O le a le mafanafana ma le malosi e usitai ai e mafai ona tatou maua i Lana savali?

E mafai ona tatou tausia poloaiga e tusa lava pe tatou te le malamalama pe aisea na tuuina mai ai

Na saunoa mai le Perofeta o Iosefa Samita (1805–44), “Sa ou faia lenei ma a’u tulafono: Pe a faatonuina ai e le Atua, ia faia loa” (Aoaoga a Peresitene o le Ekalesia: Iosefa Samita [2011], 160). O tusitusiga paia ma le talafaasolopito o le Ekalesia e aofia ai le tele o tala o tagata o e na filifili e usiusitai e tusa lava pe latou te lei malamalama atoatoa pe aisea na tuuina mai ai le poloaiga po o le fautuaga. O fuaitau nei e aofia ai faataitaiga o le usiusitai e tumu i le faatuatua ma nisi o faamanuiaga na maua e nei tagata ona sa latou usiusitai:

Atamu ma Eva: Mose 5:5–12

Simona Peteru ma ana soa: Luka 5:4–11

Nifae: 1 Nifae 9:5–6

E mafai ona valaaulia tamaiti aoga e mafaufau loloto i fesili nei: O a nisi o poloaiga e te le malamalama atoatoa i ai? E mafai faapefea e lou alofa mo le Atua ona fesoasoani ia te oe ia faamaoni ma usiusitai seia oo ina oo mai se isi malamalamaaga?

Toe iloilo au tautinoga

Valaaulia tamaiti aoga e toe iloilo soo se fuafuaga po o tautinoga na latou faia talu ai nei ina ia usiusitai atili ai i le Tama Faalelagi ma Iesu Keriso. Atonu na latou faia i se lesona muamua a le seminare pe o se vaega o a latou sini mo le polokalama a tamaiti ma le autalavou. Afai e lei i ai lava sa latou sini po o se fuafuaga ina ia usiusitai atili, atonu latou te mafaufau i se tasi o poloaiga na latou lisiina i lenei lesona.