Ioane14–16

O Le Misiona a le Agaga Paia

Oil on paper on board painting depicting Christ and eleven apostles seated on the floor around a low table. They participate in the Sacrament of the Last Supper while the shadow of Judas is seen leaving the table. Signed by artist. Done in gold and brown tones.

I le taimi o le misiona a le Faaola, sa olioli Aposetolo i le mana o le Agaga Paia, ae latou te lei mauaina lava le meaalofa a le Agaga Paia, lea o le a mafai ai e i latou, e ala i lo latou amiotonu, ona maua le mafutaga tumau ma le Agaga Paia (tagai i le Bible Dictionary, “Holy Ghost”). Na folafola atu e Iesu Keriso e faamanuia i latou i le meaalofa a le Agaga Paia pe a mavae Lona afio ae i le lagi. O lenei lesona e mafai ona fesoasoani ia te oe e faailoa ai le ala e faatino ai e le Agaga Paia Ana matafaioi eseese i lou olaga.

Galulue taitoatasi ma tamaiti aoga. Sa sailia e le Faaola ni faiga e mafai ona Ia galue taitoatasi ai ma tagata (mo se faataitaiga se tasi, tagai i le 3 Nifae 11:13–15). E faamanuiaina tagata aoga pe a mulimuli faiaoga i le faataitaiga a Keriso o le auauna atu i tagata taitoatasi. Taumafai e faailoa manaoga o tagata aoga ma fesoasoani ia i latou ia iloa pe mafai faapefea ona latou sailia ma maua le fesoasoani a le Alii e faataunuu ai na manaoga.

Sauniuniga a le tagata aoga: Valaaulia tagata aoga e mafaufau loloto i faataitaiga mai tusitusiga paia po o aafiaga patino e fesoasoani ia i latou e tali ai le fesili “E faapefea ona fesoasoani le Agaga Paia ia te oe?”

Gaoioiga e ono Mafai Ona Aoao Ai

E mafai faapefea ona fesoasoani le Agaga Paia ia te oe?

Tuu atu i tagata aoga taitasi se fasipepa, ma faatonu i latou e tali mai ma le faalilolilo ia fesili nei i le itu faafeagai o le pepa.

O le a se mea ua e malamalama i ai e uiga i le ala e mafai ai e le Agaga Paia ona fesoasoani ia te oe?

O a ni au fesili o i ai e uiga i le matafaioi a le Agaga Paia i o tatou olaga?

Ao mai pepa, ma faasoa atu nisi o tali i le fesili muamua mai le vasega. Faaauai tagata aoga ma tali a a latou uo i le vasega e ala i le fai atu o fesili e pei o le “O ai na ia maua se aafiaga faapena?” po o le “O le a se mea na e fiafia i ai mai mea na faasoa mai e lau uo i le vasega?” Fuli pepa, ma faasoa atu nisi o fesili na tusia e tagata aoga e uiga i le Agaga Paia. Atonu e fesoasoani le tusia o nisi o a latou fesili i le laupapa.

A o e suesue ai, vaavaai mo tali i au fesili o i ai e uiga i le Agaga Paia ma pe mafai faapefea e le matafaioi a le Agaga Paia ona fesoasoani ia te oe i ou lava manaoga na o oe.

Fesoasoani i tagata aoga ia iloa tali o a latou fesili i le taimi atoa o le lesona. E mafai ona faia lenei mea e ala i le fai atu o se fesili e pei o le “A o tatou suesue i le aso, o a tali sa e mauaina i nisi o fesili sa tatou faitauina i le amataga o le vasega?”

Ua aoao e Iesu Ana Aposetolo e uiga i le Agaga Paia

Ina ua uma ona faatautaia e le Faaola le faamanatuga, ma le iloaina o le a le pine ae tigaina o Ia mo o tatou tiga, faaosoosoga, ma agasala ona faasatauroina ai lea, sa faaauau pea ona Ia aoao atu i Ana Aposetolo.

Faitau i le Ioane 14:16–17, ma vaavaai mo le mea sa folafolaina e le Faaola e tuuina atu i Ana Aposetolo.

Aisea e te manatu na folafola atu ai e Iesu Keriso i Ana Aposetolo o le a latou maua le meaalofa o le Agaga Paia i se taimi vave pe a afio ese o Ia?

Tusi le fuaiupu lenei e lei uma i luga o le laupapa.

Ua auina mai e le Tama Faalelagi ma Iesu Keriso ia i tatou le Agaga Paia e …

O le a faauma e tagata aoga lenei fuaiupu a o latou faamaeaina le siata lenei.

Faaali atu pe tusi le siata ina ia mafai e tagata aoga ona vaai i koluma uma e lua, e aofia ai mau faasino i le koluma muamua. Fai atu i tagata aoga e tuu se avanoa mo se koluma lona tolu, lea o le a faaopoopo i se taimi mulimuli ane. Afai o le a galulue taitoatasi pe i ni vaega toalaiti ia tagata aoga i lenei gaoioiga, mafaufau e tuu atu i le vasega se faataitaiga e ala i le faatumuina faatasi o ni laina.

Fuaiupu	Ua auina mai e le Tama Faalelagi ma Iesu Keriso ia i tatou le Agaga Paia e …
Ioane 14:16–17
Ioane 14:26
Ioane 14:27
Ioane 15:26
Ioane 16:7–8
Ioane 16:13–14

Maitau a o faatumu e tagata aoga le siata. Ia nofouta i le aufaitau e telegese po o soo se tagata aoga e ono tauivi ma le faitau ia malamalama. Tuu atu le fesoasoani pe a manaomia.

A uma ona faamaea e tagata aoga le koluma lona lua, valaaulia ni nai tagata aoga e tusi i luga o le laupapa se fuaiupu o le aotelega po o se mataupu faavae o le upumoni na latou maua i fuaiupu taitasi.

O se molimau mai le Agaga Paia

Na aoao mai le Faaola o le a molimau mai le Agaga Paia ma vivii atu ia te Ia (tagai i le Ioane 15:26 ; 16:13–14).

Na taua e Peresitene Russell M. Nelson:

O le upu moni aupito sili ona taua o le a molimau atu e le Agaga Paia ia te oe e faapea o Iesu o le Keriso, le Alo o le Atua soifua.

(Russell M. Nelson,“Faaaliga mo le Ekalesia, Faaaliga mo o Tatou Olaga,”Ensign po o le Liahona,Me 2018, 96)

O le a se taimi na e lagona ai le aoao ma le molimau mai o le Agaga Paia ia te oe e uiga i le Tama Faalelagi ma Iesu Keriso? Na faapefea ona aoao atu ma molimau atu le Agaga Paia ia te oe?
O le a se mea e ono fai e se tasi e valaaulia ai le Agaga Paia e aoao i latou e uiga i le Tama Faalelagi ma Iesu Keriso? (tagai i le Ioane 7:17 ;14:13).

Molimau atu ia Iesu Keriso, Lona Paia, ma Lona alofa, ma mafaufau e faasoa atu se aafiaga patino o le ala na maua ai lena molimau e ala i le Agaga Paia. Uunaia tagata aoga e faaauau pea ona galulue ia iloa pe faapefea ona molimauina e le Agaga Paia nei mea i o latou lava olaga.

Aafiaga patino ma le Agaga Paia

Faaopoopo se koluma lona tolu i lau siata, ma faaigoa “O le ala na faia ai e le Agaga Paia lenei mea mo au po o se tasi ou te iloa.” Mo mau taitasi i le siata, mafaufau ma tusi e uiga i soo se aafiaga na e maua, se tagata o le aiga, po o se tasi i tusitusiga paia i le faataunuuina e le Agaga Paia o lena matafaioi. Afai e te le iloaina pe manatua se aafiaga patino mo matafaioi taitasi a le Agaga Paia na faamamafa mai e le Faaola i nei fuaiupu, e le afaina lena mea. A o e taumafai e faamaoni ma vaavaai mo nei aafiaga i lou olaga, o le a fesoasoani le Tama Faalelagi ia te oe e iloa i latou.

Tuu atu ia lava se taimi i tagata aoga e tusitusi ai e uiga i o latou aafiaga. A o latou faia lea mea, vaavaai mo tagata aoga o e atonu o loo tauivi ia iloa aafiaga na latou maua ma le Agaga Paia, ma tuu atu ia i latou taitoatasi soo se fesoasoani latou te ono manaomia. O le faalogo i se aafiaga patino mai le olaga o lo latou faiaoga e mafai ona fesoasoani ia i latou e toe manatua ai se tasi o o latou lava aafiaga.

A uma ona tusitusi tagata aoga, valaaulia ni volenitia naunautai e faasoa mai nisi o o latou aafiaga. Ona o le natura paia o aafiaga faaleagaga, o le a le talafeagai le valaau atu i se tagata aoga e faasoa mai. Faamanatu i tagata aoga e aua le faasoaina mai soo se mea e paia na’uā pe patino tele.

Afai e mumusu tagata aoga e faasoa mai o latou aafiaga, mafaufau e faaali le vitio “How Does the Holy Ghost Help You?” o loo maua i le vaega o “Gaoioiga Faaopoopo e Aoao Mai Ai” o lenei lesona e uunaia ai i latou e faasoa mai.

Tala ma Faamatalaga o Talaaga

O le a le mea e fai e le Agaga Paia?

Na aoao mai Peresitene Dallin H. Oaks:

15:16

O le sui lona tolu o le Aiga Atua o le Agaga Paia, ua faasino atu foi i ai o le Agaga Paia, le Agaga o le Alii, ma Lē Faamafanafana. O Ia o le sui o le Aiga Atua o le puna o faaaliga patino. I le avea ai ma se peresona o agaga (tagai i le MF&F 130:22), e mafai ona afio o Ia i totonu o i tatou ma faatino le matafaioi taua o fesootaiga i le va o le Tama ma le Alo ma le fanau a le Atua i luga o le fogaeleele. E tele mau ua aoao mai ai o Lana misiona o le molimau mai e uiga i le Tama ma le Alo (tagai i le Ioane 15:26 ; 3 Nifae 28:11 ; MF&F 42:17). Sa folafola mai e le Faaola o Lē Faamafanafana o le a aoao mai ia i tatou mea uma, faamanatu mai ia i tatou mea uma, ma taitai atu i tatou i upumoni uma (tagai i le Ioane 14:26 ; 16:13). O lea, ua fesoasoani ai le Agaga Paia ina ia i tatou ia iloatino le va o le mea moni ma le mea sese, taiala i tatou i a tatou faaiuga taua e tele, ma fesoasoani ia i tatou i o tatou luitau o le olaga faaletino. O Ia foi o le ala e faapaiaina ai i tatou, o lona uiga, ua faamamaina mai le agasala (tagai i le 2 Nifae 31:17 ; 3 Nifae 27:20 ; Moronae 6:4).

(Dallin H. Oaks, “O Le Aiga Atua ma le Ata o le Faaolataga,” Ensign po o le Liahona, Me 2017, 102)

Aisea e taua ai lo tatou iloa o le talanoa mai o le Agaga Paia ia i tatou?

Na aoao mai Peresitene Dallin H. Oaks o le Au Peresitene Sili:

O lenei laina patino o fesootaiga ma lo tatou Tama Faalelagi e ala mai i Lona Agaga Paia, o se puna o la tatou molimau o le upumoni, o lo tatou malamalama, ma lo tatou taitaiga patino mai se Tama Faalelagi agaalofa. O se mea taua lea o Lana fuafuaga ofoofogia o le talalelei, lea e mafai ai e tagata taitoatasi uma o Lana fanau ona maua se molimau patino i lona moni.

(Dallin H. Oaks, “O Laina e Lua o Fesootaiga,” Ensign po o le Liahona, Nov. 2010, 83)

Ioane 14:27 . E mafai faapefea ona ou lagonaina le filemu mai le Agaga Paia pe afai ou te tauivi ma le soifua maloloina faalemafaufau?

Afai e te oo i luitau o le soifua maloloina faalemafaufau e pei o le popole po o le atuatuvale, atonu e te lagona le faigata tele ona lagonaina le Agaga Paia. E le o oe e mafua ai. Ua silafia e lo tatou Tama Faalelagi ma Lona Alo o Iesu Keriso nei tauiviga, ma La te mananao e fesoasoani ia te oe. Mafaufau e iloilo se tasi pe lua o punaoa nei mo nisi faamatalaga i le auala e lagona ai le filemu mai le Agaga Paia pe a e tauivi ma faafitauli o le soifua maloloina faalemafaufau.

Vitio: “Like a Broken Vessel” (11:36; o loo maua i le ChurchofJesusChrist.org)

11:36

Reyna I. Aburto, “I Mala mai Manū, le Alii e Iesu, Tumau Mai ia te Au!,” Ensign po o le Liahona, Nov. 2019, 57–60
Debra Theobald McClendon, “Discerning Your Feelings: Anxiety or the Spirit?,” Ensign, Apr. 2019, ChurchofJesusChrist.org
Lyle J. Burrup, “Anxiety and Anxiety Disorders,” Ensign, Mat. 2017, 54–61
M ental l Health.ChurchofJesusChrist.org

Ioane 16:7 . O le a le uiga o le fetalaiga a le Faaola ina ua Ia fetalai, “Afai ou te le alu ese, o le a le sau Lē Faamafanafana ia te outou”?

E le o mailoa le mafuaaga na le faamatala atoa ai i tusitusiga paia, o le Agaga Paia e lei galue i le atoatoaga i tagata Iutaia i le taimi o femaliuai ai Iesu i le olaga nei ( Ioane 7:39 ; 16:7). O faamatalaga i le aafiaga o le Agaga Paia e lei oo mai seia vagana ai ina ua toetu Iesu atonu na tatau ai ona faasino na o lena tisipenisione faapitoa, aua ua matua manino lava na galue le Agaga Paia i tisipenisione na muamua atu. E le gata i lea, o loo i ai se faasinoga i le na o le meaalofa o le Agaga Paia e le o i ai, talu ai o le mana o le Agaga Paia sa galue i le taimi o galuega a Ioane le Papatiso ma Iesu; semanu e leai se tasi e mauaina se molimau i upumoni sa aoaoina e nai tamalii ( Mataio 16:16–17 ; tagai foi i le 1 Kor. 12:3).

(Bible Dictionary, “ Agaga Paia ”)