Atamai i Aoaoga Faavae: Ioane 17:3

O le Iloaina Ai o le Tama Faalelagi ma Iesu Keriso

I le lesona ua mavae atu, “Ioane 17,” na e aoaoina ai e mafai ona tatou alualu agai i luma i le ola faavavau e ala i le iloaina ai o le Tama Faalelagi ma Iesu Keriso. O lenei lesona o le a fesoasoani ia te oe e tauloto ai mau tauloto faaleaoaoga faavae ma le fasifuaitau autu o tusitusiga paia mo le Ioane 17:3, faamatala le aoaoga faavae, ma faaaoga mataupu faavae o le mauaina o le malamalama faaleagaga i se tulaga moni faale-olaga.

Migao mo suafa o le Atua. Ona o suafa o le Atua le Tama ma Lona Alo, o Iesu Keriso, e matuai taua lava, ia mautinoa e uunaia ma faaalia le migao e pei ona faaaogaina ai o Laua suafa (tagai i le Mataupu Faavae ma Feagaiga 63:61).

Sauniuniga a le tagata aoga: Valaaulia tagata aoga e faailoa mai se tasi latou te iloa atonu na te malamalama lelei i le Tama Faalelagi ma Iesu Keriso. Valaaulia tagata aoga e fesili i lena tagata po o le a se mea na fesoasoani ia te ia e malamalama ai i le Tama Faalelagi ma Iesu Keriso.

Gaoioiga e ono Mafai Ona Aoao Ai

O lenei lesona o le atamai i aoaoga faavae ua faatulagaina ia aoaoina pe a uma le lesona i le “Ioane 17,” o le lesona faatatau mo le fuaitau o le atamai i aoaoga faavae Ioane 17:3 . Afai e manaomia ona toe faamei lenei lesona o le fuaitau o le atamai i aoaoga faavae i se isi vaiaso, ia mautinoa e aoao foi le lesona faatatau e talafeagai i ai i lena foi vaiaso.

Tauloto ma faamatala

Fesoasoani i tagata aoga e tauloto le mau faasino ma le fasifuaitau autu o tusitusiga paia. O le gaoioiga o mulimuli mai o se tasi lea o auala e fesoasoani ia i latou e fai ai lenei mea.

Tauloto leotele mo ni taimi le mau o le atamai i aoaoga faavae Ioane 17:3 ma lona fasifuaitau autu o tusitusiga paia: “O le ola e faavavau foi lenei, ia latou iloa oe le Atua moni e toatasi, ma Iesu Keriso.”I luga o se isi fasipepa, tusi ai le mau faasino Ioane 17:3 ma mataitusi muamua o upu taitasi i le fuaiupu: O l o e f f l i l i o l A m e t m I K. I le faaaogaina ai o na o mataitusi muamua o le fuaiupu, taumafai e tauloto le mau faasino ma le fasifuaitau autu o tusitusiga paia. A o faateleina lou to’a, taumafai e tauloto mai le mau faasino ma le fasifuaitau mai mea e manatua.

Ina ia fesoasoani ia e malamalama atili i le uiga o lenei mau, faamatala upumoni o loo aoao mai i le Ioane 17:3 i au lava upu. Ia aofia ai mea nei:

1. O le uiga o le fasifuaitau “ola faavavau.”

2. O nisi o auala e mafai ona tatou “iloa” ai le Tama Faalelagi ma Iesu Keriso.

Valaaulia ni nai tagata aoga e faasoa mai a latou faamatalaga mai le vasega. Afai e manaomia e tagata aoga se fesoasoani e malamalama ai i le uiga o lenei fuaitau, faaaoga loa se taimi e talanoaina ai a o lei faagasolo le lesona.

E tele faamatalaga i le vaega o le “Tala ma Faamatalaga o Talaaga” o le lesona lenei ma le lesona talu ai, “Ioane 17,” e mafai ona faaaoga e fesoasoani ai i tagata aoga pe a manaomia.

Faataitai le faaaogaaga

Mafaufau pe o le a le tele o le iloa masani e tagata aoga o ni mataupu faavae o le mauaina o le malamalama faaleagaga pe a filifili po o le a le tele o le taimi e manaomia mo le iloiloga fautuaina lenei.

Toe iloilo i parakalafa 5–12 o le “Mauaina o le Malamalama Faaleagaga” i le vaega o le Pepa Autu o le Atamai i Aoaoga Faavae (2022). Mafaufau pe mafai faapefea ona e faamalamalama atu nei mataupu faavae taitasi i se tasi e lei faalogo muamua lava i ai.

Afai e aoga, vaevae tagata aoga i ni paga ma valaaulia i latou e faataitai ona faasoa leotele mai a latou faamalamalamaga o nei mataupu faavae.

Faitau le tulaga faataitai nei:

Ina ua maea le sauniga anapogi ma molimau, ua e matauina ua foliga faanoanoa lau uo o Iulia. A o e savali atu i le fale faatasi ma ia, sa ia fai mai, i le taimi o le sauniga i le asō, sa ia iloa ai na te le iloa lelei le Tama Faalelagi ma Iesu Keriso e faapei ona ia manao i ai. Na ia faamatalaina se lagona o le tuuatoatasi ma se naunautaiga faananau mo le ituaiga o sootaga ma i Laua lea na ia lagonaina i nisi o i latou na faasoa mai a latou molimau. Ua e filifili e mafaufau loloto ma tatalo i nai aso o sosoo ai e uiga i le auala e fesoasoani ai ia Iulia.

Faaaoga mataupu faavae o le mauaina o le malamalama faaleagaga ma fesili ma gaoioiga nei e fesoasoani ia te oe e mafaufau ai i mea e te ono tautala atu ai ma fai e fesoasoani ai ia Julia. Atonu e te manao e tusi i lalo mea ua e aoaoina ma soo se uunaiga e te maua a o e sauniuni.

Mafaufau e valaaulia tagata aoga e saunia a latou tali e ala i le galulue faatasi ma se paga. Ta’u atu ia i latou o le a latou maua le avanoa e faasoa atu ai i isi tagata aoga mea latou te aoaoina.

Iloilo manatu ma fesili faatasi mai se vaaiga e faavavau

• Aisea e te manatu ai e finagalo le Tama Faalelagi ia tatou iloa o Ia ma Lona Alo, o Iesu Keriso?

• Aisea e te manao ai ia iloa lelei foi i Laua e pei ona e mafaia i lenei olaga?

Saili le malamalama atili e ala i punavai paia ua atofaina

• E mafai faapefea e le suesueina o le tatalo a le Faaola i le Ioane 17:3 ona fesoasoani ia Iulia i ona manaoga?

Fai se lisi o ni punavai lelei e ono fesoasoani ia Iulia e iloa ai le Tama Faalelagi ma Iesu Keriso.

• E mafai faapefea e Iulia ona faaaoga punaoa o loo maua e fesoasoani ai ia te ia ia iloa atili le Tama Faalelagi ma Iesu Keriso? (Mo se faataitaiga, o a upu autu e mafai ona ia sailia i le Taiala i Tusitusiga Paia, i le Topical Guide, i leChurchofJesusChrist.org, po o luga o le polokalama o le Potutusi o le Talalelei?)

Faaalu ni nai minute e suesue ai punavai paia ua atofaina e aoao atili ai e uiga i le Tama Faalelagi ma Iesu Keriso ma le auala e iloa atili ai i Laua.

Valaaulia tagata aoga e faasoa mai mea na latou aoaoina ma pe na faapefea ona latou mauaina ia faamatalaga. E mafai ona fesoasoani lenei mea i isi tagata aoga e aoao ai pe faapefea ona faaaoga lelei atili ia punaoa o loo maua.

Faatino i le faatuatua

Valaaulia tagata aoga o e na mulimuli i le fautuaga mo le sauniuniga a le tagata aoga e faasoa mai mea sa latou aoaoina a o latou taliina fesili nei.

• E faapefea ona avea o se faatinoga o le faatuatua le taumafai ia iloa le Tama Faalelagi ma Iesu Keriso?

• O le a se mea ua e faia po o se tasi e te iloa ina ia iloa atili ai le Tama Faalelagi ma Iesu Keriso e mafai ona e fautuaina atu ia Iulia?

• O a fasifuaitau e te maua i parakalafa 5–7 i le vaega o le “Mauaina o le Malamalama Faaleagaga” o le Pepa Autu o le Atamai i Aoaoga Faavae (2022) e mafai ona fesoasoani i se tasi sa faia mea sao ae le o lagonaina pea le latalata atu i le Atua e pei ona latou mananao ai?

Valaaulia paga taitasi e faapotopoto ma ni nai isi paga ma fefaasoaai le tasi ma le isi i mea na latou maua a o faaaogaina mataupu faavae o le mauaina o le malamalama faaleagaga.

Iloiloga o le atamai i aoaoga faavae

I le amataga po o le faaiuga o se lesona o le a sosoo ai, faaaoga ni minute e le silia ma le 3 i le 5 minute e toe iloilo ai le fuaitau o le atamai i aoaoga faavae. Mafaufau e tusi le mau faasino ma le fasifuaitau autu o le mau mo le Ioane 17:3 i luga o le laupapa faatasi ma upu i le faasologa sese. Ona valaaulia lea o tagata aoga e toe faatulaga sao ia upu.

Tala ma Faamatalaga o Talaaga

O le a le ola faavavau?

O le ola faavavau o le fuaitau lea o loo faaaogaina i tusitusiga paia e faauiga ai le olaga o loo soifua ai lo tatou Tama e Faavavau. … O le ola faavavau, po o le faaeaga, o le nofo lea i le afioaga o le Atua ma faaauau ai o ni aiga (tagai i le Mataupu Faavae ma Feagaiga 131:1–4).

(Autu o le Talalelei,“Ola Faavavau,” topics.ChurchofJesusChrist.org)

E mafai faapefea ona tatou iloa le Tama ma le Alo mo i tatou lava?

Sa taliina e Elder Robert D. Hales (1932–2017) o le Korama a Aposetolo e Toasefululua lenei fesili.

Mauaina mai faaaliga faaletagata lava ia. O faaaliga faaletagata lava ia o le ala lea e fesoasoani ai le Tama Faalelagi ia i tatou ia iloa o Ia ma Lona Alo, aoao ma ola i le talalelei, tumau e oo i le iuga i le amiotonu, ma agavaa ai mo le ola faavavau—e toe foi atu ai i lo La’ua afioaga.

(Robert D. Hales, “Faaaliga Faaletagata: O Aoaoga ma Faataitaiga a Perofeta,” Ensign po o le Liahona, Nov. 2007, 87)

O le a se mea e tatau ona ou faia pe afai ou te le o mautinoa pe ou te talitonu i le Atua?

Sa faapea mai Elder Robert D. Hales (1932–2017) o le Korama a Aposetolo e Toasefululua:

Afai e le mafai ona e manatua le talitonu i le Atua pe ua e le toe talitonu pe ua e talitonu ae e aunoa ma se talitonuga maumaututu moni, ou te valaaulia oe e saili se molimau i le Atua i le taimi nei. …

… Faatasi ai ma lau lava molimau e uiga i le Atua, o le a mafai ai ona e faamanuiaina lou aiga, au fanau, au uo, lou lava olaga—i latou uma e te alofa i ai. O lou malamalama patino i le Atua e le gata o le meaalofa silisili lea o le a e foai atu, ae o le a aumaia ai ia te oe le olioli silisili o le a e maua.

… Ou te folafola atu afai o le a outou sailia o Ia ma i latou tou te alolofa i ai i le lotomaualalo, faamaoni, ma le filiga, o le a outou iloa foi ma le mautinoa. O le a o’o mai a lau molimau.

(Robert D. Hales, “Saili e iloa le Atua, lo Tatou Tama Faalelagi, ma Lona Alo, o Iesu Keriso,” Ensign po o le Liahona, Nov. 2009, 32)