“Aoao ia Iloa le Agaga Paia,” Mo le Malosi o le Autalavou, Fep. 2021, 6–7.
Sau, Mulimuli Mai ia te A’u
Aoao ia Iloa le Agaga Paia
O le a taialaina ma taitaia e le Agaga Paia o tatou olaga a o tatou aoao e iloa ma mulimuli i Ana musumusuga.
A o avea a’u ma se talavou, sa ou le’i iloa pe faapei le lagona o le Agaga Paia. Pe a ma le 12 o ou tausaga na faasaofai ai au e lou tina i lalo ma fesili mai ia te au i le fesili taua lenei: “Mark,” sa ia fai mai ai, “pe na ta’u atu ea e le Agaga Paia ia te oe e moni le Ekalesia?”
Ou te lei masani i le pepelo i lou tina, o lea sa ou tali atu ai ma le faamaoni ma le filemu “Leai?”
Ona ia fai mai lea, “E finagalo le Tama Faalelagi ia e iloaina mo oe lava ia, ae e manaomia ona e faatinoina le taumafaiga. Afai o le a e faitauina le Tusi a Mamona ma tatalo, o le a Ia faailoa atu ia te oe lona moni e ala i le Agaga Paia. ”
Sa i ai la’u lava kopi o le Tusi a Mamona, ae ou te lei faitauina lava na o a’u. Faatasi ai ma le naunautaiga e faamaoni i lenei valaaulia, sa amata ai loa lau lava malaga faaleagaga. I po taitasi ae ou te lei moe, ou te faitauina ai se mataupu i le Tusi a Mamona. A o ou tootuli ifo i lalo e tatalo, sa ou ole atu i le Tama Faalelagi e tau mai ia te au e moni. A o ou tatalo, sa i ou luga se lagona toafilemu. Sa lelei ou lagona i totonu.
Pe o nei lagona e mai le Agaga Paia? Sa ou le mautinoa lelei. Sa fou ia te au lenei mea, ma sa ou le iloa pe faapei le lagona o uunaiga a le Agaga Paia. Sa ou mafaufau pe o le a sau se agelu e asiasi mai ia te au pe atonu foi o le a faaali mai se malamalama sili o le lagi i lou potu. Ae ui i lea, faatasi ai ma le manao faamaoni ia maua le malamalama folafolaina mai le Agaga Paia, sa faaauau pea ona ou faitau ma tatalo i lea po ma lea po. O taimi uma lava ou te tatalo ai, sa ou faalogoina lagona o le filemu, ma sa lelei ou lagona i totonu.
Ana le oo lava i se taimi mulimuli ane sa ou iloaina ai sa tali mai le Alii i au tatalo i le taimi atoa lava, ae sa ou sailia se isi ituaiga tali e ese mai ai. Ou te lei iloaina e mafai ona tatou “lagonaina” ia uunaiga a le Agaga Paia.
Aoao ia Iloa Uunaiga
Sa i ai se taimi na tauivi ai Oliva Kaotui e fia iloa uunaiga mai le Agaga. Ina ua ia fesili atu i le Perofeta o Iosefa Samita e uiga i ai, sa ia maua le tali lenei mai le Alii: “Ou te lei tautala atu ea le filemu i lou mafaufau e uiga i le mataupu? O le a se molimau sili atu e mafai ona e maua mai lo lena mai le Atua?” (Mataupu Faavae ma Feagaiga 6:23). Ua uma ona ia mauaina se tali, ae na te lei iloaina. O le tali o le filemu i lona mafaufau—e pei lava sa ou lagonaina a o talavou.
E lei leva mulimuli ane, ae saunia e le Alii se isi fautuaga mo Oliva ma i tatou uma, “O le a Ou tau atu ia te oe i lou mafaufau ma lou loto, e ala i le Agaga Paia, lea o le a oo atu i ou luga ma lea o le a mau i lou loto. … O le agaga lenei o faaaliga.” (Mataupu Faavae ma Feagaiga 8:2–3).
Ua aoao mai i tatou e le Aposetolo o Paulo ia tatou iloa nei lagona o le “alofa, o le olioli, o le filemu, o le onosai, o le mataalofa, o le agalelei, o le faamaoni, [ma le] agamalu” (Kalatia 5:22–23).
O uunaiga mai le Agaga Paia e masani ona filemu ma mālū. O le a seasea ona alaga mai le Atua e taumafai ia tatou gauai atu. Nai lo lena, a o tatou faaaluina se taimi e malolo ai, lagona, ma mafaufau loloto, ua tatou faaali atu ia te Ia o loo tatou faalogologo ma mananao i tali e ala i le Agaga Paia. O le isi taimi e te tootuli ai i le tatalo, nai lo le oso i luga ina ua uma ona faapea mai “amene,” faatalitali mo ni nai minute. Ia e tumau pea i ou tulivae ma tau lava o le faalogo. Atonu o loo taumafai le Alii e “tautala atu le filemu i lou mafaufau” e pei lava ona sa Ia faia ia Oliva Kaotui ma au foi.
O Le Meaalofa Sili o le Agaga Paia
A uma le papatisoga ona tatou taliaina lea o le meaalofa o le Agaga Paia. O lenei meaalofa paia e maua ai le fesoasoani mai se sui o le aiga Atua i o tatou olaga atoa. Ua folafola mai ia i tatou a o tatou taumafai e ola agavaa mo lenei meaalofa, “o le a faaali mai e [le Agaga Paia] ia te outou mea uma e tatau ona outou faia” (2 Nifae 32:5). O le Agaga Paia na te faamautuina le upumoni i o tatou loto, puipuia i tatou mai mea leaga, ma taialaina i tatou i o tatou olaga atoa. Oka se faamanuiaga ofoofogia!
Ou te faafetai mo le meaalofa maoae o le Agaga Paia ma Lana taitaiga i lo’u olaga.