“Uunaiga i le Nofoa o le Paka,” Mo le Malosi o le Autalavou, Fep. 2021, 20–21.
Uunaiga i le Nofoa o le Paka
E lei iloaina lava e le tamaitai o loo nofo i luga o le nofoa, ae sa tatau ona ia talanoa mai ia i maua.
Ata na tusia e Bethany Stancliffe
O se tasi o aso malulu ma timuga mo maua ma lau soa a o ma savalia auala o le tamai aai tumatafaga o Los Vilos, Chile. O ni nai vaiaso faigata mo i maua—e leai se tasi e aoao ma sa ma tauivi e saili se tasi e fia faalogo i le ma savali. Sa ou lotovaivai lava, ma sa ou lagonaina e le o faamanuiaina tele i maua aua ma te lei aoaoina atu ni lesona se tele.
Sa ma savavali ma lau soa i lena po, ma sa ou tilotilo atu ma iloa ai se tamaitai i luga o se nofoa o le paka o loo tagi. Sa ou iloa lava e tatau ona ma talanoa atu ia te ia. Sa ou tilotilo atu i lau soa ma tusi atu i le tamaitai. A o ma savavali atu ia te ia, sa ou lagonaina pea le pei na ia matuai manaomia lava ona faalogo i se mea mai ia i maua, ae sa le mafai ona ou mafaufau po o le a. Sa ou iloa lava e taua lo ma talanoa atu ia te ia.
O le taimi lava na ia vaai mai ai ia i maua, sa ia fai mai, “O ese. Ou te le fia talanoa i se tasi.”
Sa ou taumafai e tau atu ia te ia po o ai i maua ma sa na o lo ma fia fesoasoani lava, ae sa lei faalogo o ia. Sa ia toe fai mai ma te o ese. Sa ou taumafai e mafaufau i se mea e mafai ona ma fai atu ae sa leai se manatu. Sa ma savavali ese.
Sa na o le fa a ma laa ese ae ou maua se isi lagona e tatau ona ma talanoa ia te ia. Sa ou liliu atu i lau soa ma faapea atu, “E tatau ona ta toe foi.”
Sa ma toe foi atu, ma o le mea lava lena na tupu, ae o le taimi lea sa sili atu ai lona le fiafia. “E manaomia lo’u tuua toatasi. O ese.”
Sa toe faapea foi, sa le mafai ona ou mafaufau i se isi mea taua e fai atu ia te ia. Sa mafai ona ou iloa sa faigata tele lona aso, ae ou te lei iloa le mea sa tatau ona ia faalogo i ai. O lea na ou mapuea ai, ma sa, ma toe savavali ese atu.
Sa ma mamao teisi ese ae ou maua foi le lagona lea: O e talanoa atu ia te ia.
“Ou te le fia tauina atu lenei mea, Hermana,” sa ou fai atu ai, “ae e tatau lava ona ta toe foi atu ma talanoa atu i lena tamaitai.”
Sa fautua mai lau soa ia aua nei o ma faia, ona sa manino lava le le fiafia tele o le tamaitai ia i matou.
Sa ou ioe, ma le faamaoni, ma lagona le popole i le toe foi atu ma faalavelave i le tamaitai, o le sa manino lava le mafatia. Ae peitai sa ou fai atu, “Leai, ou te lagona lava lo ta manaomia ona foi atu. Na te le o iloaina, ae e tatau lava ona ia talanoa ia i taua.”
Sa ma toe foi atu ma le faaeteete lava i le tamaitai i le nofoa, lea sa tagi pea. Ae ma te lei oo atu ia te ia, sa ou faia se tatalo laitiiti. “Tama Faalelagi,” sa ou mafaufau ai, “faamolemole sei fesoasoani mai ia te au ia ou iloa le mea e manaomia ona faalogo i ai lenei tamaitai.”
O le taimi lava na ma taunuu atu ai ia te ia, sa ou fai atu, “Ou te faamalie atu i le toe faalavelave mai ia te oe, ae na o lo’u fia tau atu lava ia te oe o oe o se afafine o le Atua. E manaomia moni lava e Ia lou iloaina e alofa o Ia ia te oe. Ona e alofa o Ia ia te oe. Ma te fiafia lava e talanoa atili ia te oe, ae afai e te le manao i ai, e le afaina. Na o lo’u manao lava ia e iloa lena mea.”
Sa tilotilo mai o ia ia i maua ma se foliga ua sili atu le filemu. Sa ia fai mai, “Atonu e mafai ona oulua nonofo i lalo.”
O lona igoa o Veronica. Sa ia faasoa mai ma tau mai mea sa tutupu i lona olaga. Sa tele ona faafitauli i le aiga ma sa i ai ni tala le fiafia e uiga i lana galuega. Sa lagona e ia ua matua leiloa ma ua tuuatoatasi.
Sa ma faasoa atu se mau mai le Tusi a Mamona ia te ia ma fesili atu pe fia faalogo atili i le talalelei. Sa ia teena ma le faaaloalo, ae sa faafetai mai ia i maua mo le ma savali ma le finau e talanoa atu ia te ia. A o lei malaga ese atu, sa matou tatalo faatasi ma ia i lena tamai nofoa i le paka, ma sa matou talosagaina ina ia faamanuiaina ma taitaiina o ia ma lona aiga.
Ma te lei toe vaai lava ia Veronica, ae o lena aafiaga na aoaoina ai au e ui lava atonu tatou te le vaai i se tagata ua papatiso, ae o le faaalia o le alofa i se tasi o se faatinoga taua lea o le galuega faafaifeautalai. E oo lava i faatinoga aupito itiiti e mafai ona i ai se aafiaga tele, a tatou mauaina se uunaiga—e tusa lava pe foliga mai ua fai si ou fefe pe le iloa pe aisea—e taua lo tatou mulimuli i ai. Aua ua silafia e le Tama Faalelagi mea e manaomia e Ana fanau. E tusa lava pe na’o le faasoa atu o le alofa o le Atua i se tasi le mea e sili ona lelei e mafai ona tatou faia, o se faamanuiaga lava lena.