“O Se Liua Tele o le Loto,” Mo le Malosi o le Autalavou, Fep. 2021, 12–13.
Lesona Faatino o le Afiafi Faaleaiga
O Se Liua Tele o le Loto
E faapefea ona aoao i tatou e se fuamoa e uiga i le taua o se suiga tele o le loto?
E suia le tele o mea o loo siomia ai i tatou. E suia le taumalulu i le tautotogo. E suia taeao lagilelei i aoauli timuga. O falaoamata, fefete, ma vai e mafai foi ona suia i se falaoa e fai i le fale! O loo talanoa mai tusitusiga paia e uiga i le manaomia ona i ai o “se liuga tele i totonu o i matou, po o i totonu o o matou loto” (Mosaea 5:2), ae o le a le uiga moni o lena mea?
Faatasi ai ma lenei lesona faatino o le afiafi faaleaiga, e mafai ona e aoaoina lou aiga i le mafuaaga e finagalo ai le Tama Faalelagi ia suia o tatou loto, ma o le a e aoao atu le mataupu faavae e ala i le faaliusuavaia o se atigifuamoa i le vineka.
O Le Mea e Fai
-
E mafai ona vave lava ona tupu le suiga, e pei o se suiga faafuasei i le tau po o suiga o mea fai meaai i meaai. E lelei le manatua o o tatou loto e mafai ona umi atu le taimi e sui ai, atonu foi o se olaga atoa. Ua aoao mai Elder David A. Bednar o le Korama a Aposetolo e Toasefululua e faapea o lenei suiga e oo mai e “faifai malie ma e toetoe lava a le matauina. … O lenei vaega o le faagasologa o le toe suia e manaomia ai le taimi, filiga, ma le onosai.”1
O le fuamoa, e pei lava o o tatou loto, o le a manaomia se taimi e sui ai. Atonu e te fesili i lou aiga pe o a suiga latou te manatu o le a tupu pe a tuu pea le fuamoa i totonu o le vineka. Tuu le fuamoa i totonu o le fagu. Sasaa ia lava le vineka e ufitia ai le fuamoa, tuu faamatagataga le tapuni i luga o le fagu, ma tuu ai ia le itiiti ifo ma le 24 itula. E ui lava ina manaomia ona soka le fuamoa mo sina taimi, ae e mafai ona e siakia ma matamata ao mou ese atu le atigi.
-
A uma ona faatalitali mo le 24 itula, toe faapotopoto faatasi lea o lou aiga e siaki ia suiga i le fuamoa. Aveese le tapuni ma sasaa lemu ese le vineka ia mautinoa o le a le pau ese le fuamoa. Faatu ese le fagu ma faitau faatasi le Mosaea 5:1–2.
E pei o le nuu o le tupu o Peniamina, e mafai foi ona tatou iloa le suia o le loto e ala i le aoao e faalogo i le Tama Faalelagi ma tausi Ana poloaiga. Pe na i ai se taimi o lou olaga na e lagona ai ua “le toe i ai se manao e fai mea leaga, ae ia faia mea lelei e le aunoa” (Mosaea 5:2)?
-
Ia faamama nei le fuamoa i le vai ma aveese soo se atigi o totoe. Matau le lamolemole ma le vaivai o le fuamoa ua oo i ai! Pasi faasolo ma tuu atu i tagata taitoatasi o le aiga ia lagona le suiga. E pei lava ona suia e le vineka le fuamoa, e mafai e le Alii ona suia o tatou loto. A o tatou faalogo atu ia te ia ma mulimuli i uunaiga a le Agaga Paia, o le a faamaluluina o tatou loto. Afai tatou te filifili e aua le faalogo i le Tama Faalelagi ma liliu ese mai ia te Ia, o o tatou loto e mafai ona ma’a’a, e pei o se atigi, ma taofia ai i tatou mai le lagonaina o le Agaga Paia.
-
Tuu atu i lou aiga e tusi i lalo i se fasi pepa se mea e mafai ona latou faia ina ia maua ai le loto agamalu. Pe mafai ona sili atu se taimi e te faaaluina i tusitusiga paia po o le toe iloiloina o le konafesi aoao? Atonu e te lagona le uunaia e faalogo lelei i le taimi o au tatalo? Faaalu se taimi e mafaufau moni ai pe mafai faapefea ona e galue e faamaluluina lou loto.
E te manao e toe taumafai i se isi faataitaiga? Tuu se fuamoa fou i ni vai eseese e iloa ai pe mafai ona e mauaina ia lava taunuuga. O le a le mea e tupu pe a e tuua i le vai tipolo, vai apainu, vai, susu, po o le sua o le apu?