“Faavae Mautu,” Mo le Malosi o le Autalavou, Fep. 2021, 30–31.
Faavae Mautu
E Aoga Tele
Ata na tusia e Michela Buttignol
E fai lau seminare i le 6 i le taeao, a o lei amataina le aoga. E vave lava ona ou ala ia fai le meaai o le taeao, fai le tatalo faaleaiga, ma savali i le lotu. Ae o le tele lava o lou alu i le seminare, o le tele foi lena o lou iloa o le alapo e aoga lava!
E maoae tele faiaoga ma e aoao lava e le aunoa ma le Agaga. Ua atamamai tele i latou ma iloa le tele o mea e uiga i le talalelei, lea sa ou fiafia ai e alu ma aoao atili.
O le alu i le seminare i taeao taitasi sa fesoasoani ia lava ai lou lototele e faasoa atu le talalelei i ni uo i le vasega se toalua ma fesoasoani ai ia te au e faamatala atu tusitusiga paia. Sa fesoasoani foi le seminare ia te au ia lava le lototele e tu atu ai mo ou talitonuga. Sa ou faalogologo i le leitio i se tasi taeao, ma sa fai mai se tamaloa o Iosefa Samita o se tagata pepelo. Sa ou matua le fiafia lava i lenei mea ona sa ou maua se molimau malosi ia Iosefa Samita i le seminare ma sa ou iloaina o le mea sa fai mai ai le tamaloa e le moni.
Sa ou tau atu i lou faiaoga seminare e uiga i ai, ma sa ia fautua mai ou te tusia se tusi i le tamaloa ma faasoa atu lau molimau e uiga ia Iosefa Samita. Sa ou tusia le tusi ma tuuina atu lau molimau e uiga ia Iosefa Samita ma le Ekalesia. Sa fesoasoani lea mea ou te toafilemu ai ae le o le lē fiafia tele. E lei tali mai o ia, ae sa ou lagonaina se faamautinoaga o lau molimau a o ou tusitusi. Ou te matua faafetai lava ona sa ou mauaina se molimau malosi i le Perofeta ma le talalelei i le seminare.
Raquel B., Atenitina
Auaunaga o le Aoga Sa
O au o se tiakono. Na aoaoina au e ou matua e tatau ona avea au ma se faataitaiga mo au uo aua o loo ou umia le perisitua ma ona o loo avea au ma sui o le Tama Faalelagi ma Iesu Keriso. E fesoasoani moni lava ia te au e filifili ai le mea sao ma saili mo avanoa e auauna atu ai i isi. Ou te iloa afai ou te faia ni mea lelei, o le a vaai au uo i mea ou te faia ma atonu e mananao foi e fai ni mea lelei.
Ina ua maea le aoga sa i se taimi ua mavae, sa ou i ai i le fale faafiafia ae ou vaaia ai se faiaoga sa manaomia se fesoasoani i nisi o nofoa. O le a ia faatulagaina i fafo o le fale mo se gaoioiga. Na te lei fesili mai ia te au e fesoasoani ia te ia, ae sa ou vaai sa ia manaomia se fesoasoani. Sa tele ni nofoa, ma sa na o ia lava sa i ai. O lea na ou ave ai le tele o nofoa i fafo ma faatulaga mo ia.
Mulimuli ane, na fai mai le faiaoga, “Faafetai lava mo le fesoasoani.” Sa le o se mea tele ia te au talu ai e lei umi, ae sa matuai faafetai lava o ia, lea na ou maua ai se lagona lelei. Mulimuli ane, sa tau atu e le faiaoga i lou tina le mea sa ou faia. Na fai mai lou tina sa ou faia se mea lelei ma e tatau ona ou sailia pea ni avanoa e auauna atu ai i isi, aua o se mea lena o le a faia e Keriso.
Sa ou fiafia ma faafetai ona sa ou auauna atu. Sa ou maua ai se lagona lelei, ma na ou manao ai e auauna soo atu.
Emiliano H., Texas, ISA
O Le Moliuila o le Agaga Faafetai
Ina ua ou ulufale atu i le aoga maualuga, sa foliga mai ua sili atu le faigata o mea uma mo au. Sa ou lotoleaga i taleni a isi tagata, i tagata na foliga mai na sili atu le ofoofogia nai lo au, i avanoa na oo mai i isi ae le o au. Sa ou moomoo lava i taimi uma pe na manao foi i se mea ou te lei mauaina.
Sa ou talanoa i ou matua e uiga i ai. Sa la faamanatu mai ia te au faapea ua uma ona tuuina mai e le Tama Faalelagi mea uma ou te manaomia, ae atonu na te le tuuina mai ia te au mea uma ou te manao ai. Sa fesoasoani mai ou matua ia te au e iloa, a e malamalama e leai lava se mea e te manaomia moni e le maua, ona e maua lea o le filemu.
Sa ou faitauina talu ai nei se tusi e faatusatusa ai le loto faafetai i se moliuila. Afai tou te o i fafo i le po lea e le o i ai ni moli, pau le mea tou te vaaia o le pouliuli. Ae afai e te alu i fafo ma se moliuila ma faasusulu atu i mea o loo siomia ai oe, e mafai ona e iloa atu mea uma o loo i ai iina.
O le lotofaafetai e pei o lena malamalama. Pe a susulu atu, e faamalamalama ai mea o loo i ai iina. Ae ona ua mafai nei ona e vaai i ai, ua e talisapaia atili.
O le mea sili e uiga i le loto faafetai o le, e mafai ona e faaaogaina i le ao po o le po, e tusa lava po o fea o e i ai po o a foi tulaga o e i ai. Pau lava le mea e te faia o le ki.
Ethan B., Iuta, ISA