Fesili ma Tali

“Ou te le malamalama i le tele o mau. E mafai faapefea ona ou maua ni mea se tele mai le faitauina o tusitusiga paia?”

“O loo faaauau pea ona tuputupu a’e … lau molimau i le Tusi a Mamona a o faaauau pea ona ou sailiili, faatasi ai ma se loto faamaoni, ina ia malamalama atoatoa i le afioga a le Atua e pei ona i ai i lenei tusi tulagaese o tusitusiga paia.”

Elder Ulisses Soares o le Korama a Aposetolo e Toasefululua, Konafesi aoao Ape. 2020 (Ensign po o le Liahona, Me 2020, 34–35).

Ole Atu ma Saili

“Fesili i ou matua, taitai, ma aiga. E mafai ona latou fesoasoani ia e malamalama. Ae maise lava, tatalo i le Tama Faalelagi ma ole atu ia te Ia e fesoasoani ia te oe. A o e faitau, saili mo maa taua laiti e te maua ai le fiafia i totonu.

Lolade O., 15, Quebec, Kanata

Fai Lemu

“O se auala lelei e maua ai ni mea se tele mai au suesuega o tusitusiga paia o le faitauina lea o se fasifuaitau mai lea laina i lea laina. E mafai foi ona e vaavaai mo se vaefaamatalaga pe mafaufau pe faapefea ona fesootai lena mau i lou olaga.”

Shane S., 13, Mekisiko Fou, ISA

Tusi i Lalo Uunaiga Faaleagaga

“Mo au, o le tatalo a o lei suesue ma tusitusi i lalo ni manatu e oo mai i lou mafaufau, e fesoasoani tele ia te au e faapatino ma malamalama ai i tusitusiga paia. E i ai sau api o talaaga itiiti ou te tusia ai ou manatu a o ou faitau. E fesoasoani ou te malamalama ai ma fiafia i tusitusiga paia.”

Lindsay C., 16, Oregon, ISA

Vitio o le Tusi a Mamona

“Sa amata ona ou matamata i vitio o le Tusi a Mamona, ma sa ou matua lagonaina le Agaga. Ou te faaaogaina tusitusiga paia e mulimuli ai i le vitio. Afai e faafaigata ia te oe le aoaoina po o le talitonu i tusitusiga paia, o le a fesoasoani atu ia te oe le Alii, e tusa lava pe e te le iloaina. ”

Aidan D., 11, Nebraska, ISA

Punaoa o le Sau, Mulimuli Mai Ia Te A’u

“Faaaoga le tusi lesona o le Sau, Mulimuli Mai ia te Au! E masani ona ou tauivi ia anoa lau suesuega o tusitusiga paia, ae o le faaaogaina o punaoa i le tusi lesona, e mafai ai ona ou malamalama i mea o loo ou faitauina. Talu lava ona ou faaaogaina le Sau, Mulimuli Mai ia te Au i au suesuega o tusitusiga paia, ua mafai ai ona ou malamalama lelei i tusitusiga paia ma lou Tama Faalelagi.”

Monique B., 18, Iuta, ISA

O tali ua faamoemoe e mo le fesoasoani ma ni manatu, ae e le o se faalauiloaga aloaia o aoaoga faavae o le Ekalesia.

O Le A Sou Manatu?

O nisi taimi ou te lagona ai le le taua o mea ou te faia. E faapefea ona ou faia se eseesega?

Auina mai lau tali ma le ata ae lei oo i le aso 15 o Mati, 2021.

Alu i le ftsoy. ChurchofJesusChrist.org, kiliki le “Auina Atu Lau Galuega.” Saini e alu i totonu i lau Faitotoa a le Ekalesia ona filifili lea o le “Mo le Malosi o le Autalavou” i lalo o le “Filifili le Mekasini.” Kiliki le “Faaopoopo le Faila” e filifili ai lau faila ma ata, ona kiliki lea o le “Auina Atu” e utaina ai ma auina atu lau faila. Pe imeli mai ia i matou i le [e-mail].

E ono iloiloina tali mo le uumi po o le manino.