“I Porto Alegre, Pasila,” Mo le Malosi o le Autalavou, Fep. 2021, 22–23.
O Le Auala Matou te Tapuai ai
I Porto Alegre, Pasila
Atapue mai le Getty Images
Olá! O lo’u igoa o le Helaman B. Ma o a’u o Julia Felise O. Ma te o mai mai Porto Alegre. O Porto Alegre o le laumua o Rio Grande do Sul, o se setete i saute i le atunuu o Pasila.
Helaman B.
Matou te nonofo ma ou matua, lou tinamatua, ma lou uso matua. O loo i ai se isi ou uso i le taimi nei o loo auauna atu i se misiona i Hanikeri. O Porto Alegre o se aai tele lava ma e tele taimi na ou leiloa ai.
O lo matou vaitau o le taumalulu e masani lava e mai ia Me ia Aokuso ma o la matou vaitau o le taumafanafana e mai ia Novema ia Mati. E timu pe tusa ma le 1,397 mm (55 inisi) i tausaga uma!
E toalua isi tagata o le Ekalesia i lau aoga, ae ou te le fesootai ia i laua i aso aoga masani. E ui i lea, e i ai isi au uo i le aoga, ae, e le o ni tagata o le Ekalesia. O i latou o ni tagata lelei.
I se aso masani, ou te ala ae ai i le 6:45 i le taeao, sauni, ma savali i le aoga. E uma le aoga pe tusa o le 12:30 i le aoauli, ma ou te savali vave atu i le fale e ai i le aoauli. A uma le meaai o le aoauli, ona faitau lea o au tusitusiga paia, ta le piano, ma suesue i le faaIapani. Ona i ai lea o lau seminare mai le 6:30 i le 7:30 i le afiafi ma alu e moe i le 10 i le po.
Ou te fiafia e tata viiga i le aso Sapati. O le taina i luga o le piano e aumai ai pea le Agaga ia te au, po o le a lava.
Julia Felise O.
Sa ou fanau i Sao Paulo ae na siitia atu i Porto Alegre, ina ua tolu ou tausaga. Sa auauna atu lou tama i Porto Alegre, a o avea ma se faifeautalai faamisiona. O loo matou nonofo nei ma lou tina, tama, ma le tuagane e tasi-tausaga le matua.
O tagata i Porto Alegre e fiafia tele e aai i aano o manu papakiu, e taua foi o churrasco. Ae o meaai e sili ona ou fiafia i ai o estrogonofe (o se fasipovi Pasila o le stroganoff) ma le pizza.
I lau aoga, e i ai au uo e toalua mai le Ekalesia o loo i isi vasega. Matou te taumafai e avea ma faataitaiga lelei o Iesu Keriso i tagata uma o siomia i matou.
O le malumalu i Porto Alegre e 30 minute mai lou fale. Ou te fiafia lava e alu i le malumalu e fesoasoani i papatisoga. Ou te fiafia e mafai ona fesoasoani i tagata o loo i le isi itu o le veli.