Olaga Fou o Kayli

Saunia e David Dickson

Mekasini a le Ekalesia

O lenei tamaitai talavou sa tele atu i lo ni maila na malaga ai i le mea o loo i ai nei o ia.

O le laueleele e leai se mea e ono tutusa ai ma le mea sa masani ai o ia. O le vevela, mago, ma e leai se kiona e vaaia, o Texas na foliga mai ua toeitiiti lava pei o se isi paneta ia Kayli C. Mo se teineitiiti na ola ae i Alaska, o se tali malamalama lena.

“I Alaska, i le taimi o le taumafanafana sa matou ta’ua ai a matou tau vevela o soo se mea i luga ae o le 50 tikeri,” o le tala lea a Kayli. “I Texas sa faigata ona manava ona sa matuai susū ma vevela i fafo.”

Mo Kayli, o le sui o le tau mai Alaska i Texas sa na o le tasi le suiga mai le tele. E lei leva ona maliu lona tama i se faalavelave faafuasei e lei mafaufauina, ma sa le mafai e lo latou tina ona vaai Kayli ma ona uso laiti e toalua. I le taimi lea, o Kayli, o lea ua avea nei ma se tamaitai i le aoga maualuga, sa 13 tausaga, ma ona uso laiti o Jada ma Rhianna, sa na o le 10 ma le 8 tausaga.

Sa tonu i le aiga lautele o le fofo sili e mo teineiti e toatolu e o atu i lo latou uso matua ma lona toalua i Texas.

E ui lava ina sa faafeiloaia e Jenny, le uso matua o Kayli, ma le toalua o Jenny, o Matt, ma limamafola teineiti e toatolu, ae sa le o se suiga faigofie.

Muamua o le tau. Sa i ai foi le mea moni e faapea, i tuafafine mai le taulaga-laitiiti, sa lofituina i aoga tetele o Texas.

Ona oo lea i lenei faiga atoa lava o le auai i le lotu …

O le Tulaga o Mea Na I Ai

“Sa ou fiafia e tuputupu ae i Alaska,” o le tala lea a Kayli. “Sa ou fiafia i le kiona ma le malulu. Sa ou fiafia e alu i fafo. Sa matuai matagofie mea uma. Ma sa ou fiafia e faasee i le aisa, faasee mai le mauga, ma mea uma o le taumalulu.”

E vave foi ona ia faailoa atu ni nai isi mea e uiga i le olaga i Alaska. “Sa matou vaaia ma au uo o le faia o mea leaga o le auala lea e te lauiloa ai. Ma ia te au, o le lauiloa o le auala lea sa maua ai le fiafia. O lea sa ou le agai ai i luma i se itu lelei.”

Sa oo ina maitaga se tasi o uo a Kayli. O le isi na aafia i fualaau faasaina. Sa amata ona matuai le lelei manatu i taimi uma o nisi o ana uo.

“Sa ou fiafia e nofo i Alaska,” ua toe fai mai ai Kayli. “Ae ou te mafaufau moni lava po o fea o le a i ai lou olaga pe ana ou nofo ai iina. O le toatele o au uo i Alaska e le o i ai i se nofoaga lelei i le taimi nei.”

O le Auala Ua Suia Ai Mea

O se tasi o mea taua na tupu i le olaga o Kayli a o lei mafai ona savali ma tautala o ia. A o laitiiti lava Kayli, sa feiloai lona uso matua o Jenny i faifeautalai i le kolisi ma auai i Le Ekalesia a Iesu Keriso o le Au Paia o Aso e Gata Ai. Ina ua uma ona auai i le tasi le tausaga i le kolisi i Alaska, sa siitia atu Jenny i le BYU–Idaho, lea sa ia feiloai ai i lana tane, o Matt. Ina ua maea le faauuga, sa siitia atu Matt ma Jenny i Texas.

Ina ua la taliaina nai ona tei laiti, sa lua ni tulafono a Matt ma Jenny e uiga i mataupu faalelotu: “O le muamua lava o le a latou auai i le lotu faatasi ma i maua, o se vaega o le aiga,” o le tala lea a Jenny. “O le tulafono lona lua, o le a le manaomia lava e maua ma Matt i latou ia papatisoina pe faia ni lesona faafaifeautalai. O le mea lena e tatau ona i ai sa latou lava filifiliga.”

O lea, na amata ai ona auai Kayli i le lotu faapea foi ma gaoioiga i le ogatotonu o le vaiaso. I le taimi muamua, e lei tele lava se aoga mo ia. “Sa ou auai, ae ou te lei talitonu i se mea,” o le tala lea a Kayli. “Sa ou le ano lava i ai.”

Ae peitai, sa ia amata ona matauina se mea e le masani ai. “O taimi uma lava ou te alu ai i gaoioiga a le Ekalesia po o le autalavou, ou te fiafia lava.”

Ina ua mavae ni tausaga se lua o le matauina o lenei mea, sa saunia ai Kayli e feiloai ma se uo faapitoa lava.

Laasaga Laiti, Taui Tetele

“Sa ou feiloai i lau uo o Maddie ina ua matou siitia atu i se isi vaega o Texas i le taumafanafana a o lei oo i le vasega 10,” o le tala lea a Kayli. “Sa ia faailoa mai o ia ma avea ma se faataitaiga maoae ia te au.”

Fai mai Kayli o Maddie e masani lava ona foliga aulelei ma fiafia, e tusa lava pe ua faigata nisi taimi. A o tuputupu ae la laua faigauo, na sili atu ona tulimatai atu Kayli i le auai i sauniga ma gaoioiga a le Ekalesia.

“O Maddie o se uo lelei tele,” o le tala lea a Kayli.

Ata na pueina e Aubrey Stock

O le isi faatosinaga tele i le olaga o Kayli o le seminare. E le pei o le taimi muamua na faatoa auai ai o ia i le lotu, o lenei taimi sa amata moni lava ona gauai atu Kayli i mea sa aoaoina. “O le mafuaaga na amata ai ona ou faalogo i le seminare ona o tagata sa siomia au e matuai lelei lava i le taliina o fesili ma le auai. Sa ou fia avea ma se vaega o lena mea.”

Sa ogatusa fetu, e pei ona latou fai mai ai. I le va o le suesueina o le Tusi a Mamona i le seminare, o le vaaia o le talalelei ua aumaia ai le fiafia i lona uso matua, tuagane faaletulafono, ma isi i le uarota, ma le faia o nisi o faauoga autu, na saunia ai Kayli e fai mai ioe ina ua fesili mai Maddie pe fia faalogo i lesona a faifeautalai i lona fale.

Mai iina, sa vave ona agai i luma mea uma. O Kayli ma lona uso laitiiti—lea sa fesiligia o ia lava e se uo e ese mai e fai ana lesona i le fale o lena uo—sa filifili e papatiso i le aso lava e tasi.

“I Alaska, na oo mai le fiafia mai le tafafao ma au uo ma taumafai ina ia lauiloa,” o le tala lea a Kayli. “Ao le taimi nei o lou fiafia e sau mai le talalelei. Ua tele mea ua ou aoaoina mai i tagata lotu iinei. Ua ou aoaoina o le fiafia ma le malamalama e oo mai ia Iesu Keriso ma le Tama Faalelagi.”

O Se Olaga e Faatotonugalemu i le Talalelei

Sa tuputupu ae le molimau a Kayli i le talalelei, i se vaega tele, faatasi ai ma se suesuega filiga o le Tusi a Mamona i le seminare. O nei aso, o le Tusi a Mamona e tutusa lava le taua ia te ia e pei o le taimi muamua. “O le Tusi a Mamona o se tasi lea o mea autu na aumaia ia te au le fiafia,” ua ia faamatala mai ai. “Ua suia tele ai au. Ou te manao ia lagona foi e isi lena mea ma sa taumafai e faasoa atu.”

E tauaveina e ia le Tusi a Mamona i soo se mea e alu i ai, e aofia ai le aoga. “E tele naua mea e fai e tamaiti i le aoga e aveesea ai le Agaga, e pei o le faaaogaina o le gagana le lelei po o le taumafai malosi ia lauiloa,” o le tala lea a Kayli. “O le teuina o se Tusi a Mamona i la’u ato faafafa e fesoasoani lea ia te au e manatua ai lau sini: ina ia faatumauina le Agaga ma faasoa atu manatu lelei e aumaia e le talalelei ia i tatou.”

Na te le iloa pe o lana molimau atonu na maua ai lena avanoa e tuputupu ae ai, e ui, ana le seanoa faataitaiga faamaoni a tagata o le Ekalesia o loo siomia ai o ia. “O tagata o le Ekalesia o se vaega o a’u ina ua papatisoina,” o lana tala lea. “A aunoa ma a latou faataitaiga ma le malamalama faaleagaga, atonu ou te le iloaina lava se mea e ese ai i latou ma o le a faaauau pea ona le gauai atu i se mea e faatatau i ai le Ekalesia.”

Faamoemoe e le Aunoa

O Kayli ma nai ona tei e mautinoa lava na oo i ni taimi faigata i le taimi ua tuanai. Ae ua maua e Kayli le faamoemoe mo lona lumanai, ma o se faamoemoega e manao o ia e pasi atu i soo se tasi o tauivi i se taimi faigata i le taimi nei.

“Manatua e fetaomi atu i luma ma faaauau le taulai atu i le itu lelei o mea,” o le tala lea a Kayli. “Ma afai ua maliu se tasi e pele ia te oe, ia manatua o loo i ai se fuafuaga a le Tama Faalelagi mo oe ma isi. O le a mafai ona tatou ola e faavavau ma o tatou aiga pe a tatou faia le mea sao.”