“O Oe o le Toa Manumanu o Lau Lava Tala,” Mo le Malosi o le Autalavou, Fep. 2021, 8–11.
O Oe o le Toa Manumanu o Lau Lava Tala
Atapue mai le Getty Images
Pe a ou mafaufau i le autalavou ma talavou matutua o le Ekalesia a Iesu Keriso, ou te lagonaina se alofa loloto mo outou. Pe a ou mafaufau ia te outou, ua ou vaai ia te a’u!
A o avea ma se alii talavou, sa ou tu i le pa o se malaevaalele faavaomalo ma matamata ai i na masini felelei matagofie.1 O le felelei ese atu ma le tulaueleele sa o se vaaiga faavavega. Lea na faaosofia ai lou agaga! Sa ou matuai manao lava ina ia i ai i le potu o le avevaalele o se tasi o na vaalele ofoofogia ma lagona le fiafia e lele atu ai i luga mai le eleele, ma pe’a i luga ae o ao, ma malaga atu i ni itulagi fou.
Ae pe na mafaia lena miti? Ou te lei fanau mai i se tulaga o le tamaoaiga. Sa faalua ona avea lo’u aiga ma tagata sulufai, ma ave na o mea na mafai ona matou tauaveina. Sa manatu nisi o a’u o se tagata ese. A o taaalo isi tamaiti ma a latou uo, sa tatau ona ou faaaluina ou aoauli ma faaiuga o vaiaso e galue ai i le pisinisi fai tagamea a lo matou aiga, e masani lava i le avea ai ma se tama tiliva.
Ou te fai atu lenei mea ona o nisi o outou e ono mafaufau pe o le a avea ea au miti ma mea moni. Ou te malamalama i ou lagona. Ana mafai ona ou toe foi i tua i le taimi ma talanoa atu i lena tamaitiiti laitiiti sa tu i le isi itu o le pa ma naunau mo se lumanai ia sili atu ona lelei, o le a ou fai atu:
“O le a lē faigofie, ae e mafai ona e faia. O le a e manuia. O le a faatumulia le malaga i luitau, Dieter. Ae o le tauiviga lava ia o le a faaliliuina ai oe i se tagata e te manao e avea ai oe. Galue malosi. Ia faifai pea. Taulai atu i mea e mafai ona e suia, ae le o le tele i mea e le mafai ona e suia. Ia faatuatua. Ia i ai le faamoemoe. Faalagolago i le Atua. Ia iloa afai e fai lau vaega, o le a lelei mea uma.”
O la’u fautuaga foi lenei ia te outou i le asō.
O Oe o le Toa Manumanu o Lau Lava Tala
A’u uo pele e, mai le popofou o lo’u laitiiti sa ou fiafia i tala e lē mailoa. O le tele o na tala e amata i se tagata o i ai se faafitauli. O le telē o le faafitauli, o le faateleina foi lena o le manaia o le tala. Ma o le mea e le iloa e le tagata, o le a faateleina le leaga o mea! E matua leaga lava, e moni lava, e ono amata ai ona lagona e le toa o le a ia le faatoilaloina lava ia luitau o i ona luma.
O le mea lea, seia oo ina tupu se mea faapitoa i o latou olaga, e pei o se tagata faatuatuaina po o se punavai o le poto e oo mai e fesoasoani ia i latou ia maua ai le malamalama ma le mafaufau ia lava, e faatulaga ai se fuafuaga fou. O le isi vaega o le tala e faatatau i le ala e mulimuli ai le toa i le fuafuaga ma faatoilalo ai faigata e fetaiai ma ia.
I se konafesi aoao ua mavae, sa ou lauga ai e uiga ia Bilbo Baggins—o se saa masani sa agai atu i se malaga e le mailoa e fasi se tarako. O Gandalf o lana punavai lea o le poto ma le fesoasoani. Pe mafaufau foi ia Obi-Wan Kenobi, lea na fesoasoani ia Luke Skywalker e aoao i le auala e pulea ai le Fosi ma faatoilalo ai le Death Star. O Ane o Green Gables sa i ai Marila ma Mataio, o e alolofa ia te ia ma taialaina o ia mai se tagata matua oti tuulafoaia i se tamaitiiti aoga faamanuiaina ma se uo pele. O Hermione Granger ma Harry Potter o loo i ai ni faiaoga agaalofa i le Aoga o Hogwart o le Witchcraft ma Wizardry e fesoasoani ia i la’ua ia iloa mea e manaomia ona la faia e manumalo ai ia “He-Who-Must-Not-Be-Named.”
Ma ua ou oo atu nei ia te oe. Pe e te lagona le pei o se toa pe leai, ua tasi lava oe! O oe o le toa manumanu i le tala o lou lava olaga! Atonu foi o loo e tu i luma o se pa a oe lava ia, ma naunau i se mea e te fia avea ai. E i ai taimi, e te lagona ai le tuuatoatasi—ae e le o tuulafoaiina oe.
O oe o se atalii/afafine o le Atua. O Ia o lou Tama Faalelagi. E alofa o Ia ia te oe ma ua na o se tatalo lava e mamao ese ai. O loo ia te oe Iesu Keriso. O aafiaga o Lana Togiola e avanoa lava e aveesea ai le tiga ma le tuuatoatasi o mea sese. Ua ia te oe ni epikopo alolofa ma isi taitai o le Ekalesia ma le tou aiga o le uarota e mafai ona taialaina ma fesoasoani ia te oe.
Talitonu o Le a Taialaina e le Atua Ou Laasaga
E tusa lava po o le a le mamao o ou taunuuga, ia iloa le mea lenei: Atonu e te le taunuu i le mea e te manao e te fia alu i ai i se aso po o se vaiaso po o se tausaga foi. Ae afai e faaauau pea ona e tuu le vae e tasi i luma o le isi ma taumafai i aso taitasi e mulimuli i lau fuafuaga, o le a lelei mea uma ma o le a e ausia au sini. O le a mautinoa lava lou fetaia’i ma luitau e lei mafaufauina i le taimi o lau malaga e le mailoa, ae o mea na e maua ai se tala faamanuiaina—le tala o lou olaga! Ma, aemaise lava, ia manatua afai e te faalagolago i le Alii, aoao e uiga ia te Ia, ma ia faatuatua ia te Ia, o le a Ia taitaia lou ala.2
A’u uo pele e, o tagata malaga i luga o le ala o lenei malaga maoae e le mailoa o le olaga nei, e le faavaivai lava. Aua le fiugofie. O loo susulu mai le lumanai! O le a i ai se aso, o le a e toe tepa i tua i le tagata ua e i ai nei i le agalelei ma le agaalofa, ma o le a e iloa ai o laasaga na e faia i le asō ua mamanuina ai oe i se tagata ofoofogia o le a avea oe ai i se taimi.