Sau, Mulimuli Mai ia te A’u

O Le Faitogafiti-Poto o le Tiapolo ma le Atamai o le Atua: E Leai se Tauvaga

Saunia e David A. Edwards

Mekasini a le Ekalesia

E mafai ona e aoaoina mea na aoaoina e Iosefa Samita: O le poto o le Atua o le a manumalo pea i le iuga.

alii talavou o loo tauivi ma faigata

Ata na tusia e le id-work

O se mea na tupu e ta’ua soo i le amataga o le talafaasolopito o le Ekalesia e aofia ai le leiloloa o itulau e 116 o tusitusiga o le Tusi a Mamona. E lua mafuaaga tatou te faamatalaina soo ai le tala o lenei mea ona: (1) e faatatau tonu lava i ni faaaliga se lua i le Mataupu Faavae ma Feagaiga (vaega 3 ma le 10), o lea la e tele ina sau soo ai ia tatou suesuega o tusitusiga paia; ma le (2) o lesona tumau na aoao e Iosefa Samita mai nei aafiaga e mafai ona fesoasoani ia i tatou i le tele o auala i aso nei.

O se tasi o na lesona na aoao mai e le Alii i upu nei: “E sili atu lou poto nai lo le faitogafiti-poto o le tiapolo” (Mataupu Faavae ma Feagaiga 10:43). E finagalo le Alii ia tatou faalagolago atu ia te Ia. Afai tatou te faia, o le a tatou maua le malamalama, malosi, ma le filemu sili atu.

Aafiaga o Iosefa Samita

Ina ua leiloloa itulau e 116, sa ta’u atu e le Alii ia Iosefa Samita e aua nei faaliliuina lena vaega o papatusi auro, aua sa taupulepule tagata leaga e faasese tagata i le faaalia o eseesega i le va o faaliliuga e lua. Ae o le tele o seneturi na muamua atu, na faatonuina ai e le Alii ia Nifae e fai ni papatusi laiti ma sa ia tau atu ia Mamona e faaaofia ai i lana faamaumauga. O lea na mafai ai e Iosefa ona toe amata le faaliliuga mai iina, ma ua ia i tatou le Tusi a Mamona i le asō. (Tagai i le Mataupu Faavae ma Feagaiga 10; 1 Nifae 9; Upu a Mamona.)

papatusi auro ma le Tusi a Mamona

O le tiapolo ma i latou sa auauna atu i ona faamoemoega sa faia se fuafuaga faitogafiti-poto, ae na taofia e le atamai o le Alii.

O Le Faitogafiti-Poto o le Tiapolo

O le faitogafiti-poto o le tiapolo e mafai ona tele ona foliga, ae o se tasi o savali autu lava o loo i tua e foliga mai o le “Aua le talitonu.” O le manatu autu lea a le tiapolo i lana uluai savali lava i fanau a Atamu ma Eva ina ua aoaoina i latou e o latou matua i le fuafuaga o le faaolataga (tagai i le Mose 5:13). Ma o le savali lava lea o loo i ai i le fatu o ana fuafuaga faitogafiti i aso nei.

O le a se mea e le manao le tiapolo e te talitonu i ai? Ia, o le autu lava, o soo se mea e moni pe lelei. Afai e mafai ona ia faia ia e lē talitonu i le moni o le Tama Faalelagi, Iesu Keriso, le fuafuaga o le faaolataga, o tusitusiga paia, o poloaiga, o le Toefuataiga, o perofeta, ona ia manumalo lea. Ona faigofie lava lea ona ia faia ina ia e gauai atu i faaosoosoga eseese ma taofia ai oe mai le upumoni, salamo, ma le faaeaga.

Ma e faapefea ona ia faia ina ia e lē talitonu? E ala i le totoina o le fefe, lē mautonu, ma le masalosalo i lou mafaufau.

O se Faataitaiga mo le Asō

Mo se faataitaiga, i le asō (e pei lava ona i ai i aso o Iosefa Samita) o loo taulai atu le savali a le tiapolo o le le talitonu e matele lava ia Iosefa Samita ma lana galuega o le perofeta o le Toefuataiga. O le a taumafai tagata e faatalitonu oe faapea o Iosefa Samita e le o se perofeta ma e le moni le Tusi a Mamona. Afai e te faia se sailiga i le Initoneti, e mafai ona e maua le uunaiga faapea o le faamaoniga e matuai faasagatau lava i le Perofeta ma lana galuega. Ae o se pepelo faitogafiti lenei mea.

E pei lava ona mananao tagata e faaleaga Iosefa Samita i ona aso ma sa naunau e pepelo ma taufaasese e fai ai lenei mea, o loo i ai i aso nei i latou o le a faia ina ia e taulai atu i na o sina vaega po o ni mea moni taufaasese e uiga i le Perofeta po o le Tusi a Mamona. Latou te le mananao e te vaai i le ata atoa; latou te mananao ia e taulai atu i mea e masalosalo ai.

Nai Fautuaga Nei e Tolu

Na tuuina mai e Elder D. Todd Christofferson o le Korama a Aposetolo e Toasefululua ia nei fautuaga e tolu i le suesue e uiga i le Perofeta o Iosefa Samita: “Ia onosai, aua le papa’u le malamalama, ma aua le le amanaiaina le Agaga” (“O le Perofeta o Iosefa Samita” [lauga i le faigalotu a le BYU – Idaho, 24 Sete., 2013], byui.edu/devotionals).

1. Ia onosai. O le a faamanuiaina pea lava i tatou e le Alii mo lo tatou onosai ma le faatuatua. Afai tatou te onosai ma tumau i le talitonu, o le a tele ina manino atili mea e lē o manino i le aluga o taimi. Ma o nisi o “faamaoniga” ua aumai e tagata e tetee ai i le Perofeta i aso nei e mafai ona lafoina i fafo taeao ona o faamaoniga fou e iloa ai lona sese.

2. Aua le papa’u le malamalama. Afai tatou te aoao atoatoa i a tatou suesuega, o le a tatou aloese mai le piimau i manatu lē faavaea ma lē lelei o se isi tagata, ae vaai atu i le ata e sili atu ona telē e uiga i le Perofeta—o mea moni ma o latou anotusi. O le a tatou iloa ai o fua o lana galuega e ofoofogia le lelei.

3. Aua le lē amanaiaina le Agaga. Afai tatou te gauai atu i mafaufauga, uunaiga, ma lagona e maua mai le Agaga, o le a tatou maua se seti atoa o meafaigaluega mo le mauaina ma le malamalama i le upumoni. Ma o le a mafai ona tatou agai i luma ma tuputupu ae faaleagaga e tusa lava pe tatou te le mauaina uma tali i a tatou fesili.

O Le Atamai o le Atua

O le atamai o le Atua e moni lava e sili atu nai lo le faitogafiti-poto o le tiapolo. E tusa lava pe tatou te le iloa mafuaaga uma o loo i tua atu o poloaiga a le Alii, e mafai lava ona tatou faalagolago ia te Ia ma Ana perofeta.

Sa le iloa e Nifae pe aisea na ta’u atu ai e le Alii ia te ia e fai papatusi laiti. Na te lei iloa e uiga i itulau e 116 ma fuafuaga e faaleaga Iosefa Samita i le 2,400 tausaga i le lumanai. Ae na iloa e Nifae e “mo se faamoemoega poto o i [le Alii],” ma sa ia iloa e mafai ona ia faalagolago ia te Ia (tagai i le 1 Nifae 9:5–6).

I le asō, e mafai foi ona tatou faalagolago i le Alii, e tusa lava pe tatou te le iloa mafuaaga uma o i tua atu o le fautuaga Na te tuuina mai ia i tatou e ala mai i Ana perofeta. E mafai ona tatou tumau i le talitonu ma le i ai o le faatuatua ia Iesu Keriso ma Lana perofeta filifilia o le Toefuataiga, o Iosefa Samita, e tusa lava pe tatou te le mauaina uma tali ia tatou fesili. E mafai ona tatou faatuatuaina le taimi a le Alii. E mafai ona tatou faaauau pea ona i ai le faamoemoe, e tusa lava pe foliga taufaafefe ma lofituina o tatou luitau.

E mafai ona tatou faia nei mea uma ona, po o le a lava le mea e tupu, pe a faasagatau mai fuafuaga faitogafiti a le tiapolo i le atamai o le Atua, e leai se tauvaga. O le a manumalo pea le atamai o le Atua.

Na te Silafia Lelei le Lumanai

“O loo taitaia e le Alii le Toefuataiga o Lana talalelei ma Lana Ekalesia. E alu atu o Ia i o tatou luma. Na te silafia lelei le lumanai. Na te valaauliaina oe i le galuega. Na te faaauai oe i le galuega. Ua Ia faia se fuafuaga mo lau auaunaga. Ma e oo lava i au osigataulaga, o le a e lagona le olioli a o e fesoasoani atu i isi ia tulai a’e e saunia mo Lona afio mai.”

Peresitene Henry B. Eyring o le Au Peresitene Sili, “E Alu Atu o Ia i o Tatou Luma,” konafesi aoao, Ape. 2020 (Ensign po o le Liahona, Me 2020, 69).