“Mau i le Palapala: O Se Lesona i le Salamo,” Mo le Malosi o le Autalavou, Fep. 2021, 14–15.
Sau, Mulimuli Mai ia te A’u
Mau i le Palapala
O Se Lesona i le Salamo
A o tatou filifili e liliu atu i le Tama Faalelagi ma Iesu Keriso, tatou te iloa ai o loo i ai iina i La’ua ma ua sauni e fesoasoani mai ia i tatou e o ese mai i soo se tulaga e piipii.
Ata na tusia e Dean MacAdam
O nisi taimi e mafai ona faigata ona talanoa i le salamo. Atonu tatou te le o mailoa po o le a le uiga o le salamo. Atonu tatou te manatu e na o isi e mafai ona faamagaloina pe faatoa manaomia ona tatou salamo i agasala tetele. Aua le faalogo i na manatu.
E finagalo le Tama Faalelagi ia e iloa le uiga moni lava o le salamo. E finagalo o Ia ia e iloa e le o se faasalaga ae o se faamanuiaga. O le salamo o se suiga i totonu o i tatou—o tatou mafaufauga, o tatou faanaunauga, o a tatou amioga, o lo tatou lava natura. O se vaega o le avea atili e faapei o Keriso. O le salamo e fesoasoani ia te oe e lagona atili le olioli i le taimi nei.
Olioli i le Salamo
E mafai faapefea e le salamo ona aumaia le olioli?
Na fetalai Iesu Keriso, “Foi mai nei ia te au, ma salamo i a outou agasala … ina ia ou faamaloloina outou ”(3 Nifae 9:13). O le salamo e mafai ai ona tatou “lagonaina le olioli i le i ai o le fesoasoani a le Faaola.”1
E manao Satani ia tatou manatu e tuua na o i tatou pe a tatou faia ni mea sese. E matuai le moni lava lena mea! E fesoasoani le salamo tatou te iloa ai e i ai pea iina le Tama Faalelagi ma Iesu Keriso i taimi uma. Peitai, e pule lava tatou pe liliu atu ia i Laua. Pe a tatou faia, tatou te maua le alofa, mafanafana, ma le olioli i le iloaina e mafai ona faamagaloina i tatou ma toe taumafai.
O se Aoauli Palapalā
Sa ou mafaufau i lenei lesona e uiga i le salamo ina ua uma ona ou vaaia lou uso i se tasi aoauli. Sa i tuafale tonu lava o lo matou aiga se fanua ua suaina mo se fale. I le taimi o le mamafa o timuga, sa liua ai le fanua i le palapala pipii. Sa le na o se palapala masani. E leai, o lenei palapala sa matua mafiafia, piipii, ma loloto. Afai e te mau ai, o le alu ese mai ai sa pei o le taumafai e tamoe i le pata pinati.
I se tasi aso sa filifili ai lou uso laitiiti e manao e alu i fafo ma taalo. Sa faamanatu atu e lou tina ia te ia e nofo i luga o poletito sima e latalata atu i le fale. Nai lo lena, sa savalivali ese atu lou uso i le fanua.
Ina ua mavae sina taimi, sa ou faalogo i se tasi o tagi ma tilotilo atu i fafo. Sa ou le talitonu i ai! Sa nofonofo lou uso i le ogatotonu o le palapala, na matua ufitia i le palapala, ma loimata na tafe ifo i ona alafau. Sa taumafai pea lava o ia e alu ese, ae sa le mafai. O taimi uma lava e taumafai ai e minoi, sa ia magoto atili ma atili ai i le loloto o le palapala mafiafia. Ioe, sa vave ona ma taufetuli atu e laveai o ia.
Sa ou fesoasoani i lou tina e faataatitia i lalo ia laupapa ina ia mafai ona ma savavali atu i lou uso e aunoa ma le mau foi o i maua lava. Sa matua mafiafia le palapala ma ina ua toso ese mai lou uso, sa mimiti ese atu ai ona seevae ma totini!
Faamamā e ala ia Keriso
O le olaga e mafai ona pei o se fanua palapalā. Afai tatou te le faaeteete, e mafai ona tatou mau ai i lalo i le agasala, faatosinaga faalelalolagi, po o filifiliga le lelei. O nei mea ua pei o le palapala faaleagaga e mau i o tatou agaga ma tatou lagona ai le faanoanoa tele i totonu.
A o tatou filifili e liliu atu i le Tama Faalelagi ma Iesu Keriso, tatou te iloa ai o loo i ai iina i La’ua ma ua sauni e fesoasoani mai ia i tatou e o ese mai i soo se tulaga e piipii. Ona o le taulaga togiola a le Faaola o Iesu Keriso e mafai ai ona faamagaloina i tatou ma toe faamamaina. O le a e maua pea “le olioli i le filifili e salamo.”2