Ioane 6:60–71

“A Matou O Ea Ia te Ai?”

Jesus talking to a large group of people.

Ina ua maea ona aoao atu Iesu o Ia o le Areto o le Ola (tagai i le Ioane 6:35), e toatele na lē malamalama ma filifili e lē toe mulimuli ia te Ia. Ina ua fesili Iesu i Aposetolo e Toasefululua pe ua latou fia o ese foi, na tali atu Peteru, “Le Alii e, a matou o ea ia te ai? ua ia te oe upu o le ola e faavavau” (Ioane 6:68). E mafai ona fesoasoani lenei lesona ia te oe e faamalosia ma tumau ai pea ma le faamaoni i lou tautinoga e mulimuli ia Iesu Keriso, tusa lava pe lē filifili isi tagata e mulimuli ia te Ia.

Fesoasoaniga i tamaiti aoga tauivi. E ono i ai ni tamaiti aoga i le vasega o loo tauivi faaletagata lava ia ma lo latou faatuatua. Manatua upu a Peresitene M. Russell Ballard o le Korama a Aposetolo e Toasefululua: “Ou te aioi atu ma le faamaoni ia tatou faamalosiau atu, taliaina, malamalama, ma alolofa ia i latou o loo tauivi ma lo latou faatuatua. E lē tatau lava ona tatou tuulafoaiina soo se tasi o o tatou uso ma tuafafine. O loo tatou i ai uma i nofoaga eseese i luga o le ala, ma e manaomia ona tatou auauna atu o le tasi i le isi e pei ona tatau ai” (“A Matou Ō Ea Ia Te Ai?,” Ensign po o le Liahona, Novema. 2016, 92).

Sauniuniga mo tamaiti aoga: Valaaulia tamaiti aoga e manatunatu i faamanuiaga na latou mauaina ona o le avea ai o i latou ma sui faapea ma le auai i Le Ekalesia a Iesu Keriso o le Au Paia o Aso e Gata Ai.

Galuega Faatino e Mafai ona Fai e Aoao Mai Ai

O le tali atu i aoaoga a le Faaola

Ia e faaeteete i tamaiti aoga o e ono atuatuvale pe tiga i faaiuga na faia e isi e lē toe auai ai i le Ekalesia. Atonu e i ai ni nai tamaiti aoga ua loto e faasoa i a latou ata faataitai ma le vasega.

Atiae se tulaga faataitai, e moni po o se tala fatu, i se sui auai O Le Ekalesia a Iesu Keriso o le Au Paia o Aso e Gata Ai ua filifili e lē toe mulimulitaia aoaoga a le Faaola. Atonu e aoga le faatumuina o avanoa i le ata faataitai o lo o mulimuli mai nei:

[Igoa ma le latou faiā ma oe] ua filifili e lē toe auai i Le Ekalesia a Iesu Keriso o le Au Paia o Aso e Gata Ai. A e fesili i ai ia latou mafuaaga ua lē toe auai ai, e latou te faapea mai, “[Mafuaaga mo le lē toe auai i le Ekalesia].” A o e mafaufau e uiga i le latou tali, e te lagona le [faamatala ou lagona].

O upu moni o loo faamamafaina i lenei lesona e mafai ona fesoasoani ia te oe e tumau ai pea ma le faamaoni pe a o ese tagata e pele ia te oe mai le Ekalesia a le Faaola. E mafai foi ona fesoasoani nei upu moni ia te oe pe afai o e taumafai e filifili po o le a le telē o e manao e auai ai i le Ekalesia. Tatala lou loto i musumusuga o loo manao le Alii e faamanuia ai oe.

Uunai tamaiti aoga e mafaufau i le iloiloga a le tagata lava ia o lo o mulimuli mai.

Faaavanoa se taimi e manatunatu ai po o fea o faamatalaga o le a mulimuli mai, pe afai e i ai, e faatatau ia te oe:

A ou vaaia isi tagata ua lē toe i ai lo latou faatuatua ia Iesu Keriso ma Lana Ekalesia, e aafia ai lou faatuatua.
E ui ina faapea e tiga lou loto, e tumau mausali pea lou faatuatua i taimi ua lē toe i ai le faatuatua o i latou o loo siomia au ia Iesu Keriso ma Lana Ekalesia.
E lē faalavelavea ai au pe a tuua e se isi le Ekalesia pe afai e maua ai e i latou le fiafia.
Ua ou faia le faaiuga o le a ou tumau ai pea e avea ma sui auai faatuatua o le Ekalesia.
O lea ou te tau filifili pea pe ou te manao e avea au ma sui auai faatuatua o le Ekalesia.

I le Ioane 6:26–58, na aoao atu Iesu o Ia o le Areto o le Ola na alu ifo mai le lagi ma o i latou e ai i Lona tino ma inu i Lona toto o le a ia i latou le ola e faavavau.

Faitau i le Ioane 6:60–66, ma vaavaai pe na faapefea ona tali atu nisi o tagata i aoaoga a le Alii.

Aisea ua e manatu na faafaigata ai i isi tagata ona talia nei aoaoga fou mai ia Iesu?
O a ni aoaoga a le Faaola i o tatou aso o loo faigata ona talia e nisi?
O le a sou manatu po o a ni nai mafuaaga ua afua ai ona filifili nisi tagata i o tatou aso e taumamao mai le O Le Ekalesia a Iesu Keriso o le Au Paia o Aso e Gata Ai?

Ia e manatua e alofa le Tama Faalelagi ma Iesu Keriso i tagata uma—e aofia ai ma i latou ua filifili e tuua le Ekalesia. E mafai ona tatou faaauau pea ona alolofa ma taumafai e malamalama ia i latou ua o ese. E lē faapea a faia e se isi se filifiliga e alu ese ai o lona uiga o i latou o ni tagata leaga pe o le a latou faanoanoa i taimi uma ona ua latou o ese. E lē faapea foi o le a latou lē toe filifili e toe o mai i totonu o le Ekalesia i le lumanai. E mafai ona musumusu atu le Alii ia te oe i tala e fai po o mea e fai mo i latou ua o ese.

“Pe tou te fia o ese foi?”

Faitau i le Ioane 6:67, ma maitau le fesili na faia e Iesu i Ona Aposetolo.

O Peresitene M. Russell Ballard o le Korama a Aposetolo e Toasefululua, na aoao mai pe faapefea ona faatatau le fesili a le Faaola ia i tatou.

I le faaiuga, e tatau ia i tatou taitoatasi ona tali atu i le fesili a le Faaola: “Pe tou te fia o ese foi?” [ Ioane 6:67 ]. E ao ia i tatou uma ona saili mo a tatou lava tali i lena fesili. Mo nisi, o le tali e faigofie lava; mo isi, e faigata.

(M. Russell Ballard, “A Matou Ō Ea Ia Te Ai?,” Ensign po o le Liahona, Novema. 2016, 92)

Faitau i le Ioane 6:68–69, ma vaavaai mo le tali a Peteru i le fesili a le Faaola.

Aisea ua e manatu na mafai ai ona tali atu Peteru faapena?

E ono aoga mo tagata aoga le faitauina o le molimau a Peteru i le fuaitau o atamai faapitoa i aoaoga faavae Mataio 16:15–19 .

O le a se mea e mafai ona tatou faia e mulimulitaia ai le faataitaiga a Peteru?

E ono fai mai e tagata aoga ni tali eseese, e aofia ai tali o le a mulimuli mai nei: e mafai ona tatou filifili e talitonu ia Iesu Keriso ma tumau pea ia te Ia tusa lava po o a filifiliga e faia e isi tagata.

E tusa ai ma le faatalanoaina o le filifiliga na faia e Aposetolo e Toasefululua, o Peresitene M. Russell Ballard, na aoao mai:

I lena taimi, a o tepa taulai atu isi tagata i mea sa lē mafai ona latou taliaina, sa filifili Aposetolo e tepa taulai atu i mea na latou matua talitonu ma iloa, ma i se taunuuga, sa latou mau faatasi pea ma Keriso.

(M. Russell Ballard, “A Matou Ō Ea Ia Te Ai?,” Ensign po o le Liahona, Novema. 2016, 90)

Na fetalai Peteru o loo i le Faaola “upu o le ola e faavavau” ( Ioane 6:68). O a ni aoaoga a Iesu Keriso ua e iloa e moni?
O a ni faamanuiaga ua e mauaina ona O Le Ekalesia a Iesu Keriso o le Au Paia o Aso e Gata Ai?

Mafaufau pe fai se lisi i luga o le laupapa o tali a tagata aoga i le fesili talu ai.

O Peresitene M. Russell Ballard, na talanoa i tagata taitoatasi sa mafaufau pe tuua le Ekalesia a le Faaola. Matamata i le “A Matou Ō Ea Ia Te Ai?,” o loo maua i le ChurchofJesusChrist.org, mai le taimi 5:35 seia oo i le taimi 8:16. A o e faalogologo ia Peresitene Ballard, maitau fesili o ia faia.

O a ni manatu na ia te oe a o e faalogologo ia Peresitene Ballard?
O a ni aafiaga na feagai ma oe o loo fesoasoani ai ia te oe e talitonu ia Iesu Keriso ma auai ai pe tumau ai pea i Lana Ekalesia?
E faapefea ona fesoasoani ia te oe le manatuaina o nei aafiaga i taimi o loo tofotofoina ai lou faatuatua?

14:23

Mafaufau pe faasoa atu i se molimau i le Faaola ma se tasi pe lua o mafuaaga patino mo le avea ai ma sui o Lana Ekalesia.

Afai o e tauivi ma lou faatuatua, ia e manatua e alofa le Tama Faalelagi ma Iesu Keriso ia te oe. E mafai ona e tatalo i lou Tama Faalelagi mo se fesoasoani i taimi uma. E mafai foi ona e talanoa i ou matua, taitai o Ekalesia po o faiaoga o seminare e uiga i fesili ma popolega o ia te oe.

Mafaufau pe faaali faalautele fesili o le a mulimuli mai nei ma valaaulia tagata aoga e tali se lua pe sili atu i totonu o a latou api faamaumau suesuega.

E faapefea ona e tali atu pe a fesiligia oe e le Alii, “Pe tou te fia o ese foi?” ( Ioane 6:67).
O le a se mea e mafai ona e faia e maua ai ma faamalosia ai lou molimau ia Iesu Keriso ma Lana Ekalesia?
O le a se mea e te manao e manatua pe a filifili se isi e pele ia te oe e tuua le Ekalesia a le Faaola?
O le a sou tala e fai i se isi o loo tiga ona ua filifili tagata e pele ia te i latou e tuua le Ekalesia a le Faaola?

Manatu ma Faamatalaga o Talaaga

Ioane 6:67–69 . O a mea na malamalama i ai Peteru ma le Toasefululua na fesoasoani ai ia i latou e avea ai pea ma au soo faatuatua o Iesu Keriso?

Na tusia e Elder D. Todd Christofferson o le Korama a Aposetolo e Toasefululua:

Ou te le iloa, i lena lava taimi, pe na sili atu le malamalama o Peteru ma lana Usoga i mea sa aoao atu e le Alii nai lo soo ia na lafoai le Matai, peitai na iloa e Peteru i le molimau faapitoa o le Agaga o Iesu o le Keriso, le Alo o le Atua soifua (tagai foi i le Mataio 16:15–17), ma e leai se isi mea e mafai ona maua ai le faaolataga. O lea sa ia tautino atu ai ma le atoatoa e mulimuli ia Iesu e tusa lava pe a. Afai sa i ai ni ana fesili, e mafai ona taliina i se taimi tatau ai, ae o le a le mafai ona tauanaueseina mai le faamaoni i le Alo o le Atua—o se faataitaiga matagofie mo i tatou uma.

(D. Todd Christofferson, “O Le Areto Ola Na Alu Ifo Mai le Lagi,” Ensign po o le Liahona, Novema. 2017, 39 faamatalaga 8)

O a ni lagona o le Tama Faalelagi ma Iesu Keriso e uiga ia i latou ua o ese?

O Peresitene Henry B. Eyring o le Au Peresitene Sili, na aoao mai:

Mai lava i le taimi a o le’i i ai le lalolagi, sa galulue se Tama o i le Lagi agaalofa ma Lona Alo Pele faatasi ma i latou o e na La’ua silafia o le a se ese. O le a alofa le Atua ia i latou e faavavau.

(Henry B. Eyring, “I Fanau a La’u Fanau,” Ensign po o le Liahona, Novema. 2013, 72)

O a ni mea e mafai ona ou faia mo i latou e lē toaga tele po o i latou ua tuua le Ekalesia?

O Peresitene M. Russell Ballard o le Korama a Aposetolo e Toasefululua, na aoao mai:

O lou tali, faamolemole aua tou te talai atu ia i latou! Ua uma ona iloa e tagata o lou aiga ma uo aoaoga a le Ekalesia. E latou te lē manaomia se isi lauga! O mea latou te manaomia—mea tatou te manaomia uma—o le alofa ma le malamalama, ae lē o le faamasinoina. Faasoa i au aafiaga lelei i le ola ai i le talalelei. O le mea e aupito sili ona mamana e mafai ona e faia o le faasoaina atu o au aafiaga faaleagaga ma au uo ma aiga. Ia faapea foi ona e fiafia moni e iloa mea o tutupu i o latou olaga, o latou manuia, ma o latou luitau. Ia e mafanafana, agamalu, agaalofa, ma agalelei i taimi uma.

(M. Russell Ballard, “Fesili ma Tali” [faigalotu a le Iunivesite o le Brigham Young, Novema. 14, 2017], 5, speeches.byu.edu)

Galuega Faatino Faaopoopo e Aoao Mai Ai

O le a aumai tali o a tatou fesili i le taimi a le Alii

Na muimui le tele o soo ona sa latou lē malamalama i le uiga o le tala a le Faaola i le taimi sa Ia fetalai ai e uiga i le ai o Lona tino ma le inuina o Lona toto (tagai i le Ioane 6:51–61). Sa ono lē malamalama foi Ona Aposetolo. Ae peitai, sa latou filifili e faatuatua i mea ua latou iloa ma talitonu i ai.

Felafolafoai pe faapefea ona fesoasoani lenei faataitaiga i tagata aoga i taimi o ono latou lē mauaina ai tali uma i a latou fesili.

Mafaufau pe faitauina le Luka 22:19–20 ona felafolafoai ai lea pe faapefea ona fesoasoani i Aposetolo le aoaoina e uiga i le faamanatuga e malamalama ai i aoaoga a le Alii i le Ioane 6:51–61 . (E ono aoga le faailoa atu o le Luka 22:19–20 o se fuaitau o atamai faapitoa i aoaoga faavae.)

O le filifiliga ia tausuai

O nisi o soo o le Faaola sa tausuai ona o Lana mataupu faavae (tagai i le Ioane 6:60–61). Mafaufau pe felafolafoai ma tagata aoga i mafuaaga e alai ona tausuai nisi tagata i o tatou aso ma mea e mafai ona latou faia ia filifili ai e aua le tausuai. E ono aoga vaega ua sii mai i saunoaga o le a mulimuli mai nei:

David A. Bednar, “E Leai Foi se Mea e Tausuai ai i Latou,” Ensign po o le Liahona, Nov. 2006, 89–92
Neil L. Andersen, “Aua Lava Nei Tuua o Ia,” Ensign po o le Liahona, Nov. 2010, 39–42