Mataio 14:13–21; Ioane 6:5–14

Ua Fafaga e Iesu le 5,000

Ina ua maea ona silafia e Iesu Keriso ua vavaeeseina le ulu o Ioane le Papatiso, sa Ia malaga atu ma Ana Aposetolo i se nofoaga tuufua. Sa mulimuli atu le motu o tagata ia i latou. E ui ina puapuagatia o Ia, sa alofa le Faaola i le motu o tagata ma aoao atu ma fafaga ia i latou—e 5,000 alii faatasi ai ma fafine ma tamaiti. E mafai ona fesoasoani lenei lesona ia te oe ia agaalofa atili ma aua le manatu faapito e faapei o Iesu Keriso. E mafai foi ona fesoasoani ia te oe ia mautinoa atili ai ona o Iesu Keriso o le a lava ai au taulaga maualalo.

O le faatuatuaina o au tamaiti aoga. E tatau ona faatuatua faiaoga faapea o le taiala e tatau ai ma le faamalosiauga, e mafai ai e tamaiti aoga ona malamalama i tusitusiga paia, aoao e faailoa mai aoaoga faavae ma mataupu faavae, faamatala le talalelei i isi, ma faaaoga aoaoga o le talalelei i o latou olaga.

Sauniuniga mo tamaiti aoga: Valaaulia tamaiti aoga e tatalo ma saili se avanoa e auauna ai i se isi ae lei oo i le vasega e sosoo ai. Uunaia i latou e maitauina o latou lagona a o latou auauna atu.

Galuega Faatino e Mafai ona Fai e Aoao Mai Ai

O le a se fautuaga o le a e tuuina atu?

O tulaga faataitai o lo o i lalo ifo e talafeauga ma mataupu faavae eseese e lua o loo aoaoina i le fafagaina e le Faaola o le 5,000. Mafaufau i manaoga a tamaiti aoga, ma filifili pe sili ona suesue faatasi ma le vasega i se mataupu faavae e tasi, pe sili le filifili e tamaiti aoga o se mataupu faavae e suesue ai, taitoatasi pe o ni vaega laiti. E fetaui faatinoga suesue eseese o loo fautuaina ma tulaga faataitai taitasi.

Faitau i tala faataitai ia e lua, ma filifili pe o le fea le tasi e te manao e taulai i ai a o suesueina lenei lesona. Mafaufau po o le a se mea e te ono fai atu e fesoasoani ai ia Roger ma Claire.

1. Sa mafana tele le mafutaga a lau uo o Roger ma lona tausoga lea ua maliu faafuasei talu ai nei. O taimi uma e te taumafai e asiasi i ai, sa fai atu Roger ia te oe e manao o ia e tuua na o ia lava. Ina ua maea le tele o au taumafaiga, mulimuli ane ua malie o ia e te ulufale atu i totonu. A o amata ona tatala mai lana talanoa, sa ia faapea mai, “O se mea faigata lava lenei mo au. E faapefea ona ou manumalo mai ai?”

2. Ua valaaulia talu ai nei lau uo o Claire e avea ma le peresitene o lana vasega o Tamaitai Talavou. E pisi lava o ia, ma ua lagona e ia e i ai nisi o tamaitai talavou i lana vasega e sili atu o latou uiga faauo ma e mafai ona fai se galuega e sili atu. E faasoa atu e Claire ona popolega ma oe ma faapea atu, “Ou te lē mautinoa pe mafai ona ou faia lenei mea.”

I lenei lesona atoa, saili mo upumoni e mafai ona fesoasoani i se tasi e lagona e pei o Roger po o Claire. O le mea taua lava, o le faia lea o se tatalo i lou loto e faaali mai ai e le Tama Faalelagi ia te oe le auala e mafai ai ona fesoasoani nei upumoni ia te oe ma e e te alofa i ai.O le tala i le fafagaina e Iesu o le 5,000 o lo o aofia ai mataupu faavae e mafai ona fesoasoani ia i tatou pe a oo mai nei ituaiga tulaga. Suesue i le vaega e fetaui ma le tulaga faataitai na e filifilia. A maea ona e suesue, o le a mafai ona e faasoa i le mea na e aoaoina.

Lolomi ma tufatufa atu tufaaga o le a mulimuli mai nei. E pei ona manaomia, fealuai solo i le vasega ina ia fesoasoani i tagata aoga ma a latou suesuega.

Ata Faataitai 1: Roger—O le a se mea e mafai ona ou faia e manumalo ai i taimi faigata? ( Mataio 14:13–23)

I le Mataio 14:1–12, ua tatou aoao sa vavaeese le ulu o Ioane le Papatiso e Herota. Mafaufau i lagona na oo ia Iesu ina ua Ia faalogo ua fasiotia Lana uo ma Lona tausoga.

Suesue po o le a le mea na faia e le Faaola i le Mataio 14:13–23, saili ma faailogaina faamaoniga o lenei mataupu autu: e mafai ona tatou mulimuli i le faataitaiga o Iesu Keriso e ala i le agaalofa ma auauna atu i isi e tusa lava pe o loo feagai tatou ma o tatou lava faigata.Manatua o se “mea tuufua” ( fuaiupu 13) o se nofoaga ua i ai na o ia, ma o “mea e ai” ( fuaiupu 15) o lona uiga o “taumafa.”

• O a ni mea ua e maua i nei fuaiupu e lagolagoina ai lenei mataupu autu?

• O le a le mea na faia e Iesu ina ua uma ona ia iloa ua fasiotia Ioane le Papatiso?

• O le a se auala e mafai ai ona fesoasoani le faataitaiga o le le manatu faapito o le Alii i se tasi o puapuagatia?

Na aoao mai Elder David A. Bednar o le Korama a Aposetolo e Toasefululua, i auala e mafai ai ona tatou atiinae uiga faaKeriso:

Mo se faataitaiga, ua faaalia le uiga i le mana e iloatino ai le mafatiaga o isi tagata ae o loo tatou mafatia foi i tatou lava; i le tomai e iloa ai le fiaaai o isi pe a tatou fiaaai; ma le mana e aapa atu ai ma faasafua atu galuega alofa mo le tiga faaleagaga o isi pe a tatou i ai i le totonugalemu o o tatou lava faanoanoaga faaleagaga. O le mea lea, o le uiga e faaalia i le vaavaai atu ma le aapa atu i fafo atu ae o le tali masani ma le faalenatura o le manatu o le tagata ia te ia lava ma ona manaoga. …

… E moni, e mafai e i tatou o tagata soifua ona taumafai i le amiotonu e maua meaalofa faaleagaga e o faatasi ma le gafatia e aapa atu ai i tua atu ma tali lelei atu i isi tagata o e o loo feagai ma le luitau po o le faigata tonu lea e sili ona tuusao ma faamalosi le oo mai i o tatou luga.

E lē mafai ona tatou maua se na gafatia e ala i le na o le finafinau po o le naunautai patino. E moni lava, e ao ona tatou faalagolago “i galuega, ma le alofa mutimutivale, ma le alofa tunoa o le Mesia Paia” ( 2 Nifae 2:8).

(David A. Bednar, sa sii mai i le Sara Jane Weaver, “Elder Bednar Addresses ‘the Character of Christ’ during 2019 Mission Leadership Seminar,” Church News, Iulai 9, 2019)

A o e sauni e faasoa atu mea ua e aoaoina, mafaufau loloto i aafiaga ua oo ia te oe i le auauna atu i isi.

• O le a sou manatu e uiga i le fesoasoani tatou te maua mai le auaunaga faaKeriso i taimi a o tatou feagai ma o tatou lava faigata?

Ata Faataitai 2: Claire—O le a lava ea a’u taumafaiga e faia le mea ua finagalo ai le Alii ou te faia? ( Ioane 6:5–14)

Ina ua silasila Iesu ma Ona soo i se motu o tagata ua latalata mai, sa fefefe le au soo i le le lava o mea ai e fafaga ai tagata uma.

Suesue i le faamaumauga o le fafagaina e Iesu o le 5,000 i le Ioane 6:5–14, saili ma faailoga faamaoniga o lenei mataupu autu: a tatou ofo atu i le Faaola mea uma ua tatou maua, e mafai ona Ia faateleina a tatou taumafaiga ina ia faataunuuina Ona faamoemoe.

• O a ni mea ua e maua i nei fuaiupu e lagolagoina ai lenei mataupu autu?

• E faapefea ona e manatu po o a ni lagona o le au soo po o le alii talavou e uiga i le mea e mafai ona latou ofoina ma mea o loo manaomia?

Faitau atu le faamatalaga lenei mai ia Sister Michelle D. Craig, Fesoasoani Muamua i le Au Peresitene Aoao o Tamaitai Talavou:

Pe sa e manatu ea e lē lava au taleni ma meaalofa mo le galuega o i luma atu? Sa ou maua ai. Ae e mafai e oe ma a’u ona avatu mea ua ia i ta’ua ia Keriso, ma o le a Ia faateleina a tatou taumafaiga. O mea e te ofoina atu ua sili atu ona lava—e tusa po o a ou sesē ma vaivaiga—pe afai e te faalagolago i le alofa tunoa o le Atua.

(Michelle D. Craig, “Lē Faamalieina Faaleagaga,” Ensign po o le Liahona, Nov. 2018, 54)

• O a ni auala eseese e mafai ona tatou “faasoa atu ai mea ua tatou maua ia Keriso”?

• O a mea na e aoaoina mai lenei tala o le fafagaina e Iesu o le 5,000 e mafai ai ona fesoasoani i se tasi lea e popole pe le lava mea e mafai ona ia avatu?

A o e sauni e faasoa atu mea ua e aoaoina, mafaufau i faataitaiga mai lou olaga po o le olaga a isi ina ua e vaaia le Faaola o faateleina taumafaiga a se tasi e faataunuuina Lana galuega.Mafaufau pe faapefea ona e faaaoga le faataitaiga o le fafagaina e Iesu o le 5,000 e fesoasoani ai i lau uo ma lana luitau i le ata faataitai na e filifilia.

Mafaufau pe faaali faalautele nei faatonuga ma valaaulia tagata aoga e faasoa i a latou tali ma a latou paga.

• Faasoa atu mea e te manao latou te iloa ma lagona e uiga ia Iesu Keriso.

• Faamatala i ai mea e mafai ona latou faia ina ia mulimuli i le faataitaiga a le Alii ma maua Lona mana.

• Aofia ai se fasifuaitau e tasi pe sili atu mai tusitusiga paia po o se upusii na e suesueina.

• Faasoa i se aafiaga e patino ia te oe po o se molimau e lagolagoina le mea o e aoao atu.

Mafaufau pe faaiu i le faasoa o se aafiaga e patino ia te oe ma lau molimau e uiga i le filemu na oo ia te oe e ala i le auauna atu po o le gafatia e le Faaola ona faateleina au taumafaiga faamaoni.

Manatu ma Faamatalaga o Talaaga

E toafia tagata na fafagaina e Iesu?

O le tusiga faa-Eleni o le Mareko 6:44 ua faamanino mai ai le fasifuaitau o le “lima afe o tagata” o lona uiga e lima afe tane. O le Mataio 14:21 ua faamatala mai ai ina ia le sese e ala i le faaopoopoina o le faamatalaga “e ese mai fafine ma tamaiti.”

(New Testament Student Manual [2014], 115)

I se isi taimi faapitoa, na fafagaina ai e Iesu le toa 4,000 o alii faatasi ai ma fafine ma tamaiti. (Tagai i le Mataio 15:32–38 ; Mareko 8:1–9 .)

E faamalosia faapefea a’u i le fesoasoani i isi?

O Peresitene Henry B. Eyring o le Au Peresitene Sili, sa faapea mai:

E tatau ona tatou iloa puapuaga o isi ma taumafai e fesoasoani atu. O le a faigata tele lena mea aemaise pe afai o matua tofotofoina foi i tatou lava. Ae o le a tatou iloa pe a tatou siiina se avega a se isi, tusa pe itiiti, o le a faamalolosia o tatou tua ma iloaina se malamalama i le pouliuli.

(Henry B. Eyring, “Faaosoina, Tofotofoina, ma Faaiilaina,” Ensign po o le Liahona,Nov. 2020, 98)

E mafai ea e Iesu ona faateleina a’u taumafaiga?

Na aoao mai Elder Jeffrey R. Holland o le Korama a Aposetolo e Toasefululua:

Aua le popole nei uma le gafatia o Keriso e fesoasoani ai ia te outou. Ua lava ma totoe Lona alofa tunoa. O le lesona faaleagaga e faavavau lena, o le fafagaina o le 5,000.

(Jeffrey R. Holland, Trusting Jesus [2003], 73)

Galuega Faatino Faaopoopo e Aoao Mai Ai

O le saili e faamalieina isi nai lo le faia o le mea ua tatou iloa e sa’o e mafai ona tau atu i filifiliga sese, faanoanoa, ma salamo ai

Mafaufau pe tusi le upu moni ua tuuina mai i lenei ulutala i le laupapa. Valaaulia tagata aoga e mafaufau i tulaga e filifili ai talavou i le va o le faia mea e fiafia ai isi pe faia le mea tonu. Ona valaaulia lea o tagata aoga e faitau i le Mareko 6:17–27, ma saili mo filifiliga sa faia e le Tupu o Herota ona o lona manao e faafiafia isi. A uma ona lipoti tagata aoga i mea ua latou maua, ona fesili lea i fesili e pei o nei ina ia fesoasoani ia i latou e malamalama atili ai le upu moni i le ulutala.

• Na faapefea ona e vaaia o le lolo atu i faataitaiga le lelei a uo e aumaia ai le faanoanoa?

• O ai se tasi ua avea ma faataitaiga lelei o le mulimuli atu i le Faaola e tusa pe na feagai ma faataitaiga le lelei a uo? O le a se mea ua e aoaoina e ala i lana faataitaiga?

• O a ni auala e mafai ai ona tatou liliu atu i le Faaola pe a faamalosia ia i tatou e faia le mea e le sa’o?

O le lotofaafetai e mafai ai ona tatou faapei atili o Iesu Keriso

Faagauai atu tagata aoga i le Ioane 6:11 . Fesoasoani ia i latou ia iloa na muamua avatu e Iesu le faafetai ae le’i tufaina le areto ma le i’a. Valaaulia tagata aoga e mafaufau pe faamaumau lenei fasifuaitau e latalata i le fuaiupu 11 po o i totonu o a latou api faamaumau suesuega:

“O le lotofaafetai o se vaega taua o uiga paia uma faaKeriso!”

(Dieter F. Uchtdorf, “Ia Lotofaafetai i Soo Se Tulaga,” Ensign po o le Liahona,Me 2014, 77)

• O le a se mea ua aoao mai ia te oe e le faataitaiga a le Faaola e uiga i le lotofaafetai?

• O le a sou manatu i le ala e mafai ai e le lotofaafetai ona taitai atu i isi uiga faaKeriso?

O le atiinae o le agaalofa faaKeriso ma le fai taulaga

Mafaufau pe faaaogaina nei vitio e faaata ai nei upu moni:

E mafai ona tatou mulimuli i le faataitaiga a Iesu Keriso e ala i le faaali atu o le agaalofa ma auauna atu i isi e tusa lava pe tatou te mafatia i o tatou lava faigata.

A tatou ofo atu i le Faaola o a tatou mea uma ua i ai, e mafai e Ia ona faateleina a tatou taumafaiga e faataunuu ai Ona faamoemoega.