Ioane 8

Ua Aumaia i luma o Keriso le Fafine na Maua ina o Mulilua

A o aoao Iesu i le malumalu, na aumaia e le au tusiupu ma Faresaio ia te Ia se fafine na maua ina o mulilua. Na latou fesili ia te Ia pe tatau ona fetogi i maa ia te ia e tusa ma le tulafono a Mose (tagai i le Levitiko 20:10. O le tali a Iesu ia te i latou faapea ma le fafine e mafai ona avatu ai ia te oe malamalamaaga loloto i Lana amio ma fesoasoani ia te oe e lagona le mana o Lona alofa mutimutivale.

O le taulai atu ai i tagata aoga. A o e aoao atu, ia e taulai atu i manaoga taitoatasi o tagata aoga. Aua nei sili atu le taua o au fuafuaga nai lo o tagata aoga i totonu o le potu aoga. Ia faaauau pea ona iloilo le tulaga o faatinoga a tagata aoga, ma saili auala e valaaulia ai i latou e auai i le lesona.

Sauniuniga a le tagata o le vasega: Valaaulia tagata aoga e mafaufau i se taimi na latou alolofa mutimutivale ai i se isi po o se taimi na latou manaomia pe faamoemoeina ai se alofa mutimutivale.

Gaoioiga e ono Mafai Ona Aoao Ai

O uiga auaumama o Iesu Keriso

Faaali atu fesili nei mo tagata aoga e vaai i ai a o latou ulufale mai. Atonu e aoga mo tagata aoga le galulue faatasi i ni paga po o ni vaega toalaiti a o lei faasoaina a latou tali ma le vasega.

• O le a se taimi na agalelei atu ai se isi ia te oe e ui ina e lagonaina e lei tatau ai mo oe?

• O le a se aafiaga o lena mea ia te oe?

Na faaalia e Iesu le agalelei tele i le fafine na maua ina o mulilua, lea na i’u ina loloto se aafiaga mo ia lava.Faitau i le Ioane 8:1–5 ma vaai pe aisea atonu na faigata ai ona tali atu i lenei tulaga.

Ina ua aumai e le au tusiupu ma Faresaio le fafine ia Iesu ma fesili pe tatau ona fetogi i maa ia te ia seia oti, na latou tuu ma le loto i ai o Ia i se tulaga faigata (tagai i le Ioane 8:6). Afai na tali Iesu i le leai mo le fetogi i maa o le fafine, o le a molia o Ia i lona aaitui i le tulafono a Mose (tagai i le Esoto 20:14). Afai na tali o Ia i le ioe, o le a Ia faasagatau i manatu lautele o tagata faapea foi ma le tulafono a Roma. O le a Ia lē faaalia foi le alofa mutimutivale i le fafine, o se mea sa faia soo e Iesu i le taimi o Lana auaunaga (tagai i le Tusi Lesona o le Feagaiga Fou a le Tagata Aoga [2018], ChurchofJesusChrist.org).

A o e suesue i le tali atu a le Faaola i lenei tulaga faigata, e mafai ona e faailoatino uiga e tele e mafai ona fesoasoani ia te oe e malamalama atili ai i le Faaola. O le sailiili ai mo uiga o le Faaola o se tomai e mafai ona e faaaogaina a o faagasolo au suesuega o le Feagaiga Fou. O le malamalama ai i nei uiga e mafai ona faatupulaia ai lou manao e faalatalata atili ia Keriso.

Faitau i le Ioane 8:6–11 ma vaavaai mo uiga auaumama o Iesu Keriso e mafai ona tatou vaaia i Ana fegalegaleaiga ma e o moliaina le fafine faapea foi ma le fafine.

Atonu e te fia matamata i le vitio “Alu ia Oe, Aua e te Toe Agasala” (3:21), o loo maua i le ChurchofJesusChrist.org. E mafai ona fai ma fesoasoani fesili nei e te mafaufau i ai a o e matamata:

Atonu e fai ma fesoasoani le faaali atu o fesili nei ina ia mafai ona faasino i ai tagata aoga pe a manaomia.

• O a uiga auaumama na faaalia e le Faaola i Ana fegalegaleaiga ma alii na moliaina le fafine?

• O a uiga auaumama na faaalia e le Faaola i le ala na Ia faia ai le fafine?

A manaomia, fesoasoani i tagata aoga ia iloa e ui sa onosai ma alofa mutimutivale le Faaola i le fafine, sa Ia lei ofoina atu le faamagaloga ia te ia i lena taimi. (Tagai i le faamatalaga a Peresitene Oaks i le vaega o “Tala ma Faamatalaga o Talaaga”.)

• O a ni fuaitau o tusitusiga paia o loo faapupulaina nei uiga auaumama?

Mafaufau e tuu le faatagaga i tagata aoga e faasoa faatasi o se vasega pe o ni vaega toalaiti mea na latou maitauina. A manaomia, fesoasoani i tagata aoga e faailoa mai uiga auaumama o le Faaola, e pei o le onosai i se tulaga faalelagona na moliaina ai, iloatino le tulaga, faaali atu o le alofa mutimutivale ma le agaalofa i le fafine, ma isi mea faapena.

Atonu e te manao e faailoga nei fuaitau i le Ioane 8:6–11 o loo atagia mai ai nei uiga auaumama o Iesu. Ia maitau sa lei ofoina atu e le Faaola le faamagaloga i le fafine mo ana agasala i lena taimi ae sa ia uunaia o ia e “alu ia oe, aua e te toe agasala” ( Ioane 8:11).

Atonu e fesoasoani le valaaulia o se tagata aoga e tau mai se faataitaiga o se fasifuaitau o loo atagia ai se uiga auaumama o Iesu pe faasoa atu e le faiaoga se faataitaiga. Afai e aoga mo tagata aoga le manatunatu i se uiga auaumama e atinae, e mafai ona fesoasoani fesili nei. E mafai ona tuu se taimi i tagata aoga e manatunatu ai i fesili ma tali i ai i totonu o a latou api faamaumau suesuega.

• O fea o nei uiga auaumama e te manao e atinae faalelei? Aisea?

• E mafai faapefea ona e faatagaina le Faaola e fesoasoani ia te oe e atinae pe faamalosia lenei uiga auaumama i lou olaga?

O le alofa mutimutivale o le Faaola e uunaia i tatou ia suia

O le tasi o uiga auaumama paia o Iesu Keriso o Lona alofa mutimutivale. “O le alofa mutimutivale o le faia lea ma le agaalofa o se tagata e sili atu nai lo le mea ua tatau ai mo ia” (Autu o le Talalelei, “Alofa Mutimutivale,” topics.ChurchofJesusChrist.org).

Na faasoa mai e Elder Dale G. Renlund o le Korama o Aposetolo e Toasefululua nei malamalamaaga loloto e uiga i le alofa mutimutivale agaalofa o le Faaola ma le aafiaga na i ai i le fafine:

E mautinoa lava, sa lei faatagaina e le Faaola le mulilua. Ae sa Ia lei faasalaina foi e Ia le fafine. Sa Ia faamalosiau ia te ia e toe faafou lona olaga. Sa faaosofia o ia e sui ona o Lona agaalofa ma alofa mutimutivale. O le Faaliliuga a Iosefa Samita o le Tusi Paia o loo faamaonia ai lona avea mulimuli ane ma soo: “Ma sa vivii atu le fafine i le Atua mai lena itula, ma sa talitonu i lona suafa” [Faaliliuga a Iosefa Samita, Ioane 8:11 (i le Ioane 8:11, vaefaamatalaga i)].

(Dale G. Renlund, “O Lo Tatou Leoleo Mamoe Lelei,” Ensign po o le Liahona, Me 2017, 30)

Afai e maua i tusitusiga paia, manatu e faailoga le Faaliliuga a Iosefa Samita i le Ioane 8:11, vaefaamatalaga i.

• O le a se aafiaga na i ai i le fafine ona o le alofa mutimutivale o le Faaola?

• Aisea ua e manatu ai e mafai e Lona alofa mutimutivale ona i ai na ituaiga aafiaga?

• E faapefea e le iloa e naunau le Tama Faalelagi ma Iesu Keriso i le alofa mutimutivale ona aafia ai ou lagona mo i Laua?

E ui e lē faatagaina e le Faaola le agasala, e loto faamagalo o Ia. E finagalo o Ia ia uunaia oe e salamo ma taumafai pea e lelei atili.

E ono aoga mo tagata aoga le talatalanoa i le naunau o le Faaola ia tatou taumafai pea pe a tatou fai mea sese. Afai o le tulaga lena, mafaufau e faaaoga le faamatalaga mai ia Elder Lynn G. Robbins i le vaega o “Tala ma Faamatalaga o Talaaga”.

Mafaufau e tuu sina taimi filemu i tagata aoga e manatunatu ai i mea ua latou aoaoina ina ia fesoasoani ai ia i latou e fesootai atili i le Faaola ma lagona Lona alofa mutimutivale. E mafai ona lisi i luga o le laupapa fesili o loo lisi atu i lalo (po o nisi), ma mafai ona valaauliaina tagata aoga e tali atu i ai i totonu o a latou api faamaumau suesuega.

• O a mea ua e aoaoina e uiga i le Faaola i lenei aso ua uunaia ai oe e salamo ma taumafai pea e faapei o Ia?

• O a mea ua e lagona e naunau le Faaola ina ia e faia pe suia i lou olaga a o e tauivi e faapei atili o Ia?

Mafaufau e taualuga i le faasoa atu o le molimau ma lagona patino e uiga i le agaalofa ma le alofa mutimutivale o le Faaola.

Tala ma Faamatalaga o Talaaga

O faapefea ona faamanuiaina i tatou ona o le alofa mutimutivale o le Faaola?

I le saunoa ai i le naunautaiga o le Faaola ina ia tatou taumafai pea pe a tatou faia mea sese, na aoao mai ai Elder Lynn G. Robbins o le Fitugafulu:

A o tatou ootia ai ma le lotofaafetai mo avanoa faalua e sosoo ma mea sese, po o toilalo o le mafaufau, tatou te tutu ma ofo uma i le alofa tunoa o le Faaola i le tuuina mai ia i tatou o avanoa lona lua e faatoilalo ai le agasala, po o toilalo o le loto.

E leai se tasi e sili ona ‘au ma i tatou nai lo le Faaola. … Ina ia avea e faapei o Ia o le a manaomia ai ni avanoa faalua lemafaitaulia i o tatou tauiviga ma le tagata natura i lea aso ma lea aso, e pei o le puleaina o le tausami, aoaoina o le onosai ma le lotofaamagalo, faatoilaloina o le paie, aloese mai agasala o le le faia o mea e tatau ona fai, na o ni nai mea ua ta’ua. …

Ou te faafetai e faavavau mo le agalelei, agaalofa, onosai, ma le loa ona talitiga o Matua Faalelagi ma le Faaola, o e ua faatagaina i tatou i avanoa faalua lemafaitaulia i la tatou malaga e toe foi atu i lo Latou afioaga.

(Lynn G. Robbins, “Seia Fitugafulu ni Fitu,” Ensign po o le Liahona, Me 2018, 22–23)

E mafai faapefea ona ou alofa mutimutivale atili e pei o le Faaola?

Na aoao mai Peresitene Dieter F. Uchtdorf o le Au Peresitene Sili:

I se lalolagi o tuuaiga ma le feitagai, ua faigofie lava le tau o le pua ma lafo. Ae tatou le i faia lena mea, ia tatou manatua ia upu a Ia o lo tatou Matai ma le faataitaiga: “O so outou e leai sana agasala, ia lua’i togi se maa” [Ioane 8:7].

Uso e ma tuafafine, tuu i lalo a tatou maa.

Ia tatou agalelei atu.

Ia tatou faamagalo atu.

Ia tatou talanoa ma le filemu o le tasi ma le isi.

Ia faatumulia e le alofa o le Atua o tatou loto.

“Ia tatou agalelei i tagata uma lava” [Kalatia 6:10].

(Dieter F. Uchtdorf, “O Le e Alofa Atu e Alofaina Mai,” Ensign po o le Liahona, Me 2012, 76)

Na aoao mai e Elder Dale G. Renlund o le Korama a Aposetolo e Toasefululua:

Ina ia avea e faapei o Keriso, e naunau se tagata i le alofa mutimutivale. O tagata e naunau i le alofa mutimutivale e le faamasinosino; latou te faailoa atu le agaalofa i isi, aemaise ia i latou o e le taualoa, e tauagafau, e agalelei, ma aga faatamalii. O nei tagata latou te taulimaina ma le alofa ma le malamalama tagata uma, e tusa lava po o a o latou tulaga e pei o lanu, itupa, sootaga faalelotu, faiā feusuai, tulaga faaletamaoaiga, ma ituaiga, itu’au, po o eseesega faaleatunuu. E fuaao e le alofa faaKeriso nei mea uma.

(Dale G. Renlund, “Ia Fai le Amiotonu, Ia Naunau i le Alofa, ma Ia Feoai ma Lou Atua ma le Lotofaamaulalo,” Ensign po o le Liahona, Nov. 2020, 111)

Na faapefea ona faaalia e le Faaola le alofa mutimutivale e aunoa ma le faatagaina o amioga amioletonu?

Na aoao mai Peresitene Dallin H. Oaks o le Au Peresitene Sili:

E mautinoa lava e lei tauamiotonuina e le Alii le agasala a le fafine. Na ona Ia tau atu ia te ia Na te le faasalaina o ia—o lona uiga, Na te le faia le faamasinoga faaiu mo ia i lena taimi. … O le fafine na maua ina o mulilua sa tuu atu i ai le taimi e salamo ai, o le taimi semanu e le avatua e i latou sa mananao e fetogi o ia.

(Dallin H. Oaks, “‘Judge Not’ and Judging,” Ensign, Aok. 1999, 8)

Gaoioiga Faaopoopo e Aoao Ai

Ioane 8:12 .“O aʼu nei o le malamalama o le lalolagi”

Mafaufau e faitau i le Ioane 8:12 ma talatalanoa i le tofi ma le matafaioi a le Faaola i le avea ai ma “le malamalama o le lalolagi.”

E mafai foi ona faaaoga le upusii lenei. Na faailoa mai e Peresitene Dallin H. Oaks ni auala se tolu o loo avea ai Iesu Keriso ma “le malamalama o le lalolagi”:

O Iesu Keriso o le malamalama o le lalolagi aua o ia o le puna o le malamalama lea “e susulu atu mai le afioaga o le Atua e faatumulia ai le loaloa o le vateatea” [ Mataupu Faavae ma Feagaiga 88:12 ]. …

O Iesu Keriso o le malamalama o le lalolagi aua o ana faataitaiga ma ana aoaoga e faamalamalamaina ai le ala e tatau ona tatou uia e toe foi atu i le afioaga o lo tatou Tama o i le Lagi. …

O Iesu Keriso foi o le malamalama o le lalolagi aua o lona mana e faatosinaina i tatou e faia mea lelei.

(Dallin H. Oaks, “O le Malamalama ma le Ola o le Lalolagi,” Ensign, Nov. 1987, 63–64)

O le vitio faale Tusi Paia o le “Ua Fetalai Iesu: O A’u o le Malamalama o le Lalolagi; e Tuu Saoloto Outou e le Upumoni” (4:26) e mafai ona faaaogaina e aoao atu ai fuaiupu 12–59 .

Ioane 8:13, 17–18, 25–29 . O le faiā a Iesu ma Lona Tama

Na aoao manino mai Iesu Keriso e uiga i Lana faiā ma Lona Tama, e aofia ai ma le faamanino mai o Ia ma Lona Tama o ni tagata eseese. Valaaulia tagata aoga e faitau i le Ioane 8:13, 17–18, 25–29, ma vaavaai mo upu ma fuaitau o loo atagia mai ai le faiā a le Faaola ma Lona Tama.

Ioane 8:30–36 . “E tuu saoloto outou e le upumoni”

Na faliu Iesu ia i latou na “talitonu ia te ia” ma aoao i ai e uiga i le tuu saolotoina o i tatou e le upumoni. E mafai ona faitau tagata aoga i fuaiupu 31–33 ma vaai po o le a le mea e mafai ai ona latou iloa le upumoni. E mafai ona faailoa mai e tagata aoga se tasi o faalagiga o le Faaola o “le upumoni” (tagai i le Ioane 14:6) ma tuu i ai le suafa o le Faaola i le avanoa o le “upumoni” i le Ioane 8:31–36 .

E mafai foi ona talatalanoa tagata aoga pe faapefea e le agasala ona iu ai i le pologa ma pe faapefea e Iesu Keriso ona iu ai i le tuusaolotoina, ma mafai ona talanoaina foi le 2 Nifae 2:27 .