The resurrected Jesus Christ (wearing white robes with a magenta sash) standing above a large gathering of clouds. Christ has His arms partially extended. The wounds in the hands of Christ are visible. Numerous angels (each blowing a trumpet) are gathered on both sides of Christ. A desert landscape is visible below the clouds. The painting depicts the Second coming of Christ. (Acts 1:11)
Sa usa ka pribadong pakigsulti didto sa Bukid sa mga Olibo, si Jesukristo mitubag sa mga pangutana sa Iyang mga tinun-an mahitungod sa Iyang Ikaduhang Pag-anhi. Kini nga leksiyon makatabang ninyo sa pagsabot unsa ang gitudlo sa Manluluwas mahitungod sa mga timailhan sa Iyang pag-anhi ug paglantaw sa mga adlaw nga Siya mobalik sa kalibotan.
Pagtabang sa mga estudyante aron makakuha og makahuloganong mga kasinatian. Hinumdomi nga ang inyong tumong isip usa ka magtutudlo dili ang pagtudlo sa leksiyon o paghuman sa sulod. Kondili, aron matabangan ang mga estudyante nga matun-an ang mga kasulatan sa paagi nga makatabang nila sa pagkahibalo ug pagsunod sa Manluluwas.
Pagpangandam sa estudyante: Dapita ang mga estudyante nga mobasa sa Joseph Smith—Mateo 1:22–55 ug mamalandong diha sa ilang mga hunahuna ug pagbati mahitungod sa Ikaduhang Pag-anhi sa Manluluwas.
Posible nga mga Kalihokan sa Pagkat-on
Paghanduraw sa pag-anhi ni Jesukristo
Kon ang mga estudyante hangyoon sa pagbasa sa Joseph Smith—Mateo 1:22–55 ug sa pagpamalandong sa Ikaduhang Pag-anhi ni Jesukristo sa dili pa ang klase, ikonsiderar nga paambiton sila sa ilang mga hunahuna ug pagbati karon. Ipakita ang hulagway sa ibabaw, ug ipangutana ang mga pangutana nga makatabang sa mga estudyante nga masulti ang ilang mga hunahuna ug mga pagbati bahin sa maong hilisgotan. Paminawa unsa ang gipaambit sa mga estudyante, ug ikonsiderar ang mosunod nga materyal aron mapalambo ang ilang kasinatian.
Hunahunaa ang mahitungod sa unsay inyong nahibaloan kabahin sa Ikaduhang Pag-anhi ni Jesukristo ug ang mga timailhan nga mag-una niini. Hunahunaa kon unsa kaha kini.
Unsa ang inyong mahanduraw kon maghunahuna kamo mahitungod sa Ikaduhang Pag-anhi ni Jesukristo?
Unsa nga mga pagbati ang maanaa kaninyo kon maghunahuna mahitungod sa Pag-anhi sa Manluluwas?
Paminawa og maayo unsa ang mga isulti sa mga estudyante. Kon ang mga estudyante morag gikulbaan o nahadlok mahitungod sa Ikaduhang Pag-anhi ni Jesukristo, pangita og mga kahigayonan sa tibuok nga leksiyon aron sila mobati og kalinaw. Tabangi sila nga makasabot sa mga timailhan sa pag-anhi sa Manluluwas ug paglantaw sa Iyang pagbalik.
Sa inyong pagtuon karon, pamatia ang mga pag-aghat sa Espiritu Santo aron matabangan kamo nga mahibalo unsa ang inyong mabuhat sa pagpaabot sa adlaw nga si Jesukristo moanhi pag-usab.
Ang mga timailhan nga nag-una sa Ikaduhang Pag-anhi ni Jesukristo
Sa dihang ang mga tinun-an nangutana sa Manluluwas, “Unsa ang timailhan sa imong pag-anhi?” ( Joseph Smith –Mateo 1:4), Iya silang gitudloan mahitungod sa mga hitabo padulong sa Iyang Ikaduha nga Pag-anhi. Bisan og walay lain kon dili ang Langitnong Amahan lamang ang nahibalo sa eksaktong adlaw o oras kon kanus-a kini mahitabo, gipasabot ni Jesus ang kamahinungdanon sa pagbantay sa lainlaing mga timailhan nga Iyang gihatag (tan-awa sa Joseph Smith—Mateo 1:40,46).
Usa ka dapit diha sa mga kasulatan diin ang mga timailhan sa pag-anhi sa Ginoo gilatid diha sa Joseph Smith—Mateo . Kini mao ang Hubad ni Joseph Smith, o pag-usab, sa Mateo24 , nga anaa makita sa Perlas nga Labing Bililhon.
Unsa ang pipila ka timailhan nga inyong nahibaloan nga mag-una sa Ikaduhang Pag-anhi ni Jesukristo?
Ikonsiderar ang pagdapit sa mga estudyante sa paglista sa mga timailhan diha sa pisara. Human makapaambit ang mga estudyante sa ilang nahibaloan, ikonsiderar ang padapit kanila sa pagsusi niini nga mga timailhan diha sa mga kasulatan ug sa pagpangita og uban pa.
Aron makakita sa pipila ka timailhan nga gipadayag sa Ginoo ug sa usa ka hinungdan nganong gipadayag Niya kini, basaha ang Joseph Smith—Mateo 1:22–23, 28–36,48 . Mahimo usab ninyong tan-awon ang “ Timailhan sa mga Panahon, Mga ” nga makita diha sa Giya sa mga Kasulatan, sa scriptures.ChurchofJesusChrist.org.
Unsa ang importante kaayo diha ninyo mahitungod sa mga timailhan nga gihatag sa Manluluwas alang sa Iyang Ikaduhang Pag-anhi?
Unsa ang atong makat-onan mahitungod kang Jesukristo pinaagi sa pagkahibalo nga Iyang gipadayag kini nga mga timailhan dugay na kaniadto sa dili pa ang Iyang Ikaduhang Pag-anhi?
Unsa ang inyong pagbati sa inyong paghanduraw sa ebanghelyo nga “gisangyaw sa tibuok kalib[o]tan” ( Joseph Smith–Mateo 1:31) ug sa Manluluwas “nga moabot diha sa mga panganod sa langit, uban sa gah[o]m ug dako nga himaya”? ( Joseph Smith—Mateo 1:36). Ngano man?
Ikonsiderar ang pagdapit sa mga estudyante sa pagrebyo sa mga bersikulo nga ilang natun-an dinhi niini nga leksiyon ug pagmarka sa importanteng mga detalye mahitungod sa Manluluwas ug sa Iyang mga tinguha alang kanila. Human nila mapaambit ang ilang namarkahan, ang mosunod nga kalihokan tingali makatabang. Batia ang kagawasnon sa pagdugang og mga hugpong sa pulong nga ilang naila mahitungod sa Manluluwas ug sa Iyang mga tinguha alang kanila.
Pagpili og pinkamenos usa sa mosunod nga mga hugpong sa pulong ug ikonsiderar nga markahan kini diha sa inyong mga kasulatan. Sa inyong pagmarka sa mga pulong, hunahunaa ang mahitungod sa mensahe ni Jesukristo. Pangitaa kon unsa ang matudlo sa mga pulong sa Manluluwas diha kaninyo mahitungod Kaniya ug sa Iyang mga tinguha alang kaninyo.“Tan-awa nga kamo dili masamok” ( Joseph Smith –Mateo 1:23).“Siya nga dili mabuntog, ang mao pagaluwason.” ( Joseph Smith—Mateo 1:30).“Ang akong mga pulong dili mahanaw, apan ang tanan matuman” ( Joseph Smith—Mateo 1:35).“Pangandam usab kamo” ( Joseph Smith—Mateo 1:48).
Unsa nga kinaiya sa inyong hunahuna ang gusto sa Manluluwas nga maanaa kaninyo mahitungod sa Iyang pag-anhi?
Asa sa mga pulong ni Jesukristo ang nakatabang ninyo sa paghigugma ug pagsalig Kaniya?
Sa tibuok semana, inyong tun-an ang dugang pa mahitungod sa Ikaduhang Pag-anhi ni Jesukristo ug unsaon ninyo sa pagpangandam alang niini.
Pagpaabot sa pagbalik sa Ginoo
Ang mga estudyante mahimong hangyoon sa pagtan-aw sa hulagway sa Ikaduhang Pag-anhi ni Jesukristo o pagpiyong sa ilang mga mata ug handurawon ang mga hitabo sa Ikaduhang Pag-anhi ni Jesukristo samtang naminaw sa mosunod nga paghulagway ni Elder Neil L. Andersen.
Samtang magbasa kamo sa mosunod nga pamahayag ni Elder Neil L. Andersen sa Korum sa Napulog Duha ka Apostoles, ihanduraw ang unsay iyang gisulti ug hunahunaa ang mahitungod sa inyong kaugalingong kinaiya mahitungod sa Ikaduhang Pag-anhi.
Imahe
Official portrait of Elder Neil L. Andersen of the Quorum of the Twelve Apostles, 2010, August.
Ang paghunahuna sa Iyang pag-anhi nagpahinam kanako. Kini kulbahinam gay[o]d! Ang gidak-on ug kahalangdon, ang gilapdon ug katalagsaon, mas molabaw pa sa makita sa mortal nga mga mata o masinati.
Nianang adlawa … Siya m[o]pakita “diha sa mga panganod sa langit, nagbisti og gah[o]m ug sa dakong himaya; uban sa tanang balaang mga anghel” [ Doktrina ug Mga Pakigsaad 45:44 ]. … Ang adlaw ug ang bulan mausab, ug ang “mga bitoon [ilabay] gikan sa ilang mga dapit” [ Doktrina ug mga Pakigsaad 133:49 ]. …
… Kita moluhod uban sa pagtah[o]d, “ug ang Ginoo mopadungog sa iyang tingog, ug ang tanan nga mga lumulupyo sa yuta makadungog niini” [ Doktrina ug mga Pakigsaad 45:49 ]. …
Nianang adlawa, mahilom ang mga nagduha-duha, “kay matag dunggan makadungog … , ug matag tuhod moluhod, ug matag dila mokumpisal” [ Doktrina ug mga Pakigsaad 88:104 ] nga si Jesus mao ang Kristo, ang Anak sa Dios, ang Manluluwas ug Manunubos sa kalib[o]tan.
… Hina[o]t nga maandam kita sa Iyang pag-anhi pinaagi sa kanunay nga pagbalik-balik og hinumdom niining mahimayaong hitabo ug niadtong atong mga gimahal.
(Neil L. Andersen, “Paanhia ang Imong Gingharian,” Liahona, Mayo 2015, 122)
Unsa nga mga hunahuna o mga pagbati ang inyong naangkon samtang naghanduraw kamo sa unsay gihulagway ni Elder Andersen?
Giunsa niini nga leksiyon pag-impluwensiya sa inyong mga hunahuna o mga pagbati sa sinugdanan sa klase mahitungod sa Ikaduhang Pag-anhi?
Unsa kaha ang makatabang ninyo sa paghanduraw sa pag-anhi sa Ginoo isip usa ka mahimayaong hitabo?
Kinsa ang tawo nga lagmit ninyong maistoryahan mahitungod sa Ikaduhang Pag-anhi ni Jesukristo?
Kon mahimo, ikonsiderar ang pagpalit og gagmay nga hulagway sa Ikaduhang Pag-anhi sa Manluluwas alang sa mga estudyante. Ang mga estudyante mahimong dapiton sa pagbutang sa maong hulagway ngadto sa lugar nga makapahinumdom kanila kanunay sa mahimayaong pagbalik sa Ginoo.
Sa lahi nga okasyon, si Elder Neil L. Andersen mipaambit sa iyang mga hunahuna mahitungod sa panahon kon si Jesukristo mobalik dinhi sa kalibotan nga mahimayaon:
Imahe
Official portrait of Elder Neil L. Andersen of the Quorum of the Twelve Apostles, 2010, August.
Walay makadasig sa akong tinguha sa pagpamulong bahin ni Kristo labaw pa kay sa paghanduraw sa Iyang pagbalik. Samtang kita wala makahibalo kanus-a Siya moab[o]t, ang mga panghitabo sa Iyang pagbalik makapahingangha! Siya moab[o]t sa mga pangan[o]d sa langit diha sa kahalangdon ug himaya uban sa tanan Niyang balaan nga mga anghel. Dili lamang pipila ka anghel, apan ang tanan sa Iyang balaan nga mga anghel. Dili kini ang pulahon og aping nga kerubin nga gipintal ni Raphael nga atong makita sa atong mga Valentine card. Kini ang mga anghel sa mga siglo, ang anghel nga gipadala aron siradohan ang mga baba sa mga liyon [tan-awa sa Daniel 6:22 ], aron ablihan ang mga pultahan sa prisohan [tan-awa sa Mga Buhat 5:19 ], aron ipahibalo ang Iyang dugay nang gipaabot nga pagkatawo [tan-awa sa Lucas 2:2–14 ], aron hupayon Siya sa Getsemani [tan-awa sa Lucas 22:42–43 ], aron pasaligan ang Iyang mga disipulo sa Iyang Pagsaka sa Langit [tan-awa Mga Buhat 1:9–11 ], ug aron ablihan ang mahimayaon nga Pagpahiuli sa ebanghelyo.
Imo bang mahanduraw ang higayon nga mahimamat Siya, kon sa iyang kilid o sa laing habig ba sa tabil? [tan-awa sa 1Tesalonica 4:16–17 ; Doktrina ug Mga Pakigsaad 88:96–98 ]. Kana ang Iyang saad ngadto sa mga matarong. Kining talagsaon nga kasinatian moimpluwens[i]ya sa atong mga kalag sa kahangtoran.
(Neil L. Andersen, “Kita Naghisgot Kang Kristo,” Liahona, Nob. 2020, 91)
Unsa kaha kon ako nabalaka mahitungod sa mga timailhan sa Ikaduhang Pag-anhi sa Manluluwas?
Pag-andam sa kalibotan alang sa Ikaduhang Pag-anhi
Pipila ka mga batan-ong lalaki sa Aaronic nga Pagkapari mahimong dapiton nga moadto sa klase nga andam mohubit [recite] o mopasabot sa porsiyon sa Aaronic nga Pagkapari nga tema sa korum mahitungod sa pag-andam sa kalibotan alang sa pagbalik sa Manluluwas. Ang mga batan-ong babaye mahimo sab nga hangyoon sa pagpaambit sa unsa ang ilang gibuhat aron maandam ang kalibotan sa Ikaduhang Pag-anhi ni Jesukristo.
Mga sambingay mahitungod sa Ikaduhang Pag-anhi ni Jesukristo
Tabangi ang mga estudyante sa pagkat-on mahitungod sa tinguha sa Ginoo nga kita maandam sa Iyang Ikaduhang Pag-anhi pinaagi sa pagtuon sa mubo nga mga sambingay nga Iyang gitudlo diha sa Joseph Smith—Mateo . Ang mosunod nga mga pakisayran mahimong ipakita nga mahimong kapilian sa klase o mahimong tungaon sa pagbahin tali sa mga estudyante. Kon ang mga pakisayran gi-assign, bantayi ang katas-on o pagkakomplikado sa matag sambingay. Human makabasa ang mga estudyante, mahimo silang hangyoon sa pagpasabot sa ilang mga sambingay ngadto sa ilang pares o ngadto sa gagmay nga mga grupo. Ikonsiderar ang paggamit sa unang pakisayran ug pagpasabot agig paagi sa pagpakita sa maong buluhaton ngadto sa klase.
Human makapaambit ang mga estudyante, makatabang alang sa mga estudyante ang pagsumada sa mensahe sa Ginoo nga anaa nalakip niini nga mga sambingay pinaagi sa pagtubag og usa ka pangutana sama sa mosunod: Base sa unsay inyong nakat-onan gikan sa mga sambingay, unsa ang inyong gibati nga maoy mensahe sa Ginoo alang kaninyo mahitungod sa Iyang Ikaduhang Pag-anhi?
