Joseph Smith—Matio
Miandrandra ny Fiavian’ny Tompo
Tao anatin’ny resadresaka nitokana iray teo amin’ny Tendrombohitra Oliva, i Jesoa Kristy dia namaly ny fanontanian’ireo mpianany mikasika ny Fiaviany Fanindroany. Ity lesona ity dia afaka manampy anao hahatakatra ny zavatra izay nampianarin’ny Mpamonjy momba ireo famantarana ny fiaviany sy hiandrandra ny andro izay hiverenany eto an-tany.
Manampy ireo mpianatra hanana traikefa manan-danja. Tsarovy fa ny tanjonao amin’ny maha-mpampianatra anao dia tsy ny hampianatra lesona na hamita ny votoatin-javatra. Fa hanampy kosa ireo mpianatra handalina ny soratra masina amin’ny alalan’ny fanampiana azy ireo hahafantatra sy hanaraka ny Mpamonjy.
Fiomanan’ny mpianatra: Asao ireo mpianatra hamaky ny Joseph Smith—Matio 1:22–55 ary hisaintsaina ny hevitr’izy ireo sy ny fahatsapany momba ny Fiavian’ny Mpamonjy Fanindroany.
Sahanasa fianarana azo atao
Maka sary an-tsaina ny fiavian’i Jesoa Kristy
Raha nasaina namaky ny Joseph Smith—Matio 1:22–55 sy nisaintsaina momba ny Fiavian’i Jesoa Kristy fanindroany ireo mpianatra nialoha ny fotoam-pianarana, dia hevero ny manasa azy ireo mba hizara ny zavatra izay eritreretiny sy tsapany amin’izao ankehitriny izao. Asehoy ilay sary etsy ambony, ary mametraha fanontaniana mba hanampiana ireo mpianatra hilaza ny zavatra eritreriny sy tsapany momba an’ilay lohahevitra. Henoy tsara ny zavatra izay zarain’ireo mpianatra ary hevero ny hampiasa ity fitaovana manaraka ity mba hampivelatra ny traikefany.
Mieritrereta momba ny zavatra izay fantatrao momba ny Fiavian’i Jesoa Kristy Fanindroany sy ireo famantarana izay hiseho mialoha izany. Alaivo sary an-tsaina ny mety ho endrika hisehoan’izany.
-
Inona no zavatra tonga ao an-tsainao rehefa mieritreritra ny Fiavian’i Jesoa Kristy Fanindroany ianao?
-
Inona no fahatsapana anananao rehefa mieritreritra momba ny fiavian’ny Mpamonjy?
Henoy tsara ny zavatra izay havalin’ireo mpianatra. Raha toa ka miahiahy na matahotra ny amin’ny Fiavian’i Jesoa Kristy Fanindroany ireo mpianatra dia mitadiava fotoana mandritra ny lesona mba hanampiana azy ireo hahatsapa fiadanana. Ampio izy ireo mba hahatakatra ireo famantarana ny fiavian’ny Mpamonjy ary hiandrandra ny fiverenany.
Rehefa mandalina ianao anio, dia henoy ny bitsiky ny Fanahy Masina mba hanampy anao hahafantatra ny zavatra azonao atao hiandrandrana ny andro hiavian’i Jesoa Kristy indray.
Ireo famantarana mialoha ny Fiavian’i Jesoa Kristy Fanindroany
Raha nanontany ny Mpamonjy ireo mpianany hoe: “Inona no famantarana ny fiavianao?” ( Joseph Smith—Matio 1:4), dia nampianatra azy ireo momba ireo zavatra hiseho mialoha ny hiaviany fanindroany Izy. Na dia tsy misy olona mahafantatra ny andro na ora marina hitrangan’izany aza afa-tsy ny Ray any An-danitra, dia nanazava ny maha zava-dehibe ny fiambenana ireo famantarana samihafa izay nomeny i Jesoa (jereo ny Joseph Smith—Matio 1:40, 46).
Ny toerana iray ao amin’ny soratra masina izay ahitana ireo famantarana ny fiavian’ny Tompo dia ao amin’ny Joseph Smith—Matio . Izy io dia dikanteny nataon’i Joseph Smith, na fanitsiana, ny Matio 24 , izay hita ao amin’ny Voahangy Lafo vidy.
-
Inona avy ireo famantarana fantatrao mialoha ny hiavian’i Jesoa Kristy fanindroany?
Asao ireo mpianatra mba hanao lisitra ireo famantarana eny amin’ny solaitrabe. Rehefa avy nizara ireo zavatra fantany ny mpianatra, dia hevero ny hanasa azy ireo hitady ireo famantarana ireo na hafa ao amin’ny soratra masina.
Mba hahafahana mahita ny sasany amin’ireo famantarana izay nambaran’ny Tompo sy ny antony nahatonga Azy nanambara izany, dia vakio ny Joseph Smith—Matio 1:22–23, 28–36, 48 . Azonao jerena ihany koa ny “ Famantarana ny fotoana ” ao amin’ny Torolalana ho an’ny Soratra Masina, izay hita ao amin’ny scriptures.ChurchofJesusChrist.org.
-
Inona no manaitra anao amin’ireo famantarana izay nomen’ny Mpamonjy momba ny Fiaviany Fanindroany?
-
Inona no zavatra azontsika ianarana momba an’i Jesoa Kristy rehefa nahafantatra isika fa nampahafantariny efa ela malohan’ny hiaviany fanindroany ireo famantarana ireo?
-
Inona no zavatra mba tsapanao rehefa maka sary an-tsaina ny filazantsara izay “hotorina manerana izao tontolo izao” ( Joseph Smith—Matio 1:31) sy ny Mpamonjy izay “ho avy eo amin’ny rahon’ny lanitra amin-kery sy voninahitra lehibe” ianao? ( Joseph Smith—Matio 1:36). Nahoana?
Asao ireo mpianatra mba hamerina hijery ireo andinin-tsoratra masina izay nianarany tao amin’ity lesona ity ary hanisy marika ireo antsipiriany manan-danja momba ny Mpamonjy sy ny mba faniriany momba azy ireo. Rehefa avy nizara ny zavatra izay nomarihiny izy ireo, dia mety hahasoa ny fanaovana izao sahanasa manaraka izao. Aza misalasala manampy ireo fehezanteny fanampiny izay hitan’izy ireo momba ny Mpamonjy sy ny faniriany momba azy ireo.
Misafidiana iray amin’ireto fehezanteny manaraka ireto farafaharatsiny ary asio marika izany ao amin’ny soratra masinao. Rehefa manisy marika ireo teny ianao dia eritrereto ny hafatra izay navelan’i Jesoa Kristy. Tadiavo ny zavatra azon’ny tenin’ny Mpamonjy ampianarina anao momba Azy sy ny faniriany ho anao.“Aoka tsy hatahotra ianareo” ( Joseph Smith—Matio 1:23).“Fa izay tsy ho resy no hovonjena” ( Joseph Smith—Matio 1:30).“Tsy holevona kosa ny teniko fa ho tanteraka avokoa” ( Joseph Smith—Matio 1:35).“Koa aoka ho vonona koa ianreo” ( Joseph Smith—Matio 1:48).
-
Inona araka ny eritreritrao, no fihetsika tian’ny Mpamonjy hanananao momba ny fiaviany?
-
Inona amin’ireo tenin’i Jesoa Kristy no manampy anao hitia sy hatoky Azy?
Mandritra ity herinandro ity, dia handalina kokoa momba ny Fiavian’i Jesoa Kristy Fanindroany sy ny fomba ahafahanao miomana amin’izany ianao.
Fiomanana mialoha amin’ny fiverenan’ny Tompo
Azo asaina hijery ny sarin’i Jesoa Kristy ireo mpianatra na hanakimpy ny masony ary haka sary an-tsaina ny zavatra hitranga amin’ny Fiavian’i Jesoa Kristy Fanindroany eo am-pihainoana ny fanoritsoritana manaraka izay nataon’ny Loholona Neil L. Andersen.
Rehefa mamaky ity teny nolazain’i Loholona Neil L. Andersen ao amin’ny Kôlejin’ny Apôstôly Roambinifolo ianao dia alaivo sary an-tsaina ny zavatra lazainy ary eritrereto ny fihetsikao manokana momba ny Fiaviana Fanindroany.
Mampientanentana ny fanahiko ny mieritreritra ny fiverenany. Tena hampitolagaga mihitsy izany! Ny velarana sy ny fahalehibiazana, ary ny hakantony, dia hihoatra noho izay rehetra fahitan’ny maso mety maty na niainana.
Amin’izany andro izany … dia hiseho “eny amin’ny rahon’ny lanitra Aho, mitafy hery sy voninahitra lehibe, miaraka amin’ny anjely masina rehetra” [ Fotopampianarana sy Fanekempihavanana 45:44 ]. … Hiova endrika ny masoandro syny volana, ary “ny kintana [ho]esorina amin’ny toerany” [ Fotopampianarana sy Fanekempihavanana 133:49 ]. …
… Handohalika amim-panajana isika, “Ary hiloa-bava ny Tompo ka handre izany avokoa ny faran’ny tany;” [ Fotopampianarana sy Fanekempihavanana 45:49 ]. …
Amin’io andro io dia hangina ny mpisalasala lava, “fa ny sofina tsirairay dia handre izany … , ary ny lohalika rehetra hitsaoka, ary ny lela rehetra hiaiky” [ Fotopampianarana sy Fanekempihavanana 88:104 ] fa i Jesoa no Kristy, ilay Zanak’ Andriamanitra, ilay Mpamonjy sy Mpanavotra an’izao tontolo izao.
… Enga anie isika hiomana amin’ny fiaviany amin’ny fieritreretana hatrany ireo zavatra hitranga lehibe ireo ao an-tsaintsika sy miaraka amin’ireo olona tiantsika.
(Neil L. Andersen, “Ho Tonga anie ny Fanjakanao,” Liahona, mey 2015, 122)
-
Inona no zavatra tsapanao na noeritreretinao rehefa naka sary an-tsaina ny zavatra nosoritsoritan’ny Loholona Andersen ianao?
-
Ahoana no fiantraikan’ity lesona ity tamin’ireo eritreritra na fahatsapana izay nanananao tany am-piandohan’ny fianarana momba ny Fiaviana Fanindroany?
-
Inona no zavatra izay mety hanampy anao haka sary an-tsaina ny fiavian’ny Tompo ho toy ny fisehoan-javatra be voninahitra?
-
Iza no olona mba azonao iresahana momba ny Fiavian’i Jesoa Kristy Fanindroany?
Raha azo atao, dia mividiana sary kely maneho ny Fiavian’ny Mpamonjy Fanindroany ho an’ireo mpianatra. Azon’ireo mpianatra atao ny mametraka ilay sary amin’ny toerana iray mora hita mba hampahatsiahy azy ireo matetika ny fiverenan’ny Tompo amim-boninahitra.
Fanazavana sy fampahalalana avy amin’ny zava-miseho
Joseph Smith—Matio 1:36–37 . Ho tahaka ny ahoana indray ny fiavian’ny Mpamonjy?
Tamin’ny fotoana iray hafa, ny Loholona Neil L. Andersen dia nizara ny eritreriny momba ny fotoana izay hiverenan’i Jesoa Kristy eto an-tany amim-boninahitra:
Tsy misy zavatra manosika ahy hiresaka an’i Kristy mihoatra noho ny fakana sary an-tsaina ny fiverenany. Na dia tsy fantatsika aza hoe rahoviana Izy no ho tonga, dia ho mahavariana tokoa ny zavatra hitranga amin’ny fiverenany! Ho avy eo amin’ny rahon’ny lanitra amin’ny halehibeny sy ny voninahitra Izy miaraka amin’ny anjeliny masina rehetra. Tsy anjely vitsy fotsiny fa ny anjeliny masina rehetra . Tsy ireo kerobima mena takolaka nataon’i Raphael sary hosodoko hita amin’ireny karatra firarian-tsoa amin’ny fetin’ny mpifankatia ireny no resahina eto. Ireo no anjelin’ny taonjato maro, ny anjely nalefa hanakombona ny vavan’ny liona [jereo ny Daniela 6:22 ], hamoha ny varavaran’ny tranomaizina [jereo ny Asan’ny Apostoly 5:19 ], hanambara ny fahaterahany izay efa nandrasana hatry ny ela [jereo ny Lioka 2:2–14 ], hampahery Azy tao Getsemane [jereo ny Lioka 22:42–43 ], hanome toky ireo mpianatra tamin’ny Fiakarany tany an-danitra [jereo ny Asan’ny Apostoly 1:9–11 ], ary hanokatra ilay Famerenana amin’ny laoniny tamim-boninahitra ny filazantsara.
Azonao sary an-tsaina ve ny hoe hakarina hitsena Azy, na eto amin’ity lafiny ity na any amin’ny lafiny ilan’ny voaly? [jereo ny 1 Tesaloniana 4:16–17 ; Fotopampianarana sy Fanekempihavanana 88:96–98 ]. Izany no fampanantenany ho an’ny olo-marina. Izany traikefa mahatalanjona izany dia hanamarika ny fanahintsika mandrakizay.
(Neil L. Andersen, “Miresaka an’i Kristy isika,” Liahona, nôv. 2020, 91)
Ahoana raha manahy momba ireo famantarana ny Fiavian’ny Mpamonjy Fanindroany aho?
Ny horonan-tsary “Be Not Troubled” (5:10) dia manampy antsika hahatakatra fa tsy tokony hatahotra ireo famantarana ny andro farany isika. Hita ao amin’ny ChurchofJesusChrist.org ity horonan-tsary ity.
//media.ldscdn.org/webvtt/scripture-and-lesson-support/doctrine-and-covenants-visual-resource/2010-07-038-be-not-troubled-en.vtt
Sahanasa fianarana fanampiny
Manomana izao tontolo izao ho amin’ny fiverenan’ny Mpamonjy
Ny zatovolahy sasany ao amin’ny Fisoronana Aharôna dia azo angatahina ho tonga ao an-dakilasy vonona ny hilaza na hanazava ny ampahany amin’ny fanevan’ny kôlejin’ny Fisoronana Aharôna momba ny fanomanana izao tontolo izao amin’ny fiverenan’ny Mpamonjy. Ny zatovovavy ihany koa dia azo asaina mba hizara ny zavatra izay ataony mba ho fanomanana an’izao tontolo izao amin’ny Fiavian’i Jesoa Kristy Fanindroany.
Ireo fanoharana momba ny Fiavian’i Jesoa Kristy Fanindroany
Ampio ireo mpianatra mba hianatra momba ny fanirian’ny Tompo amin’ny tokony hiomanantsika amin’ny Fiaviany Fanindroany amin’ny alalan’ny fandalinana ireo fanoharana fohy izay nampianariny ao amin’ny Joseph Smith—Matio . Ireto andinin-tsoratra masina manaraka ireto dia azo aseho mba hahafahan’ny iray kilasy hisafidy na koa zaraina mitovy amin’ireo mpianatra. Raha omena ireo andinin-tsoratra masina ireo, dia fantaro ny halavany na ny hasarotry ny fanoharana tsirairay. Rehefa avy namaky ny mpianatra, dia azo asaina izy ireo mba hanazava ilay fanoharana amina namana na amina vondrona kely iray. Hevero ny hampiasa ny fanovozan-kevitra sy fanazavana voalohany mba hahafahana maneho ny asa izay atao amin’ny iray kilasy.
|
Tsy hitranga an-tsokosoko ny Fiavian’i Jesoa Kristy Fanindroany. Toy ny hazavan’ny masoandro manerana ny tany manontolo, ka ny olona rehetra dia hahafantatra avokoa. | |
Rehefa vita ny fizarana, dia mety hanampy ireo mpianatra ny famintinana ny hafatry ny Tompo izay voarakitra ao anatin’ireo fanoharana ireo amin’ny alalan’ny famaliana fanontaniana toy izao manaraka izao: Miainga avy amin’ny zavatra izay nianaranao tamin’ireo fanoharana ireo dia inona ny hafatra izay navelan’ny Tompo taminao momba ny Fiaviany Fanindroany?