The resurrected Jesus Christ (wearing white robes with a magenta sash) standing above a large gathering of clouds. Christ has His arms partially extended. The wounds in the hands of Christ are visible. Numerous angels (each blowing a trumpet) are gathered on both sides of Christ. A desert landscape is visible below the clouds. The painting depicts the Second coming of Christ. (Acts 1:11)
ʻI ha fepōtalanoaʻaki fakataautaha ʻi he Moʻunga ʻo e ʻŌlivé, naʻe tali ai ʻe Sīsū Kalaisi ʻa e ngaahi fehuʻi ʻEne kau ākongá fekauʻaki mo ʻEne Hāʻele ʻAnga Ua Maí. ʻE lava ke tokoni atu ʻa e lēsoni ko ʻení ke mahino kiate koe ʻa e meʻa naʻe akoʻi ʻe he Fakamoʻuí fekauʻaki mo e ngaahi fakaʻilonga ʻo ʻEne hāʻele maí pea hanganaki atu ki he ʻaho te Ne toe hāʻele mai ai ki he māmaní.
Tokoniʻi e kau akó ke nau maʻu ha ngaahi aʻusia mahuʻingamālie. Manatuʻi ʻoku ʻikai ko hoʻo taumuʻa ko e faiakó ke akoʻi ha lēsoni pe aleaʻi e kakano kotoa ʻo e lēsoní. Ka, ke tokoniʻi ʻa e kau akó ke nau ako ʻa e folofolá ʻi ha founga te ne tokoniʻi kinautolu ke nau hoko ʻo ʻiloʻi mo muimui ki he Fakamoʻuí.
Teuteu ʻa e tokotaha akó: Fakaafeʻi e kau akó ke nau lau ʻa e Siosefa Sāmita—Mātiu 1:22–55 pea fakakaukauloto ki heʻenau ngaahi fakakaukaú mo e ongoʻi fekauʻaki mo e Hāʻele ʻAnga Ua Mai ʻa e Fakamoʻuí.
Ngaahi ʻEkitivitī Ako ʻOku Ala Fakahokó
Fakakaukauloto ki he hāʻele mai ʻa Sīsū Kalaisí
Kapau naʻe kole ki he kau akó ke nau lau ʻa e Siosefa Sāmita—Mātiu 1:22–55 pea fakakaukauloto ki he Hāʻele ʻAnga Ua Mai ʻa Sīsū Kalaisí kimuʻa he kalasí, fakakaukau ke tuku ke nau vahevahe ʻenau ngaahi fakakaukaú mo e ongó he taimí ni. Fakaʻaliʻali ʻa e fakatātā ʻi ʻolungá, pea fai ha ngaahi fehuʻi ʻe lava ʻo tokoni ki he kau akó ke nau lea ʻaki ʻenau ngaahi fakakaukaú mo e ongó fekauʻaki mo e kaveingá. Fakafanongo ki he meʻa ne vahevahe ʻe he kau akó, pea fakakaukau ki he naunau ko ʻení ke fakatupulaki ʻenau aʻusiá.
Fakakaukau ki he meʻa ʻokú ke ʻilo fekauʻaki mo e Hāʻele ʻAnga Ua Mai ʻa Sīsū Kalaisí pea mo e ngaahi fakaʻilonga ʻe hoko mai kimuʻa aí. Fakakaukauloto pe ʻe fēfē nai ia.
Ko e hā ʻa e meʻa ʻokú ke fakakaukauloto ki ai fekauʻaki mo e Hāʻele ʻAnga Ua Mai ʻa Sīsū Kalaisí?
Ko e hā ha ngaahi ongo ʻokú ke maʻu ʻi hoʻo fakakaukau ki he hāʻele mai ʻa e Fakamoʻuí?
Fakafanongo fakalelei ki he meʻa ʻoku lea ʻaki ʻe he kau akó. Kapau ʻoku ngali manavasiʻi pe ilifia ʻa e kau akó fekauʻaki mo e Hāʻele ʻAnga Ua Mai ʻa Sīsū Kalaisí, kumi ha ngaahi faingamālie ʻi he kotoa ʻo e lēsoní ke tokoni ke nau ongoʻi nonga. Tokoni ke mahino kiate kinautolu ʻa e ngaahi fakaʻilonga ʻo e hāʻele mai ʻa e Fakamoʻuí pea hanganaki atu ki Heʻene toe hāʻele maí.
ʻI hoʻo ako he ʻaho ní, fakafanongo ki he ngaahi ueʻi mei he Laumālie Māʻoniʻoní ke tokoni atu ke ke ʻiloʻi ʻa e meʻa te ke lava ʻo fai ke ʻamanaki atu ai ki he ʻaho ʻe toe hāʻele mai ai ʻa Sīsū Kalaisí.
Ko e ngaahi fakaʻilonga kimuʻa ʻi he Hāʻele ʻAnga Ua Mai ʻa Sīsū Kalaisí
ʻI he fehuʻi ʻe he kau ākongá ki he Fakamoʻuí, “Ko e hā ʻa e fakaʻilonga ʻo hoʻo hāʻele maí?” ( Siosefa Sāmita—Mātiu 1:4), naʻá Ne akoʻi kinautolu fekauʻaki mo e ngaahi meʻa ʻe hoko ʻo aʻu ki Heʻene Hāʻele ʻAnga Ua Maí. Neongo ʻoku ʻikai ha taha tukukehe pē ʻa e Tamai Hēvaní ʻokú Ne ʻafioʻi ʻa e ʻaho pe houa pau ʻe hoko ai ʻení, ka naʻe fakamatalaʻi ʻe Sīsū ʻa e mahuʻinga ʻo e tokanga ki he ngaahi fakaʻilonga kehekehe naʻá Ne ʻoangé (vakai, Siosefa Sāmita—Mātiu 1:40,46).
Ko e feituʻu ʻe taha ʻi he folofolá ʻoku fakamatalaʻi ai e ngaahi fakaʻilonga ʻo e hāʻele mai ʻa e ʻEikí Siosefa Sāmita—Mātiu . Ko e liliu ʻeni ʻe Siosefa Sāmitá, pe ko hono toe vakaiʻi ʻo e Mātiu24, ʻoku maʻu ʻi he Mataʻitofe Mahuʻingá.
Ko e hā ha ngaahi fakaʻilonga ʻokú ke ʻiloʻi ʻe hoko kimuʻa ʻi he Hāʻele ʻAnga Ua Mai ʻa Sīsū Kalaisí?
Fakakaukau ke fakaafeʻi e kau akó ke nau hiki ha lisi ʻo e ngaahi fakaʻilongá ʻi he palakipoé. Hili hono vahevahe ʻe he kau akó ʻa e meʻa ʻoku nau ʻiló, fakakaukau ke fakaafeʻi kinautolu ke nau vakaiʻi ʻi he folofolá ʻa e ngaahi fakaʻilonga ko ʻení pea kumi mo e niʻihi kehé.
Lau ʻa e Siosefa Sāmita—Mātiu 1:22–23, 28–36,48 ke maʻu ha niʻihi ʻo e ngaahi fakaʻilonga naʻe fakahā ʻe he ʻEikí mo ha ʻuhinga naʻá Ne fakahā ai kinautolú. Te ke lava foki ʻo vakai ki he “ Fakaʻilonga ʻo e Ngaahi Kuongá, Ngaahi ” ʻi he Ko e Fakahinohino ki he Ngaahi Folofolá, ʻoku lava ke maʻu ia ʻi he scriptures.ChurchofJesusChrist.org.
Ko e hā ʻoku makehe kiate koe fekauʻaki mo e ngaahi fakaʻilonga naʻe ʻomi ʻe he Fakamoʻuí ki Heʻene Hāʻele ʻAnga Ua Maí?
Ko e hā te tau lava ʻo ako fekauʻaki mo Sīsū Kalaisi ʻi heʻetau ʻilo naʻá Ne fakahā ʻa e ngaahi fakaʻilonga ko ʻení kimuʻa ʻi Heʻene Hāʻele ʻAnga Ua Maí?
Ko e hā hoʻo ongoʻi ʻi hoʻo fakakaukauloto atu ki hono “malanga ʻaki [ʻa e ongoongoleleí] ʻi he māmaní kotoa pē” ( Siosefa Sāmita—Mātiu 1:31) pea mo e Fakamoʻuí “ʻoku hāʻele mai ʻi he ngaahi ʻao ʻo e langí, ʻi he mālohi mo e nāunau lahi”? ( Siosefa Sāmita—Mātiu 1:36). Ko e hā hono ʻuhingá?
Fakakaukau ke fakaafeʻi e kau akó ke nau toe vakaiʻi e ngaahi veesi ne nau ako ʻi he lēsoni ko ʻení pea fakaʻilongaʻi e ngaahi fakamatala fakaikiiki mahuʻinga fekauʻaki mo e Fakamoʻuí mo Hono finangalo maʻanautolú. Hili ʻenau vahevahe ʻa e meʻa ne nau fakaʻilongaʻí, ʻe ala ʻaonga ʻa e ʻekitivitī ko ʻení. Ongoʻi tauʻatāina ke tānaki atu mo ha toe ngaahi kupuʻi lea naʻa nau ʻilo fekauʻaki mo e Fakamoʻuí mo Hono finangalo maʻanautolú.
Fili ha taha ʻo e ngaahi kupuʻi lea ko ʻení pea fakakaukau ke fakaʻilongaʻi ia ʻi hoʻo folofolá. ʻI hoʻo fakaʻilongaʻi ʻa e ngaahi foʻi leá, fakakaukau ki he pōpoaki ʻa Sīsū Kalaisí. Kumi e meʻa ʻe lava ke akoʻi atu ʻe he folofola ʻa e Fakamoʻuí fekauʻaki mo Iá mo Hono finangalo maʻaú.“Vakai ke ʻoua naʻa mou puputuʻu” ( Siosefa Sāmita—Mātiu 1:23).“Ka ko ia ia ʻe ʻikai ke vaivaí, ʻe fakamoʻui ia” ( Siosefa Sāmita—Mātiu 1:30). “ʻE ʻikai mole atu ʻa ʻeku ngaahi leá, ka ʻe fakahoko kotoa pē” ( Siosefa Sāmita—Mātiu 1:35).“Ke mou tali teu foki mo kimoutolu” ( Siosefa Sāmita—Mātiu 1:48).
ʻOkú ke pehē nai ko e hā e tōʻonga fakakaukau ʻoku finangalo e Fakamoʻuí ke ke maʻu fekauʻaki mo ʻEne hāʻele maí?
Ko e fē ʻi he ngaahi folofola ʻa Sīsū Kalaisí ʻokú ne tokoniʻi koe ke ke ʻofa mo falala kiate Iá?
ʻI he uiké ni kotoa, te ke ako lahi ange ai fekauʻaki mo e Hāʻele ʻAnga Ua Mai ʻa Sīsū Kalaisí mo e founga ʻe lava ke ke mateuteu ai ki aí.
ʻAmanaki atu ki he toe hāʻele mai ʻa e ʻEikí
ʻE lava ke kole ki he kau akó ke nau sio ki ha fakatātā pe kuikui honau matá pea fakakaukauloto ki he ngaahi meʻa ʻe hoko ʻi he Hāʻele ʻAnga Ua Mai ʻa Sīsū Kalaisí lolotonga ʻenau fanongo ki he fakamatala ko ʻeni ʻa ʻEletā Niila L. ʻEnitasoni
ʻI hoʻo lau e fakamatala ko ʻeni meia ʻEletā Niila L. ʻEnitaseni ʻo e Kōlomu ʻo e Kau ʻAposetolo ʻe Toko Hongofulu Mā Uá, fakakaukauloto ki he meʻa ʻokú ne lea ʻakí mo fakakaukau ki hoʻo tōʻonga fakakaukau ki he Hāʻele ʻAnga Ua Maí.
ʻĪmisi
Official portrait of Elder Neil L. Andersen of the Quorum of the Twelve Apostles, 2010, August.
ʻOku hanga ʻe heʻeku fakakaukau ki Heʻene hāʻele maí ʻo ueʻi hoku laumālié. ʻE fakaofo moʻoni ia! ʻE laka hake ʻene makehé mo e ngeiá, hono lahí mo e fakaʻofoʻofá, ʻi ha toe meʻa kuo aʻusia pe mamata ai e mata fakamatelié.
ʻI he ʻaho ko iá … Te Ne hā mai “ʻi he ngaahi ʻao ʻo e langí, [kuo] kofu ʻaki ʻa e mālohi mo e nāunau lahi; fakataha mo e kau ʻāngelo māʻoniʻoní kotoa pē” [ Tokāteline mo e Ngaahi Fuakava 45:44 ]. … ʻE liliu e laʻaá mo e māhiná, pea “ʻe laku hifo ʻa e ngaahi fetuʻú mei honau ngaahi tuʻungá” [ Tokāteline mo e Ngaahi Fuakava 133:49 ]. …
… Te tau tūʻulutui ʻi he loto-ʻapasia, “pea ʻe fakaongo atu ʻe he ʻEikí ʻa hono leʻó, pea ʻe fanongo ki ai ʻa e ngaahi ngataʻanga kotoa pē ʻo e māmaní” [ Tokāteline mo e Ngaahi Fuakava 45:49 ]. …
ʻI he ʻaho ko iá, ʻe fakalongolongo e kau fakaangá, “he ʻe ongoʻi ia ʻe he telinga kotoa pē …, pea ʻe peluki ʻa e tui kotoa pē, pea ʻe vete ʻe he ʻelelo kotoa pē” [ Tokāteline mo e Ngaahi Fuakava 88:104 ]” ko Sīsū ʻa e Kalaisí, ko e ʻAlo ʻo e ʻOtuá, ko e Fakamoʻui mo e Huhuʻi ʻo e māmaní.
… ʻOfa ke tau teuteu ki Heʻene hāʻele maí ʻaki hono toutou fakaangaanga e ngaahi meʻa nāunauʻia ko ʻení ʻi hotau ʻatamaí pea mo kinautolu ʻoku tau ʻofa aí.
(Neil L. Andersen, “Ke Hoko Mai Ho Puleʻangá,” Ensign pe Liahona, Mē 2015, 122)
Ko e hā e ngaahi fakakaukau pe ongo naʻá ke maʻu ʻi hoʻo fakakaukauloto ki he lea ʻa ʻEletā ʻEnitasoní?
Naʻe tākiekina fēfē ʻe he lēsoni ko ʻení ʻa e ngaahi fakakaukau pe ongo naʻá ke maʻu ʻi he kamataʻanga ʻo e kalasí fekauʻaki mo e Hāʻele ʻAnga Ua Maí?
Ko e hā te ne lava ʻo tokoniʻi koe ke ke fakakaukauloto ki he hāʻele mai ʻa e ʻEikí ko ha meʻa nāunauʻiá?
Ko hai ha taha te ke lava ʻo talanoa ki ai fekauʻaki mo e Hāʻele ʻAnga Ua Mai ʻa Sīsū Kalaisí?
Kapau ʻe lava, fakakaukau ke fakatau mai ha fanga kiʻi fakatātā iiki ʻo e Hāʻele ʻAnga Ua Mai ʻa e Fakamoʻuí maʻá e kau akó. ʻE lava ke fakaafeʻi ʻa e kau akó ke fokotuʻu ʻa e fakatātaá ʻi ha feituʻu te ne fakamanatu maʻu pē kiate kinautolu ʻa e toe hāʻele nāunauʻia mai ʻa e ʻEikí.
ʻI ha meʻa ʻe taha, naʻe vahevahe ai ʻe ʻEletā Niila L. ʻEnitasoni ʻene ngaahi fakakaukau fekauʻaki mo e taimi ʻe toe hāʻele mai ai ʻa Sīsū Kalaisi ki he māmaní ʻi he nāunauʻiá:
ʻĪmisi
Official portrait of Elder Neil L. Andersen of the Quorum of the Twelve Apostles, 2010, August.
ʻOku ʻikai ha meʻa te ne fakaʻaiʻai ʻeku loto-holi ke lea ʻo kau kia Kalaisí ka ko ʻeku fakakaukauloto ki Heʻene toe hāʻele maí. Neongo ʻoku ʻikai ke tau ʻiloʻi ʻa e taimi te Ne hāʻele mai aí, ka ʻe fakaholomamata ʻa e ngaahi meʻa ʻe hoko ʻi Heʻene toe hāʻele maí. Te Ne hāʻele mai ʻi he ngaahi ʻao ʻo e langí ʻi he fakaʻeiʻeiki mo e nāunauʻia fakataha mo ʻEne kau ʻāngelo māʻoniʻoní. ʻO ʻikai ko ha kau ʻāngelo pē ʻe niʻihi ka ko e kotoa ʻEne kau ʻāngelo māʻoniʻoní. ʻOku ʻikai ko e selupimi kouʻahe-pahapaha ʻeni naʻe tā fakatātaaʻi ʻe Lafaele ʻi he ʻū kaati Valenitainé. Ko e kau ʻāngelo ʻeni ʻo e ngaahi senitulí, ko e kau ʻāngelo naʻe fekauʻi ke nau tāpuni ʻa e ngutu ʻo e fanga laioné [vakai, Taniela 6:22 ], ke fakaava ʻa e ngaahi matapā ʻo e fale fakapōpulá [vakai, Ngāue 5:19 ], ke fanongonongo ʻa Hono ʻaloʻí, ʻa ia kuo fuoloa e tatali ki aí [vakai, Luke 2:2–14 ], ke fakafiemālieʻi Ia ʻi Ketisemaní [vakai, Luke 22:42–43 ], ke fakapapauʻi ki Heʻene kau ākongá ʻi Heʻene Hāʻele Haké [vakai, Ngāue 1:9–11 ], pea mo fakaava ʻa hono Fakafoki nāunauʻia mai ʻo e ongoongoleleí.
Te ke lava nai ʻo fakakaukauloto ki haʻo feʻiloaki mo Ia ʻi he moʻuí ni pe ko e tafaʻaki ʻe taha ʻo e veilí? [vakai, 1Tesalonaika 4:16–17 ; Tokāteline mo e Ngaahi Fuakava 88:96–98 ]. Ko ʻEne talaʻofa ia ki he kakai angatonú. ʻE tākiekina ʻe he aʻusia fakaofo ko ʻení ʻa hotau laumālié ʻo taʻengata.
(Neil L. Andersen, “ʻOku Mau Lea ʻia Kalaisi,” Ensign pe Liahona, Nōvema 2020, 91)
Fēfē nai kapau ʻoku ou hohaʻa ki he ngaahi fakaʻilonga ʻo e Hāʻele ʻAnga Ua Mai ʻa e Fakamoʻuí?
Ko hono teuteuʻi ʻo e māmaní ki he toe hāʻele mai ʻa e Fakamoʻuí
ʻE lava ke kole ki ha kau talavou ʻe niʻihi ʻo e Lakanga Taulaʻeiki Faka-ʻĒloné ke nau omi mateuteu ki he kalasí ke lau maʻuloto pe fakamatalaʻi ha konga ʻo e kaveinga ʻo e kōlomu ʻo e Lakanga Taulaʻeiki Faka-ʻĒloné fekauʻaki mo hono teuteuʻi ʻo e māmaní ki he toe hāʻele mai ʻa e Fakamoʻuí. ʻE lava foki ke kole ki he kau finemuí ke nau vahevahe ʻa e meʻa ʻoku nau fai ke teuteuʻi ai ʻa e māmaní ki he Hāʻele ʻAnga Ua Mai ʻa Sīsū Kalaisí.
Ko e talanoa fakatātā ʻo kau ki he Hāʻele ʻAnga Ua Mai ʻa Sīsū Kalaisí
Tokoni ki he kau akó ke nau ako fekauʻaki mo e finangalo ʻo e ʻEikí ke tau teuteu ki Heʻene Hāʻele ʻAnga Ua Maí ʻaki hono ako ʻa e ngaahi talanoa fakatātā nounou naʻá Ne akoʻi ʻi he Siosefa Sāmita—Mātiu . ʻE lava ke fakaʻaliʻali ʻa e ngaahi fakamoʻoni fakafolofola ko ʻení ki he kalasí ke nau fili mei ai pe ʻe lava ke vahevahe tatau ʻi he kau akó. Kapau ʻoku vahe ʻa e ngaahi fakamoʻoni fakafolofolá, tokanga ki he lōloa pe faingataʻa ʻo e talanoa fakatātā takitaha. Hili hono lau ʻe he kau akó, ʻe lava ke kole ange ke nau fakamatalaʻi ʻenau ngaahi talanoa fakatātaá ki hanau hoa pe ʻi ha fanga kiʻi kulupu iiki. Fakakaukau ke fakaʻaongaʻi ʻa e ʻuluaki fakamoʻoni fakafolofolá mo e fakamatalá ko ha founga ke fakatātaaʻi ʻaki ʻa e ngāue kuo vahe ki he kalasí.
He ʻikai hoko fakapulipuli ʻa e Hāʻele ʻAnga Ua Mai ʻa Sīsū Kalaisí. ʻE ʻilo ia ʻe he taha kotoa, ʻo hangē ko e maama ʻo e laʻaá ʻokú ne kātoi ʻa e māmaní kotoa.
Hili e vahevahe ʻa e kau akó, ʻe ala tokoni ki he kau akó ke nau fakamatalaʻi fakanounou ʻa e pōpoaki ʻa e ʻEikí ʻoku ʻi he ngaahi talanoa fakatātā ko ʻení ʻaki hono tali ha fehuʻi hangē ko ʻení: Makatuʻunga ʻi he meʻa naʻá ke ako mei he ngaahi talanoa fakatātā ko ʻení, ko e hā ʻokú ke ongoʻi ko e pōpoaki ʻa e ʻEikí kiate koe fekauʻaki mo ʻEne Hāʻele ʻAnga Ua Maí?
