Siosefa Sāmita—Mātiu 1; Mātiu 25; Maʻake 12–13; Luke 21

Vakai Fakalūkufuá

ʻI ha fepōtalanoaʻaki fakataautaha ʻi he Moʻunga ʻŌlivé, naʻe tali ai ʻe Sīsū Kalaisi ʻa e ngaahi fehuʻi ʻEne kau ākongá fekauʻaki mo ʻEne Hāʻele ʻAnga Ua Maí. Naʻá Ne fekauʻi kinautolu ke “ʻoua naʻa [nau] puputuʻu” (Siosefa Sāmita—Mātiu 1:23). Naʻá Ne akoʻi foki ʻa e founga ke teuteu ai ki Heʻene toe hāʻele maí, ʻi hono vahevahe ʻa e ngaahi talanoa fakatātā ʻo e kau tāupoʻou ʻe toko hongofulú, ngaahi talēnití, mo e fanga sipí mo e fanga kosí. ʻOku kau ʻi he uike ní ha fakamanatu fakataukei fakatokāteline ke tokoni ke mahino kiate koe mo fakamatalaʻi ʻa e ngaahi moʻoni ʻoku maʻu ʻi he ngaahi potufolofola fakataukei fakatokāteliné.

Teuteu ke Akoʻi

ʻOku ʻoatu ʻe he fakamatala ko ʻení ki he kau faiakó ha ngaahi fakakaukau ki he meʻa ʻe ala fie maʻu ke teuteuʻi kimuʻa ki he lēsoni takitaha.

Siosefa Sāmita—Mātiu

Taumuʻa ʻo e lēsoní: ʻE lava ke tokoni ʻa e lēsoni ko ʻení ke mahino ki he kau akó ʻa e meʻa naʻe akoʻi ʻe he Fakamoʻuí fekauʻaki mo e ngaahi fakaʻilonga ʻo ʻEne hāʻele maí pea hanganaki atu ki he ʻaho te Ne toe hāʻele mai ai ki he māmaní.

Teuteu ʻa e tokotaha akó: Fakaafeʻi e kau akó ke nau lau ʻa e Siosefa Sāmita —Mātiu 1:22–55 pea fakakaukauloto ki heʻenau ngaahi fakakaukau mo e ongo fekauʻaki mo e Hāʻele ʻAnga Ua Mai ʻa e Fakamoʻuí.

Ngaahi Naunaú: Ko ha fakatātā siʻisiʻi ʻo e Hāʻele ʻAnga Ua Mai ʻa Sīsū Kalaisí ke foaki ki he tokotaha ako takitaha, kapau ʻe lava

Fokotuʻu ki hono akoʻi ʻi he konifelenisi vitioó: Fakakaukau ke tuku ha miniti ʻe taha ke tohi ai ʻe he kau akó ʻi ha laʻipepa ʻa e lahi taha ʻo e ngaahi foʻi lea pe kupuʻi lea te nau lava ʻo fakakaukau ki aí te ne tali ʻa e ongo ʻuluaki fehuʻi ʻi he lēsoní. Fakaafeʻi hanau niʻihi ke vahevahe ha taha ʻo ʻenau ngaahi foʻi leá pe kupuʻi leá pea fakamatalaʻi e ʻuhinga ne nau hiki ai iá.

Sosefa Sāmita—Mātiu 1:21–37; Luke 21:25–36

Taumuʻa ʻo e lēsoní: ʻE lava ke tokoni ʻa e lēsoni ko ʻení ki he kau akó ke nau fakaʻehiʻehi mei he kākaá mo ikunaʻi ʻa e manavahē fekauʻaki mo e ngaahi meʻa ʻe hoko ʻi he ngaahi ʻaho fakaʻosí.

Teuteu ʻa e tokotaha akó: Fakaafeʻi e kau akó ke vakaiʻi e founga kuo tokoniʻi ai kinautolu ʻe heʻenau ngaahi taumuʻa ako folofolá. ʻE lava foki ke fakafuofuaʻi ʻe he kau akó kapau kuo nau faingataʻaʻia ke tauhi ʻenau ngaahi taumuʻá mo e founga te nau loto ke fakalakalaka aí.

Fokotuʻu ki hono akoʻi ʻi he konifelenisi vitioó: Fakakaukau ke fakaʻaliʻali ʻa e ngaahi fakamoʻoni fakafolofola mei he Luke 21 mo e ngaahi fakamatala fekauʻaki mo iá ʻi ha slide. Lau leʻolahi ha potufolofola, fehuʻi ange pe ko e fakamatala fē ʻokú ne fakamatalaʻi fakanounou lelei tahá, pea fakaafeʻi e kau akó ke nau tali ʻi he polokalama fepōtalanoaʻakí ʻo fakaʻaongaʻi ʻa e a, e, pe f.

Mātiu 25:1–13

Taumuʻa ʻo e lēsoní: ʻE lava ke tokoni e lēsoni ko ʻení ke mahino mo ongoʻi ʻe he kau akó e mahuʻinga ʻo hono teuteuʻi kinautolu ke feʻiloaki mo e ʻEikí ʻi Heʻene toe hāʻele maí.

Teuteu ʻa e tokotaha akó: Fakaafeʻi e kau akó ke nau fakafuofuaʻi kinautolu ʻi ha meʻafua mei he 1 ki he 10 (ʻoku ʻuhinga ʻa e 1 ʻokú ke ʻikai ki ai; 10 ʻoku ʻuhinga ia ʻokú ke ʻio ki ai) ʻi he lea ko ʻení: “ʻOku ou ongoʻi mateuteu ki he Hāʻele ʻAnga Ua Mai ʻa Sīsū Kalaisí.” Fakaafeʻi kinautolu ke fakalaulauloto ki he ʻuhinga naʻa nau fakafuofuaʻi ai kinautolu ʻo hangē ko ia ne nau faí.

Vitiō: ” (1:40); “ʻA kinautolu ʻoku potó” (8:43; mamataʻi mei he taimi 0:00 to 5:41)
Laʻipepa Tufá: Ko e laʻipepa tufa ʻo e ngaahi māmá

Fokotuʻu ki hono akoʻi ʻi he konifelenisi vitioó: Hili hono hiki ʻe he kau akó ʻenau talanoa fakatātā ʻo e kau tāupoʻou ʻe toko hongofulú ʻi onopōní, fakakaukau ke kole ki ha tokotaha ako ʻe taha ke ne fili pe ko e talanoa fakatātā ʻa hai ʻoku nau fie fanongo ki aí. Pe, kapau te nau loto ki ai, te nau lava pē ʻo tuhu ki ʻolunga, lalo, toʻohema, pe toʻomataʻu, pea ʻe lava ke kole ki he tokotaha ʻoku ʻasi ʻi he tafaʻaki ko iá ʻi he komipiuta ʻa e faiakó ke ne vahevahe. (Fakatokangaʻi ange: ʻOku ʻikai faʻa fakaʻaliʻali ʻa e kau akó ʻi he fakahokohoko tatau ʻi he ngaahi komipiuta kotoa pē.) Kapau ʻe fie maʻu, ʻe lava pē ke toe fakahoko ʻa e ʻekitivitī ko ʻení.

Mātiu 25:14–46

Taumuʻa ʻo e lēsoní: ʻE lava ke tokoni ʻa e lēsoni ko ʻení ke ʻiloʻi ʻe he kau akó ʻa e ngaahi moʻoni mei he talanoa fakatātā ʻo e ngaahi talēnití mo e talanoa fakatātā ʻo e fanga sipí mo e fanga kosí. ʻE lava foki ke tokoni ia ki he kau akó ke nau teuteu ki he Hāʻele ʻAnga Ua Mai ʻa e Fakamoʻuí.

Teuteu ʻa e tokotaha akó: Fakaafeʻi e kau akó ke nau lau e talanoa fakatātā ʻo e ngaahi talēnití (vakai, Mātiu 25:14–30)) pe ko e talanoa fakatātā ʻo e fanga sipí mo e fanga kosí (vakai, Mātiu 25:31–46) pea teuteu ke vahevahe e ngaahi lēsoni ne nau ako mei heʻenau akó.

Laʻipepa Tufá: Ko e laʻipepa tufa fekauʻaki mo e talanoa fakatātā ʻo e ngaahi talēnití mo e talanoa fakatātā ʻo e fanga sipí mo e fanga kosí

Fokotuʻu ki hono akoʻi ʻi he konifelenisi vitioó: Fakakaukau ke vahevahe ʻa e kau akó ki ha ngaahi kulupu ʻo fakaʻaongaʻi ʻa e fanga kiʻi kulupu konifelenisi iiki angé ke ako ʻa e ongo talanoa fakatātaá. Hili iá pea mou toe fakataha fakakalasi ke aleaʻi kinautolu. Kapau ʻoku fakangofua ʻe he tekinolosiá, feinga ke ʻaʻahi ki he ngaahi kulupu kehekehe ke fakalotolahiʻi mo tataki kinautolu.

Toe Vakaiʻi ʻo e Fakataukei Fakatokāteline 9

Taumuʻa ʻo e lēsoní: ʻE lava ke tokoni ʻa e lēsoni ko ʻení ke maʻu ʻe he kau akó ha mahino lahi ange ki he ngaahi moʻoni ʻoku maʻu ʻi he ngaahi potufolofola fakataukei fakatokāteliné. ʻE lava foki ke tokoni ki he kau akó ke nau akoako hono fakamatalaʻi e ngaahi moʻoni ko ʻení ki he niʻihi kehé.

Fakatokangaʻi ange: ʻE ala fie maʻu ke akoʻi ha lēsoni fakataukei folofola ʻi he tokāteliné ʻo fetongi ʻaki ʻa e lēsoni ko ʻení. Vakai ki he taimi-tēpile ki he vave hono akoʻí ʻa ia ʻoku ʻomi ʻe he talēkita fakaʻēliá pe vahefonuá pe kouʻōtineitá ke fakapapauʻi ʻe akoʻi e lēsoni fakataukei fakatokāteline takitaha lolotonga e fakataha ʻa e seminelí.

Teuteu ʻa e tokotaha akó: Fakaafeʻi e kau akó ke fili ha potufolofola fakataukei fakatokāteline kuo nau toki ako kimuí ni pea fakamatalaʻi ia ki ha taha.

Naunau: Ko e ʻekitivitī fakatauhoa ʻo e fakataukei fakatokāteliné ke fakaʻaliʻali ʻi he palakipoé

Fokotuʻu ki hono akoʻi ʻi he konifelenisi vitioó: Kimuʻa pea kamata e kalasí, fakakaukau ke fakaafeʻi ha kau ako ʻe toko fā ke nau fakatātaaʻi e ngaahi fatongia ʻo e ngaahi kaungāmeʻá ʻi he ʻekitivitī fakamatalaʻí. Tuku ke nau taufetongi ʻi hono fehuʻi pe ko e hā e ʻuhinga ʻo e ngaahi potufolofola fakataukei fakatokāteliné pea fakaʻatā e kau ako ʻi he kalasí ke nau tali.